Lúkkë 4
4
Saami Seytaane fíirí Yéesú
(Saame Maccëe 4.1-11 ; Marka 1.12-13)
1Yéesú líiffé a Ruuh-Peseŋ, kolohte laahi Yurdeŋ, Ruuha kúɗté rí na ɓen ri luufa. 2Ɗi hompe dín fë waal sabay iniil (40) Seytaane na saam fíirí. Waalli ƴaaha ɓéeɓ, ɗi túmëy yin loyi níi yaabi misikke míllëˈté ríi ham.
3Seytaanaa won ɗi tígí daaha tih : « Hena biti fu Koy Koope kaah raa, túuƴé laˈi bee yíssëh ñam. » 4Yéesú won ɗi tih : « Bíníyúté Téerëe bitih : “Ow pesaˈ ñam neh kut.”#Saame Nérsí Kootaa 8.3 »
5Seytaanaa kúɗté rí sun fi daŋi utte, yíppée ríi teeɓ ginna feey fa ɓéeɓ, 6antee rii won tih : « May roo yeɗ nguur ka a alal ma ginni ƴee ɓéeɓ ; wa ɓéeɓ ee yaˈ soˈ, te mi mín wëe on ɓëyí neɓaˈ soˈ. 7Kon fu jaamiyoh soˈ raa, fu lahaˈ wa ɓéeɓ. » 8Yéesú won ɗi tih : « Bíníyúté Téerëe bitih : “Fay ƴekre Koo-Yíkëe daa Koope fu ra te fay jaamiyee ri kut.”#Saame Nérsí Kootaa 6.13 »
9Filoon fi baaha, Seytaane kúɗté rí Yerusalem, cëgíɗté rí jibi Faam fi gaani Koope, antee rii won tih : « Hena biti fu Koy Koope kaah raa, yeɗɗee feey. 10Bíníyúy Téerëe biti Koope ay nah malaaka yi níidú woo ? 11Bíníyúté biti ɓal : “Wa ay roo meeɓ teŋel, toñeh fay kabinee laˈ.”#Saame Kañaa ya 91.11-12 » 12Yéesú won ɗi tih : « Bíníyúté Téerëe bitih : “Koo-Yíkëe daa Koope fu, ngana saam olsohi.”#Saame Nérsí Kootaa 6.16 »
13Filoon fi bee ñeyaˈ ri pagaɗɗa ra ɓéeɓ na saam fíirí Yéesú rë, Seytaane saañce na séhíɗ waal kay.
Nimili Yéesú Galile
(Saame Maccëe 4.12-17 ; 13.53-58 ; Marka 1.14-15 ; 6.1-6)
14Yéesú kolaˈ daaha, ñéerëˈté a doolii Ruuh-Peseŋ nimilte Galile. Tiyi hente lëyëŋ deyi baa ɓéeɓ. 15Ɗi húmú yëeddëˈ filiɓ ílíƴƴë na ɗaguu yëwúɗɗë Koope ra, ɓëewë ɓéeɓ kañe ri.
16Lahte bis, Yéesú kolohte saañce Nasaret fa koraˈ ri ra. Lahaˈ bisa na hílsúu yëwúɗɗë rë, ɗi payte haalte tígë na ɗaguu Koope ra ti di na húmú pagaˈ ri merees nen ; ɗi kolohte jaŋii Unni Koope. 17Ɗi yerute téerëe bíní yonente Isayii ra. Kúnsëˈ rí téerëe rë, ɗi otte tígë bíníyú unna na húmú saam ri ƴee ra :
18 « Ruuhi Koo-Yíkëe ee soo na,
ɗi falte soˈ waarii ñëkíɗɗë Uni Neba,
ɗi wolte soˈ woni ɓëewë téƴú kasu ra biti wa ay yeɗɗu,
woni búumíɗɗë biti wa ay ot a sëmlëˈí ɓëewë moklu ra.
19 Ɗi wolte soˈ woni ɓëewë biti kíilë nay waa teeɓe Koo-Yíkëe naaˈ-keeñ ra ee ac ra. » # Saame Isayii 61.1-2
20Jaŋiyaˈ ri unna níi wocce ra, Yéesú kúnté téerëe, nimiliɗte ri ɓëeˈ në tooppitoh yii leŋke tígë na ɗaguu Koope ra, tookke ay yëeddée. Ɓëewë húmú daaha ra ɓéeɓ na yeelu ri. 21Ɗi won wa tígí daaha tih : « Woteh fee Koo beh, Unnee téerëe keluu ron ƴaa ra, lahte kah-kah ! »
22Keeññi ɓëewë ɓéeɓ sosse Yéesú në te wa éemúté unni neɓɓa won ri ra, na wonu tih : « Añcaŋ yaa koy Suseef kep ee ! » 23Ɗi won wa tih : « Mi yúhté biti ɗon ay soo won léehí beh : “Ɗo fi naahee, paƴe afu !” Ɗon ay soo won biti ɓal : “Fun keluute iña paŋ fu Kafarnawum ra ɓéeɓ ; page mani wa filiɓ ginu noo, fun ot !” » 24Ɗi ɓaatte won tih : « Mee ron won kaaf ka ra ee : yonente na síkíríih gina dék rí rë. 25Cëe mi won ron : lante biti ɓeleɓɓi ƴaalli wa húlúté húmú caakute Israyel na pesaˈ yonente Éelí rë. Bín fë, Koo húmú toɓay níi hente kíil éeyë a caan, tahte yaabi misikke laɓpe gina ɓéeɓ. 26Añcaŋ, Koope húmú wolay Éelí ow yínë sah ɓeleɓɓi ƴaa na ; ɗi wol ri bi dék Sareptaa di deyi Sidon, te ri yëwúɗ neh.#Saame 1 Buurra 17.8-16 27Guuñiɗ caak ɓal húmú Israyel na pesaˈ yonente Élísée rë ; añcaŋ, ow yínë sah waa na guuña laday faana ; faan Naamaan fa dék Sírí rë kut daa lan guuña, te ri yëwúɗ neh.#2 Buurra 5.1-14 »
28Keluu ɓëewë húmú tígë na ɗaguu Koope ra unni ƴah, keeññi wa ɓéeɓ haayte níi haay. 29Wa koluute, ɗúhrúté Yéesú gina, kúrúté rí af daŋa yípúu gin wa ra, na fahuu yeñi feey. 30Ndaa ri húussé leelii wa saañce.
Paƴi ɓëyí yébítëh na ham ri
(Saame Marka 1.21-28)
31Yéesú lahte Kafarnawum di Galile. Bisa na hílsúu yëwúɗɗë rë, ɗi na yëedíɗ ɓëewë yee won Téerëe rë. 32Wa éemúté ɗee na yëeddëˈ rí rë, bi na yëeddëˈ rí a sañ-sañ. 33Ɗeef ɓëyí lahaˈ yébítëh húmú waa na, di tígë na ɗaguu yëwúɗɗë Koope ra, ɗi foŋke sun won tih : 34« Yéesú fí ɓëy Nasaret, fu fahaˈ paŋi fun yih ? Fu ac múklí fun a ? Mi yúh rë ! Daa fu Ɓëyí selaa ɗúhëˈ Koope na ra. » 35Tígí daaha, Yéesú digiɗte uni won afa tih : « Héddée te fu yeris ɓëyí beh ! » Yébítëh fë kéeníɗté ɓëeˈ feey fíi ɓëewë ɓéeɓ, yerisse ri te yin misikay ri. 36Ɓëewë ɓéeɓ éemúté, wa na wonantuu hanndal ki wa tih : « Bee wonaɗ mën ɗí kan ? Ɓëyí bee túuƴëˈ yébítëh yë a sañ-sañ a doole : ɗi túuƴ wë yeris ow raa, wa yeris ri. » 37Tii Yéesú yíppée hen lëyëŋ deyi baa ɓéeɓ.
Ɓëewí caakka paƴ Yéesú rë
(Saame Maccëe 8.14-17 ; Marka 1.29-34)
38Yéesú ɗúhté tígë na ɗaguu yëwúɗɗë Koope ra, saañce faam Simoŋ#4.38 Simoŋ fa na wonuu tígí dee ra, daa ri bee Yéesú yeɗ ɗi tii Peer ra.. Lahaˈ ri ra, ɗeef jér fëníɗté pacool Simoŋ ɓeleɓ, faana tampe níi ti paloɓ nen. Yéesú ɗagute paƴi. 39Tígí daaha, ɗi sígímpé sun fi jérdë, digiɗte uni túuƴcé tami faana yeris ɗi. Tami faana yerisse ɓelaa, ɗi yíppée koloh na tooppitoh wa.
40Haalaˈ naˈ ra, ɓëewë lahu jéríɗ rë ɓéeɓ, a di míntí man jérë, komute wa Yéesú. Ɗi tíkké wë ɓéeɓ yaˈ paƴce wa. 41I yébítëh yeɗɗute jéríɗ caak ɓal, na fogu wone tih : « Daa fu Koy Koope ! » Ndaa Yéesú digiɗte uni sun fi wa, kaddaˈte waa won, ndah wa fi ƴaa yúhúté biti daa ri Buura Koo fal ri ra, te ɗi fahaay biti daa wa wonun yii baaha.
Kolohi Yéesú Kafarnawum saañce na waare Yúdée
(Saame Marka 1.35-39)
42Ladaˈ Koo ra, Yéesú ɗúhté gina, saañce tígí ɗaayte. Ow caak koluute saami. Oluu wa ri ra, wa na fahuu hami, kaaˈ ri saañ hel wa. 43Ndaa ri won wa tih : « Mi waɗtee pay ginni kayya ɓal, mi waare wa Uni Nebi Nguur ki Koope, ndée yii baaha daa tah Koope wol soˈ. » 44Ɗaaha, ɗi kolohte na waare ílíƴƴë na ɗaguu yëwúɗɗë Koope Yúdée rë.
Селектирано:
Lúkkë 4: NDV
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© (Active), Wycliffe Bible Translators, Inc. All rights reserved.