Luc 13
13
Bɨ̌n e dwírá míléme
1Jɔʼ yaá ó bʉ́ʉ́ bʉ̂r, bé á nze lɛ́ɛ e Yésʉs mpʉ̌ Pilátos á jʉ̂ bʉ́ʉ́ bʉ̂r ó Galilê ɨ́ jɔʼ bé á be lɨ́ edwě Nzyɛ̌m mindwéá yɨ́. Bé ntɔ̂ʼ pûhla métié mɔ́ɔ́ le maá mé ótír bé á pa tíʼe Nzyɛ̌m bá. 2Yésʉs ntɔ̂ʼ dî e bé ó: «Nzê bɨ̌n jwɨʼ ó, bʉr ó Galilê baá, bé á jʉ́ŋɔɔ ó, ebě, bé ó b'á bu sâ misyóm, laa bʉ́ʉ́ bʉ̂r ɛ̌? 3Heʼé, mě lɛ́ɛ́ bɨ́n ó, bɨ́n óbe, atúmo míkoo e misyóm mín le edwira míléme nó, bɨ̌n óbɛ̂h, bé ódîm ɨ́ nkɔb bʉr mpʉ bê. 4Nzê bɨ̌n jwɨʼ ó, bʉr kám e mwom tólóm mbɛ̌r mé Siloâm, wé á bíla bá ó b'á bu bébe, laa bʉ̂r ó Yerʉ́zalɛm bɨ́bɛ̂h ɛ̌? 5Heʼé, mě lɛ́ɛ́ bɨ́n ó, bɨ́n óbe, atúmo míkoo e mebébe mɨ́n le edwira míléme nó, lɛ́ɛ́, bɨ̌n ntémé, bé ódîm ɨ́ nkɔb bʉr mpʉ bê.»
Kɨkɛnǎ lɨ́ dí agúmogumo yɨ́
6Yésʉs ntɔ̂ʼ sâ bé kɨkɛna yɨ̂: «Nyʉ́ʉ́ mʉ̂r á si be lɨ́ ɨ́ pemé yé. Nye nzě nɨnaǎ lɨ́ yaá, lɨ́ esáa mpúmó, abee. 7Nye nzě lɛ́ɛ e mʉr á bɨbaʼle pemé nyá ó: “Paá bee: yé mû ó mimbú mílɛ̂l gbaa mé lɨ́ enzě naǎ lɨ́ yɨ̂, lɨ́ enzě sáa mpúmó, akœ̌b sɔ̂ʼ. Mě lɛ́ɛ́ gó ó, go twɛ́lɨɨ yê. Yé lɨ́ edě sí, abe mé e nyɔm ɨ́ yé?” 8Nó ó mbɔ̂ʼlʉ pemé á nze lɛ́ɛ e né ó: “Dâ ɛ̌, paá bá bîr yê, yé páa báʼǎ di gúú mbû ngwár. Me ópû yé ɨ́ mempah mɨ́mɛ̂h, mé osʉ bíbwǎh bí ékunuu. 9Yʉ́ʉ́ jɔʼ, yé e nkul egúmo mpúmó ɨ́ mbú dí enze wɨ́. Yé óbe, agúmo nó, mé ocwɛl gó yǎ.”»
Yésʉs lɨ́ etǐʼ mbél mʉ́má ɨ́ móhó sábat
10Ɨ́ gúú móhó sábat, Yésʉs á be ó lɨ́ elɛ̂ʼle bʉ̂r o b'á be ɨ́ mpáh minjɨʼla bá. 11Gúú mbél mʉ́má, wé á be ó tɨ̂. Nye á be ó e mbɨ́ǎ sísǐm. Wé á sâ nye ó, nyʉ̂l díʼee nye niʼrá. Nye á jaa didi ó, njɨ kûkur, tâŋ mimbû kám e mwom, asɨ́ʼasɨʼa. 12Jɔ̌ʼ Yésʉs á bee nye nó yɨ́, nye ntɔ̂ʼ jébe nyê. Nye e né ó: «Mʉmá, ekpaa lô, lɨ́ síe.»
13Nye ntɔ̂ʼ kɛl nyé mebô ɨ́ nyʉ̂l. Tyé e tyé yaá, nyʉ̂l ntɔ̂ʼ sɨ́ʼa nyê. Mʉmá waá ntɔ̂ʼ tyɛ̂b tîtyěl, ntɔ̂ʼ dwě Nzyɛ̌m kûm. 14Njwɨ́ɨ mpáh minjɨʼla ntɔ̂ʼ jóʼo ébébe é léme, duho ɨ́ syɛ́ɛla mé Yésʉs, ebě, nye á si tiʼ mʉr ɨ́ móhó sábat. Njwɨ́ɨ mpáh minjɨʼla waá ntɔ̂ʼ lɛ́ɛ le entumo e bʉ̂r ó: «Ɨ́ sóno nyɨnyɛ̂h, yé e móhó ngwár dí móhó sábat wɨ́. Mimóhó mísaman, myê mɨná gá e nyɔm ó, lɨ́ esú ó, mɨná séaa gâ bisyɛ́ɛ́. Ntaá nzě joma gá ɨ́ mimóhó myaá, abe yɨ́ɛ móhó sábat.»
15Tî Yésʉs, nye e né ó: «Bɨ̌n baányâ-mikóo bâ, ɨ́ móhó sábat, bɨ̌n óbɛ̂h, bé lɨ́ etii bíntœœ ndu e bitab bín, lɨ́ etô e byé ɨ́ mentíbé. Nzê yé abe nó ɛ̌? 16Mʉmá nyâ, nye ó nta mé Abraham. Sátan nyɨɛ, nyɨ́ boó kâʼ nyé menkara. Nye mû kɛ́ʼá ó, tâŋ mimbû kám e mwom. Bintœœ pǎ nyɛɛ́ tiɔɔ ɨ́ móhó sábat, á dwɛʼra e mʉr!»
17Mpʉ̌ Yésʉs á yala e né nó yɨ́, ontɨ̂m le obɨn bé bɨ́bɛ̂h ntɔ̂ʼ jóʼo sôn. Entumo e bʉ̂r lɨ́ɛ, lé á be lɨ́ ekʉ́ soho ɨ́ lɔ̌b mbɨambɨa bísyɛ́ɛla bíbyɛ̂h nyé á sɨsâ bí.
Kɨkɛna mâ díh é nzɔ́m
(Matthieu 13.31-32; Marc 4.30-32)
18Yésʉs á dî ó: «Mpóʼo mé Nzyɛ̌m, nye lɨ́ enwɨɨla e yé? Mé e nkul ejwɨʼ nyé e wáǎ mbǐ sɔ̂ʼ? 19Nyě nwɨɨlá ó e díh é nzɔ́m nyʉ́ʉ́ mʉ̂r á to myam ɨ́ pemé yé lɨ́. Lê nzě pâh, sâ lɨ́ ɨ́ ntuuu. Binʉ̌n nzě lʉ́o mɔ̂ʼ mɔ́ɔ́ tɨ̂ʼ ɨ́ milɔ́ɔ.»
Kɨkɛnǎ levure
(Matthieu 13.33)
20Yésʉs ntɔ̂ʼ báʼǎ lɛ́ɛ ó: «Mpóʼo mé Nzyɛ̌m nwɨɨlǎ e wáǎ mbǐ sɔ̂ʼ? 21Nyě nwɨɨlá ó e levure. Nyʉ́ʉ́ mʉ́má á si pûhla yé le okílo ó pǔ blêr mekám mébá. Tó kumo ɨ́ jɔ̌ʼ tímé blêr, wé á nkaŋle wɨ́wɛ̂h yɨ́.»
Ebê, lé ɨ́ mána
22Yésʉs á be lɨ́ elaa bínkana e bínkana, le mékwár e mékwár, lɨ́ etô le edwe bʉ̂r milɛ́ʼlá nzɨ́ e nzɨ̌ ɨ́ jɔʼ nyé á be lɨ́ etô Yerʉ́zalɛm yɨ́. 23Nyʉ́ʉ́ mʉ̂r ntɔ̂ʼ dî e Yésʉs ó: «Dâ ɛ̌, nzê bʉr o ngá bǐ twǐʼ njʉ̌m dǐ bá, bé abuo ɛ̌?» Yésʉs ntɔ̂ʼ yala e né ó: 24«Gbáʼ gá nkul lɨ́ enî lɨ́ ebê dí ɨ́ mána lɨ́. Mě lɛ́ɛ́ bɨ́n ó: bʉr ɨ́ buo buo, bé ógwɨ̂m énî tɨ̂, bɨ́ɛ abe e nkul.
25«Jɔʼ mʉ̂r mbɛ̌r ógbɔlwa, nzě pɨr ébê le engʉŋ yɨ́, bɨ̌n bé ólîʼ kʉ̌l. Bɨ̌n bé ókwâʼle, jébe ó: “Dâ ɛ̌, dibɨɨ bɨ́h ebê ʉ.” Nye óyala ó: “Mé agʉ́ǎ nko bɨ̂n duho yɨ́.” 26Bɨ̌n bé ónyɛl élɛ́ɛ e né ó: “Dâ ɛ̌, mɨná gá ó b'á be lɨ́ edɨde le enyǔl gúmo gwár. Ntʉ bɨ́h gó á dwidwe milɛ́ʼlá ɨ́ minkpǎʼ mí nkana gá yɨ́ná bá ɛ́?” 27Nye óbáʼǎ lɛ́ɛ ó: “Mé agʉ́ǎ nko bɨ́n dí eduho yɨ́. Tó tyɛ̂b gá lɨ́ ejaa, bʉr o dí egbah métié bá!” 28Gúmo yaá ó bɨ́n ngá jóno le epûʼlo médye yɨ́, ɨ́ jɔʼ bɨ́n óbeě Abraham, Isaac, Yákɔb, le ogwíha o mílɔ̌b mé Nzyɛ̌m mû e bidiá ɨ́ Mpóʼo mé Nzyɛ̌m, bɨ̌n bɨɛ guhɔɔ̌ kʉ̌l yɨ́. 29Bʉr, bé óduhǒ nko mejɨma me dʉ́o, ndu e nko mejá mé dʉ́o. Bé óduhǒ nko tín ndu e nko tie. Bé óswâl, ntɔ̂ʼ nʉa bídiá byɔ́ɔ́ ɨ́ dína ɨ́ Mpóʼo mé Nzyɛ̌m. 30Bʉr o dí ɨ́ báánâʼ mepíhe bá, bé ótyɛ̂b mésôʼ. Baá dí báánâʼ mesôʼ bá, bé ókǎ tyɛ̂b mépíhe.»
Yésʉs lɨ́ ejɨ ɨ́ lɔ̌b bʉ̂r ó Yerʉ́zalɛm
31Jɔʼ yaá ó bʉ́ʉ́ óFarizyɛ̂n, bé á pyâl gúmó Yésʉs á be yɨ́. Bé e né ó: «Duhaa wâ. Go e tó gúmo swîh, ebě, Erôd, nye lɨ́ edǐ jʉ̂ gô!»
32Yésʉs ntɔ̂ʼ yala e bé ó: «Tó lɛ́ɛ gá pɨpɨ́ʼ tír waá ó: “Me náǎ ó lɨ́ eso méleme le etiʼ mímbêl mûh le ómɛ́n. Ɨ́ móhó lɛ̂l, me ósîl syɛ́ɛ́ yâm.” 33Sâ gwár, yé jala ó, me tôʼ e tyen yâm dóló mûh, le ómɛ́n, le móhó ká bɔma wɨ́, ebě, yé ajala ó, ngwíha milɔ̌b mé Nzyɛ̌m, nye jʉ́ŋɔɔ yʉ́ʉ́ súm swîh, njɨ̌ Yerʉ́zalɛm.
34«Yerʉ́zalɛm, Yerʉ́zalɛm, gua mʉr dí ejʉ̂ ógwíha o mílɔ̌b le elúmo baá Nzyɛ̌m dí elómlo gó bá mekóʼ nyá! Nzɔʼ ntíá mé á be lɨ́ egwɨ̂m ésyɛŋ bwán bô mpʉ ábyɛɛ́-kúo dí esyɛŋ bwán bé sí mempabaá mé yɨ́, bɨ̌n bɨbené benáa. 35Jwɛ́ʼɛ́ɛ́ gâ, mbɛ̌r wɨ́n, wé ólíʼɔɔ ó gumo. Mě lɛ́ɛ́ bɨ́n ó, bɨ̌n bé ákǎ bee mê, tó pyâl ɨ́ jɔʼ bɨ́n ngá lɛ́ɛ ó: “Mɨná gúmlaa gá waá dí enze e díé mé Dâ nyá.”»
Селектирано:
Luc 13: ozm
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се