San Mateo 5
5
Jesús rixxiꞌe nuxa benni gualíga daca cana lo Tata Do Iyyabaaha
(Lc. 6:20-23)
1Atti biláni Jesús ixe tsitsiaba ca benni bitupa atta doe, gopittebe lo ttu lhilhi, nianna udottebe. Ca benni rudheti ca tisa ruleꞌe Benniha nna ubigattebacabi atta do Benniha. 2Lee nna udulottebe beleꞌenie ca biꞌiniha re cabi:
3—Carbáru ca benni roquinna iquicani reasaquinna nu anca gue Tata Do Iyyabaaha, cumu lacana acacana benni innabia Ben-na.
4’Carbáru ca benni ribesi lo niꞌa gue nu ratecana, cumu Tata Do Iyyabaaha utee elha xen lasi guecani.
5’Carbáru ca benni bittu ra xxeni lecani, cumu lacana ralhacana dhicana yiesi lo yu-ni attiba interés ute Tata Do Iyyabaaha.
6’Carbáru ca benni ridá lecani uncana nu anca tsee raca le Tata Do Iyyabaaha aca, cumu guasiaba sá aca nu ridá lecani aca.
7’Carbáru ca benni ratúa lecani ca benni, cumu guasatúaba le Tata Do Iyyabaaha cana.
8’Carbáru ca benni chi anca nari lastoocani de bitturu tulha bencana, cumu lacana iláquinna Tata Do Iyyabaaha.
9’Carbáru ca benni runi qui tseꞌe tsee len loes ca benni, cumu lacana gatta lácani xiꞌini Tata Do Iyyabaaha.
10’Carbáru ca benni rate ruyúcana elha disa lo niꞌa gue de runcana nu anca tsee, cumu lacana acacana benni innabia Tata Do Iyyabaaha.
11’Carbárule gansi de lo niꞌa quia rusía le ca benni le, ruría lacan le lhe lacana nna run lecani runcana xiyya guele dequi runle iyáloba nu lä anca tsee. 12Gualedacani lhe gualebequi itta lele lhe cumu xxeni anca nu tsee dhíle iyyabaaha. Ca unná nna anáguaba bedhacacana ca profeta useꞌe atti bittu chi bisíale yies lo yu-ni, tsa läga uca uyúcana ca biꞌiniha.
Ca benni ria lecani Jesús ancacana attiba deti-na lhe xieni-na lhe
(Mr. 9:50; Lc. 14:34-35)
13’Lebiꞌi ancale attiba deti seꞌele lagüi gue ca benni seꞌe yies lo yu-ni, ttiaca gansi deti-na enitti ixe gueni, lärgaga aca eyona ixe attu libe. Lania nna tsa lärgabi ixuuna, iruꞌunabana ca lheꞌeliꞌa-na, qui ulea benni iquini.
14’Lebiꞌi ancale attiba ttu xieni gue yies lo yu-ni. Attiba ttu yiesi re lo ttu lhilhi läga aca igatsi nua. 15Nuttuguaba nu benni te rugalhana ttu gui, nianna uttodhina ttu lmoti iqui nua. Sinuqui udolana unnuha ttu atta yadha qui udani nua gue iyába ca benni seꞌe lheꞌe yoꞌoha. 16Anáguaba lebiꞌi, gualuni nu anca tsee, qui atti iláni ca benni nu anca tsee runleha nna lania nna cuequi xencana Tata gueri do iyyabaaha.
Jesús rixxiꞌe gue ca ley bocaꞌan Tata Do Iyyabaaha len Moisés
17’Bittu aquinle ga delha yies lo yu-ni qui cuaya ca ley bocaꞌan Tata Do Iyyabaaha len Moisés, niguaba ca tisa bocaꞌan ca profeta gue Ben-na lo ca sitsi lhe. Läga delha neti güettua ca ben-na, daba neti qui unia saxxína aca nu rá ca tisa dia lo ca sitsi gue Ben-na. 18Neti nna gualíbatia ria le, laca sna rerba yies lo yu-ni lhe iyyabaaha lhe ni ttu tisa chicaꞌa lhe ni ttu letra lhe nu dia lo ca ley-na bittu ttua, axta qui saxxína aca iyá nu chi gaꞌana lo ca ley-na aca. 19Larcala nna benni bittu udona tisa gue ttu ca tisa dia lo ca ley-na, masquiba ancana ttu tisa chicaꞌaru, lana nna gána adí ca benni bittu udocana tisa gue nu rá Ben-na lhe unnuha nna acana nu xuna gue delo iyá ca benni rinnabia Tata Do Iyyabaaha. Ttiaca benni rudona tisa gue nu rá lo ca ley-na lhe ruleꞌenna adí benni udocana tisa gue Ben-na lhe unnuha nna benni ra xxeni leni aca nua gue delo iyá ca benni rinnabia Tata Do Iyyabaaha.
20’Cumu neti ria le, gansi bittuba unle adíru nu anca tsee atti ca fariseo-na lencana ca nu ruleꞌe nu rá lo ca ley-na, tsa läga aca acale benni rinnabia Tata Do Iyyabaaha.
Jesús rixxiꞌe gue nu rutseꞌequi benni
(Lc. 12:57-59)
21’Lebiꞌi nna chiba yule gue nu beleꞌequinna ca benniola gueriha atti rácana: “Bittu uttile benni, cumu iyába nu runi elhutti labíaba aca elha uxtisi gue nua.” 22Ttiaca neti nna ria le, iyába nu iseꞌenna leni ttu betsi loesini, unba Tata Do Iyyabaaha elha uxtisi gue nua. Nuxaba usia leni ttu betsi loesni nna gutsaduba cana nua lo ca uxtisi qui uncana elha uxtisi gueni, nu quena iqui ttu betsi loesni nna ralhaba nua tsiana lo gui gue atta lexúaha.
23’Larcala nna gansi lu dialu qui cuꞌulu úna lo becoa gue Tata Do Iyyabaaha, atti chi dulu nía nna exxa lelu ritilhaba lenlu ttu betsi loeslu, 24lu nna nía tte bodhaꞌan úna gueluha atta do becoha, atti bequitte beyya, primer xa beaca tsee len betsi loesluha, lania liba nna bequi beyya gualhuꞌu úna gueluha.
25’Gansi nu ritilha lenluha sagaꞌan lu lheꞌe yoꞌo lagüi lo ca uxtisi, laca yuꞌu lenlu nua neda nna beni gaxasná eyaca tsee lenlu nua, qui bittu icheen lu sadún lu lo xueda, cumu xuedaha nna utten lu las ná güensina, güensinaha nna udelhan lu lisiyya. 26Cumu neti ria nna läga eríalu lheꞌe lisiyyaha axta liba quixalu iyárecha belhi nu innába ca nua.
Jesús rixxiꞌe bittu anca tsee isá ttu benni ttu nu bittu anca latselani
27’Lebiꞌi nna chiguaba bieninle ca tisa ca nu rácana ca benniola gueriha, atti rácana cabi: “Bittu isálu nu bittu anca latselalu.” 28Ttiaca neti nna rpeale, nuxaba benni dha leni ttu nuila atti ilenna nua, lana nna attisiba chiba bisána nua de belaba lhiꞌu leni isána nua.
29’Larcala gansi iyya lo derechu guelha runna ixúyielu unlu nu lä anca tsee, uleana uruꞌuna na idittu, cumu tseerla salíana lu unnittilu ttu lhaꞌa iyya lolha, attichula itúbalu tsialu atta lexúaha. 30Gansi ná derechu guelha runi ixúyielu unlu nu lä anca tsee, uchú na uruꞌuna na idittu, cumu tseerla salíanalu unnittilu ttu lhaꞌa nálu attichula itúbalu tsialu atta lexúaha.
Jesús rixxiꞌe bittu dica udhequi ttu unbiyuu nuila gueniha
(Mt. 19:9; Mr. 10:11-12; Lc. 16:18)
31’Ráguabacana ca benni uca benniola gueriha: “Nuxaba unbiyuu udhequini nuila gueniha, lana nna ugüena unnuha ttu sitsi nu rixxiꞌa loni dequi chiba belaꞌacana.” 32Ttiaca neti nna ria le, gansi cuentaba udhequi ttu unbiyuu nuila gueniha, gan läba de bisá nua attu unbiyuu subi, lana nna sunruba runna qui isá nua attu unbiyuu subi. Anáguaba unbiyuu nu edí nuila bedhá iquicaniha, ttu nu satsaba nua unna.
Jesús rixxiꞌe bi dica innári atti ugüeri tisa
33’Lebiꞌi nna chiguaba bieninle gue nu beleꞌequinna ca benniola gueriha: “Gansi ugüelu tisa lo Tata Do Iyyabaaha unlu ttu bixa, bittu aquinlu lä unbalu nu chi begüeelu tisa unluha.” 34Ttiaca neti nna ria le: Atti rugüele tisa nna tsa bittu udettile nuxa. Bittu udettile iyyabaaha, cumu anque atta do Tata Do Iyyabaaha rinnabie. 35Lä udettiguale yies lo yu-ni lhe cumu ancana atta rudú niꞌa Ben-na, lä udettiguale yiesi Jerusalén lhe cumu de ancana yiesi gue Tata Do Iyyabaaha Benni rinnabia ra xxeni lee. 36Lä udettiguale iquile lhe cumu läga aca guele unle eyaca sitsi o yadhi ni ttu itsiquile. 37Suntteba gualná: “O”, gansi yule guacaba, gansi yubale bittuba aca nna suntteba gualná: “Bittu aca”, cumu nu udianle uxxúale adí iqui tisa-ni nna gue nu lexúhaba chi anca nua.
Jesús rixxiꞌe bittu dica eyon nari
(Lc. 6:29-30)
38’Lebiꞌi nna chiguaba binale rácana: “Gansi ttu benni ugüena iyya lo attu benni, unnuha nna ralhaguaba nua ugüecana iyya loni, benni cueana laya ttu benni nna ralhaguaba nua cueacana layani.” 39Ttiaca neti nna ria le: Bittu edú disale lo nu lä duta leniha. Nu unlale nna gansi nuxa galhina gui xxaga derechu guele, odequilale attu ladu qui galhina gui. 40Gansi nuxa salhuꞌuna lu lo uxtisi de runna cuana mixa guelha, begüeela nua itupa gabana guelha. 41Nuxaba unna duelha guelu ujalu yua gueniha ttu kilómetro, lu nna bijala nua chupa kilómetro. 42Nuxaba bixa innában lu nna begüee nua nu rinnabana, nu innába ganna na ttu bixa len lu nna bete ganna gueni.
Aquinri gue ca nu lä raca uyúcan ri
(Lc. 6:27-28, 32-36)
43’Lebiꞌi nna chiguaba binale rácana: “Aquinle gue ca benni gueri-na, gualutía di lele ca nu lä raca uyúcan le-na.” 44Ttiaca neti nna ria le: Aquinle gue ca nu lä raca uyúcan le-na, gualnnaba len Tata Do Iyyabaaha aca lanie ca nu riguecana iquile na. 45Análiba nna acale xiꞌini Tata gueri do iyyabaaha. Cumu Benna runie riria tatubisa-na qui rudanie gue ca nu du tsee lequinna lhe ca nu bittu du tsee lequinna lhe. Anáguaba runie raca iyya gue ca nu runi nu dica ixuu lhe ca nu runi nu lä dica ixuu lhe. 46Cumu gansi sunruba ca nu racaquinna guele-na raquinle guecani, lania nna tsa lägabi nu tsee dhíle gue nu runle-na. ¿Läba ganna anáguaba run ca güequixa ridí belhi deyya Roma? 47Gansi sunruba ca benni guele-na rále padiuxi, ¿bi nu tsee nua runle runle anía? ¿Läba ganna anáguaba run ca benni bittu anca biani Tata Do Iyyabaaha? 48Larcala nna lebiꞌi acale benni runi nu anca tsee, attiba Tata gueri do iyyabaaha anque Benni runi nu anca tsee.
Селектирано:
San Mateo 5: zaq
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2021, Wycliffe Bible Translators, Inc. All rights reserved.