Yohana 7
7
Amǝ'eam Yesu earnǝi ɗang
1Anzǝm man ngga, Yesu gya aɓa nzali Galili; eare kutio aɓa bu-nzali Yahudi ɗang, acemǝnana aɓwana-mǝgule mala amǝ Yahudi mǝnana akano ka, à nda ban alte à nǝ̀ wal-lui. 2Sǝ lang Lamsan Doagumli, mala amǝ Yahudi gbashina ka,#7:2 Ɓalli gbal aɓa: Pǝris 23:34; Nggur 16:13. 3amǝ'eam Yesu ne wi ama, “Kyane a bu-nzali Yahudi, ace mǝnana ɓǝ̀ alaggana mo ɓǝa kya sǝn agir-ndali mǝnana a kǝ pea ka. 4Kǝɓwa pà kàm mǝnana kǝ earce ɓǝ̀ aɓwana surǝì, sǝ nǝ̀ nggǝ pakki aturo aɓa sǝmbǝrǝa ka ɗang. Sǝ acemǝnana a kǝ pakki amǝnia yì agir ka, puro lǝmndǝ rǝo ɓǝ̀ ɓanza surǝo.” 5Nggearǝ amǝ'eam Yesu nǝ ɓamuria ka, à earnǝi à paɓamuria abani ɗang.
6Pǝlǝa Yesu nea wia ama, “Pwari mem mǝnana mǝ nǝ pur nǝi a banfana ka, malaká karǝ peatu ɗang, sǝ ma'wun ngga koya pwari ka ma'wun na. 7Ɓanza pa nǝ ɓinǝ mǝsǝ wun ɗang, sǝ mim ngga kǝ ɓinǝ mǝsǝam, acemǝnana ǝn nggǝ bang aɓealɓikea mǝnana kǝ pak ka. 8Wu kyane. Mim ngga pà mǝ nǝ ká ado ɗang, acemǝnana pwari mem malaká karǝ ɗang.” 9Anzǝm mǝnana Yesu bangŋǝnia wia cau anggo ka, pǝlǝa akrǝi zuku a Galili.
Yesu wario aban Lamsan Doagumli
10Anzǝm mǝnana amǝ'eambǝi umna aban Lamsan ka, Yesu gbal ka wario ɗǝong, pusǝrǝi ɗang. 11Aɓwana-mǝgule mala amǝ Yahudi camarǝ alte aban Lamsan, à kǝ ɗikiban ama, “Ɓwe na ake le?”
12Aɓwabunda kǝ na cau nggùr-nggùr amur Yesu. Aɓea ɓwana ama, “Yì ka, ɓwa mǝɓoarne na.”
Sǝ aɓea ɓwana gbal ka ama, “Awo, yì ka, mǝswarkiban na.” 13Sǝ kǝɓwa puro na cau bwāng amuri ɗang, acemǝnana à kǝ ɓanggi aɓwana-mǝgule mala amǝ Yahudi.
14Lang à warina ɗār aɓa Lamsan, à gauwuni a tsuru ka, Yesu kutio aɓa Ndàmǝgule mala Ɓakuli, pǝlǝa tita kani aɓwana gir. 15Sǝ aɓwana-mǝgule mala amǝ Yahudi ka à ndali kǝrkǝr, à na ama, “Lang sǝ ɓwa man surǝ gir ani kǝrkǝr, yi mǝnana kǝɓwa kani wi raka?”
16Pǝlǝa Yesu nea wia ama:
Agir mǝnana ǝn nggǝ kania wun ngga à mem na ɗang, à pur aban Ɓakuli mǝnana tasǝam ngga. 17Ɓwa mǝnana kat earǝna ama nǝ̀ pak gir mǝnana Ɓakuli earkiyi ce ka, nǝ̀ sǝlǝa ko kanigir mem ngga pur nǝ ban Ɓakuli, ko mala ɓamuram na ǝn nggǝ na ka. 18Ɓwa mǝnana kǝ na cau aɓa ɓamuri ka, gulo mala ɓamuri na alkiyite ka, sǝ ɓwa mǝnana kǝ pak gir ace gulo mala ɓwa mǝnana turi ka, ɓwa mǝ'mǝsǝcau nì na, ɓe kǝgir nyir pa a ɓalǝi ɗang. 19Musa nǝ̀ pa wun Nggurcau re? Sǝ kǝɓwa ata wun kpate ɗang. Ace mana sǝ wu kǝ earce ama wu nǝ̀ wal-luem?
20Ɓwabunda mǝnana ram ngga ne wi ama, “We ka, kukwar na a rǝo. Yana alkiyito ama nǝ̀ wal-luio?”
21Pǝlǝa Yesu earia wia ama, “Ən pak gir'ndǝlǝki mwashat ɓǝrɓǝr a pwari Sabbat, sǝ wun kat ka wu pak ndali. 22Musa pà wun Nggurcau mala kasǝ-ɓatau kat andǝ amani ama yì nǝ̀ tite raka, aká wun nǝ̀ tite. Ace mani ka wu kǝ kasǝi muna ɓate a pwari Sabbat, pwari usǝlǝo.#7:22 Ɓalli gbal aɓa: Tite 17:10; Pǝris 12:3. 23Ɓǝ̀ pwari mana à tsǝa ace kasǝi muna-ɓwabura ɓate, kpa a pwari Sabbat, pwari usǝlǝo ka, wu kǝ lidǝmba nǝ pe, ace mǝnana ɓǝa kǝa yàl Nggurcau mala Musa raka. Palang sǝ bum wun lullo a rǝam acemǝnana ǝn twali ɓwa ban rǝkwana a pwari Sabbat ka? 24Wu kǝa wu pak ɓashi ace sǝn ɓamǝsǝu ɗang. Wu pak ɓashi amur gir mǝnana mǝsǝcau na ka.”
Yesu ka, nda Kǝrǝsti, Mǝ'amsǝban le?
25Pǝlǝa aɓea amǝ Urǝshalima na ama, “Nggearǝ ɓwa mǝnia na mbak aɓwana-mǝgule mala amǝ Yahudi alkiyite ama à nǝ̀ wal-lui ka re? 26Sǝ ndya came kǝ na cau a banfana ka, sǝ kǝɓwa loasǝ kun a rǝì ɗang. Ko aɓwana-mǝgule ka, à earǝna adyan ama mǝsǝcau yì ka, nda Kǝrǝsti, yì ɓwa mǝnana Ɓakuli tarrì ka le? 27Màlà mǝnia yì ɓwa ka sǝm surǝna rǝ ban mǝnana pur kam ngga. Sǝ ɓǝ̀ Kǝrǝsti yiu ka, kǝɓwa pà nǝ̀ surǝ ban mǝnana pur kam ngga ɗang.”
28Mǝnana Yesu na ban kanigir aɓa Ndàmǝgule mala Ɓakuli ka, loasǝ gi kpǝm na ama, “Kàngkàng wu surǝam andǝ ban mǝnana ǝn pur kam ngga? Mim ngga ǝn yiu ace cau mala ɓamuram ɗang. Tárram mǝnana tasǝam ngga mǝ'mǝsǝcau na. Wun ngga wu surǝì ɗang. 29Mim ngga ǝn surǝì, acemǝnana abani sǝ ǝn puro, sǝ yì nǝ̀ turam.”
30Lang Yesu bangŋǝna cau man anggo ka, aɓwana-mǝgule mala amǝ Yahudi ɓariki ama à nǝ̀ bwali, sǝ kǝɓwa tsǝk bu a rǝì ɗang, acemǝnana pwari male malaká pak ɗang. 31Sǝ aɓa mǝno anggo kat ka aɓwana pas aɓalǝ aɓwana mǝnana à ram ngga à pà ɓamuria aban Yesu. À kǝ na ama, “Ɓǝ̀ Kǝrǝsti, yì ɓwa mǝnana Ɓakuli tarrì, yiu ka, nǝ̀ yia pakki agir-ndǝlǝki mǝnana à kuti mana mǝnia yì ɓwa ka pakkia ka le?”
À tasǝ amǝ yalban ɓǝa kya bwal Yesu
32Amǝ Farisi ok ɓwabunda aban sherǝ amǝnia yì acau ka amur Yesu, pǝlǝa yia andǝ agbani pǝris tasǝ amǝyal Ndàmǝgule mala Ɓakuli ama ɓǝa kya bwali.
33Yesu nea wia ama, “Mǝ ndakani ado ata wun zuku, sǝ mǝ nǝ nyare mǝ nǝ o aban Tárram mǝnana tasǝam ngga. 34Wu nǝ̀ altam, sǝ pa wu nǝ̀ kumam ɗang; sǝ ban mǝnana mǝ ndakam ngga pa wu nǝ̀ gandǝ ká kam ɗang.”
35Sǝ aɓwana-mǝgule mala amǝ Yahudi nacau a rǝarǝia ama, “Nggearǝì ka, ake sǝ nǝ̀ ká le, mǝnana pa sǝm nǝ̀ sǝni raka? Ko nǝ̀ ká aban aɓwana ma'sǝm mǝnana à mesǝkea arǝ ala mala amǝ Gǝrik ka, sǝ nǝ̀ ngga kania amǝ Gǝrik agir gbal le? 36Sǝ ɓālǝi aman, yi mǝnana na ama, sǝm nǝ̀ alte sǝ pà sǝm nǝ̀ kumi ɗang; sǝ ɗǝm ngga na ama, ban mǝnana ndakam ngga pà sǝm nǝ̀ gandǝ ká kam ɗang?”
Mùr mǝnana kǝ pa yilǝmu ka
37A masǝlǝata pwari, mǝnana ndà pwari mǝgule mala Lamsan ngga, Yesu lo came sǝ loasǝ gi kpǝm na ama, “Ɓwa mǝnana kat kǝ ok mǝsamur ka ɓǝ̀ yiu abanam ɓǝ̀ yi nu.#7:37 Ɓalli gbal aɓa: Pǝris 23:36. 38Ɓwa mǝnana kat pà ɓamuri abanam ngga, a bumi sǝ amealmur mala mur mǝpà yilǝmu nǝ̀ puro, à nǝ̀ nggǝ ɓangŋa, kǝla mǝnana Malǝmce na ka.”#7:38 Ɓalli gbal aɓa: Ezǝk 47:1; Zak 14:8. 39Yesu naban na cau amur kǝ Bangŋo mǝnana aɓwana mana à pà ɓamuria abani ka, à nǝ̀ ngga kum ngga. Sǝ a pwari mǝno gbal anggo ka à malaká pà Bangŋo ni ɗang, acemǝnana Yesu malaká loapi ɓembe kutia aɓa gulo male peatu raka.
Kun aɓwana gaki amur Yesu
40Lang à nǝ̀ ok cau mǝnana Yesu na ka, aɓea ɓwana na ama, “Mǝsǝcau na, mǝnia yì ɓwa ka nda Mǝɓangna mala Ɓakuli mǝnana sǝm kundǝkiyi ka.”
41Sǝ aɓea ɓwana na ama, “Kǝ yì nda Kǝrǝsti, Mǝ'amsǝban.” Aɓea ɓwana bangŋa ama, “Palang sǝ Kǝrǝsti ka nǝ̀ pur a Galili? 42Malǝmce na ama, Kǝrǝsti Mǝ'amsǝban ngga nǝ̀ pur a tau mala Dauda, sǝ à nǝ̀ ɓǝli a Betalami, la mǝnana Dauda dukam ngga.”#7:42 Ɓalli gbal aɓa: 2Sam 7:12; Mik 5:2. 43Kara kun aɓwana gakina amur Yesu. 44Aɓea aɓwana ka eare malea ka à nǝ̀ bwal Yesu, sǝ kǝɓwa gandǝ tsǝk bu a rǝì ɗang.
Ɗwanyi pa ɓamuru mala aɓwana mǝgule mala amǝ Yahudi
45Sǝ lang amǝyal Ndàmǝgule nyarǝna ka, agbani pǝris andǝ amǝ Farisi ɗia ama, “Palang sǝ wu bwali wu yinǝi ɗang?”
46Amǝyalban banggia wia ama, “Kǝɓwa pà kàm mǝnana kǝ nacau kǝla mala mǝnia yì ɓwa ka ɗang.”
47Sǝ amǝ Farisi pǝlǝa à nea wia ama, “Wun gbal ka yi ɓosǝkina ta kun wun le? 48Wu ok àkǝ̀ pwari ama kǝɓwa aɓalǝ aɓwana-mǝgule mala amǝ Yahudi ko amǝ Farisi, pà ɓamuri abani le? 49Sǝ ɓwabunda mǝnia à kǝ gyate ka, à surǝ Nzongcau mala Musa raka, à nda a ɓata suban mala Ɓakuli!”
50Nikodimus nakam abanì. Yì ka, nda aɓalǝ amǝ Farisi, amǝ kurcau, sǝ nda ɓwamǝgule mǝnana wario aban Yesu ɗiɗyal ka. Ɗiban ama,#7:50 Ɓalli gbal aɓa: Yoh 3:1-2. 51“Nggearǝì ka, Nggurcau ma'sǝm eara sǝm ama ɓǝ̀ sǝm kasǝ ɓashi amur ɓwa mǝnana à ok kǝcau a kuni, sǝ sǝm surǝ gir mǝnana pak raka le?”
52Sǝ à pe wi eare ama, “Tino, we gbal ka a pur nǝ Galili le? Kyane kya bǝlki ɓa Malǝmce ɓukɓuk sǝ a wu nǝ sǝlǝ ama kǝ mǝɓangna pa nǝ̀ pur a Galili ɗang.”
53[Sǝ koyan le ka nyare o a ɓala male.
Селектирано:
Yohana 7: mbu
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© Wycliffe Bible Translators, Inc. and © The Nigeria Bible Translation Trust 2016