Bagri

एक दिन यीसू कठैई एक जिग्यां पराथना करा हा जद पराथना पूरी कर ली तो बिंगै चेला माऊं कणैई एक पूछयो, “हे प्रभु, जिंया यूहना आपगै चेला नै पराथना करणी सिखाई बिंया थे म्हानै बी करणी सिखादैयो।” यीसू बानै केयो, “जद थे पराथना करो तो इंया केवो, ‘हे पिता, थारो नाम पवितर मानीज्यै अर थारो राज आवै। म्हानै रोज गी रोटी दिया करो अर म्हारै पापां नै माफ करो जिंया म्हे म्हारै उपर पाप करण आळा नै माफ करां। अर म्हानै कीं बी तरियां ऊं अजमाईयो ना।’”


जे थारो कोई बेली है अर आदी रात नै आ'गे थानै केवै, “हे भाई थारै कनै रोटी पड़ी है तो दे दे। क्यूंकै मेरै कनै कोई दूसरो बेली आयो है अर मेरै कनै बिनै खुवाण खातर कीं कोनी है।” अर बो अन्दर ऊं आवाज लगावै है कै मनै तंग ना कर। टाबर सारा सूत्या है अर दरवाजो बी बंद करेड़ो है ईंखातर मैं थानै अबी कोनी दे सकूं। तो मैं थानै केवूं ऊं कै बो थारो बेली होण गै खातर खाण पीण ना बी दैय पण मांगण आळो बारी बारी मांगणै गै खातर तूं बिनै जरूर देवैगो। ईंखातर मैं थानै केऊं, मांगोगा तो थानै मिलसी, ढूंढोगा तो थानै लादजीसी, जे थे बारनो खड़कास्यो तो थारै खातर खुलजीसी। क्यूंकै परमेसर ऊं झिको मांगै है बो बिनै देवै, झिको ढूंढै है बो बिनै मिलै अर जे कोई बिंगो बारनो खड़कावै तो बो जरूर खोलसी। थारै में हिस्यो कुण बाप है झिकै गो बेटो रोटी मांगै तो थे बिनै पथर देवै, अर जे दूध मांगै तो जहर देवै। अब इंया बताओ थे बुरा होगे बी आपगै बेटां नै आच्छी चिजां देवो तो परमेसर पिता थारै मांगणै पर पवितर आत्मा क्यूं कोनी देसी?


एक दिन यीसू एक आदमी ऊं गूंगी ओपरी काडी तो बो बोलण लागग्यो अर लोगां नै भोत ई अचंभो होयो। ओ देखगे बामूं केई बोल्या, “ओ तो ओपरियां गै प्रधान बेलजबूल गी मदद ऊं ओपरियां काडै।” केईयां बानै परखण खातर केयो, “जे तूं सुरग ऊं आयो है तो बठै गो कोई निसान दिखा।” पण यीसू बांगै मन गी बात जाणग्यो अर केयो, “झिकै देस अर घर में फूट पड़ज्यै तो बे घर ऊजड़ज्यै, जे सैतान आपगै राज गै बिरोध में खुद काम करै तो बिंगो राज किताक दिन चालैगो? थे मेरै खातर केवो कै ओ ओपरियां गै प्रधान बेलजबूल गी मदद ऊं ओपरियां काडै। जे मैं प्रधान बेलजबूल गी मदद ऊं ओपरियां काडूं तो थारा चेला किंगी मदद ऊं काडै? थारा चेला ई थानै गळत ठहरावैगा। जे मैं परमेसर गी मदद ऊं ओपरियां काडूं तो थे जाण लेईयो कै परमेसर गो राज थारै कनै आ'ग्यो है। फेर यीसू बानै एक मिसाल बतागे समझाया कै एक तकड़ो आदमी हथियार लेगे आपगै घर गी रुखाळी करै तो बिंगो धन कोई हलावै कोनी। पण बिं आदमी ऊं कोई ओर तकड़ो आदमी आ'गे बिं पर हमलो करै तो जिं हथियार पर बिंगो भरोसो हो बो खोस ल्यै अर बिंगो सारो धन दूसरा नै बांट दयैगो। ईंखातर झिको मेरो चेलो होगे बी दूसरा नै मेरै कनै कोनी ल्यावै, इंगो मतलब ओ है कै बो दूसरा नै मेरूं दूर करै।


जद ओपरी आत्मा आदमी ऊं निकळज्यै तो बा सुखी जिग्यां में आसरो ढूंढै पण बिनै जिग्यां ना मिलै तो बा ओपरी झिकै आदमी ऊं कडी ही बिमै ई पाछी आ'ज्यै। अर बिं आदमी नै सजो सजायो होयो देखगे बा जा'गे आप ऊं ओर बुरी दूसरी सात ओपरियां नै आपगै सागै ले आवै। अर फेर बिं आदमी गो हाल पेलां ऊं बी ओर जादा बुरो हो'ज्यै है।”

जद बो ऐ बातां बताण लागरयो तो बिं भीड़ माऊं एक लुगाई जोर ऊं बोली, “धन्य है बा कोख झिकी में थे रेया, धन्य है बा मां झिकी गो थे दूध पीयो।” जद यीसू केयो, “पण धन्य तो बे है झिका परमेसर गो बचन सुणै अर मानै है।”


जद भीड़ ओर बोळी होण लागगी तो यीसू केयो, “ईं जुग गा लोग भोत बुरा है, क्यूंकै परमेसर मनै घाल्यो है अर आं लोगां मनै परखण खातर सुरग गो निसान मांग्यो है। पण योना झिको परमेसर गो एक दास हो बिंगै अलावा आनै ओर कोई निसान कोनी मिलै। क्यूंकै जद योना नीनवे देस गै लोगां गै खातर निसान बण्यो बिंयाई मिनख गो बेटो ईं जुग गा लोगां गो निसान बणसी। परमेसर ईं जुग गै लोगां गै न्याय गै दिन दिखणाद में सीबा देस गी राणी जी उठैगी अर ईं जुग गै लोगां नै दोसी मानैगी। क्यूंकै बा राणी राजा सुलेमान गी आच्छी बातां नै सुणन खातर भोत ई दूर ऊं चालगे आई। पण अठै राजा सुलेमान ऊं बड़ो आदमी है अर थे बिंगी बातां नै कोनी मानो। न्याय गै दिन नीनवे सैहर गा लोग खड़या होगे ईं जुग गै लोगां नै दोसी ठहरावैगा क्यूंकै जद योना परमेसर गो संदेस सुणायो हो, नीनवे सैहर गा लोग आपगी बुराइंया खातर पछतावो करण लागग्या। अब तो योना ऊं बी बड़ो आदमी थारै बिचाळै है अर बिंगी बातां नै ईं जुग गा लोग कोनी मानै है।”


फेर यीसू आ मिसाल दी: “कोई बी आदमी आपगै घर में रात नै दीयो जगागे बिनै ढकै कोनी पण सांमै आळै में रखै क्यूंकै बो चावै कै झिको मा आवै बिनै चानणो मिलै। तेरै सरीर गो दीयो तेरी आंख है जद तेरी नजर साफ है तो तेरो पूरो सरीर उजळयो है, जे तेरी नजर ई बुरी है तो पूरो सरीर ई अंधेरै में है। ईंखातर चोकना रेवो कै झिको चानणो थारै मा है बो अंधेरै में ना बदळ ज्यै। तो जद तेरो पूरो सरीर उजियाळै में होवैगो तो इंगै किसैई अंग पर अंधेरो कोनी रेवैगो। अर इतो चानणो होवैगो जिंया कै दीयै गी तेज रोसनी बिंगै उपर पड़ै है।”


जद यीसू ऐ बातां करण लागरयो तो एक फरीसी आदमी बिनती करण लागग्यो, “मेरै घरे भोजन करण चालो।” जद बो भोजन करण लागग्यो तो, बो फरीसी आदमी हेरान होयो कै यीसू भोजन करण ऊं पेलां यहुदी रिवाज गै अनुसार हात कोनी धोया। प्रभु बिनै केयो, “हे फरीसियो, थे भांडा तो बारूं बारूं मांजो, पण थारै मा पाखंड अर बुराई भरेड़ी है। हे मूरखो, झिकै आनै बारूं बणायो बणई आनै माऊं बणायो है। देखो, झिको थारै कनै बो गरीबां नै बांट दैयो तो सारो कीं सुद्ध होज्यैगो।” “पण हे फरीसियो थारै सागै बुरो होवैगो, क्यूंकै थे पोदिनो अर सारी जड़ी बूंटियां गो दसवों हिसो परमेसर नै देवो हो पण थे दूसरा गै सागै न्याय करणो अर परमेसर ऊं प्रेम करणो भूल जावो हो। दसवों हिसो देणो आच्छो है पण आं बातां गो पालण करणो ओर बी जरूरी है।” हे फरीसियो, “थारै सागै बुरो होवैगो, थे ओ चाओ कै लोग म्हानै सतसंग घर में सारा ऊं आच्छी अर ऊंची जिग्यां बिठावै अर बजार में लोग म्हानै बारी बारी निमस्कार करै। थारै सागै बुरो होवैगो। क्यूंकै थे बां दबेड़ी कबरां बरगा हो बिंगै मा गी गंदगी ऊं अणजाण होगे बिंगै उपर लोग चालै है।” ऐ बातां सुणगे एक धरम सासतरी बोल्यो, “हे गुरू, ऐ बातां कर'गे थे म्हारी बी बेजती करो” यीसू जबाब दियो, “हे धरम सासतरी थारै सागै बुरो होवैगो। थे इतो भार जितो थारूं बी कोनी चकिजै बितो दूसरा लोगां पर लद देवो अर आप एक आंगळी बी कोनी लगाओ” थारै सागै बुरो होवैगो। थे बां परमेसर गी बात बोलण आळां गी कबरां बणाओ झिकां नै थारै बाप दादा मार दिया। आ दिखावो कै थे आपणै पुरखां गा काम ऊं राजी हो अर बांगा पक्स में गवा हो। झिका थारा पुरखां दूसरा नै मारया। बांगी कबरां गै उपर गुमटी बणागे बांगै काम नै पूरो करो हो। ईंखातर परमेसर झिकै गै कनै सारो ग्यान है बानै केयो, “मैं बांगै कनै परमेसर गी बात बोलण आळा अर खास चेला नै घालूंगा। पण बे केईयां नै मार देसी अर केईयां नै तंग करसी” संसार बणण ऊं लेगे अब तांई जिताई परमेसर गी बात बोलण आळां नै मारया है, बांगो लेखो ईं जुग गै लोगां कनूं लेईजैगो। परमेसर गै दास हाबिल ऊं लेगे धूप करण गी जिग्यां अर मिन्दर गै बिचाळै मारया गेया जकरिया तांई जिता बी परमेसर गी बात बताण आळा नै मारया हा बां सारा गो लेखो बी ईं जुग गै लोगां ऊं लेईजैगो। हे धरम सासतरियो, थारै सागै बुरो होवैगो। थे परमेसर गै नेमा नै जाणन ऊं लोगां नै रोक्या है। थे खुद'ई परमेसर गै राज में कोनी जावो हो अर लोगां नै बी कोनी जाण दैयो हो। यीसू आपगी सारी बातां कर'गे जाण लाग्या तो सासतरियां अर फरीसियां बुरी तरियां बांगै लारै पड़ग्या अर भांत भांत गा सुआल करण लागग्या। क्यूंकै बे चावा यीसू कोई हिस्यो जबाब देवै जिंऊ बानै फसा सकां।

Слушни за लूका 11