Milʉ́mlʉ́ 5
5
Ananías, bé e mʉmá wé, Safíra
1Yé á bě e nyʉ́ʉ́ mʉ̂r, díé lé, lé á be ó, Ananías. Nye á be ó e mʉmá wé, Safíra. Bé e myɛ̌l, bé á si boo twe twíí ó, bɨ́ɛ ntémé bé óbɛ́ma mébi mɔ́ɔ́, le edwe bʉ̂r o mílʉ́mlʉ́ mɔnɨ́ tɨ̂ʼ yɨ́yɛ̂h, 2Ananías nyɨɛ ntɔ̂ʼ kǎ lie, bɛ̂ʼ gúú páʼ mɔnɨ́ tɨ̂, nɛŋ wé lɨ́ esú lɔ́ɔ́, bé bʉr o tɨ̂, mʉmá wé lɨ́ ekʉ́ gʉ́ǎ syɛ́ɛla yaá. Nye nzě tó dwe bʉ̂r o mílʉ́mlʉ́ páʼ mɔnɨ́ wé á ka buʼo wɨ́.
3Pétrus nzě lɛ́ɛ e né ó: «Ananías, ebe yé Sátan bana nze ní gó ɨ́ léme, bánǎ sâ ó, go kʉ́ŋaa Sísǐm mé Nzyɛ̌m mbǐ nɨ̌ yɨ́ ɛ́? Ebě, gʉ́ bɛ̂ʼ gúú páʼ mɔnɨ́ yô gó á nʉa lɨ́ ebóm é pemé yô yɨ́, komo yé lɨ́ empah. 4Go dína apǎ bɛ́mǎ pemé yô, yé á kʉ gúmo ó e go mʉr tɨ̂. Ntémé, ɨ́ jɔʼ gó á bɛ́ma yé yɨ́, mɔnɨ́ yaá, yé á be ó mɔnɨ́ yô, yé abe nó? Sá yé á pʉgʉ tíne go ó, go sâʼ syɛ́ɛla yaá yɨ́, yé á be yé? Go bé akʉ́a mʉ̂r. Go gwa kʉ́á ó Nzyɛ̌m.»
5Lě Ananías á jóʼo mekǎn maá, le nyé á nɔ́ʼa, bwóolǒ sísǐm wé. Bʉr bɨ́bɛ̂h o b'á jóʼo lɔ́ɔ waá bá, nzě buú jóʼɔɔ bʉ́á. 6Bwá bíloʼo byé á be tɨ̂ʼ bí, byê nzě díblɔɔ̌ múu e sana ndɔ́má, ntɔ̂ʼ tóŋɔɔ e wé, tó dɨlɔɔ.
7Mewala melɛ̂l, mé osí laa nɛ́ɛ: mʉmá mé Ananías ntɔ̂ʼ pyâl, agʉ́ǎ sá yé á laa yɨ́. 8Nó ó Pétrus á dî e né ó: «Lɛ́yɨ́ɨ́ mê: bím tɔ́ɔ́ nyɨ̂ʼ ó bɨ́n le Ananías bɛ́má pemé ɛ́?» Nye nzě kam ó: «Eee, bím yaá ó nɨ̌.» 9Nó Pétrus á lɛ́ɛ e né ó: «Bɨ̂n bana bono pɨ̂ʼ ó, bɨ̌n bóbló ó, Sísǐm mé Tî gá wɨ́ná ɨ́ yé? Jóʼláa: bʉr o to dɨ̌l múú njʉ́mǒ bá, bé mû ó lɨ́ ebê. Bé ónkɛ́ɛ gó ntémé jwɨʼ gwár yaá.»
10Lě Pétrus á sil elwib, lě Safíra ntɔ̂ʼ á nɔ́ʼa ɨ́ mekʉ̌ mé, bwóolo ntémé sísǐm wé. Biloʼo bínɨ̌, byê nzě nî, kœbɔɔ nyé mû múu. Bé ntɔ̂ʼ kǎ nkɛ́ɛ ntémé múú wé, tó dɨlɔɔ wé bǎʼ e waá njʉ̂m. 11Nó Mbɛ̌r-Nzyɛ̌m wɨ́wɛ̂h, ndu e bʉr o b'á jóʼo milɔ̌b myaá bá, bé á bu jóʼo bʉ́á.
Mesimá ɨ́ buo buo
12Bʉr o mílʉ́mlʉ́, bé á si sâ mesimá ɨ́ buo buo ti e bisá bí ékâm, bʉr ɨ́ buo buo lɨ́ ebee. Obûʼla bɨ́bɛ̂h, bé á gwɨgwɨ̂hla ó, gúmo gwár ɨ́ gwal mé Salomɔ̂ŋ dí dóló ɨ́ mpáh Nzyɛ̌m yɨ́. 13Bʉr ɨ́ buo buo, bé á be lɨ́ esêʼle bê. Damá jóʼo nó, bé á bé adûhwo étiʼe ɨ́ mpúhlá e bê. 14Bʉr o b'á dyɛ̂ʼwo e Tî Yésʉs, baá bé á nî ɨ́ sɔ́má óbûʼla bá, bé á be ɨ́ buo, bʉbá e bʉrʉ̂m. Nye ntɔ̂ʼ bâʼra bé ɨ́ sɔ́má óbûʼla bé. 15Nó bé á nze gɔ́na le enzeŋɔɔ e mimbél myɔ́ɔ́, didyéʼɔɔ myé ɨ́ nkpâh minkpǎʼ Pétrus á dudwáala mí. Bé á didyêʼ myé nó ó, ɨ́ bijoó ti e mimyɛɛla, lɨ́ ebʉbóno ó, Pétrus ólaa nó, sisîm yé, yé óbɛ̌m kúna e nyʉ́ʉ́ mʉ̂r ɨ́ sɔ́má yɔ́ɔ́, nyɨ́haá ntɔ̂ʼ tiʼe. 16Mentumo me bʉ̂r, mé á be lɨ́ eduho ntémé ɨ́ binkana byé á be ɨ́ mempah mé Yerʉ́zalɛm bí. Bé á nze ó e mimbêl ti e baá mímbɨ́a mísísǐm, myé á nzɨnzamra bá. Bɨ́bɛ̂h ntɔ̂ʼ tiʼe.
Bʉr, bé lɨ́ etíble bʉ̂r o mílʉ́mlʉ́
17Nó njwɨ́ɨ opara, le bʉr ó njoo yé, bʉr o nkɔ́m oSadwisyɛ̂n, bé á nze mɔa, lwɨ́ŋlá e nzwíí, 18bé ntɔ̂ʼ mɛ̂r bʉ̂r o mílʉ́mlʉ́, gbáŋɔɔ bé ɨ́ mbʉʼ. 19Nó ɨ́ pum waá, éngeles mé Dâ nzě dib mébê mé mbɛ̌r mímbʉʼ, ntɔ̂ʼ pyêl bʉ̂r o mílʉ́mlʉ́ kʉ̌l. Nye ó: 20«Tóʼ gâ, bɨ̌n e tyɛ́b lɨ́ ebɛhɛɛ e mpáh Nzyɛ̌m. Bɨ̌n a lɛ́ʼlé bʉ̂r sá yɨ́yɛ̂h dí edumo le edwán é twiʼ yɨ́.»
21Ɨ́ dwiné mɛ́n kúnó, bʉr o mílʉ́mlʉ́ ntɔ̂ʼ tó tyɛ̂b lɨ́ ebɛhɛɛ e mpáh Nzyɛ̌m, mpʉ̌ Nzyɛ̌m á pa boo lɛ́ɛ bé yɨ́. Bê nzě nyɛl édwe bʉ̂r milɛ́ʼlá.
Ɨ́ dyɛ̂m yaá, njwɨ́ɨ opara, bé e bʉr ó bʉ̌m nɨ́nɨ́ɨ́ nzě syɛŋa ɨ́ bʉ̌m nɨ́nɨ́ɨ́ dí gwɨ́hlá ótɔ́má bʉ̂r bé óYúden yɨ́. Bê nzě lómo bʉ̂r ó, bé tô nʉa bʉ̂r o mílʉ́mlʉ́ ɨ́ mbɛ̌r mímbʉʼ. 22Jɔʼ bísója, byé á nî ɨ́ mbɛ̌r mímbʉʼ tʉ́ŋlʉ̌ yɨ́, byé á bé akœb bé tɨ̂. Byê nzě swîʼ, tó lɛ́ɔɔ bʉ̂r ó gwɨ́hlá yaá ó:
23«Bɨ̂h kœ̌b mébé mé mbɛ̌r mímbʉʼ ó, mipɨrá, odwéela otîtyěl ɨ́ mebê. Sâ gwár, jɔʼ bɨ̂h dǐb mébê, dwɛ̂ʼ tʉ́ŋlʉ̌ yɨ́, bɨ̌h bé abee mʉ̂r ngwár tɨ̂.» 24Njóʼá njwɨ́ɨ odwéela o mpáh Nzyɛ̌m, le ojwɨ́ɨ o tɨ̂, bé á jóʼo milɔ̌b myaá yɨ́, bé á be ó milʉ̂ ɨ́ nzamá, akǎ gʉ́ǎ mpʉ̌ ndumló lɔ̌b waá, wé óbe yɨ́.
25Jɔʼ yaá ó nyʉ́ʉ́ mʉ̂r á ka pyâl. Nye ó: «Jwɛ́ʼɛ́ɛ́ gâ, bʉr o bɨ́n á gbâ ɨ́ mbʉʼ bá, bé mû ó lɨ́ ebɛhɛɛ e mpáh Nzyɛ̌m lɨ́ edwe bʉ̂r milɛ́ʼlá!» 26Njwɨ́ɨ odwéela ó mpáh Nzyɛ̌m, bé e bisója byé, bé ntɔ̂ʼ tô, tó búla e bʉr o mílʉ́mlʉ́ mé Yésʉs baá. Sâ gwár, bé á bé atíne bé e nkul, ebě, bé á be lɨ́ ekpɛ́ɛ ó, bʉr, bé ámû lúmo bé mekóʼ.
27Jɔʼ bé á búla e bʉr o mílʉ́mlʉ́ baá yɨ́, bê nzě tyêl bé ɨ́ mpǒm bʉ̌m nɨ́nɨ́ɨ́ ó, njwɨ́ɨ opara díʼee bé metíá. 28Nye e bé ó: «Bɨ̌h bé á bé así kamle bɨ́n lɨ́ ebáʼǎ dwe mʉ̂r lɛ́ʼlá ɨ́ díé é mʉ̂r nɨ̌ ɛ́? Á bɨ̌n báʼǎ kǎ tô dóló le elɛ̂ʼle bé ɨ́ yé ɛ́? Lɛ́ʼlá wɨ́n waá, wé mû ó sí bánǎ jalǎ Yerʉ́zalɛm yɨ́yɛ̂h. Bɨ̌n ntémé mû kǎ sâ mímbi mímyɛ̂h ó, bɨ̌n dwé ó bɨ̌h mebě, mpʉ̌ sá lɛ́ɛ́, bɨ̌n á jóʼo ó, bɨ̌h ó b'á jʉ̂ mʉr waá.»
29Nó Pétrus, bé e bʉr o mílʉ́mlʉ́, bé á nze yala e bé ó: «Bɨ̌h bé ɨ́ jala le esâ Nzyɛ̌m mejóʼo, abe bʉ̂r. 30Nzyɛ̌m bimpám gá bíná á si pɛh Yésʉs, dwih nyé lɨ́ odwe. Yésʉs waá ó bɨ́n á jʉ̂ lɨ́ ebomlo nyé e binzâŋ, bɨ́nɔɔ nyé ɨ́ kolôs kʉ́ nyá. 31Nzyɛ̌m, nyɨ́ bɨ̂r nyé kʉ́, dil nyé ɨ́ mbó éjʉ́m wé ɨ́ ntuuu, tyêl nyé ɨ́ dǐ Tî, ti e dǐ Tiʼbʉr. Nye á sâ nó ó, lɨ́ esú lé édib bʉ̂r o b'Ɨ́zraɛ̂l nzɨ̌ etúmo míkoo e misyóm myɔ́ɔ́, le edwira míléme, ó nye pɛ́ʼɛɛ bibaa bí ébébe nyé á niʼe bé bí. 32Le bɨ̌h nyɨɛ, le Sísǐm mé Nzyɛ̌m ntémé ó dí oboʼlo o tɨ̂. Sísǐm waá ó Nzyɛ̌m dí edwe bʉ̂r o dí esâ Yésʉs mejóʼo bá.»
33Bʉr o b'á nze ɨ́ gwɨ́hlá bá, bé ntɔ̂ʼ kpaa ébúʼ ɨ́ jɔʼ bé á jóʼo milɔ̌b myaá yɨ́. Bê nzě sáa ó, bé jʉ́ ó bʉr o mílʉ́mlʉ́ baá. 34Nó ó yé á be ó e nyʉ́ʉ́ Farizyɛ̂n, díé lé Gamalyɛ̂l. Nye á be ó lɛ̂ʼla metié bʉ̂r bɨ́bɛ̂h bé á dwáawo nyá. Nye nzě tyɛ̂b témé bʉ̌m nɨ́nɨ́ɨ́. Nye ó, bé páa pyêl bʉ̂r o mílʉ́mlʉ́ kʉ̌l ɨ́ mâ jɔʼ. 35Nye e bʉr ó gwɨ́hlá ó: «Bʉr o b'Ɨ́zraɛ̂l, gwá di gá le ocwóó ɨ́ páʼ syɛ́ɛla bɨ́n múo kpɛl ésâ bʉ̂r bâʼ yɨ́. 36Yé dína ó agúm pǎ lɛŋ mélû, Tœdâs á be lɨ́ etô le enkʉ́na ɨ́ nye mʉr tɨ̂. Nye ó, nyɨɛ nye ó mpaŋ mʉ̂r. Kúnókúno e bʉr minter minâ bánǎ dúŋɔɔ nyê. Ádwií nɛ́ɛ: jóʼo bé jʉ́ nyê. Bʉr bɨ́bɛ̂h o b'á pa dudû nye bá, bé ntɔ̂ʼ bʉ́la. Lɔ̌b wé ntɔ̂ʼ gœ̂ʼ náǎ. 37Píe tɨ̂, ɨ́ jɔʼ lâŋ bʉr, Yʉ́das, mʉr Galilê, á si gbɔba le ojwɨ́ɨ, bé e bʉr ɨ́ buo buo ɨ́ koo wé píhe. Nye ntémé á si jʉ́ŋɔɔ. Bʉr bɨ́bɛ̂h nyé á dulo bá, bé ntɔ̂ʼ bʉ́la. 38Nó ó, ɨ́ lɔ̌b mû lɨ́ elɛb ɨ́ báánâʼ wɨ́, mě tɨ́é bɨ́n ó, bɨ̌n ayɨ́ kǎ báʼǎ sâ bʉ̂r ónɨ̌ sɔ̂ʼ. Bírɨ́ɨ́ gá bê, bé tôʼ. Gwɨ́má yɔ́ɔ́ ti e syɛ́ɛla yɔ́ɔ́, bíɛ, byé bé byaá bi dí eduho ɨ́ pɨʼ bʉr bí nó, lɛ́ɛ́, byé ódwě ntuʼ. 39Sâ gwár, yé sí kǎ pyâl ó, byé duho ó kwá mé Nzyɛ̌m nó, bɨ̌n l'abe e nkul elwímla e byé mbɨ̂mbɨá. Gwá di gá le ocwóó. Yé ámû jaá nyɨ̂n lɨ́ epíhe ó, bɨ̌n mû ó lɨ́ elwímla e Nzyɛ̌m!»
40Bʉr ó gwɨ́hlá nzě kamɔɔ. Bê nzě jébe bʉ̂r o mílʉ́mlʉ́, bíŋɔɔ bê, gbáŋɔɔ bé mpéné ó, bé l'anyamlě kǎ báʼǎ lwib ɨ́ díé mé Yésʉs, ntɔ̂ʼ bírɔɔ bê. 41Nó mpʉ bʉ̂r o mílʉ́mlʉ́, bé á duho ɨ́ bʉ̌m nɨ́nɨ́ɨ́ yɨ́, bɨ́bɛ̂h, bé ntɔ̂ʼ lóno ɨ́ bisʉhʉʉ, ebě, Nzyɛ̌m á bee ó, bé ó mbi bʉ̂r o jálá le esáŋɔɔ bísá bí ésɔ́m ɨ́ lɔ̌b díé mé Yésʉs bá. 42Móhó wɨ́wɛ̂h, bé á be ó lɨ́ etô dóló le elɨlɛ̂ʼle bʉ̂r, agwâʼ, lɨ́ ebɛhɛɛ e mpáh Nzyɛ̌m le ɨ́ mimbɛ̌r mi bʉ̂r tʉ́ŋlʉ̌. Bé á be lɨ́ etúno bé Mbɨambɨa Lɔ́ɔ, lɨ́ elɛ́ɛ e bé ó, Yésʉs ó dí Mʉ̌r Nzyɛ̌m á lœm múló mé jwɨ́ɨ nyá.
Селектирано:
Milʉ́mlʉ́ 5: ozm
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се