YOANA 6
6
1Ato mi lötuto ngalechoni, kwoghyö Yeso nanampa Kalilaya, akekuro ngat nanampa Tiperya. 2Kïrïp nyinte söpïch nyo wow, ompöwölo kökikïsïwa kiporut cho kighchï nyinte pich cho kichirsot. 3Kïwö Yeso kïpus kutïng akumpur atoni nko kinetankachi. 4Kökikïrikï asispa pipö Yaudi nyo wow nyo pö Pasaka.* 5Kïtopöntö nyu Yeso, kïsïwa tuyot nyo wow kutöngu wölo kimi nyinte, kïlenchï Pilipo, “Kyolo onö omisyö nyo mïchini kepagha pïchï nya?” 6(Kimwa nyinte lenyoni atökïtyam Pilipo, wölo kinkït nyinte kïgh nyo kighöy.) 7Kuyokyï Pilipo lö, “Ato kïlentöy tökïsïch chi ompö nyo le kite, kemököy makatin cho pö ropïyeni silpa cho le 200.”
8Kïlenchï kinetanenyi akong nyo kikuro Andrea, werto ompö Simon Petro, 9“Mi yi karöchïnin nyo tïng makatina matay mut nko kaghagh odeny. Wölo mïchini ngo chete ompö pïchï kïmïkul?” 10Kïlenchï Yeso chane, “Akanya kumpur pikö ngwïny.” (Kimi atoni suswö cho chang.) Kïlenyona, kumpur pïchay löwïr ngwïny, ki ngata chane mïrön 5,000. 11Kïcheng Yeso makatinechay akuyokyï Tororöt sörö, akuporchï pïchoni kimpuröy ngwïny. Kwigh lenyoni tïkwïl nko kaghaghe kïsïch chane lapay cho teno cho kimököy. 12Otini kipïghyö chane lapay, kïlenchï kinetankachi, “Aghamïta rarakanka cho köngötï atömepot kïgh.” 13Kïghamït nyu kinetankachi rarakan cho kinyïghï köröpon taman nko odeny cho kingötunö makatinechay le mut cho kingötunö pïchoni kyam.
14Otini kisïwa pïchoni kiporunötononi kigh Yeso, kïlö, “Anyï nyu nyoman werkoyontonay kikïngor lö ngwïnöy!” 15Kinkïtï Yeso lö kirich kïpa chane kïnam nyinte ompö owesyö atökwigh pöytoghin, kïwö ngat kutang kutïng nyinte onkït.
Köwestegho Yeso pögh parak
(Mat 14:22-23; Mrk 6:45-52)
16Otini kimön, kïröytö kinetankachi akïpa ntökwit nanam, 17kïpus meli akwoghyö nanam kutang Kapernaum. Kikikïtuwit atoni akitomönye kwitï Yeso wölini kimi chane. 18Kutor nanamoni kïwasawas kegh ompöwölo kikut yomöt nyo wow. 19Otini kökikïpegha chane nanam ntökwit ato teno kilomiten mut anta mut nko akonga, kïsïwa Yeso kïwestegho pögh parak akökikïrich nyinte melinoni, kuwöghisyö chane nyoman. 20Kïlenchï Yeso, “Mowöghisïyi, ani nyete!” 21Atolapay kïcham chane kïtak nyinte ompö melinoni, akïtökïnyini lawel kurel melinay koronini kïpetöy chane.
Yöröy pich Yeso
22Kïmi asista nyo kirïpöy kïsïwa söpïch pö pich nyo kingötï nanamay antakwagh lö kimömicha meline walaka kïpoto akonga, kunkïtï lö kimölïtnye Yeso meli nko kinetankachi, wölo kipïstö chane nyinte. 23Kwituna meline walaka Tiperya ato lekïto atanye kyama pïchanya makatin cho kisoyön Echotyon atökïpagha chane. 24Otini kipköchï pich lö kimöminye Yeso atoni anta kinetankachi, kïlany melin akïpa kutang Kapernaum kïmarata nyinte.
Yeso kï makatyanta söpon
25Otini kinyorï pïchay Yeso ompö nanamay antakwagh kïlenchï, “Konetin, kengwïnanyi oyï wöl nya?” 26Kïlenchï Yeso, “Omwowokwa nyoman lö kamaratanïkwa amelö ompöwölo kyasïwekwa töngönchin, wölo ompöwölo kyamakwa makatinechanya ntopïghyö. 27Mosïngo omisyö nyo wonyot, wölo asïngena omisyö nyo ghyongtoy ntökwitïta söpon pö kokay. Konokwa omisyononi Wero Chi nyo kakukïniniö Paponyi Tororöt akutö nyinte macheyunyi nyo pö chamat.” 28Kïtep nyu chane nyinte lö, “Kighecha ne tökemuka kegha ighisyewut pö Tororöt nya?” 29Kuyokyï Yeso chane lö, “Anyï ighisyö nyo möchokwa Tororöt oghe: aghanakwa chichoni kiyokyï nyinte.”
30Kuyokyï chane nyu lö, “Ighenyi kiporunöy ne kesïwenacha akeghan? Ighenyi kïgh ne? 31#Wuw 16:4,15; Tum 78:24. Kyama papotïnecha mana surkwen kïle wölo kikikirta ompö kirurut lö, ‘Kitö nyinte chane makatyan nyo kingwïna yïm kwam.’ ”
32Kïlenchï Yeso, “Omwowokwa nyoman lö melö Musa nyo kikonokwa makatyan nyo kingwïna yïm. Paponyan nyo konokwa makatyan nyo pö man nyo ngwïno yïm. 33Ompöwölo makatyan nyo konu Tororöt kï nyinte nyini körökunö yïm atökutö ngwïny söpon.” 34Kïlenchï nyu pïchay Yeso, “Kwato lenyona, Echotyon, ikonech osis löwïr makatyantanoni.” 35Kïlenchï Yeso chane, “Ochan makatyanta söpon. Momönye kömöy chi nyo ngwïnöy wölo omitan akï momönye maral chi nyo ghönanïn. 36Komwowokwa lö kasïwanïkwa wölo moghönekwanye. 37Chi anka tïkwïl nyo konanïn Paponyan, kungwïnöy wölo omitan, amoyonchinanye sany chi anka tïkwïl nyo ngwïnchinanïn. 38Ompöwölo korökunan yïm angwïn ngwïny atagh machata Tororöt nyo kiyokwanïn, melö machatenyan. 39Nyinte nyini kiyokwanïn nyo mököy lö tömopïstan ompö nyo le akonga ompö pïchoni kakïkonanïn nyinte, wölo taghan chane kututu lapay asispa söröm. 40Ompöwölo mököy Paponyan lö tösïch pich löwïr söpon pö kokay cho sïwïyi Wero Tororöt akughan nyinte ataghan chane kututu asispa söröm.”
41Kutor nyu pipö Yaudi kïngwïrngwïronchï nyinte, ompöwölo kimwa lö, “Ochan makatyanta söpon nyo kirökunö yïm.”
42Kïtep kegh chane lö, “Mö Yeso so nyete nyaye le wero Yosep? Kumuko lö ne kïlentöy, ‘Korökunan yïm?’ Kinkïtöcha kwanta nko kame!”
43Kïlenchï Yeso chane, “Opïstenö ngwïrngwïrönöt akwane nko akwane. 44Memuchönye chi kungwïnöy wölo omitan kïpoto ato nokunö Paponyan nyinte nyo kiyokwanïn kutöngwï wölo omitan ataghan nyinte kututï asispa söröm. 45#Isa 54:13. Kikir werkoyï lö, ‘Netöy Tororöt pich löwïr.’ Ngwïnöy chi anka tïkwïl wölo omitan nyo lïmöy kinetutko Paponyan. 46Molenchï kegh mi chi nyo kikïsïwa Papo, kïpoto chichoni kingwïna wölo mi Tororöt, chichoni onkït nyo kakïsïwa Papo. 47Omwowokwa nyoman lö anka tïkwïl nyo ghönanïn, kïtïng söpon pö kokay. 48Ochan makatyanta söpon. 49Kyama papotïnekwa mana wölnö le surkwen, wölo kïrkegh kyam, kïmeghö chane. 50Wölo ato am chi anka tïkwïl makatyantanoni rökuno yïm, kïmömeghönye. 51Ochan makatyan nyo satate nyo kirökunö yïm. Ato töp chi anka tïkwïl ntökwam makatyantanoni, kïsöpöy kokay. Akï makatyan nyo otöninan nyinte kï portönyan nyo okonunan atökïsöpö ngwïnya.”
52Kutor nyu pïchay pö Yaudi kïtep kegh lö, “Muköy chichï kïkonecha portanyi kyome lö ne?”
53Kïlenchï Yeso pïchay, “Omwowokwa nyoman lö ato mamakwanye por pö Wero Chi, aghegh kisönkachi, kïmosïkekwanye söpon ompö oringwo. 54Anka tïkwïl nyo omöy portönyan akïgha kisönköchan kïtïng söpon pö kokay, aghan nyinte kututu asispa söröm. 55Ompöwölo omisyo man portönyan akï gheghsyo man kisönköchan, 56chi anka tïkwïl nyo omöy portönyan akïgha kisönköchan kïtöpo orinyan atöponan orinyi. 57Kiyokwanïn Paponyu nyo satate, achan satate ompö nyinte. Kïlenyoni tïkwïl, anka nyo omanïn, kïsöpöy ompö ani. 58Nyete nyu makatyantanoni kirökunö yïm. Melö karkegh nko makatyantananya kyam papotïnekwa akïmeghö. Söpöy kokay nyo omöy makatyantanete.” 59Kimwa Yeso ngalechoni otini kimi kunetisyegho kö pö saghat* ompö Kapernaum.
Ngala söpon pö kokay
60Kïlïm nyu kinetankachi cho chang ngalechoni, kïlö, “Oghïghe ngalechï tya! Ekï ngo nyu nyo muköy kïteröy?” 61Kipköchï Yeso akimöminye chi nyo kimwochï nyinte lö kingwïrngwïronchö kinetankachi ompö ngölyontononi. Kïtep nyinte chane lö, “Köghöchokwa so ngölyontononi? 62Ekïlïku nyu ne köny ato asïwekwa Wero Chi kïwetöy yïm wölini kingwïna otini le tagh? 63Kïgh nyo konu söpon kï Mïkulöwu Tororöt, menyiwunye kïgh ptangengmöt onkït. Ngalechoni komwowokwa kï Mïkulögh akï söpon. 64Wölo mi kwenunkwa cho meghönöcha.” Kimwa Yeso lenyoni, ompöwölo kinkït nyinte kïngeta otini le towunöt lö ki ngo cho ki puryö kighanat akinkït tïkwïl lö ki ngo nyo kiwïchtoy nyinte. 65Kïtas kïmwa lö, “Nka nyanya kyomwowokwa lö memuchönye chi kungwïnchanïn kïpoto ato chömchï Paponyan.”
66Kutor kinetankachi cho chang kïmïlonchö löt kïngeta atoni akimökïpacha nko nyinte ngat. 67Kïlenchï Yeso kinetankachi chay le taman nko odeny, “Echo le akwa köny, omökekwa opechine kegh tïkwïlï?” 68#Mat 16:16; Mrk 8:29; Luk 9:20. Kuyokyï Simon Petro lö, “Kïpetecha wölo mi ngo nya Echotyon? Nyini itïngetenyi ngal cho konu söpon pö kokay. 69Akakeghanacha ye akenkït lö ichinyi Nyo Tïlil nyo pö Tororöt.” 70Kïlenchï Yeso chane, “Melö so kyakï akwa kï taman nko odeny? Wölo kïrkegh kïlenyoni, kïmito akong ompö akwa nyo le Onyöt!” 71Kingölono nyinte kïpörtoy Yudas, wero Simon Iskariote. Ompöwölo ki nyinte nyo kiwïchtoy Yeso, kïrkegh ki akonga ompö pïchoni le taman nko odeny.
Yeso nko werkökwa
Селектирано:
YOANA 6: PIPÏLIA
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
©Bible Society of Kenya, 2019