YOANA 9
9
1Akwotini kimi Yeso kïwetöy, kïsïwa chi nyo kikarote kïngata otini kikïyï. 2Kïtep kinetankachi lö, “Ngo nyo kigh ngokï tökeyï chichï kïkarote nya konetin, nyinte kegh nya anta yïyichi?”
3Kuyokyï Yeso chane lö, “Kimeghanye ngölyontononi ompö ngokichi kegh anta cho pö yïyichi, wölo kikïyï nyinte kïkarote atömanyïn kïrumtö ighisyewut pö Tororöt ompö nyinte. 4Mïchinecha kegha pöghisyewut pö nyinte nyini kiyokwanïn kïtökïpöghet, ompöwölo itu nangatï ato mökumukönye chi kïpöghisïyi. 5#Mat 5:14; Yna 8:12. Ochan löpoyïn pö ngwïny otini tö tomitan ngwïny.”
6Otini kiwany Yeso kïmwa lenyoni kïngwïtyï ngwïny akwigh norayon, akïmala konyiko chichoni kikarote, 7akïlenchï, “Wïyö mwatena konyiku takarya Siloam.” (Ato kïwaghach kaynanoni kelentöy, “Nyo kïyontoy.”) Kïlenyona, kïwö chepkarotnay akuwun konyichi akïmïla kurosïtoy.
8Kïpechï pöröriskachi nko pikö walaka cho kisïwïyi nyinte tagh kïsomsïyi kïtepsyö lö, “Melö so chichete nyanya le meywon kitöpo akïsomsïyi?”
9Kïlo pikö walaka, “Nka,” kïlö walaka, “Ewo, melö nyinte, wölo lata chichanye.” Wölo kuyokyï chichoni kikarote nyinte lö, “Ani nyete.”
10Kïtep pïchay lö, “Köyotisyö konyiku lö ne nya?”
11Kuyokyï lö, “Katankwar nyïngwïny chichay kïkuro Yeso akuyila konyichan akïlenchanïn, ‘Wïyö Siloam aiwuntö.’ Owan nyu owun atolapay amukan arosïta.” 12Kïtep pïchay lö, “Akïmi onö nyinte?”
Kuyokyï lö, “Monkïtönye.”
Kamar Parisaytin* wölo kakisoptö chepkarotnay
13Atolapay kumït chane chichoni kikarote wölo mi Parisaytin. 14Ki asispa Sapato* nyoni kitankwar Yeso nyïngwïny akwigh konyiko chichoni kurosïta. 15Kïtep nyu Parisaytin chichay ngat lö, “Kösöpchö konyiku lö ne nya?” Kïlenchï, “Kiyila noroyon konyichan, awan owun amukan ye arosïta.”
16Kïlö Parisaytine walaka, “Melö ngwïno chichoni wölo mi Tororöt, ompöwölo mörïpönye kirurut pö asispa Sapato.” Wölo kïlö walaka, “Muko lö ne kwigh chi nyo le mwokïyon töngönchintin cho lata chï?” Kïpesyö nyu pïchoni.
17Kïtep Parisaytine walaka chichoni ngat lö, “Kwato kayat ye chichoni konyiku, inonenyi lö ngo nyinte?” Kïlenchï, “Werkoyon nyinte.”
18Kimeghancha pïchay pö Yaudi lö kikarote chichoni ato le tagh akwanyï ye rosïtoy, ntökïtenö kunkïtunö yïyichi. 19Kïtep nyu chane lö, “Montönkwa nyete nyay olentekwa kikïyï kïkarote nya? Kötöptö onö nyinte ye nyu tökumï kurosïta?”
20Kuyokyï yiyichi lö, “Kinkïtöcha lö montöncha nyete akenkïtöcha lö kikarote nyinte otini kikïyï. 21Wölo mökinkïtöchanye kïgh nyo kegha ye tökurosïta amökinkïtöchanye lö ngo nyini kiyat konyichi. Atepa nyinte, kikïyetï nyinte nyo muköy kïsöröpchini kegh.” 22Kimwa yiyichi lenyoni, ompöwölo kiwagh chane pipö Yaudi cho kökikïchomnyechï lö ato töp chi anka tïkwïl ntökïmwatïta lö, Yeso kï Kristo,* ketulo kö pö saghat.* 23Nka nyoni kimwa yiyichi lö, “Kiyetï nyinte, atepa!”
24Kïkur chane chichoni kikarote panto odeny akïlenchï, “Mwaghe ngala man ompö tawu Tororöt. Kinkïtöcha lö mwokïyon chichoni.”
25Kuyokyï chichay lö, “Ato kö mwokïyon, kïmonkïtönye, onkïtön kïgh akonga lö kyochan karote akwanyï orosïtonan ye.”
26Kïtep pïchay lö, “Kiwunyi nyinte ne nya? Kiyat nyinte konyiku lö ne?”
27Kuyokyï chichay lö, “Nyaye kökomwowokwa ataghakwa atera, omökekwa olïme ngat nyo pö ne? Omökekwa so tïkwïl olïkune rïpankachi?”
28Kïchïp chane nyinte akïlenchï, “Ichinyi rïpana kïyoni chi kerïpecha cho le acha Musa. 29Kinkïtöcha lö kingalan Tororöt nko Musa, wölo mökinkïtöchanye wölo ngwïno chichoni.”
30Kuyokyï chichay lö, “Töngönchini nyu nyoman ato monkïtökwanye wölini ngwïno chichoni akwanyï köyotwanïn nyinte konyichu! 31Kinkïtöcha lö möterchininye Tororöt mwokïyis, wölo terchini pich cho töni nyinte konyït akwigh machatenyi. 32Tomönye kelïm kïngeta otini le towunöto ngwïny lö mi chi nyo kikumï kïyat konyi chi nyo kikïyï kïkarote. 33Ato melö kengwïna nyinte wölo mi Tororöt, kïmelö kemuköy ntökwigh kïgh nyonikïny.”
34Kïlenchï pïchay, “Ichinyi ngo terurechanyi nya chi nyo kikïyiyïn ainara ngokï?” Atolapay kutul nyinte kïwö sany.
Körotyo mïkulögh
35Otini kïlïm Yeso lö kikitulö nyinte kö pö saghat, kïtuyö nko nyinte kïtep lö, “Ighönenyi Wero Chi nya?”
36Kïlenchï chichay, “Mwowante Echotyon lö ngo nyinte ataghanan.” 37Kïlenchï Yeso, “Kesïwenyi nyinte akï nyinte nyete ngölonöy nko nyi.”
38Kïlenchï chichay, “Oghönan, Echotyon,” akïkïtïngchï nyinte.
39Kïlenchï Yeso, “Kangwïnan ngwïnyinete atorwokyï, atökumï chepkörotonoy kurosïta, kïwöghökisyö cho rosïtoy kïlïkwï chepkarotin.”
40Kïtepsyö Parisaytine walaka cho kimi nko nyinte ato kimwoghöy nyinte ngalechoni lö, “Imökenyi mwoghe so lö kïchicha köryöte tïkwïl?”
41Kuyokyï Yeso lö, “Ntökochikwa köryote, kötömotïngetekwanye lelut, wölo omwoghekwa ye lö, ‘Kirosïtocha,’ kuporu nyoni lö tomitenökwa nko lelutkökwo.
Körkeyïn pö mösöwonto kechir
Селектирано:
YOANA 9: PIPÏLIA
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
©Bible Society of Kenya, 2019