If you have would like a copy of this version please contact info@davaraudiobibles.org

The Gofa Bible, CC-BY-SA-4.0, The Word for the World International and The Word for the World Ethiopia. (Text). Gofa Audio Bible, CC-BY-SA-4.0, Davar Partners International, 2018. (Audio).

ጌሻ ማፃፋ

The Word for the World International and The Word for the World Ethiopia

እስ ጋላስ ቃራፃ ቃንፀይሳትነ ናጋራንቾት የሱሳ ትምርትያ ስአናዉ እያ ዩሾን ሺቅዶሶና። ሽን ፋርሳወትነ ህገ አስታማረት፥ “ሀይስ ኡራይ ናጋራንቾታ ሺሽድ ኤኬስ፥ ኤንታራ እስፈ ሜስ” ያግድ ዙዙምዶሶና።
የሱሲ ሀ ሌምሱዋ ኤንታዉ ያግድ ኦድስ፦ “ህንተ ግዶፈ እሱዋስ ፄቱ ዶርሳት ደእያባ ግድኮ ኤንታፈ እሶይ ይኮ ኡዱፉን ታማነ ኡዱፉናታ ባዞን አግድ ዮይሳ ደማና ጋካናዉ ኮዮናይ ኦኔ? ደምዳ ዎደ ኡፋይትድ ባ ጋናን ቶክድ፥ ባ ሶ ስሜስ። ባ ላገታነ ሾሮታ ፄግድ፥ ‘ይዳ ታ ዶርሳ ደማስ፥ ታራ እስፈ ኡፋይትተ’ ያጌስ። ሄሳዳካ፥ ማሮት ኮሾና ኡዱፉን ታማነ ኡዱፉን ፅሎታፐ አድ፥ ማሮታን ገልያ እስ ናጋራንቹዋ ጋሶን ሳሎን ግታ ኡፋይስ ግዴስ።
“ዎይኮ ታሙ ብር ደእያ እስ ማጫስያ ታማፈ ኢስያ ይኮ ደማና ጋካናዉ ፆምፐ ኦይዳ ኬ ፕታዳ ምን ኮዮናይ ኦኔ? ደምዳ ዎደ ባ ላገታነ ባ ሾሮታ ፄጋዳ ‘ይዳ ታ እስ ብራ ደምዳ ግሾ ታራ ኡፋይትተ’ ያጋዉሱ። ስእተ፥ ሄሳ መላ እስ ማሮተን ገልያ ናጋራንቹዋን ፆሳ ኪታንቾታ ስንን ኡፋይስ ግዴስ” ያግስ።

ዛሪድ የሱሲ፥ “እስ ኡራስ ናምኡ ናይት ደኦሶና። ኤንታፈ ካሎ ናአይ ባ አዋኮ፥ ‘ታ አዋዉ፥ ነ ሻሉዋፐ ታ ግሹዋ ታዉ እማ’ ያግስ። አዋይ ባ ሻሉዋ ባ ናይታስ ሻክስ። ጉ ጋላሳፐ ጉየ፥ ካሎ ናአይ ባ ግሹዋ ኡባ፥ ቃች ኤክድ ሃሆ ቢታ ብስ። ያን አልታጫን ሻሉዋ ቶችድ ኦንግስ። እ ባዉ ደእያባ ኡባ ዉርስዳፐ ጉየ ሄ ቢታ ኡባን ምኖ ኮሽ ከይን መቶትስ። ሄሳ ግሾ፥ ሄ ቢታ አሳፐ እሱዋ ሶ ጋታ ገልስ። ኡራይ እያ ጉዱን ሄማና መላ ባ ሞ የድስ። ጉዱንት ምያ ሀርቁዋፈ ማናዉ አሞትስ፥ ሽን እዮካ እያዉ እምያ አስ በንትቤና። እ ባ ዎዛናኮ ስሚድ፥ ‘አፑን ታ አዋ አይለታስ ካ ዎራ ዎን ታ ሀይሳን ኮሻራ ሀይቃናዉ ጋካድና?’ ደንዳዳ ታ አዋኮ ባዳ፥ ‘ታ አዋዉ፥ ሳሎን ፆሳ፥ ሳአን ነና ቆሀስ። ህዛፐ ነ ናአ ጌተታዳ ፄገታናዉ ታዉ በሶና ግሾ፥ ነ ሶን ደእያ አይለታፐ እሱዋዳ ታና ፓይዳ’ ያጋና” ያግስ። ሄሳ ግሾ፥ ደንድድ ባ አዋኮ ብስ።
“ሀኖሽን፥ እ ቡሮ ሃሆን ደእሽን አዋይ ቃትድ፥ እያኮ ዎፅ ብድ፥ እድምድ ዬርስ። ናአይካ፥ ‘ታ አዋዉ ሳሎን ፆሳ፥ ሳአን ነና ታ ቆሀስ። ህዛፐ ነ ናአ ጌተታዳ ፄገታናዉ በስከ’ ያግስ።
“እያ አዋይ አይለታ ፄግድ፥ ‘ኤለስድ ኡባፈ ሎኦ ግድዳ ማኦ ኤህድ እያ ማይዝተ፤ እያ ብራን ሳጋዮ፥ እያ ቶሆን ጫማ አተ። ሞ ጋታርመን ኤህድ ሹክተ፥ ሞስ፥ ኡፋይቶስ። ታ ናአይ ሀይስ ሀይቅስ፥ ሽን ሀእ ፓፅስ፤ ይስ፥ ሽን በንትስ’ ያግስ። ሄሳፈ ጉየ፥ ኡፋይስ ዶምዶሶና።
“ሄ ዎደ ባይራ ናአይ ጎሻ ጋደን ደኤስ። ያፐ ይሸ ሶ ማትሽን የነ ጉፋ ግርስ ስእስ። እ፥ አይለታፐ እሱዋ ፄግድ ሀንያባይ አይበኮ ኤራናዉ ኦይችስ። አይለይ፥ ‘ነ እሻይ ሳሮ ይዳ ግሾ ነ አዋይ ሞ ጋታርመን እያዉ ሹክስ’ ያግስ።
“ባይራ እሻይ ይሎትድ ሶ ገላናዉካ ኮይቤና። አዋይ ካረ ከይድ ሶ ገላና መላ እያ ዎስስ። ሽን እ ባ አዋኮ፥ ‘ሄኮ፥ ሀይሳ መላ ላይ ታ ነዉ አይለታዳ ነ ኪታፐ እሱዋካ ፓጭሶና ነዉ ኪተትን፥ ታኒ ታ ላገታራ ኡፋይታና መላ ሀር አቶሽን እስ ላቃ ዴሸ እማባካ። ሀኖሽን፥ ሀይስ ነ ናአይ ነ ሻሉዋ ላይማታራ ይስድ ይን፥ ሞ ጋታርመን ሹካዳሳ’ ” ያግስ።
“አዋይካ፥ ‘ታ ናአዉ፥ ኔኒ ኡባ ዎደ ታራ ደኣሳ፥ ታባ ኡባይ ኔሳ። ሀይስ ነ እሻይ ሀይቅስ፥ ሽን ፓፅስ፤ ይስ፥ ሽን በንትስ። ሄሳ ግሾ፥ ዳሮ ኡፋይታናዉ በሴስ’ ያጋና” ያግስ።

Слушни за ሉቃሳ 15