Génesis 9
9
Ndo Dio ndache Noé thi runcheꞌe Ndo
1Binchenchaon Ndo Dio Noé ko kain xeꞌen ko ndachro Ndo: «Dinthechunda ra tsjé chjan ko nchekauntja ra nunthe. 2Ko kain kuxiigo te ngataꞌa nunthe ruxraguꞌan ra ba, ko jaꞌa ra tsetuꞌan ra ngain ba: Thi kuxiigo tjaganga ko kain kuxiigo chrji ngataꞌa nunthe ko kain kuchee te chringi ndachaon. 3Ko jaꞌa ra nchao sinthe ra kexeꞌo kuxiigo ko kain ka ixin jaꞌan chjaꞌa ra ixin sinthe ra. 4Aro jintheꞌa ra nthao xra chunda jni ixin jni jichunxin kuxiigo. 5Kexeꞌo thi suen naa chujni, jaꞌan sinthaꞌa jie̱, ja̱ naa kuxiigo chrintho suen naa chujni, kuxiigo mee seꞌen ba, ko kexeꞌo chujni suen naa chujni kai rugunda seꞌen.
6»Thi suen inaa chujni
kai inaa chujni suen jeꞌe
ixin Ndo Dio binchechjian chujni
inchin jeꞌe Ndo.
7Ko jaꞌa ra, dinthechunda ra tsjé chjan
ko tutsjé ra ngataꞌa nunthe.»
8Kai ndachro Ndo Dio ngain Noé ko ngain xeꞌen: 9«Nduaxin tendathjo ra thi sinthaꞌa ngajin ra ko ngain ni sachrjeninxin ra, 10ko ixin kain kuxiigo binthe ngajin ra ngaxiꞌin barco: Kuxiigo techunda nene, kuxiigo nchekjanii ni ngain nchia, kuxiigo chrjikua ko te ngaꞌa jna ko kainxin kuxiigo te ngain nunthe. 11Ko jaan, ndua thi ndachrjan: «Irukjanꞌa na suꞌen chujni ko kuxiigo ixin chrin suji, ko ixruꞌin chrin suji tsii ixin sinchexanthe kain thi jii ngain nunthe. 12Ko jiꞌi sikunxin ra thi ndachrjan, ko sikon kain ni sachrjeninxin ra ko kain kuxiigo, 13ixin sakee kunchechana ngain thjui ko jiꞌi ruxraxaunxin ra thi jaꞌan ndachrjan ngain chujni te nguii nunthe. 14Are jaꞌan sikian thjui ngataꞌa nunthe, kunchechana tsununxin. 15Ko jaꞌan ruxraxaꞌon ixin thi ndachrjan ngajin ra ko ngain kuxiigo, ko irukjanꞌa tsii chrin suji ixin suen ra. 16Mexinxin are seꞌe kunchecha ngain thjui, jaꞌan sikon ba ko ruxraxaꞌon thi ndachrjan ko xruꞌin nchaꞌon rutjañana thi ndachrjan ngain chujni ko ngain kuxiigo te ngataꞌa nunthe.» 17Kai Ndo Dio ndache Noé: «Kunchecha jiꞌi ruxraxaunxin ra thi jaꞌan ndachrjan ngajin ra ko ngain kuxiigo te ngataꞌa nunthe.»
Noé kuan
18Xeꞌen Noé binthegachrjexin ngain barco, mee kjui xan Sem, Cam ko Jafet. Ko Cam kjui ndudee Canaán. 19Kanio xeꞌen Noé bachrjeninxin kainxin chujni te ngataꞌa nunthe.
20Kuthimejan Noé kuexiꞌin bincheꞌe xra ngataon jngi, ko kjuenga naa jngi ntha uva. 21Ko naa nchaꞌon biꞌi vino, ko ndakuan ko ndakuthulucho ngaxiꞌin nchia ndasiꞌin. 22Ko Cam, ndudee Canaán, are bikon thulucho ndudee, kuinga bachrje ko bikekiin kayui xan choo. 23Kuthejan Sem ko Jafet kuaa naa luntho, ko binthekentaꞌa luntho nthacheen, ko thinga tethingaxinto ixin binthegixiꞌin nchia ndaasin ixin rugikonꞌa thulucho ndudee. Ko jañaa kjuamataon xan ndudee xan.
24Ko are Noé bachrjeꞌe thi dikuan ko kunuꞌe keꞌe bincheꞌe Cam, xan icha nchiin, 25ko ndachro ixin Cam ko ni sachrjeninxin Cam:
«¡Jianꞌa tsjiꞌa jaꞌa, Canaán!
Jaꞌa thi icha tsurentheꞌa ngain kayui xan choo.»
26Kai ndachro ixin Sem ko Jafet ko kain ni sinthegachrjeninxin:
«Ndo Diuna sinchenchaon Sem,
ko Canaán tsji xi nchexree.
27Ko Ndo Dio sinchejié nuntheꞌe Jafet
ko seꞌe chiaon nchia ndasiꞌin Sem
ko Canaán tsji xi nchexree.»
28Are ndabanga jinda bikiatheꞌe nunthe ixin chrin suji, Noé xra bechon nii renkia ko yoo kan ko the nano. 29Ko na̱a̱ renkia ko yoo kan ko the nano bechon Noé, ko beꞌen.
Селектирано:
Génesis 9: plsNT
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2017, Wycliffe Bible Translators, Inc. All rights reserved.