Библия пэ влахицко романи шыб

© 2021 Bible Translators of Ukraine © 2021 Pioneer Bible Translators This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Кала Тибериё дэшупанч бэрш сас императороса, Понтиё Пилато сас баро рай андэ Иудея, Иродо сас рай тетрархо андэ Галилея, о Филипо, пхрал лэско, — рай тетрархо андэ Итурея и Трахонитско пхув, а Лисаниё — рай тетрархо андэ Авилиния. Андэ кодья вряма сас барэ рашаенца Анас и Каиафа. Сас лав Дэвлэстар кав Иоано, шаво лэ Захарияско, андэ мал. Иоано прожалас пай всавори пхув пашав Иордано и акхарэлас манушэн тэ каисавэн и тэ болэнпэ, кай о Дэл тэ эртисарэл лэндирэ бэзэха. Сар запистрасордо андо лил пророкоско Исаяско:
«Гласо цыписавэл андэ мал:
Гытон о дром Раести,
ворта терэн дрома важ Лэсти!
Всаворэ оврагоря пхэрдёна,
всаворэ барэ и цэкнэ плая тэлёна,
бангэ дрома тернапэ ворта,
нагладосавэ дрома гладосавэна,
и всаворэ мануша дикхэна фэрисаримос Дэвлэско».
Иоано пхэнэлас манушэнди, савэ авэнас тэ болэнпэ:
— Родо сапано! Ко пхэндя тумэнди тэ нашэн холятар, сави жал пэр тумэндэ? Сикавэн рындонэнца, со тумэ каисайле, и на гындон: «Дад амаро исин Авраамо». Пхэнав тумэнди, со Дэл ваздэла андай кадэла бара шаворэн Авраамости. Акэ, товэр пашав корнё дрэвоско пашлёл: всаворэ дрэворя, савэ на анэн лашо плодо, пхагэн товэрэса и шон андэ яг.
Пушэнас лэстар и мануша:
— Со амэнди тэ терас?
Вов пхэндя лэнди:
— Кастэ исин дуй гада, мэк отдэл екх кодлэсти, кастэ нинай, кастэ исин хамос, мэк дэл епаш кодлэсти, кастэ нинай.
Авиле лэстэ тэ болэнпэ стидэмаря налогонэндирэ и пушэнас лэстар:
— Сытяримари! Со амэнди тэ терас?
Вов пхэндя лэнди:
— На лэн лэ манушэндар майбут колэстар, со трэбуй тумэнди тэ лэн.
Пушэнас лэс и халавдэ:
— Со амэнди тэ терас?
Вов пхэндя лэнди:
— На залэн манушэндар зораса. На хохавэн лэ манушэн, жувэн пэ кола ловэ, савэ тумэнди потинэн.
Всаворэ мануша ажутярэнас и гындонас андэ пэсти водя пала Иоано, чи на вов о Христосо. Иоано пхэндя всаворэнди:
— Мэ болав тумэн паеса, нэ авэла Кодва, Ко майзорало мандар. Мэ на ашав тэ роспхандав Лэсти тэраха. Вов болэла тумэн Свэнтонэ Духоса и ягаса. И андэ Лэстирэ васт ганавди, вов жужарэла пэско токо и стидэла ворзо Пэско андэ пусын, ай шэлуха спхабарэла андэ яг, сави на пэрэашэла тэ пхабол.
Кала и авэр будэр лава пхэнэлас лэнди Иоано, кала пхэнэлас лэнди Радосаво Лав. Иоано ля тэ ужылисарэл раес тетрархос Иродос, важ кода со вов ля палав ром Иродиада, ромня пэстирэ пхралэстиря, и колэсти со вов терэлас найлашэ рындоря. Тунчи Иродо тердя инке екх вырито рындо — пхандадя лэ Иоанос андо баруно.

Кала всаворэ мануша болдэпэ, кадя ж сас болдо и Исусо. Тунчи Вов мангляпэ Дэвлэс, и отпхэрнадяпэ болыбэн. И Свэнто Духо, сар голубо, сжыля по Исусо. Сас гласо упрал, саво пхэнэлас:
— Ту Шаво Мэрно, савэс Мэ камав! Ту — Мэрно радомос!

Кала Исусо ля тэ терэл и бути важ о Дэл, Лэсти сас варикай трянда бэрш. Вов сас, сар гындонас, шаво Иосифоско. Андо лэско родо сас: Илиё, Матфато, Левиё, Мелхиё, Ианаё, Иосифо, Матафиё, Амосо, Наумо, Еслиё, Нагеё, Маафо, Матафиё, Шымьё, Иосифо, Иодаё, Иоханано, Риса, Зоровавелё, Шэалтиило, Нириё, Мелхиё, Адиё, Косамо, Элмадамо, Иро, Иосиё, Элиезеро, Иоримо, Матфато, Левиё, Симеоно, Иуда, Иосифо, Ионамо, Элиакимо, Мелеа, Мена, Матафа, Нафано, Давидо, Иесеё, Овидо, Боазо, Сала, Нахшоно, Аминадаво, Админо, Арниё, Хецроно, Фарецо, Иуда, Иаково, Исаако, Авраамо, Терахо, Нахоро, Серуго, Реуо, Пелего, Еверо, Шэлахо, Каинано, Арпахшадо, Симо, Ноё, Ламехо, Мафусало, Енохо, Иаредо, Мелелеило, Каинано, Еносо, Сифо, Адамо, о Дэл.

Слушни за Лукастар 3