मत्ती 10

यीशु सनी चेलारे

(मरकु 6:7-13; लूको 9:1-6)

1दंङ यीशुज़ि एनोह सनी चेला तिंङ कछंङ बुलाके, दोतिंङ मीहतु दोरच़ी मांजी आत्मारे हुपिमी ए ऊई लाह पाहठी बीमारी ए कमज़ोरी ठीक लहज़िमी अधिकार रेह च़रति। 2दुह सनी प्रेरितातु मिन दिह तोहई; पहला शमौन, अतिंङ पतरस लाह कुट्री, दोऊ न्वा अन्द्रियास, जब्दीऊ योह याकूब ए यूहन्ना। 3फिलिप्पुस ए बरतुलमे, थोमा ए चुंगी लेहपच़ा मत्ती, हलफई ऊ योह याकूब ए थद्देयास। 4शमौन कनानी#10:4 दुह इच्च़ा पुराना यहुदी समाजो मीह तोहई, दिह समाजो मकसद तोहई कि परमेश्वरो राज्यो भत्ते संसारा रिंङ स्थापना लहज़ी झांह लेह दोरे सन सत्तर तचेक रोमी समाजो कट्टर बिरोधी तोईरे ए यहूदा इस्करियोति अच़ि यीशुबि च़ुमज़ि लहते।

सनी प्रेरिता तु सेवा कम

5दिहरे सनी तिंङ यीशुज़ि दिह आज्ञा रेह चरच़तो, “ऊईजाति तु ए सामरी मीहतु नगरंङ था ईलांई। 6पर इस्राएल देशो मीहतु कछंङ ईलांई अंऊ ञोंहषे त्रैंईतु ठ्रोह तोतोर। 7दंङ ईलांई, दिह प्रचार लांई कि स्वर्गो राज पिचे अंजा। 8नत्पारे ठीक लांई: सिए दोरे श्रींङमी लांई, कोढ़ीरे शुद्ध लांई, दंङ मांजी आत्मारे हुन्दुई, छना केतिङ मुफ्ता खोकसी तोह ध्वांए मुफ्ता रांई। 9केनातु दोर माह ज़ंङ, माह रोपा, माह तांबा तांहई। 10अमू थल्जी माह झोली, तांहई माह झुह्ट कुरतिरे, माह झुह्ट बूटरे, माह लठी तांहई, छना कुचे कम लहज़ाबि दोऊ बगत खोकसी जूंस।

11अंऊ ला नगरंङ ए इलाकारिंङ योंई ता पता लगाएतुंई कि अरी मीह जोगे तोह? अपेहल तचेक दुह नगरंङ ज़ि माह हुंजोंई, दोऊ दोरे बंङज़ुंई। 12तोंखा अंज़े दोपहल दोबि आशीष रांई। 13अगर दुह घरबारो मीहरे रूठे शुईरेता केहतु आशीर्वाद दोतु कछंङ पीपोह्तो पर अगर दोरे दोऊ जोगे माह शुईरेता केहतु आशीर्वाद केहतु हखा यह्च़ा अपतो। 14दंङ अच़िया केहतु गप्पा माह रेड्रोर ए केहतु इज्ज़त माह लोहर, दुह घरबारे ए नगरारिंङ हुंज़ा केनातु कोन्ज़ो धुह्‌ड़ ला ठुड़ेके कि च़रतुंई। 15गेह केतिंङ हेले कुट्रातग न्याय ध्याड़ारिंङ दुह नगरो हालात सदोम ए अमोरा शहर महस दुखदायी शोतो।

अंजा खरे टेम

16खंड्रूई गेह केतिंङ त्रैंईतु ठ्रोह शंखुतु बिचंङ चरच़ातग, झांह लेह ओमड्रो ठ्रोह चलाक ए कबूतरो ठ्रोह बुद्धिमान शुई। 17केतिंङ खबरदार बंङज़ी जूंस; बैरीर केहतु खिलाप योर दोच़ी केहरे पंचायतंङ, कोर्टंङ च़ुमने शोर दंङ केतिंङ यहुदी सभा घरबारंङ तेंङे च़रपोर। 18गिऊ बज़हज़ि मोह्ड़े-मोह्ड़े रज्ज़ा, हाकिमज़ि केहतु पुछताछ लोहर। केहच़ी ऊईजाति तु तुईज़ी गिऊ पाहठी गवाही रमोनी। 19पर अपेहल दोच़ी केरे च़ुमने लोहर ता दिह चिंद थालांई कि ञेंहच़ी छना छि कुंई; छना कुचे केतिंङ छिल्ला कुट्रिमी शोतो दुह केतिंङ कंड्रे च़रपोर। 20छना कुंई साते ता कुट्रा दुह, केरे माह शुह दंङ पवित्र आत्मा शोतो।

21मीहरे एनोह विशवासी न्वा रिंह्ङ तिंङ सच़िमी थल्जी विरोधितू गुहड़िंङ रेह च़रपोर, ध्वांए याह-बाहच़ि ला एनोह कटुतंङ साते लोहर। दंङ कटुरे एनोह याह-बाहतु बिरोधंङ शुहचे दोतिंङ सच़िमी थल्जी बैरीतु गुहड़िंङ रेह च़रपोर। 22दंङ गिऊ टोहकठे विशवास लहज़िमी रंङ साते भत्ते मीहच़ी केतंङ साते बैर लोहर; पर अंऊ दुखो अनंत तचेक गिऊ टोहकठे पक्‍का विशवासरिंङ बंङज़ोतो, परमेश्वरे दुह बचाके च़रपोतो। 23अपेहल दोच़ी केरे इच्च़ा नगरारिंङ तंग लाहरिरे ऊई नगरारिंङ पोक्शे ईलांई। गेह केतंङ हेले कुट्रातग, केहरे अईता इस्राएलो भत्ते नगरंङ पिह्छी मशोंई, गेह मीहू योह वापिस अच़ा अपोग। 24चेला एनोह गुरु बे मोह्ड़े माह शुहबी, माह परगर एनोह मालिकाबे मोह्ड़े शुहबी। 25दिह झोबड़ी शोतो कि चेला एनोह गुरु बराबर शोतो, दंङ परगरो एनोह मालिको बराबर; अगर दोच़ी घरबारो घ्याता बि मांजी आत्माओ मुख्या, शेतान कुहषी ततोर, अगर दोच़ी गेह चुंङो मालिकारंङ साते मांजी व्यवहार लोहर दंङ दोबि लाह मांजी व्यवहार चुंङी टबरारंङ साते लाह लोहर।

अतंङ साते बेवोई?

26दिऊ थल्जी केहरे मीहतंङ था बेई; छना कुचे कि नयाय ध्याड़ारिंङ भत्ते धिर छिल्ला घटेकषी तोह दुह तुईज़ी अपतो, दंङ छिल्ला धिर ब्याके तोह दुह भत्तेतु तुईज़ी प्रगट शोतो। 27छि गेह केतिंङ हंञारारिंङ कुट्रातग दुह केहच़ी छंङीरिंङ कुंई; छि रेट्रे रेट्रातंई दुह लंङदिंङ इलजे कडूंई। 28अच़ि फुको घात लाह्तोर, पर आत्मो नुकसान लेह मरच़ि, दोतंङ साते थाबेंई पर परमेश्वरारंङ साते बेंईन अच्च़ी फुके आत्मा झुल्ला नरकंङ खत्म लेह तरच़ा। 29छि झुह्ट पेसारिंङ झुह्ट प्याहरे माह लंङसातोरा? तांला केहतु बाहऊ हिटी मेह दोतु बिचंङज़ि इच्च़ा ला धरतीऊ टोहकठे माह दह्पी। 30परमेश्वरे केहतु जहानो भत्ते धिरो पाहठी चिंद ला। देर तचेक कि दोई दिह ला ञेंहच़ा कि केहतु पुंज़ा अंयों क्राह तोह। 31दिऊ थल्जी था बेंईन। केहरे परमेश्वरो थल्जी प्यारेबे बढ़के शुई।

यीशु बि स्वीकार ए अस्वीकार लहज़ी

32अच्च़ी लाह मीहतु तुईज़ी कुट्रातोर कि दोरे गिऊ चेलार शुहर, दंङ गेह लाह दोबि घेंङौ स्वर्गीय बाहऊ तुईज़ी घेंङौ चेला मनेक्पोग। 33पर अच़ि मीहतु तुईज़ी गिऊ चेला शुबीरंङ साते इन्कार लोहतो, दंङ गेह लाह दोबि घेंङौ स्वर्गीय बाहऊ तुईज़ी घेंङौ चेला शुहबिमी दोरच़ी इन्कार लोहग।

यीशु अपिमी परिणाम

34दिह था सोचेक्तुंई कि गेह धरती रिंङ मीहतु बिचंङ मेल मिलाप लहज़िमी अंज़े शुगाह; गेह मीहतु बिचंङ मेल मिलाप लह्जी माशुहगा पर झगड़ा कराएच़िमी थल्जी अंज़े शुगाह। 35गेह ताह अंज़े शुगाह कि, मीहतिंङ दोतु पिता परमेश्वरे, मियोबि दोऊ याहऊ दोरच़ी दंङ बोह्ड़ीबि दोऊ युह्गो खिलाप लेह च़रपोग। 36मीहू बैरीर दोऊ एनोह घरबारो मीहरे शोर। 37अच़ि एनोह याह ए बाहबि गिहबे चंबे चेहच़ा, दुह गिऊ जोहगे माह शुह; दंङ अच़ि याह बि या मियोबि गिहबे महस दाह चेहच़ा दुह गिऊ चेला बणेक्पिमी जोगे माह। 38अरी गिऊ चेला शुहबिमी बजाए दुख सहन लहज़िमी ए सीमी लाह तेयार माह दुह गिऊ चेला बणेक्पिमी जोगे माह। 39छना कुचे अच़ि एनोह जहान दिह धरतीऊ टोईच़ी बचाएपोतो दोई दुह योहपतो; अच़ि गिऊ थल्जी एनोह जहान रमोतो दोई दुह खोकपोतो।

ईनाम

40अच़ि केरे ग्रहण लाह दोई गेह ग्रहण दंङ अच़िला गेह ग्रहण दोई परमेश्वरा बि अपनाच़ा। 41अच़ि भविष्यकंड्रापी भविष्यकंड्रारे चेहके ग्रहण लाह, दोई भविष्यवक्तातु ठ्रोह ए ईनाम खोकपोतो; दंङ अच़ि धर्मी बि धर्मी चेहके ग्रहण लाह दोई धर्मी मीहू ठ्रोह ए ईनाम खोकपोतो। 42अच़िला दिह कवचि दीतु बिचंङज़ि इच्च़ाबि ला गिऊ चेला चेहके दोबि सोई ती रमोतो, गेह केतंङ हेले कुट्रातग, परमेश्वर दोबि ईनाम ज़रुर रमोतो।”

Voafantina amin'izao fotoana izao:

मत्ती 10: LBFNT

Asongadina

Hizara

Dika mitovy