Luc 10
10
Yésʉs lɨ́ elómo ómpʉ́n mekám nzaangbá le obá
1Píe tɨ̂, Tî Yésʉs nzě twâr bʉ́ʉ́ bʉ̂r, tâŋ mekám nzaangbá le obá, ntɔ̂ʼ lómo bé dóló, bʉr obá óbá. Bé ntɔ̂ʼ tô bínkana e bínkana byɛ̂h, ɨ́ bisúm bíbyɛ̂h nyé á be ó, nye kúmaa bí. 2Nó nyé á lɛ́ɛ e bé ó: «Yé ɨ́ buo méde mû sí tɨ̂ ɨ́ pemé má. Sâ gwár, bʉr o tó kpɛm méde maá bá, bé abuo. Nó, jɨʼlaa gá e Kúm pemé ó, nye lómaa bilóbila ɨ́ buo buo. Bé tô kpɛm méde ɨ́ pemé. 3Tóʼ gâ. Paá bee: mě lómó bɨ́n ó mpʉ bwá bínteme páʼ onkœœ! 4Anʉa gá mimpɨ́ʼ, myaá mí mɔnɨ́, nkʉ̂ myah, nkʉ̂ osípah. Abára gá e mʉr téme-nzɨ̌. 5Jɔʼ bɨ́n ní ɨ́ mbɛ̌r yɨ́, lɛ́yɨ́ɨ́ gá bʉr ó mbɛ̌r ó: “Mepyɛbla, mé díʼee bɨ̌n ɨ́ miléme!” 6Mʉ̂r mbɛ̌r waá bé mʉ̂r mepyɛbla nó, meswɨhlɨ mɨ́n, mé ókœ̌b já ɨ́ lémé wé. Nyé obáʼǎ nʉa mépyɛbla me dí eduho ɨ́ meswɨhlɨ maá má. Nyé bé abe mʉ̂r mepyɛbla nó, mepyɛbla maá, mé óbúla, báʼǎ kumo ɨ́ bɨ̌n. 7Mbɛ̌r bɨ́n ngá di wɨ́, diʼee gá tɨ̂. Déʼ gá sá bʉ̂r o tɨ̂, bé ódwe bɨ́n yɨ́, ebě, syɛ̂l mesâ jala ó, dweŋɔɔ myɛ́na mé. Atô le ede gá mímbɛ̌r e mímbɛ̌r myɛ̂h. 8Bɨ́n ní ɨ́ nkana, kœb ó, bé lɨ́ egwá baʼle bɨ́n nó, bɨ̌n e dé sá yɨ́yɛ̂h ngá dweŋɔɔ bɨ́n yɨ́. 9Tiʼɨɨ gá mimbél mí nkana yaá. Bɨ̌n e lɛ́ɛ́ e bʉr ó nkana yaá ó: “Nzyɛ̌m mû ó kúno etyêl Mpóʼo nyé ɨ́ bɨ̌n.” 10Bɨ́n pyál ɨ́ yʉ́ʉ́ nkana, bʉr o tɨ̂ʼ abaʼle bɨ́n nó, tóʼ gá ɨ́ minkpǎʼ mi tɨ̂. Bɨ̌n e tútúnó nkpǎʼ e nkpǎʼ ó: 11“Bɨ̌h bɨ́ kuro pím nkana yɨ́n dí enara bɨ́h ɨ́ mekʉ̌ nyɨ́. Gʉ́ŋáá gá ó, Mpóʼo mé Nzyɛ̌m mû ó lɨ́ ekúnwo e bɨ̌n!” 12Mě lɛ́ɛ́ bɨ́n ó, dʉ́ó Nzyɛ̌m ótíʼe bʉ̂r milɔ̌b, dwe bé mebě yɨ́, bintɨ́ʼá byɔ́ɔ́, byé óbuú bwaʼ, laa byaá bi bʉ̂r ó Sodôm.»
Bʉr o dí ebeně Yésʉs bá
(Matthieu 11.20-24)
13«Nkoó, nye ó e bɨ̌n, bʉr ó Korazîn! Nkoó, nye ó e bɨ̌n, bʉr ó Bétsɛ́da! Yé bé mesimá mé á sâ kwá nyɨ́n má, mé á syɛ́ɛ ó Tîr e Sidɔ̂n nó, lɛ́ɛ́, bʉr o tɨ̂, bé á si di ɨ́ bwǎh, kʉ́ba mínkura, le elɔma méswií lɨ́ elɛ̂ʼle ó, bɨ́ túmo míkoo e mebébe mɔ́ɔ́, le edwira míléme. 14Sɨ́ǎ yaá ó, dʉ́ó Nzyɛ̌m ngá tíʼe bʉ̂r milɔ̌b yɨ́, Tîr, bé e Sidɔ̂n ngá be, abuú dweŋɔɔ bíntɨ́ʼá mpʉ bɨ́n yɨ́. 15Á gua, Kapernáʉm, nzê go óbɨ́nɔɔ, tó pyâl ɨ́ jʉ́o kʉ́ ɛ̌? Tʉ̂toʼó! Go ósulɔɔ sí, tó pyâl ɨ́ bɨ́ siʼe.»
16Nye nzě lɛ́ɛ le ompʉ́n bé ó: «Waá sá bɨ́n mejóʼo nyá, nyɨ́ jóʼo mê. Waá ntémé béné bɨ́n nyá, nyɨ́ bene ntémé me. Ntémé, waá béné mé nyá, nyɨ́ bene mʉ̂r á ntɨh me nyá.»
Mpúla ompʉ́n mé Yésʉs
17Bʉr mekám nzaangbá le obá baá, mpúla bé á búla nyɨ́, bisʉhʉʉ, byé á be bé ɨ́ miléme ó lwɨ́ŋlá. Bé ó: «Dâ ɛ̌, meleme, mé lɨ́ esâ bɨ́h mejóʼo ɨ́ jɔʼ bɨ́h dí eso mé e nzɨ̌ díé lô yɨ́!»
18Yésʉs ntɔ̂ʼ lɛ́ɛ e bé ó: «Me á si bee Sátan lɨ́ eduho ɨ́ jʉ́o kʉ́ mpʉ̌ ndweh mpíé. 19Jóʼláá gâ: me á si dwe bɨ̌n nkul etíbe ónyʉ́a ndu e bibámlwál. Mɨ́ dwe bɨ́n nkul entaa ménkul mɨ́mɛ̂h me ntɨ̂m e mbɨn gá wɨ́ná. Sá ébébe, yé abe e nkul epyâl ɨ́ bɨ̌n. 20Sâ gwár, ayɨ́ buú soho gá ɨ́ lɔ̌b mímbɨ́a mísísǐm, byé lɨ́ esâ bɨ́n mejóʼo. Sohaa gá ebe míé mɨ́n dí micɛmá ɨ́ jʉ́o kʉ́.»
21Ɨ́ jɔʼ yaá, Sísǐm mé Nzyɛ̌m nzě lóŋlǒ lémé mé Yésʉs e bisʉhʉʉ. Nó nyé á lɛ́ɛ ó: «Dâ, me lɨ́ edwe gó kûm, gua, Njwɨ́ɨ kʉ́ e sí, ebě, go á si lɛ̂ʼle bʉr o dí mpʉ bwá ó ntwǒm bá, bisá gó á sol ocwóó ndu e l'ogwɨ́a ó sí yɨ̂ʼ bí. Dâ ɛ̌, yé ó nó! Ebě, go á boo bi bísʉhʉʉ ɨ́ lémé gô ó, yé sáŋɔɔ nó.
22«Sɔ́ŋ wǎm á si dwe me bisá bíbyɛ̂h. Abe e mʉr dí egʉ́a Mwân, pɛ̌ʼ njɨ Nzyɛ̌m Sɔ́ŋ nye omér. Abe e mʉr dí egʉ́ǎ Nzyɛ̌m Sɔ́ŋ, pɛ̌ʼ njɨ Mwân ndu e waá Mwân kpɛ́l élɛ̂ʼle nyá.»
23Yésʉs ntɔ̂ʼ lɛ́ɛ le ompʉ́n bé, bé mû bé omér ó: «Bɨ̌n bɨɛ, metyɛʼ me mpóm, mé díʼee e bɨ̌n, ebě, míh mɨ́n, mé lɨ́ ebee bísá bínɨ̌. 24Mě lɛ́ɛ́ bɨ́n lɨ́ otyeetye ó, ogwíha o mílɔ̌b le ojwɨ́ɨ ɨ́ buo buo, bé á gwɨ̂gwɨm ó, bé béyɨɨ sá bɨ́n dí ebee yɨ̂, sâ gwár, abee, le ejóʼǒ sá bɨ́n dí ejóʼo yɨ́, sâ gwár, ajóʼo yê.»
Kɨkɛna mʉ̂r mpam
(Matthieu 22.34-40; Marc 12.28-34)
25Nyʉ́ʉ́ lɛ̂ʼla metié nzě mɔa sí, nzě bóblǒ Yésʉs. Nye e né ó: «Lɛ̂ʼla, me sâʼ wáǎ mbi sɔ̂ʼ dí ó, me nʉ́aa twǐʼ njʉ̌m dǐ, jala e nkɔb líʼe nyǎm?» 26Yésʉs nzě yala ó: «Metié gá mɨ́ná, mé lɨ́ elɛ́ɛ yé? Go lɨ́ eláa yé tɨ̂?» 27Mʉr waá ntɔ̂ʼ yala ó: «Mé lɛ́ɛ́ ó: “Kpɛlɨɨ̌ Dâ, dí Nzyɛ̌m gǒ nyá, le lémé gô wɨ́wɛ̂h, le sísǐm gô wɨ́wɛ̂h, le nkul nyǒ nyɨnyɛ̂h, le pɨʼ nyǒ nyɨnyɛ̂h.” Mé lɨ́ ebáʼǎ lɛ́ɛ ó: “Kpɛlɨɨ mɨ́ɔɔ́ gǒ mʉr mpʉ gó dí ekpɛl gó mʉr tɨ̂ʼ yɨ́.”» 28Yésʉs ntɔ̂ʼ lɛ́ɛ ó: «Gʉ́ kʉ́ gwá yala. Sáʼ nó, go nkʉ̂ tiʼe.»
29Tó kœb ó, lɛ̂ʼla waá á be lɨ́ edǐ lɛ̂ʼle ótîtyěl wé. Nye ntɔ̂ʼ dî e Yésʉs ó: «Á mɨ́ɔɔ́ wǎm mʉr, nye nzé?»
30Yésʉs ntɔ̂ʼ lɛ́ɛ ó: «Nyʉ́ʉ́ mʉ̂r á be ɨ́ duhǒ Yerʉ́zalɛm ó, nyě tó ó Yerikô. Nyé dína téme-nzɨ̌ nɛ́ɛ: binzilngǎn nzě duho lɨ́ eboʼo bé á la lɨ́, nyába nyé ɨ́ nyʉ̂l, pɛʼɔɔ nyé mikán, bíŋɔɔ nyê, ɨ́ bíŋɔɔ bíŋɔɔ, líʼɔɔ nyé múu ɨ́ séhé. 31Nó nyʉ́ʉ́ pára á be lɨ́ elaa ɨ́ nzɨ̌ nyaá. Mbeá nyé á bee mʉ̌r nɨ̌ yɨ́, nye ntɔ̂ʼ syɛ̂hle, ntaa ɨ́ lʉ́ʉ́ émpah e nzɨ́, tô yé. 32Jwɨʼ gwár e gwár yaá, ɨ́ jɔʼ mʉ̂r onzweh mé Levî á pyâl tɨ̂, dwɛ̂ʼ mʉ̂r waá yɨ́, nye á jaa kpâh ó kpáháa ɨ́ gúú páʼ nzɨ́. 33Nó yé á ka sâ ó, nyʉ́ʉ́ mʉ̂r Samarî á be lɨ́ elaa ɨ́ nzɨ̌ mpwár nyaá nyá, á nze kumǒ gúmo yaá. Mbeá nyɨ́ɛ á bee mʉr waá yɨ́, nye kʉ́ nzě jɨ̂ʼ nyé nkoó, 34sîhlě bǎʼ e né, sʉ nyé menyoʼ le múlo ɨ́ mepɨ́ɨ́, dyɛl mé e mimyɔʼ. Nye nzě byɛɛle mʉ̂r waá, kɛl nyé kʉ́ tír nyé mʉr tɨ̂ʼ á kɨkalwo tɨ̂ʼ nyá, ntɔ̂ʼ tô e né, tó dyêʼ nyé ɨ́ joó ɨ́ gúú mbɛ̌r ójwóo. Bé e nɔ́ɔ́ ntɔ̂ʼ bá dǐ sɔ́má, mʉr Samarî lɨ́ esúʼo nyê. 35Jáŋɔɔ sí. Ɨ́ mɛ́n, nye ntɔ̂ʼ nʉa mínzaŋ mí mɔnɨ́ mimbá, dwe mʉ̂r mbɛ̌r. Nye e né ó: “Gwá baʼle mé nyǎ. Jɔʼ mé óbúla yɨ́, me óbwóolo gó sá yɨ́yɛ̂h gó ngá dímle lɨ́ ebaʼle nyé yɨ́.”»
36Yésʉs ntɔ̂ʼ dî e lɛ̂ʼla metié waá ó: «Ɨ́ bʉr olɛ̂l bé á bee mʉr á bíŋɔɔ nyá bá, waá wáa á lɛ̂ʼle ó, nye ó mɨ́ɔɔ́ wé mʉr nyá? Gǒ bee nyá?» 37Lɛ̂ʼla metié ntɔ̂ʼ lɛ́ɛ ó: «Waá á cwɨ́a e né nyá.»
Yésʉs ntɔ̂ʼ lɛ́ɛ e né ó: «Tóʼ. Go e tó sâ jwɨʼ gwár yaá.»
Yésʉs lɨ́ etó beě Mááta, bé e Maria
38Mpʉ̌ Yésʉs, bé le ompʉ́n bé, bé á be lɨ́ etô ɨ́ nzɨ̌ nyaá yɨ́, bê nzě pyâl ɨ́ nyʉ́ʉ́ kwár. Mʉmá kwár nyaá, díé lé Mááta, ntɔ̂ʼ soho nyê, tira nyé ntɔ́ɔ ɨ́ mbɛ̌r wé. 39Nó Mááta á be ó e mɨ́ɔɔ́ wé, Maria. Tî Yésʉs á be ó lɨ́ elwib e Maria, Maria waá ndîndǐl bǎʼ e mekʉ̌ mé lɨ́ ejôʼlǒ sá nyé á lɨlɛ́ɛ yɨ́. 40Mááta nyɨɛ á be ó lɨ́ elûhwa e bisyɛ́ɛ́ ɨ́ buo buo. Nye nzě pyâl gúmó Yésʉs á be yɨ́, le elɛ́ɛ e né ó: «Dâ ɛ̌, nzê yé abá lɛ́ɛ gó sɔ̂ʼ ɨ́ jɔ̌ʼ Maria dí entúŋlo mɛ̂m me omér e bisyɛ́ɛ́ nó yɨ́ ɛ́? Lɛ́yɨ́ɨ́ nyé ó, nye kœ́bɨɨ me ɨ́ syɛ́ɛ́!» 41Tî Yésʉs ntɔ̂ʼ yala e né ó: «Mááta, Mááta, gua, gǒ yéʼwó ó bisɔ̂ʼ ɨ́ buo buo. 42Tó kœb ó, sá dí ɨ́ buú buǒ nyɔm yɨ́, yé ó njɨ gwár. Sâ yaá, yé ó mbɨambɨa nkɔ̌b Maria nyɨɛ pɛ́h nyɨ́. Abe e mʉr ópɛʼ nyé nyǎ.»
Селектирано:
Luc 10: ozm
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се