Matta 4
4
Mammɔ A Tɛl Yesu
(Mar 1:12,13; Luk 4:1-13)
1Nǝngɔ Yʊwa Kwaamaɨ a shu nǝn Yesu a mʊgɔ kuul sǝ mammɔ ya tɛl gǝnɨ. 2A do diil mwɛmɔ kɔkɔgɔ fʊltǝnaal jǝbɔ kumɔ fʊltǝnaal a ja bɔ jǝl, jʊwanɔ a ta gǝn. 3Nǝngɔ Mammɔ ba sʊwa gǝn gɔ, “Na mʊ nǝn Bʊla Kwaamaɨ, sʊwa tatǝn nɨ a yǝlam kʊkkʊm.” 4Nǝngɔ a jǝla gɔ, “A mʊla mʊlaɨ gɔ, ‘Ke bɔ nǝn jǝjalǝn kwaagɔ nǝl bʊʊ lɛɨ, n kɛltɨn nɨ gwam jel lɛ a nyiyo Kwaamaɨ.’ ” 5Nǝngɔ mammɔ a do gǝn a yɔ nǝn gɔ a tuulɔ nɨ sagsagɨɨ, a tɨ nǝn gɔ a jʊblɨ Kan Kwaamanɨ. 6A sʊwa gǝn gɔ, “Na mʊ nǝn Bʊla Kwaamaɨ, gǝla mɔ. A mʊla mʊlaɨ tag gɔ,
“ ‘Nǝ nǝ bɛtɔ twama gǝnɔ diil a dul mʊn,
jǝ kɔ kɔ kang jinɔ
ja kʌshi ń nǝn,
kage ń ga naa a tɛl.’ ”
7Nǝngɔ Yesu a jǝla gǝn gɔ, “A mʊla mʊlaɨ gɔ, ‘Ka ń tɛl lɛ Tɛlalɔ mʊnɔ Kwaama.’ ”
8Nǝngɔ mammɔ a do gǝn a yɔ nǝn gɔ a yem nɨ a deba nyɨɨ. Nǝngɔ a nʊng gǝn fɔlɔn yooli nɨ gwam jǝbɔ dʊʊlǝn jini. 9Nǝngɔ a sʊwa gǝn gɔ, “Gwam jʊtǝb nɨ mǝ nǝ ń nǝ ń, na mʊ jʊng jʊng ń nɨ ɨ dʊʊnɨ.” 10Nǝngɔ Yesu a sʊwa gǝn gɔ, “Kʌlʌm shu fɔ a kǝga mɨ Mamm! A mʊla mʊlaɨ gɔ, ‘Maa Tɛlalɔ Kwaama mʊnɔ gǝm bǝlátǝm. Nǝn gɔ kwaagɔ mʊ nǝ gǝn dʊʊn nɛɨ.’ ” 11A daagɔ, nǝngɔ Mammɔ a bǝla gǝnɨ. Nǝngɔ bɛtɔ twama Kwaamaɨ ba tɨka gǝnɨ.
Yesu A Tǝl Maajɨ Gǝnɔ A Galili
(Mar 1:14,15; Luk 4:14-16)
12Yesu a nyʊwa fulon kubʌltǝm Yohanaɨ a lɔsomii, nǝngɔ a yǝla a bɛ a mʊgɔ Galilii. 13A bǝla Nazaratɨ, nǝngɔ a shu ya yɨ a Kafarnahumi, daa gɔ gǝ na a gwanga wɨma a tǝm Zabalunaɨ jǝbɔ Naftali. 14A maa nyɔ sǝ a yii jʊ nɨ ja sʊwa a nyiyo nǝkuwotǝmkǝga Ishayaɨ gɔ,
15“Tǝm Zabalunaɨ,
jǝbɔ tǝm Naftalii,
jǝ na a golagɔ a yɔ a dʌng tiyo Urduni,
tǝm Galili a daa nɨ nǝbɔ woi n Bʌtʌbi.
16Nǝb nɨ yǝm a kumtojili a
kuwo gʌleng nyalǝmɔ,
nǝb nɨ yǝm a tǝm duuli
bwaagɨɨ nyalǝmɔ a gwi jim.”
17Nǝngɔ Yesu a tǝl kiyotǝm kɛl Kwaamaɨ gɔ, “Jǝ́ yǝla jǝ́ bǝla bwɨlangkɛltɨn jenɔ, jʊ a bwɨɨ fɔlɔn lɔ Kwaamaɨ a dwama.”
Yesu A Jo Nǝb Tatǝm Jʌngigɔ
(Mar 1:16-20; Luk 5:1-11)
18Kwama Yesu yɔ lɛ a kʌng wɨma Galilii, nǝngɔ a kuwo kaam kɛb yoi, nǝn Saminu wʊnɨ jǝ jo lɛ gɔ Bitrusi jǝbɔ kɨla gɔ Andarawas. Jǝ nǝb tatǝm jʌngi, jǝ mal lɨyal a mʊgɔ wɨma. 19Nǝngɔ Yesu a sʊwa ji gɔ, “Jǝ́ bwang mɨ, mǝ dǝg jen ya jǝ́ bɛ nǝn nǝb.” 20A ta bɔ bʊtɔ, nǝngɔ ja bǝla lɨyaltɨn jinɔ ja bwang gǝmɨ. 21A ja kǝga nǝn yɔmɨ, nǝngɔ a kuwo kaam kɛb yo tagɨ, nǝn Yakubu bʊla Zabadii, jǝbɔ kɨla gɔ Yohana, jǝ na a mʊgɔ tɨyamwɛng jǝ fɛ lɨyal jinɔ lɛ jǝbɔ tɛtɛ ji Zabadi. Nǝngɔ Yesu a jo jii. 22A ta bɔ bʊtɔ, nǝngɔ ja bǝla tɨyamwɛng jinɔ jǝbɔ tɨya ji ja bwang gǝmɨ.
Yesu A Mɛla Nǝbɔ Gǝm Kɛl Kwaamaɨ A Gung Nǝb Bɔɔlamɔ A Lada
(Luk 6:17-19)
23Yesu a bwangtǝn tǝm Galiligɔ gwam, mɛla nǝbɔ gǝm lɛ a kantɨn mɛlalɨ, kiyo jim fulon kɛl lǝmɨ fɔlɔn lɔ Kwaamaɨ lɛ, gung nǝb twɨlamɔ lɛ, jǝbɔ nǝb bɔɔlamɔ a kʊm nǝbɨɨ. 24Fulon gungtǝm nǝbɔ gǝ maa lɛɨ, a la tǝm Suriyagɔ gwam. Nǝbɔ bɛ gǝm lɛ nǝn nǝb bɔɔlamɔ jǝbɔ nǝb twɨlagɔ, jǝbɔ nǝb yʊwa bwɨlagɔ, jǝbɔ nǝb jwigɔ, jǝbɔ nǝbɔ bʊtɔgɔ a swam swamɨ, a gung ji gwam. 25Nǝbɔ a lada nyɔ na a bwang gǝm a mʊgɔ Galilii, jǝbɔ Dikafolis, jǝbɔ Urushalima, jǝbɔ Yahudiya jǝbɔ tangǝn tǝmtɨn nɨ a dʌng tiyo Urduni.
Voafantina amin'izao fotoana izao:
Matta 4: DBD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©️2024 Luke Initiative for Scripture Translation
