ЛукӀа 18
18
Адалат гвачир дуванбегдикай кьиса
1Ахпа Исади Вичин тилмизриз умуд квадар тавуна датӀана дуьаяр авуникай са кьиса ахъайна:
2– Са шегьерда са дуванбег авай, адаз я Аллагьдихъай кичӀедачир, я инсанрихъай регъуьдачир. 3Гьа шегьерда са хендеда авай. Дуванбегдин патав къвез ада лугьузвай: «Дуванда вуна зи пад хуьх».
4Амма адаз папан пад хуьз кӀан тийиз хейлин вахт алатайла, дуванбегди вичи вичикди лагьана: «Заз Аллагьдихъай кичӀедачтӀани, инсанрихъай регъуьдачтӀани, 5и папа зун секиндиз тун тавуниз килигна, мад ада зи кьилтӀар тавун патал, за адан силис гьялда».
6 Реббидини лагьана:
– И адалат гвачир дуванбегди вуч лугьузватӀа килиг! 7Мегер Аллагьди Вичи хкягъайбурун, Вичиз юкъуз-йифиз ялварзавайбурун пад кьадачни? Ада абуруз гудай куьмек энгелардани кьван? 8За квез лугьузва: Аллагьди тадиз абурун пад кьада. ГьакӀ ятӀани, Инсандин Хва элкъвена хтайла, яраб Адаз чилел иман жагъин хъийидатӀа?
Фарисей ва харж кӀватӀдайди
9Чеб гьахъ-михьи инсанар яз гьисабзавай, масабур кваз такьазвай ксариз Исади агъадихъ галай кьиса ахъайна:
10– Кьве инсан дуьаяр ийиз Аллагьдин КӀвализ гьахьна. Абурукай сад фарисей тир, муькуьдини – харж кӀватӀдайди.
11Фарисейди кьилди акъвазна дуьа ийидайла, лагьана: «Я Аллагь! Ваз шукур хьуй, зун амай вири инсанар хьтинди туш: зун чапхун гвайбурукай, гунагькаррикай, зинабурукай ва и харж кӀватӀзавай хьтиндини туш. 12За гьафтеда кьведра сив хуьзва ва гъилиз къвезвайдан цӀудакай са пайни за Аллагьдин КӀвализ гузва».
13Харж кӀватӀзавайда фарисейдивай яргъал акъвазна, кьил хкаждай жуьрэт авачиз, вичин хур гатаз, лагьана: «Я Аллагь! Гунагькар заз мергьемет ая!»
14За квез лугьузва хьи, фарисей ваъ, гьа и харж кӀватӀзавай инсан дуьа авурдалай кьулухъ вичин кӀвализ Аллагьдин вилик гьахъ-михьи яз хъфена. Гьар ни вичи вич вине кьуртӀа, гьам агъуз вегьида, вичи вич агъуз кьурди виниз акъудда.
Исади аялриз хийир-дуьа авун
(МатӀай 19:13-15; Мрк. 10:13-15)
15Исадин патав, Ада кап алтадун патал, аяларни гъидай, амма тилмизри абуруз туьгьметар ийизвай. 16Исади Вичин тилмизриз эверна, лагьана:
– Аялар Зи патав атурай, куьне абуруз манийвилер ийимир, вучиз лагьайтӀа Аллагьдин Пачагьлугъ гьахьтинбурунди я. 17За квез рикӀивай лугьузва: ни Аллагьдин Пачагьлугъ аялди хьиз кьабул тавуртӀа, ам аниз акъатдач.
Девлет авай жегьил
(МатӀай 19:16-29; Мрк. 10:17-30)
18Гьакимрикай сада хабар кьуна:
– Хъсан Муаллим! Эбеди уьмуьрдин иеси хьун патал, за вуч авун лазим я?
19– Вуна Заз хъсанди вучиз лугьузва? – жаваб гана Исади. – Аллагьдилай гъейри садни хъсанди туш. 20Ваз Аллагьдин тагькимар чида: «Зинавал ийимир; яна рекьимир; чуьнуьхмир; тапан шагьидвал ийимир; жуван диде-бубадиз гьуьрмет-хатур ая»#ЭхкъечӀун 20:12-16; Киххьей Къанун 5:16-20..
21– За вири а тагькимрал жуван жегьил чӀавалай амал ийизва, – лагьана ада.
22И гафарин ван хьайи Исади лагьана:
– Ваз кимизвайди са кар я: фена вахъ вуч аватӀа, маса гана, кесибриз пай ая, гьа чӀавуз вахъ цавара хазинаяр жеда. ГьакӀ авурла, Захъ галаз ша.
23И гафарилай кьулухъ адан кефияр чӀур хьана, вучиз лагьайтӀа ам лап гзаф девлет авайди тир.
24И гьал акур Исади адаз лагьана:
– Девлет авайбуруз Аллагьдин Пачагьлугъдиз фин акьван четин я хьи! 25Девлет авайдаз Аллагьдин Пачагьлугъдиз гьахьунилай деведиз рапунин хъуькъуьмдай экъечӀун регьят я.
26И гафарин ван хьайибуру лагьана:
– АкӀ хьайила, бес нивай вич хилас ийиз жеда?
27– Инсанрилай алакьдачир кар Аллагьдилай алакьда – жаваб гана Исади.
28Петрудини лагьана:
– Ингье, чи мал-девлет туна чун Ви гуьгъуьна аваз атана.
29-30Исади абуруз лагьана:
– За квез рикӀивай лугьузва: Аллагьдин Пачагьлугъдиз фин патал, и девирда кӀвал-югъ, диде-буба, стха-вах, паб-аял тур, гьар садал вичи турдалайни гзаф гьалтда, къведай девирда адаз эбеди уьмуьр жеда.
Исади Вичин кьиникьикай пуд лагьай гъилера лугьун
(МатӀай 20:17-19; Мрк. 10:32-34)
31Вичин цӀикьвед илчи са къерехдихъ тухвана, Исади абуруз лагьана:
– Ингье, чун Ярусалимдиз физва. Инсандин Хцикай пайгъамбарри кхьенвайди ина Адан кьилел къведа: 32Ам римвийрин гъиле твада, Адакай рахшандарни ийида, Адакай ягьанатда, Адаз тфуярни гуда, 33Ам гатана рекьинни ийида. Амма пуд лагьай юкъуз Адал чан хкведа.
34Амма Исади лагьай гафарин гъавурда абур гьатначир, и гафарин мана Аллагьди илчийрикай кӀевирнавай хьиз тир, абурувай а мана кьатӀуз хьаначир.
Буьркьуьди сагъар хъувун
(МатӀай 20:29-34; Мрк. 10:46-52)
35Иса Еригьандин патав агакьдайла, рекьин къерехда са буьркьуьди, це лугьуз, ацукьнавай. 36Патавай инсанар физвайди чир хьайила, ада хабар кьуна:
– Им вуч хабар я?
37Адаз Назаретви Иса къвезва лагьана. 38Гьа вахтунда ада гьарайна:
– Я Иса! Заз регьим ая! Я Давуд пачагьдин Хва!
39Вилик кваз физвайбур ам секинриз алахъна, амма ада мадни кӀевиз гьарайна:
– Я Давуд пачагьдин Хва! Заз регьим ая!
40Исади, акъвазна, ам Вичин патав гъун эмирна. Буьркьуьди Адан патав гъайила, Исади хабар кьуна:
41– Ваз Завай вуч кӀанзава?
– Я Агъа! – жаваб гана ада. – Заз экв ахкуна кӀанзава.
42– Сагъ хъхьухь! – лагьана Исади. – Ви иманди вун сагъарна.
43Адан вилериз гьасятда экв хтана, амни Аллагьдиз хийир-дуьа ийиз-ийиз Исадин гуьгъуьна аваз фена. И кар акур вири халкьдини Аллагьдиз шукурар ийиз хьана.
Селектирано:
ЛукӀа 18: ЛезПК
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© Институт перевода Библии, 2010-2024