2Mpanjaka 21
21
Ny nanjakan’i Manase sy Amona.
1ROA ambin’ny folo taona Manase, fony izy vao nanjaka. ary dimy amby dimam-polo taona no nanjakany tany Jerosalema. Ary ny anaran-dreniny dia Hefziba.
2Ary nanao izay ratsy eo imason’i Jehovah izy tahaka ny fahavetavetan’ny firenena izay noroahin’i Jehovah tsy ho eo anoloan’ny Zanak’Isiraely. 3Fa namboariny indray ny fitoerana avo, izay noravan’i Hezekia rainy, ka nanangana alitara ho an’i Bala izy sady nanao Aseraha, tahaka izay nataon’i Ahaba, mpanjakan’ny Isiraely, ary niankohoka teo anatrehan’izay rehetra eny amin’ny lanitra izy ka nanompo ireny, 4sady nanao alitara tao an-tranon’i Jehovah koa izy, dia tao amin’izay nolazain’i Jehovah hoe: Ao Jerosalema no hasiako ny anarako. 5Fa nanao alitara teo anatin’ny kianja roa tamin’ny tranon’i Jehovah ho an’izay rehetra eny amin’ny lanitra izy. 6Ary ny zanany nampamakiny ny afo, sady nanandro sy nanao sikidy izy ary naka ny manao azy ho tsindrian-javatra sy ny mpanao hatsarana, ary nahery nanao izay ratsy eo imason’i Jehovah izy ka nampahatezitra Azy.
7Ary ny sarin’i Astarta izay nataony dia napetrany tao amin’ny trano nolazain’i Jehovah tamin’i Davida sy Solomona zanany hoe: Ato amin’ity trano ity sy eto Jerosalema, izay nofidiko tamin’ny firenen’Isiraely rehetra, no hasiako ny anarako mandrakizay. 8Ary tsy hampandeha ny tongotry ny Isiraely intsony hiala amin’ny tany izay nomeko ny razany Aho, raha mba hitandrina ka hanao araka izay rehetra nandidiako azy sy araka ny lalàna rehetra izay nandidian’i Mosesy mpanompoko azy ihany izy. 9Nefa tsy nihaino izy; fa Manase nitaona azy hanao ratsy mihoatra noho ny nataon’ny jentilisa, izay naringan’i Jehovah tsy ho eo anoloan’ny Zanak’Isiraely.
10Ary Jehovah nampilaza ny mpaminany mpanompony hoe: 11Satria Manase, mpanjakan’ny Joda, nanao izao fahavetavetana izao ka nanao ratsy mihoatra noho izay rehetra nataon’ny Amorita izay teo alohany sady nampanota ny Joda tamin’ny sampiny, 12dia izao kosa no lazain’i Jehovah, Andriamanitry ny Isiraely: Indro, hahatonga loza amin’i Jerosalema sy Joda Aho, ka izay rehetra mandre izany dia hangintsingintsina ny sofiny roa. 13Ary hohenjaniko ato Jerosalema ny famolainan’i Samaria sy ny pilaon’ny taranak’i Ahaba; ary hamaoka an’i Jerosalema Aho, toy ny olona mamaoka lovia ka sady mamaoka no manohoka azy koa. 14Ary hafoiko ny lovako sisa ka hatolotro ho eo an-tànan’ny fahavalony; dia ho sambotra sy ho babon’ny fahavalony rehetra izy, 15satria efa nanao izay ratsy eo imasoko izy ka nampahatezitra Ahy hatramin’ny andro nivoahan’ny razany avy tany Egypta ka mandraka androany.
16Ary na dia ny ra marina aza dia nalatsak’i Manase be dia be mandra-pamenony an’i Jerosalema rehetra, ho fanampin’ny ota izay nampanotany ny Joda tamin’ny nanaovany izay ratsy eo imason’i Jehovah.
17Ary ny tantaran’i Manase sisa mbamin’izay rehetra nataony sy ny fahotana izay nataony, tsy efa voasoratra ao amin’ny bokin’ny tantaran’ny mpanjakan’ny Joda va izany? 18Ary Manase lasa nodi-mandry any amin’ny razany, dia nalevina teo an-tanimboly eo ala-tranony amin’ny sahan’i Oza; ary Amona zanany no nanjaka nandimby azy.
19Roa amby roa-polo taona Amona, fony izy vao nanjaka, ary roa taona no nanjakany tany Jerosalema, Ary ny anaran-dreniny dia Mesolemeta, zanakavavin’i Haroza, avy any Jotba.
20Ary nanao izay ratsy eo imason’i Jehovah koa izy tahaka ny nataon’i Manase rainy. 21Fa nandeha tamin’ny làlana rehetra izay efa nalehan-drainy izy ka nanompo ny sampy izay notompoin-drainy sady niankohoka teo anatrehany. 22Ary nahafoy an’i Jehovah, Andriamanitry ny razany, izy, fa tsy nandeha tamin’ny làlan’i Jehovah.
23Ary ny mpanompon’i Amona mpanjaka nikomy taminy ka namono azy tao an-tranony.
24Ary ny vahoaka namono izay rehetra nikomy tamin’i Amona mpanjaka, dia nampanjaka an’i Josia zanany hisolo azy.
25Ary ny tantaran’i Amona sisa, tsy efa voasoratra ao amin’ny bokin’ny tantaran’ny mpanjakan’ny Joda va izany? 26Ary nalevina tao amin’ny fasany tao amin’ny sahan’i Oza izy; ary Josia zanany no nanjaka nandimby azy.
Voafantina amin'izao fotoana izao:
2Mpanjaka 21: MBP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Baiboly Protestanta Malagasy © Malagasy Bible Society, 1965, 2019.