Matyu 11
11
Jon hu mon prouk uwr hiykwe hyo ki-wayh me me-ha, Jisas so owh mon
(Luk 7:18-35)
1Jisas hiy hyo ki-wayh iha seys mu nareysyar non me hiy-me kupaku lowpway so meyki mon hokwe, yier sehe kiy-okriy hain. Sa hiykwe om kipay Galili ko mon mahiy-ey, hiymon sorasor mey o, God so ok ke nak-mesor mey o, seme meio e.
2Enekwei sohokwe Jon hiykwe kalabus-a mon lwak, sawk hiykwe mey, Krais hiy ma meio seme lonuayk menkin, hiykwe sa hyo ki-wayh me Jisas so owh mon seme me-ha, 3hye senkin mesopok e, “Hmey, uwr seirpey-ar, Juda hrom ma naruok wayr hokwe, mo hwon-ar pak? Sa hromkwe uwr prueyn irweyk se ma-naruok e?”
4Jisas hiykwe sa senkin makiy-sahre mekow ha, “Homkwe ma-ley nok, ok hom ma lonuayk o, mey hom ma lira o, seme Jon se senkin kwa ma-mesor kow. 5Uwrsa nene kopyo non homkwe pa ma-lira. Uwrsa lomposyay homkwe pa ma-lanio sayok. Uwrsa kuor lepra non homkwe pa owh yaprue ma-lwak. Uwrsa nweyk swapoumay homkwe pa ma-lonuayk. Uwrsa ma lokrue homkwe pa ma-loksian. Seyr God so ok-ihey kokwe uwrsa puraw-ar ma nuw-wak me pa mesor kow. #Ais 35:5-6; 61:1 6Uwr, hane hokuaw ma makuayk lopa hiykwe, God so uron ihey-ar so ouon mon lwak.”
7Jon so ki-wayh hom ma-ley neyney menkin, Jisas hiykwe sawk uwrsa popua hay me kiy-mesopok, Jon se, “Homkwe ki hrahra-aw mon ley mokwe, homkwe uwr penkin se ley ira so? Homkwe uwr prueyn, pey-ma, howniy hok ma lway war-a-war se hieyn ke po ley ira pak. Korey law. 8Hai, homkwe payay me lira e ley neyney mo? Hmey, uwr prueyn omeme owh ko yaprue me ma lie se lira so? Korey law, payhokuaw uwrsa omeme yaprue senkin me ma lie somokwe, a yaprue, king hiy ma lwayr mon-aw lwak. 9Hai sawk homkwe penkin uwr se ley ira so? Hmey, homkwe profet prueyn se po ley ira pak? Suw okar, sawk hakwe hme senkin mekow, uwr sohokwe profet mo eir mon lwak. 10Jon se kokwe paraw kokwe mo senkin mey,
‘Hano ok me mesor kow uwr sohokwe, hakwe hno peyrmawk me-ha ey, hno yerki se meio kumay naruok kow e.’ Mal 3:1
11Hakwe hme okar kiy-mekow, Jon hu mon prouk uwr hiykwe uwr ipey-ar, uwrsa paraw ma lwayr hain mo eir mon lwak. Paraw kokwe uwr prueyn senkin sohokwe lousne pa. Sawk uwrsa Nonkumey so Wayr-hre-yier mon ma lwak mokwe, mo hom uru ipey-ar lopa lwak e hi, homkwe Jon so eir mon lwak. 12Sawk enekwei, Jon hu mon prouk uwr hiy ma mesor kow pie o, pokon ohiy o, Nonkumey so Wayr-hre-yier hokwe seirpey hay po nuw-kama-prasyay. Sa uwrsa aw non homkwe hmo krai arian non lono yawriy e mon. 13Payhokuaw, profet lowpwarowp o, ok, Moses so sow mon ma lwak sohom o, somokwe Nonkumey so Wayr-hre-yier hiy le ey se memeir. Hom senkinaw mesor nona nona ne, Jon hiy lousne. #Luk 16:16 14Sawk homkwe hano ok me nanpanan onokyaw e mon ankin, Jon hiykwe mo Elaija. Profet Elaija so le enekwei hokwe mo paraw po nuw-mesor nona nona ne. #Mal 4:5; Mat 17:10-13; Mak 9:11-13 15Uwr nweyk non lwak ankin, hiykwe ok seme kwa lonuayk.
16Sawk hakwe uwrsa enekwei pokon ko mo yor mokwe owhnan penkin ke kiy-me meir a? Uwrsa pokon ko homkwe ney me hieyn, hmo wayh-om me market-yier mon senkin kikrweik iwowr,
17‘Hromkwe hme hu lou kow liok, sawk homkwe hreme nion yayh siraw pase non-owk e. Seyr hromkwe hme eheyr liwak yuk woun kow liok, sawk homkwe hreme nion eheyr siraw pase non-yuk e.’
18Homkwe ney me hieyn, ok senkin senkin me lohruw-a. Payhokuaw, Jon hu mon prouk uwr hiy le menkin, hiykwe ayay la pa, seyr wain-hu lowswa pa. Sawk homkwe hye senkin me, ‘Hiykwe now-awruw non.’ 19Uwrsa mo Ney hiykwe sawk le nok, ayay la, seyr wain-hu nak-owswa. Sa homkwe senkin me, ‘Uwr ehe kwa lira, hiykwe nanuowp, wain-hu ipey lowswa uwr. Seyr takis-lonok-uwr o, uwrsa yor piap-araw non o, sohom mo wayh-ih.’” Jisas hiy makiy-me, “Hmo nonkway mokwe erey ka-ley, erey ka-ley. Sawk homkwe hmo nonkway arian hok ayaw-ar nuw-wak e nak-swakakar me.” #Mat 9:14
Uwrsa uron kankoum lopa lwak ankin, homkwe uron kwa nuw-hok e
(Luk 10:13-15)
20Enekwei sohokwe Jisas hiykwe uwrsa, om har mon ma lwak seme kasaw lon hohuaw me. Payhokuaw, homkwe mey poya-poya krai non Jisas hiy ma meio mokwe papo lira, sawk homkwe hmo uron mokwe pase kankoum e. 21Hiykwe senkin me, “Woiow, om Korasin o, om Betsaida o, homkwe kwa nak-hok, hme kokwe aw-mar ipey-ar nuw-ohre ey. Payhokuaw, mey poya-poya krai non, hmo owh mon ma mon ousne mokwe, om Tair mon o, om Saidon mon o, serey mon ousne hokwe, uwrsa somokwe uron paraw po nuw-kankoum sow. Seyr omeme uron lowk ey me liy nak-owk peyk iwak sir kay. Seyr ihuan liy louh wakiawk, hmo weynpaweyn piap-araw hom ma mon somokwe. 22Sawk hakwe hme senkin kiy-me, enekwei pariawey-ar, God so aw-mar, om Tair, Saidon leys se mon piapay ey hokwe, ouon mon kor-wak ey. Sawk uwrsa om Korasin ko o, om Betsaida ko o, hme kokwe God so aw-mar hokwe ayaw-arar nuw-wak ey. #Ais 23; Ese 26:1–28:26; Jol 3:4-8; Amo 1:9-10 23Hai, Kaperneam-om, homkwe senkin nan, homkwe nonkumey mon lie ey. Korey law-ar, hmekwe nonkumey mon liy hiy-ie ley, sawk hmekwe lokrue-uwr mo yier mon hiy-okumey ey. Payhokuaw, mey poya-poya krai non hmo om mon ma meio ousne somokwe, om Sodom mon meio ousne hokwe, om Sodom sohokwe paniaw po lwak. #Ais 14:13-15; Stt 19:24-28 24Sawk hakwe hme senkin sehe kiy-me, enekwei pariawey-ar, God so aw-mar, om Sodom se mon piapay ey hokwe, ouon mon kor-wak ey. Sawk uwrsa Kaperneam ko me kokwe God so aw-mar hokwe ayaw-arar nuw-wak ey.” #Mat 10:15; Luk 10:12
Homkwe hano mon kwa le wayr nieys
(Luk 10:21-22)
25Enekwei sohokwe Jisas hiykwe senkin me, “Aio, hunkwe nonkumey o, ki ohiy o, hoho Hakamay, hakwe hne me-ihey, payhokuaw hunkwe hno nonkway omokwe uwr, ney nopre me hieyn ma lwak me papo mesair kow. Sawk uwr nonkway non me kokwe, hunkwe papo kawk sue, homkwe liy kiy-nonkway ley. #1 Ko 1:26-29 26Okar, Aio, hwon senkin ma lon somokwe, hne nian kar po mon ey.”
27Jisas hiy makiy-me, “Hano aio hiykwe omeme lowpwarowp mokwe, hano iha mon papo kow. Sawk Ney se kokwe uwr prueyn sa prueyn nonkway pey, sawk Aio hiykiaw-aw. Seyr Aio se kokwe uwr prueyn sa prueyn nonkway pey, sawk Ney hiykiaw-aw. Seyr uwrsa Ney hiykiaw Aio se ma mon ousne kumay kow, homkwaw nonkway. #Mat 28:18; Jon 3:35; 17:2; Fl 2:9
28Ama, uwrsa mey posokwaw meio sese yay wayr e, seyr low posokwaw lway e, homkwe hano owh mon kwa le nene. Hakwe hme kokwe liwak nieys ihey ey se kow ey. #Jer 31:25 29Hunkwe hano now-pay omeme me lway nakey ey se kwa lyay, hno someyk mon. Sa hano yor arian me kwa nak-ira mon sorasor nonkway. Payhokuaw, hano yor mokwe senkin, hakwe kopowrie, seyr hakwe uwr uru lopa se hieyn lanio. Hom senkin lon ankin, hmo wa mokwe liwak nieys weyn hokwe liy lirway. 30Payhokuaw, hano now-pay, omeme me lway nakey ey kokwe, honon honon-ar korey. Sawk low, ha hme ma kow hokwe nowkra-araw nuw-wak.” #1 Jn 5:3
Селектирано:
Matyu 11: aau
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2006, Wycliffe Bible Translators, Inc. All rights reserved.