Yʉánɛs 13
13
Yésʉs lɨ́ ejwɨɨ ómpʉ́n mekʉ̌
1Yé á be ó, nzɔɔ Páska mû kúno ebwalɔɔ. Yésʉs nyɨɛ á be ó sí boó gʉ́a ó, jɔʼ dí ó, nye káa duhǒ sí yɨ̂, bére kwá Sɔ́ŋ yɨ́, mû ó sí pyâl. Jɔʼ yɨ́yɛ̂h, nye á be ɨ́ buú kpɛl bʉ̂r bé, bé á di ɨ́ sí yɨ̂ʼ bá. Nye á kpɛl bé ó, abe le odumo.
2Yésʉs, bé le ompʉ́n bé, bé á be ó lɨ́ ede. Jɔʼ yaá, sɔ́ŋ meleme á be ó sí tyɛ̂b Yʉ́das, mwân mé Simon Iskariôt, ɨ́ léme, dwe nyé pɨʼ ó, nye bɛ́maa Yésʉs. 3Yésʉs mʉr tɨ̂ʼ á be lɨ́ egʉ́a ó, nye á duho ó kwá mé Nzyɛ̌m. Nye ntémé óbúla kwá mé Nzyɛ̌m. Nó ntémé, Nzyɛ̌m á be ɨ́ gbâ sá yɨ́yɛ̂h sí jwɨ́ɨ́ yé. 4Bé dína lɨ́ ede nɛ́ɛ: nye nzě mɔa sí, nzě pɛ̌ʼ kán kʉ́, nʉa sána kán, tyeele nyé ɨ́ kuó. 5Nzě nʉa médíbé, gbâ ɨ́ sʉ́á, nzě nyɛl éjwɨɨ ómpʉ́n mekʉ̌, le epîm mékʉ̌ mɔ́ɔ́ e kán nyé á be e wé ɨ́ kuó wɨ́. 6Nye nzě tó pyâl gúmó Simon Pétrus á be yɨ́. Simon Pétrus, nye e né ó: «Dâ ɛ̌, nzê go ó jálá le ejwɨɨ mé mekʉ̌ ɛ̌?»
7Yésʉs, nye e né ó: «Ɨ́ báánâ, go dína ó, apǎ gʉ́ǎ sá mé mû lɨ́ esâ bɨ́n yɨ̂. Sâ gwár, go ósûʼlǎ gʉ́a yê.»
8Pétrus, nye e né ó: «Heʼé, Dâ! Go ányamlě jwɨɨ mé mekʉ̌.»
Yésʉs nzě yala e né ó: «Mé bé ajwɨɨ gó mekʉ̌ nó, go l'abi nkɔ̂b ɨ́ páʼ wâm.»
9Simon Pétrus, nye e né ó: «Dâ ɛ̌, yé bé nó wá, ayɨ́ jwɨɨ mé njɨ mekʉ̌ e mekʉ̌. Jwɨyɨɨ mé ntémé mebô ndu e lʉ̂.»
10Yésʉs, nye e né ó: «Mʉr mû sí boó jwɨa nyá, nyé akǎ jala le ebáʼǎ jwɨɔɔ, alaa ó njɨ mekʉ̌, ebě, nye ó nyʉ̂l nyɨnyɛ̂h njwɨá. Bɨ̌n bé ó minjwɨá. Sâ gwár, ntʉ bɨ́n bɨ́bɛ̂h dí minjwɨá.» 11(Yésʉs á be ó lɨ́ eboó gʉ́a mʉ̂r óbɛ́ma nyé nyá. Sá tɨ̂ʼ ó nyé á lɛ́ɛ ó: “Sâ gwár, ntʉ bɨ́n bɨ́bɛ̂h dí minjwɨá” yɨ́.)
12Jɔ̌ʼ Yésʉs á sil ejwɨɨ bé mekʉ̌ yɨ́, nye ntɔ̂ʼ báʼǎ bwâr kán wé, báʼǎ di ɨ́ téble. Nye ó: «Nzê bɨ̌n bɨ́ gʉ́ǎ sá mê sá bɨ́n nɨ̌ ɛ̌? 13Bɨ̌n jɨ́jébé mé ó: “Lɛ̂ʼla”, nkʉ̂ ntɔ̂ʼ “Tî Yésʉs”. Bɨ̌n bé lɨ́ ekʉ́ gwá jébe, ebě, me ó dí kwahaá nye. 14Mɛ̂m, Lɛ̂ʼla ndu e Tî wɨ́n sí jwɨɨ bɨ́n mekʉ̌ nó, nó yé lɛ́ʼlé ó, bɨ̌n ntémé bé ɨ́ jala le ejwɨɨla mékʉ̌ páʼ nyɨ́n. 15Mě dwé bɨ́n ó, mveʼle, ó bɨ̌n ntémé nkʉ̂ sɨ̂sǎ mpʉ mê sá bɨ́n yɨ̂. 16Mě lɛ́ɛ́ bɨ́n lɨ́ otyeetye ó, abe e syɛ̂l ngwár dí elaa njwɨ́ɨ wé. Lʉ́mla áláá mʉ̂r lómó nyé nyá ɨ́ dúu. 17Ɨ́ báánâ, bɨ̌n bɨ́ gʉ́a bísɨ́ǎ byaá. Bɨ́n ósâ byé nó, bɨ̌n bé óbe ó mbɨ̂mbɨá.»
Syɛ́ɛla mé Yʉ́das
18«Mé alwib ɨ́ lɔ̌b wɨ́n, bɨ̌n óbɛ̂h, njɨ mʉr ngwár. Me lɨ́ egʉ́a baá mé á twâr bá. Twárá mé á twárɔɔ nyɨ́haá mʉ̂r wɨ́, wé á be ɨ́ jala, lɨ́ esú ó, péh Mékaná mé Nzyɛ̌m, yé díraa. Ebě, yê cɛmá ó: Mʉr dí ede méde mâm nyá, nyɨ́ dwira e me. 19Me lɨ́ eboó lɛ́ɛ bɨ́n nó, ɨ́ jɔ̌ʼ syɛ́ɛla yé yaá dína apǎ syɛ́ɛ yɨ́. Mě lɛ́ɛ́ nó ó, ebě, ɨ́ jɔʼ yé ókǎ syɛ́ɛ yɨ́, bɨ̌n bé óbûʼla ó, mɛm ó dí Me-ó-tɨ̂. 20Mě lɛ́ɛ́ bɨ́n lɨ́ otyeetye ó, mʉr dí enʉa mʉ̂r mé dí elómo nyá, nyě nʉá ntémé ó me. Nó ntémé, mʉr dí enʉa mé nyá, nyě nʉá ó, mʉr á ntɨh me nyá.»
21Jɔʼ nyé á sil elwib mpʉ́nʉ̌ yɨ́, milɔ̌b myaá, myé ntɔ̂ʼ tɨ̂l nyé mekʉ̌ sí. Nye nzě boʼlo ó: «Mě lɛ́ɛ́ bɨ́n lɨ́ otyeetye ó, mʉr ngwár ɨ́ sɔ́má gá yɨ́ná óbɛ́ma mê.» 22Ompʉ́n nzě táare édwɛ̂ʼla páʼ nyɔ́ɔ́, miléme ɨ́ mo ɨ́ nzamá, agʉ́a mʉ̂r nyé á lwib ɨ́ lɔ̌b wé nyá. 23Nyʉ́ʉ́ mpʉ́n Yésʉs á bu kpɛl nyá, á be ó bǎʼ e Yésʉs, lʉ́ wé lɨ́ edyɛ̂ʼwo ɨ́ bɨr mé Yésʉs. 24Simon Pétrus nzě kwâb nyé ó, nye díʼee Yésʉs díé é mʉ̂r nyé á lwib, dumo e né nyá. 25Mpʉ́n waá nzě dwira, dyêʼ lʉ̂ ɨ́ bɨr mé Yésʉs, nzě dî e né ó: «Dâ ɛ̌, mʉr waá, nye nzé?»
26Yésʉs nzě yala ó: «Me ótwǎr péh blêr ɨ́ sʉ́á méde. Mʉr mé ódwe nyá, mʉr waá ó tɨ̂ʼ nyá.» Yésʉs ntɔ̂ʼ nʉǎ péh blêr, twar méde, nzě dwě Yʉ́das, mwân mé Simon Iskariôt.
27Lě Yʉ́das á nʉa blêr yaá, lě Sátan ntɔ̂ʼ á nî ɨ́ nye. Yésʉs, nye e né ó: «Sá gó dí egwɨ̂m ésâ yɨ́, kaá sâ yé kám e kám!»
28(Bé á bé agʉ́ǎ sá nyé á lɛ́ɛ nye nó yɨ́. 29Ɨ́ mpʉ yé dí ó Yʉ́das ó b'á be lɨ́ ebaʼle ékúró yɨ́, bʉr ɨ́ buo buo, bé á be lɨ́ ejwɨʼ ó, Yésʉs á lómo nye ó, nye tôʼ bwâm sá yé óbe bé e nyɔm ɨ́ nzɔɔ yɨ́, nkʉ̂ ntɔ̂ʼ ó, nye súʼaa baántéʼenteʼe o bʉ̂r.) 30Lě Yʉ́das á kʉ nʉa blêr, le nyé á tô kʉ̌l. Yé á be ó ɨ́ pum.
Edwán lé étié
31Jɔ̌ʼ Yʉ́das á bě sí tô kʉ̌l yɨ́, Yésʉs, nye e bé ó: «Ɨ́ báánâ, kûm Mwân mé Mʉr, nyɨ́ pan. Kûm mé Nzyɛ̌m, nyɨ́ pan ntémé ɨ́ nye. 32Kûm mé Nzyɛ̌m bé lɨ́ epan ɨ́ Mwân mé Mʉr nó, lɛ́ɛ́, Nzyɛ̌m ntémé ógúmlo Mwân wé ɨ́ nye mʉr tɨ̂. Nó ntémé nyé múo nzě gúmlo nyé yɨ́. 33Bwán bâm, me ka líʼ lɨ́ edi e bɨ̌n ó, mâ jɔʼ. Bɨ̌n bé ósáa mê. Nó, mě lɛ́ɛ́ bɨ́n báánâʼ ó, sá mé á nyɛɛ lɛ́ɛ le oYúden yɨ́. Yé ó: bɨ̌n bé abe e nkul etô nko mé múo tô yɨ̂. 34Me mû ó lɨ́ etyêl bɨ́n edwán lé étié: kpɛlaa gá páʼ nyɨ́n mpʉ mé á kpɛl bɨ̌n yɨ́. 35Bɨ́n sí kpɛla páʼ nyɨ́n nɛ́ɛ: bʉr bɨ́bɛ̂h, bé ogʉ́a tɨ̂ʼ ó, bɨ̌n bé ó ompʉ́n bâm.»
Pétrus ólɛ́ɛ ó, nyé agʉ́ǎ Yésʉs
(Matthieu 26.31-35; Marc 14.27-31; Luc 22.31-34)
36Simon Pétrus nzě dî e né ó: «Dâ ɛ̌, go ótô nkoó?»
Yésʉs ntɔ̂ʼ yala e né ó: «Gó abe e nkul edû mé ɨ́ báánâʼ nko mé múo tô yɨ́. Go ósûʼlǎ dû mê.»
37Pétrus, nye e né ó: «Dâ ɛ̌, mé abe e nkul edû gó báánâʼ ɨ́ yé ɛ́? Me ɨ́ cǎr ó, me dwêʼ twiʼ yâm lɨ́ esú lô.»
38Yésʉs, nye e né ó: «Nzê yê tyeetye ó, go ɨ́ cǎr ó, go bírɨɨ twiʼ yô lɨ́ esú lâm ɛ̌? Me lɨ́ elɛ́ɛ gó lɨ́ otyeetye, njʉ́m kúo apǎ kwâʼ, go ókɛ́la nzɔ̂ʼ lɛ̂l ó, gó agʉ́a mê.»
Селектирано:
Yʉánɛs 13: ozm
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се