Luc 19
19
Yésʉs, bé e Zakéyos
1Jɔ̌ʼ Yésʉs á nî ɨ́ Yerikô yɨ́, nye nzě kpâhla ɨ́ nkana yaá. 2Nyʉ́ʉ́ mʉ̂r á be ó tɨ̂, díé lé Zakéyos, mʉr á be lɨ́ ejwɨ́ɨ̌ sɔ́má ónwɨa ó mɔnɨ́ tœ́a bɨ́bɛ̂h nyá. Nye á be ó e bisâ ɨ́ buo buo. 3Nye á be ó lɨ́ edǐ beě Yésʉs, le egʉ́ǎ mbi mʉ̂r nyé á be wɨ́. Nó mpʉ nyé á be ɨ́ gúlwo gúlwo yɨ́, nye á bé abe e nkul ebee nyê, ebě, bʉr, bé á be ɨ́ buú buo. 4Nó nyé á tô kám dóló, ntɔ̂ʼ jʉ ɨ́ lɨ́ sycomore kʉ́, ó nye nkʉ̂ bee nyê, ebě, Yésʉs á be ó, nye láŋaa tɨ̂ʼ ɨ́ nzɨ̌ nyaá. 5Jɔ̌ʼ Yésʉs á pyâl gúmo yaá yɨ́, nye nzě bɨ̂n mîh kʉ́. Nye e né ó: «Zakéyos, kpáhwá sulo sí, ebě, me ɨ́ jala le edi ɨ́ mbɛ̌r gô mûh!»
6Zakéyos ntɔ̂ʼ kpâhwǎ sulo sí, ntɔ̂ʼ nʉa nyé e bisʉhʉʉ. 7Bʉr bɨ́bɛ̂h bé á bee syɛ́ɛla yaá bá, bé á si lwib lɔ̌b waá minyimla. Bé ó: «Mʉr nyâ, nyɨ́ tó jâ ɨ́ mbɛ̌r syɛ̂l misyóm!»
8Nó ó Zakéyos á nze tyɛ̂b, le elɛ́ɛ e Tî Yésʉs ó: «Dâ ɛ̌, paá bee! Me múo nzě bɛ̂ʼ bísá byâm ɨ́ bipéh bíbá. Me ónʉa yɨ̂ʼ pêh, tó dwe báántéʼenteʼe o bʉ̂r. Yé bé me á bě sí sâ míkóo, nʉǎ mɔnɨ́ kwá nyʉ́ʉ́ mʉ̂r nó, me óbwóolo nyé yǎ, ntɔ̂ʼ kɛ̌l bím mɔnɨ́ yaá nzɔʼ lɛ̂l tɨ̂ʼ kʉ́.»
9Nó ó Yésʉs á nze lɛ́ɛ e né ó: «Mbɛ̌r bʉ̂r wɨ̂, wɨ́ tiʼe mûh, ebě, mʉr nyâʼ ntémé, nye ó nta mé Abraham. 10Ebě, Mwân mé Mʉr á nze ó, nzě sáa baá mû sí dîm bá ó, nye ódwe bé twiʼ.»
Kɨkɛna mínzaŋ bímɔnɨ́
11Jɔʼ bʉ̂r baá, bé á be, bé mû sí jóʼo mékǎn ménɨ̌ yɨ́, Yésʉs nzě báʼǎ sâ bé yʉ́ʉ́ kɨkɛna, lɨ́ emveʼle baá bé á jóʼo milɛ́ʼlá myé bá. Mpʉ nyé á be, nye mû bǎʼ e Yerʉ́zalɛm yɨ́, bʉr, bé á jwɨʼ ó, Nzyɛ̌m á be ó, nye mû kúno etyêl Mpóʼo nyé. 12Nó nyé á lɛ́ɛ ó: «Yé á be ó e yʉ́ʉ́ mpǎŋ njwɨ́ʼ mʉ̂r. Wé á si mɔa ɨ́ sí yé, tó di ɨ́ sí yé á be ká ká lɨ́ ejaa yɨ́. Nye á tô ó, bé dílɨɨ nye ɨ́ dǐ njwɨ́ɨ. Píe tɨ̂, nyé okǎ búla. 13Nye dína apǎ tô, nye á si jébe osyɛ̂l o mésá bé kám, nzě dwe bé mʉr ngwár, nzǎŋ gʉ̂l ngwár, bím mɔnɨ́ syɛ̂l mesâ dí ede lɨ́ ongɔn otɛ̂n yɨ́. Nye e bé ó: “Bulɨɨ gá me mɔnɨ́ yɨ̂, tó pyâl ɨ́ jɔʼ mé óbúla yɨ́.” Nye nzě mɔa, tô.
14«Náǎ yé ó, bʉr ó sí yé lɨ́ enwim nyê. Nó ó bé á lómo bʉr ó, bé tôʼ dû nyê, lɨ́ etô le elwáŋlě lɔ́ɔ gʉ̂ʼ ó: “Bɨ̌h bé akpɛl ó, mʉr nyâʼ díʼee njwɨ́ɨ wɨ́h!”
15«Nó nko nyé á tô yɨ́, bʉr o nkɔ́m nyaá nzě tyélɔɔ nyé njwɨ́ɨ. Nye ntɔ̂ʼ báʼǎ nze ɨ́ sí yé, ánta nye. Nó nyé á lɛ́ɛ ó, bé jébaa nye osyɛ̂l o mésá bé, baá nyé á tímle mɔnɨ́ bá. Nye á be ó lɨ́ egwɨ̂m égʉ́ǎ bím mɔnɨ́ yé, yé á byâ yɨ́. 16Mʉr esôʼ pyâl. Nye ó: “Dâ ɛ̌, me á si baʼa bi minzaŋ mí gʉ̂l miswîh kám, duho ɨ́ nzǎŋ gʉ̂l gó á tímle me wɨ́.” 17Sɔ́ŋ, nye e né ó: “Yé ɨ́ mbɨa. Go ó mpǎŋ syɛ̂l mesâ. Mpʉ gó á gʉ́a ebaʼle bísâ bi dí tîtííǎ bí yɨ́, mɨ́ tyêl gó njwɨ́ɨ binkana kám!” 18Waá mbá ntɔ̂ʼ nze. Nye ó: “Dâ ɛ̌, me á si baʼa bi minzaŋ mí gʉ̂l miswîh mitɛ̂n, bâʼra e waá gó á tímle me wɨ́.” 19Sɔ́ŋ, nye e né ó: “Gua, mɨ́ tyêl gó njwɨ́ɨ binkana bitɛ̂n.” 20Nyʉ́ʉ́ nzě pyâl. Nye ó: “Dâ ɛ̌, beě nzǎŋ gʉ̂l gô? Me á baʼle wé ó, tyeelá lɨ́ eliré é kán, 21ebě me á be ó lɨ́ ekpɛ́ɛ gô, ebě, go ɨ́ buú nyan mʉ̂r. Gǒ nʉnʉǎ sá gó á be akomo yɨ́. Gǒ kpɨkpɛm méde ó, ɨ́ gúmó gó á be abe mempeʼ yɨ́.” 22Sɔ́ŋ, nye e né ó: “Sá bɨ́bla syɛ̂l mesâ yɨ̂! Me ótíʼe gó lɔ̌b ɨ́ mekǎn me dí eduho ɨ́ num gô má. Go á be lɨ́ egʉ́a ó, me ɨ́ buú nyan mʉ̂r. Mě nʉa ó, sá mé á be akomo yɨ́. Go á si gʉ́a ntémé ó, mě kpɛ̌m méde ó, ɨ́ gúmó mé á be amyam mempeʼ yɨ́. 23Go á bé ató gbâ mé mɔnɨ́ yâm ɨ́ bâŋ ɨ́ yé? Ɨ́ mpúla nyǎm, me gwá nzě nʉǎ mɔnɨ́ yâm yaá, le eběr kʉ́.” 24Nye e bʉr o b'á be tɨ̂ʼ bá ó: “Pɛʼɛɛ gá nye nzǎŋ gʉ̂l wé, bɨ̌n e tímlé wé mʉr dí e minzaŋ mi gʉ̂l kám nyá.” 25[Nó bé á lɛ́ɛ e né ó: “Dâ ɛ̌, nye mû ó, boó be e minzaŋ mí gʉ̂l kám!”] 26Nye ó: “Mě lɛ́ɛ́ bɨ́n ó: mʉr nyɨnyɛ̂h dí e sɔ̂ʼ nyá, ódweŋɔɔ yʉ́ʉ́. Waá nyɨnyɛ̂h dí tʉ̂toʼó nyá, bé ópɛʼ nyé damá jóʼo ó, mâ bím nyé dí e tɨ̂ʼ nyá. 27Nó ontɨ̂m le obɨn bâm bé á bene ó, me díʼee njwɨ́ɨ wɔ́ɔ́ bá, ntáʼ gá me e bǎ kâ. Bɨ̌n e jʉ́ bé wâʼ ɨ́ míh mâm.”»
Yésʉs lɨ́ enî Yerʉ́zalɛm
(Matthieu 21.1-11; Marc 11.1-11; Yʉánɛs 12.12-19)
28Jɔʼ nyé á sil elwib nó yɨ́, Yésʉs ntɔ̂ʼ nʉa ésóʼ é sɔ́má bʉ̂r, lɨ́ etô Yerʉ́zalɛm. 29Jɔʼ nyé á be, nye mû le ekúnwo e Bɛtfagée ndu e Bétanî, nko écwɨ̂ʼ bé jɨ́jébé ó, “Ecwɨ́ʼ lé ólivier” yɨ́, nye ntɔ̂ʼ lómo ómpʉ́n bé obá dóló. 30Nye ó: «Tóʼ gá ɨ́ kwár dí ɨ́ bɨ̌n dóló nɨ̌. Jɔʼ bɨ́n ngá pyâl gʉ̂ʼ yɨ́, bɨ̌n bé ókœb mâ kamntʉl tyeelá, nye dína, mʉr apǎ kalwo ɨ́ koo kʉ́. Tiyɨɨ gá yê. Bɨ̌n e nzé e yé wâ. 31Mʉ̂r dí e bɨ̌n ó: “Bɨ̌n bé lɨ́ etiǐ kamntʉ̌l nɨ̌ ɨ́ yé?” nó, bɨ̌n e lɛ́ɛ́ e mʉr waá ó: “Ebě, Dâ, nye lɨ́ egwɨ̂m yê.”»
32Nó bʉ̂r o nyé á lómo bá, bé á nze tô, tó kœbɔɔ bísâ bíbyɛ̂h mpʉ̌ Yésʉs á boo lɛ́ɛ bé yɨ́. 33Jɔʼ bé á be lɨ́ etiǐ kamntʉl yɨ́, bʉr o tɨ̂ʼ ntɔ̂ʼ dî e bé ó: «Bɨ̌n bé lɨ́ etiǐ kamntʉ̌l nɨ̌ ɨ́ yé?»
34Bé ntɔ̂ʼ yala ó: «Dâ, nye lɨ́ egwɨ̂m yê.»
35Nó bé á tô e mâ kamntʉl waá kwá mé Yésʉs. Bé ntɔ̂ʼ janɔɔ míkán myɔ́ɔ́ ɨ́ koǒ kamntʉl, dilɔɔ̌ Yésʉs tɨ̂ʼ kʉ́. 36Nyɨɛ lɨ́ etô, bʉr lɨ́ etô le ejan nyé mikán myɔ́ɔ́ dóló nkpǎʼ e nkpǎʼ. 37Mpʉ nyé á be, nye mû le ekúnwo e Yerʉ́zalɛm, lɨ́ esulo Écwɨ́ʼ lé ólivier yɨ́, nó ó sɔ́má ómpʉ́n, yé á taare esoho ɨ́ buo buo le egúmlǒ Nzyɛ̌m e metyêl kʉ́kʉ́, ɨ́ mesimá ménɨ́nɨ́ɨ́ mɨ́mɛ̂h bé á bee má. 38Bé á lɨlɛ́ɛ ó: “Mɨná gúmlaa gá njwɨ́ɨ dí enze e díé mé Dâ Nzyɛ̌m nyá. Kwár mé Nzyɛ̌m, nye lónaa ɨ́ mepyɛbla. Bʉr o dí ɨ́ jʉ́o kʉ́ bá, bé dwêʼ Nzyɛ̌m kûm.”
39Bʉ́ʉ́ óFarizyɛ̂n á be tɨ̂ʼ ɨ́ sɔ́má bʉ̂r yaá bá, bé á lɛ́ɛ e né ó: «Lɛ̂ʼla, nkáŋláá le ompʉ́n bô.»
40Nó ó Yésʉs á yala e bé ó: «Mě lɛ́ɛ́ bɨ́n ó: bé sí dible mínum myɔ́ɔ́ nɛ́ɛ: mekóʼ, mé óbɨ̂n métwíí mɔ́ɔ́ kʉ́ lɨ́ egúmlo mê.»
Yésʉs lɨ́ ejɨ ɨ́ lɔ̌b Yerʉ́zalɛm
41Jɔ̌ʼ Yésʉs á pyâl bǎʼ e Yerʉ́zalɛm, ntɔ̂ʼ bee yé yɨ́, nye ntɔ̂ʼ jɨ édwê ɨ́ lɔ̌b wé. 42Nó nyé á lɛ́ɛ ó: «Yé bé go bé ɨ́ gʉ́a ɨ́ dʉ́ó lɨ̂ʼ mûh, sâ gwa gbá gó mepyɛbla ɨ́ léme yɨ́ nó, mpa gʉ́ tiʼe. Ɨ́ báánâ, yê go ó solá. Gó abe e nkul béé yê. 43Ebě, mimóhó, myé lɨ́ enze, jɔʼ bʉ̂r o dɔ̂m bɨ́n, bé ókɛb bɨ́n ɨ́ nká, sumǒ kôʼ dí ɨ́ lele lele wɨ́. Bé ómân bɨ́n, le enyêhle bɨ́n ɨ́ mipáʼ mímyɛ̂h. 44Bé ógbɛ́ɛ gó, Yerʉ́zalɛm, le egbah bwán bô bɨ́bɛ̂h dí go tʉ́ŋlʉ̌ bá. Bé ólíʼe gó ó, abe le ekóʼ kɛlá ɨ́ lʉ́ʉ́ kʉ́, ebě, go bé adweʼě jɔ̌ʼ Nzyɛ̌m á nze go ɨ́ menɔɔlʉ yɨ́.»
Yésʉs ɨ́ mpáh Nzyɛ̌m tʉ́ŋlʉ̌
(Matthieu 21.12-17; Marc 11.15-19; Yʉánɛs 2.13-22)
45Nó ó Yésʉs á nze nî ɨ́ mpáh Nzyɛ̌m, ntɔ̂ʼ táare éso bʉ̂r o b'á bɨbɛ́ma bisɔ̂ʼ tɨ̂ʼ bá. 46Nye ó: «Yê cɛmá ɨ́ Mekaná mé Nzyɛ̌m ó: Mbɛ̌r wâm, wé óbe ó mbɛ̌r mínjɨʼla. Tó kœb ó, bɨ̌n bɨɛ̌ dwir wé ó, ekul e bínzilngǎn!»
47Yésʉs á lɨlɛ̂ʼle bʉr ɨ́ mpáh Nzyɛ̌m tʉ́ŋlʉ̌ ó, dʉ́ó lɨ́lɛ̂h. Ojwɨ́ɨ o tɨ̂, bé le olɛ̂ʼla o métié ndu e minjwɨ́ʼ mí bʉ̂r, bé á be ó lɨ́ esáa nzɨ́ ejʉ̂ nyê. 48Bé á bé agʉ́ǎ mpʉ bé sâʼ nó yɨ́, ebě, minzɨnzɨ mi bʉ̂r mímyɛ̂h, myé á be lɨ́ ekʉ́ gwá jôʼlo nyê.
Селектирано:
Luc 19: ozm
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се