2 Tantara 26
26
Ny nanjakàn’i Hozià
(Jereo 2 Mp 14.21-22; 15.1-3)
1Vao 16 taona i Hozià#26.1 I I Hozià dia antsoina hoe Hazarià manerana ny rijan-teny mirazotra ao amin’ny 2 Mp. no nalain’ny vahoaka jodeanina rehetra ka notendreny ho mpanjaka handimby an’i Amatsià rainy. 2Rehefa lasa nodimandry any amin’ny razany kosa ity rainy, dia i Hozià no nampody ny seranana#26.2 Jereo 8.17. Elata ho an’ny fanjakan’i Joda sy nanamboatra azy indray.
3Feno 16 taona i Hozià fony tonga mpanjaka; ary naharitra 52 taona no nanjakany tao Jerosalema. Ny anaran-dreniny dia i Jekôlià izay avy ao Jerosalema ihany. 4Nanao izay mahitsy eo imason’ny TOMPO i Hozià, tahaka izay rehetra nataon’i Amatsià rainy.
Niraiki-po tamin’Andriamanitra aloha i Hozià, dia nivadika taminy
5I Hozià tamin’ny andro niainan’i Zakarià izay nampianatra azy hanaja an’Andriamanitra, dia nivavaka tokoa tamin’ny TOMPO Andriamanitra sady nomeny fanambinana.
6Nandeha niady tamin’ny Filistinina i Hozià, ka nandrava ny mandan’i Gata sy ny an’i Jabne ary ny an’i Asdôda#26.6 Gata, Jabne, Asdôda: tanàna filistinina teo amoron-tsiraka, samy andrefan’i Jerosalema.; avy eo izy dia nanamafy tanàna jodeanina takaikin’i Asdôda sy takaikin’ny Filistinina. 7Ary nanampy azy hatrany Andriamanitra hanohitra ny Filistinina sy ny Arabo nonina tao Gora#26.7 Gora (araka ny RM, jereo 2 Mp 9, 27) na Gerara (araka ny Targoma)? Kanefa samy tsy fantatra mazava ny misy ireo toerana ireo. Toa mety mitombina kokoa ny dkt tranainy grika izay milazà hoe Petrà. ary ny Mehonita#26.7 Mehonita: jereo 20.1 sy nta.. 8Ireto Mehonita ireto aza dia nandoa hetra ho azy.
Tonga nahery fatratra i Hozià ka niely laza hatrany amin’ny sisin-tanin’i Ejipta. 9Nanao tilikambo tao Jerosalema izy, teo amin’ny Vavahadin’ny Zoro sy teo amin’ny Vavahady mankany an-dohasaha#26.9 Vavahadin’ny Zoro: jereo 25.23 sy nta; Vavahady mankany an-dohasaha: teo amin’ny manda lafiny andrefana izany. sady nohamafisiny tsara. 10Nanao tilikambo fiambenana ihany koa izy tao an-taniefitra sady nihady lavaka maro ho famorian-drano, satria nanana omby aman’ondry betsaka izy teny amin’ny faritr’i Sefelà sy teny amin’ny lemaka; ary nanana mpiasa tany teny an-kavoana sy mpamboly voaloboka teny an-tanimboaloboka koa ny mpanjaka, satria tia asa tany tokoa izy.
11Nanana tafika i Hozià, dia tafika afa-mifanandrina amin’ny fahavalo sy vonona hiatrika ady; notsinjaraina ho vondro-miaramila izany, araka ny vokatry ny fanisana notontosain’i Jehiela mpitantsoratra sy i Mahaseià mpitantan-draharaha, sady napetraka ho eo ambany fifehezan’i Hananià izay anankiray tamin’ireo komandy voatendrin’ny mpanjaka. 12Andiany roa nisy olona eninjato no filohan-tarika nibaiko ireo miaramila maherifo ireo; 13ary ny tafika matanjaka nofeheziny kosa dia antokony telonjato nisy vatan-dehilahy 7 500, izay nahery niady tokoa mba homba ny mpanjaka hamely ny fahavalony. 14Isaky ny hiantafika ireo, dia efa nanomanan’i Hozià ampinga sy lefona, satro-by fiarovan-doha sy akanjo vy fiarovan-tratra, ary tsipîka sy vaton’antsamotady. 15Nanamboatra milina tao Jerosalema izy izay noforonina manokana mba hapetraka teny amin’ny tilikambo sy teny amin’ny zoron’ny manda ary mba handefasana zana-tsipîka na vato lehibe. Nahagaga ny nanampian’Andriamanitra an’i Hozià, ka tonga nahery tokoa izy sady niely lavitra ny lazany.
16Kanjo nampiavonavona am-po azy izany hery nananany izany, ka nitarika loza ho an’ny tenany. Nivadika tamin’ny TOMPO Andriamaniny izy ka niditra tao amin’ny Toeramasin’ny TOMPO mba handoro vovo-javamanitra teo amin’ny alitara fanaovana izany. 17Fa mba niditra nanaraka azy kosa i Hazarià mpisorombe, niaraka tamin’ny mpisoron’ny TOMPO valopolo lahy izay samy mahery fo avokoa. 18Dia nijoro teo anoloan’ny Hozià mpanjaka ireo ka nanao taminy hoe:
–Tsy anjara raharahanao, ry Hozià, ny handoro vovo-javamanitra ho an’ny TOMPO; fa anjaran’ny mpisorona taranak’i Aharôna izay natokana hanao izany#26.18 Jereo Nom 3.10; 17.5; 18.7.. Mialà amin’ny Toeramasina ianao, satria manimbazimba an’Andriamanitra; ary tsy ho voninahitra ho anao eo anatrehan’ny TOMPO Andriamanitra izany.
19Mbola teny an-tanan’i Hozià ny fitaovana fandoroana vovo-javamanitra no nisafoaka tamin’ireo mpisorona izy. Tamin’izay indrindra dia nisy aretin-koditra nipoitra teo amin’ny handriny raha izy mbola tao an-tranon’ny TOMPO iny, teo anatrehan’ny mpisorona sady teo anilan’ny alitara fandoroana vovo-javamanitra. 20Ary i Hazarià mpisorombe sy ireo mpisorona hafa rehetra dia nanatrika nijery azy ka nahita ny aretin-koditra teo amin’ny handriny. Dia noroahiny hiala ny Toeramasina izy; sady ny tenany koa mba nivoaka ny tempoly faingana ihany, satria tsapany efa namely azy ny TOMPO.
Fiafaran’ny nanjakàn’i Hozià
(Jereo 2 Mp 15.5-7)
21Dia nianjadian’izany aretin-koditra izany i Hozià mpanjaka ambara-pahafatiny; ary nitoetra mitokana tao amin’ny trano anankiray izy#26.21 Jereo 2 Mp 15.5 sy nta., sady tsy nahazo niditra tao an-tranon’ny TOMPO intsony. Ka dia i Jôtama zanany lahy, efa mpifehy ny tao an-dapan’ny mpanjaka, no nitondra ny tany sy ny fanjakana. 22Ny sisa amin’ny tantaran’i Hozià, na tamboalohany na tafara, dia nosoratan’i Isaià mpaminany zanakalahin’i Amôtsa#26.22 Tsy ananantsika intsony izany lahatsoratra izany.. 23Rehefa lasa nodimandry any amin’ny razany kosa i Hozià#26.23 Jereo Is 6.1., dia nalevina tao an-tsaha filevena-mpanjaka; kanefa tsy tao amin’ny fasan-drazana no nandevenana azy, satria hoy ny olona hoe: «Voan’ny aretin-koditra izy!» Ary i Jôtama zanany lahy no nanjaka nandimby azy.
Voafantina amin'izao fotoana izao:
2 Tantara 26: DIEM
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Dikanteny Iombonana Eto Madagasikara © Malagasy Bible Society, 2004.