Matias 11
11
Yesus re 'a Yohanes tukanga baptis
(Luk. 7:18-35)
1Yesus 'o doto'o 'Ai me-mete'e nga nyagi moi re nga muḏiḏi pasala i'a, Unanga 'o tagi di'a 'O doto'o re 'O singadolo Habari Roanga toma limau-limau ma co-cori.
2Wakutu Yohanes tukanga baptis, unanga gena-ge 'o osama bui re 'o 'isene mangale 'O Kristus 'ai munara, unanga 'o 'utusu 'ai me-mete'e nga muḏuo i'a 'aḏi tagi sano ra Yesus so'o ne: 3“Mete'e Ma Jou'ongu Madutu 'ai jaji, Jou masiretene 'O Kristus, bolo ngomi mi totoma ngowa'a lelegu?”
4Yesus 'a sangoro, “Ni maḏibo re siajele ra Yohanes, mangale 'oru ga'a ngini ni 'isene re ni oḏi'i: 5Ngowa'a hafu 'aḏi oḏi'i, ngowa'a ḇolo 'aḏi tagi, ngowa'a si-siḏi 'eno'o 'aḏi la, ngowa'a popongolo 'aḏi 'isene, ngowa'a raḏi sengene, dadunu 'aḏi 'ahu moju, re Habari Roanga ra Ma Jou'ongu Madutu ino Ngoi ta singadolo toma ngowa-ngowa'a ma dinga'unu ua.#Yes. 35:5-6, 61:1 6Bara'utungu ngowa'a ga'a manga ngo-ngaku kama elala ua ra Ngoi!”
7Wakutu Yohanes tukanga baptis 'ai me-mete'e gena-ge 'aḏi tagi-tagi moju, Yesus mulaingi 'o kanau toma ngowa'a repe mangale Unanga. Unanga 'o kanau, “Ngini ni tagi toma daeraha baulaco di'a ni oḏi'i 'oru?! Sanga ua, ngini ni tagi oḏi'i matengo ga'a 'o sitaka-taka mangale 'Ai habari ma tero sa'olo rurubu ma so'a ngai moi ga'a karawiana ya wusu! 8Dadi ngini ni tagi di'a ni oḏi'i 'oru?! Ngowa'a matengo ga'a mapake rousu?! Sanga ua! Sababu ngowa'a ga'a mapake rousu 'aḏi tegoro toma kadato! 9Dadi ngini ni tagi di'a ni oḏi'i 'oru?! Nabi?! Tero mode'e. Sidogo ḏi'i, unanga gena-ge lebe la-lamo'o i'a reo nabi ma siḏa-siḏa i'a. 10Sababu toma Boku 'Ofi-'Ofi 'age rema bu-bula'a nena-ne 'i silefo mangale 'a Yohanes. Ma Jou'ongu Madutu 'o kanau so'o ne:
‘Nena-ne Ngoi 'ari so-soma'a.
Ngoi ḏuanga i'a to 'utusu unanga siḏa, kara Ngana,
la unanga ḏuanga i'a 'a sidodahe ngo'omo di'a Ngana.’#Mal. 3:1
11Ni ngaku mode-mode'e 'Ari demo-demo nena-ne: Toma dungia nena-ne matengo i'a mai ua ga'a sibuoro lebe la-lamo'o i'a rea Yohanes tukanga baptis. Mada'a mulaingi nange-ne, ngowa'a ma pake ua ga'a 'o osama nyo-nyoimi toma Soroga ma Pareta,#11:11 “Soroga ma Pareta” ma tero Ma Jou'ongu Madutu 'ai Pareta. unanga gena-ge 'o dadi ngowa'a lebe la-lamo'o i'a rea Yohanes. 12Toma wakutu 'a Yohanes mulaingi 'o siḏagi Ma Jou'ongu Madutu 'ai munara singadolo nange-ne, Ma Jou'ongu Madutu 'ai 'umata 'aḏi sanga dola'aku toma ngowa-ngowa'a ga'a 'aḏi makutale mau 'aḏi kuasa ya siḏagi manga de'e. 13Singadolo Yohanes gena-ge 'o sapolo, 'a Musa 'ai hukumu mo-moini re nabi manga do-doto'o, enanga 'i siajele mangale 'oru ga'a balasu 'i dadi.#Luk. 16:16 14Re na'o ngini mau ni ngaku, Yohanes unanga 'o ma tero 'a Elia, unanga 'ai ta-sapolo ri sinubuata pasala ḏua.#Mal. 4:5; Mat. 17:10-13; Mrk. 9:11-13 15Na'o reninga ngau'u ni 'isene la-la!
16Ngowa-ngowa'a toma 'orasa nange-ne, Ngoi ta site-tero reo 'oru?! Ananga ma tero sa'olo ngowa 'olo 'aḏi maḏegoro toma pasara, toropo moi-toropo moi 'aḏi ma'u sangoro i'a re ino ma'u ngali-ngali,
17‘Ngomi ḇisa serulingi ḏua
mada'a ngini ni roje ua,
ngomi mi nyanyi-nyanyi duka re balisa
mada'a ngini ni rerese ma gaḏi ua.’
18Ngoi 'ari maksudu so'o ne: Yohanes sapolo re unanga 'o ka'e 'anggur ua re 'o puasa ḏi'i. Mada'a ngowa'a 'u dawongo ua 'aḏi kanau, ‘Unanga 'o roh ma jira 'u dungosama!’ 19Ngoi, Manusia ma Ngowa'a Nau'u reto sapolo, To oromo re ka'e 'anggur. Nange-ne ḏi'i ngowa'a raḏi dawongo Ngoi ua 'aḏi kanau, ‘Oḏi'i Unanga gena-ge 'O da-danata re 'O 'etolo, re Ma'u ḏagilomu reo ngowa-ngowa'a golo-golo'o balastengi re ngowa-ngowa'a baraḏosa!’ Kalaha so'o gena, Ma Jou'ongu Madutu 'ai 'akala ma soro'unu 'i waiti banari ra Ma Jou'ongu Madutu 'ai ngowa-ngowa'a manga de'oso re ḏegoro ma rousu.”
Limau-limau ma manusia ga'a 'aḏi maḏibo toma ngo'omo boloto ua
(Luk. 10:13-15)
20Ḏua Yesus mulaingi 'o ḇangata ngowa'a Yahudi ga'a tegoro limau-limau ga'a Unanga ro 'a'a ga'a hera-heranga lebe repe. Sababu toma limau-limau gena-ge, ngowa'a 'aḏi maḏibo toma ngo'omo boloto ua. 21Unanga 'o kanau, “Bahala ra ngini ngowa'a toma limau Korasim re limau Betsaida. Ma Jou'ongu Madutu ḏuanga i'a 'o singe-ngeta'a hukumu ra ngini. Si'ade-'ade i'a Ngoi to 'a'a ga'a hera-heranga toma ngowa'a ma jira toma limau Tirus re Sidon ma tero sa'olo Ngoi ta si'a'a ḏua ra ngini ninga sigolona, tantu ḏua ananga da'a raḏi maḏibo toma ngo'omo boloto, re ananga 'aḏi mapake pakeanga si'a'a reo kaḏu re tamanga sae'e ya sidu-durono reo itomo ma korou'u.#11:21 Gena-ge nana'o mangale ananga 'aḏi matuduba tamanga ḏosa.#Yes. 23:1-18; Yeh. 26:1—28:26; Yl. 3:4-8; Am. 1:9-10; Za. 9:2-4 22Mada'a, Ngoi to siajele ra ngini: toma Kiamata ma Wangere, ngini ngowa'a Yahudi toma limau Korasim re Betsaida ḏuanga i'a ni sanga hukumu lebe tubuso reo ngowa'a ma jira toma limau Tirus re Sidon!
23Re ngini ngowa'a Yahudi toma limau Kapernaum! Awa ngini ni ta'ajiri mangale Ma Jou'ongu Madutu ḏuanga i'a 'o dawongo ngini toma soroga! So'o gena ua! Mada'a Unanga 'o siupa'a ngini toma naraka! Si'ade-'ade i'a Ngoi to 'a'a ga'a hera-heranga toma ngowa'a ma jira toma limau Sodom 'ua re 'au wali ma tero sa'olo Ngoi ta si'a'a ḏua ra ngini ninga sigolona, tantu ḏua limau Sodom gena-ge rema enanga singadolo nange-ne.#Do. 19:24-28; Yes. 14:13-15 24Mada'a, Ngoi to siajele ra ngini nena-ne: toma Kiamata ma Wangere, ngini ngowa'a Yahudi toma limau Kapernaum ḏuanga i'a ni sanga hukumu lebe tubuso reo ngowa'a ma jira toma limau Sodom!”#Mat. 10:15; Luk. 10:12
Yesus 'o manyiata
(Luk. 10:21-22)
25Toma 'orasa gena-ge Yesus 'o kanau, “Baba, Ma Jou'ongu Madutu 'o kuasa toma diwanga re dungia, Ngoi to puji re silamo'o 'Ani lomanga sababu mo-moini gena-ge Baba na gogono toma ngowa'a pahe re ngowa'a 'akala soro'unu, mada'a Baba na sijumu toma ngowa-ngowa'a ga'a manga de'oso re ḏegoro ma tero sa'olo ngowa 'olo. 26Ya, Baba sababu enanga gena-ge 'i sisanangi 'Ani 'akala re sinyingara.”
27Ḏua Yesus 'o kanau, “ 'Ori i'a mo-moini, 'Ari Ḇaḇa ra sidoa'a ra Ngoi. Matengo i'a mai ua 'o nana'o Ngoi ḏuga-ḏuga pa'i 'Ari Ḇaḇa ḇato. Matengo i'a mai ua 'o nana'o 'ari Ḇaḇa ḏuga-ḏuga pa'i Ngoi, 'Ai Ngowa'a Nau'u, re ra guna ḇato ga'a Ngoi to sinana'o 'Ari Ḇaḇa.#Yoh. 3:35, 1:18, 10:15
28Ino ni sapolo ra Ngoi, ngini ga'a ni sibasono tala ni momoro re ninga gina lai tubuso; Ngoi masiretene ḏuanga i'a tini sikare ngini. 29Pa'i ni mete'e ḇato 'Ari parenta re ni madoto'o ra Ngoi ḇato, sababu Ngoi 'ari 'akala re sinyingara 'i mereoso re maholo, re ngini ḏuanga i'a ni sanga ngomasa mamete'e ra Ngoi.#Yer. 6:16 30Re parenta 'i tubuso ua, re gina ga'a To pula'a enanga 'i kare ḇato.”
Селектирано:
Matias 11: SNT
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
2015 © Indonesian Bible Society