KISAH 9
9
Saulus Kibetobat
(Kis 22:6-16; 26:12-18)
1Sementare ajeh, Saulus lekat kiancam kaha-perdat pengikot Tuhan. Kek kiet nu Imam Agong agame Yahudi 2ru kisemanj surat kuasa de kaha-perneng nu pemimpen-pemimpen deg sembahyang mai Yahudi ku kote Damsyik. Surat ajeh kiog kuasa untok Saulus kicap pengikot-pengikot Yesus pek kira keralka kerdor ru kien enai nu kote Yerusalem supaye bijel.
3Ku kateh iceknip nu kote Damsyik, bile ilei ya kaha-merek nu kote ajeh, aleh-aleh mong cahaya ju langit kisog nu isekelileg. 4Kek kijer nu matik ru kicerngai suara de belwal nu kek, “Saulus, Saulus! Yama haaniaye Eng?”
5Saulus kitanya, “Enjen bok?”
Suara ajeh Kiberlag, “Eng Yesus de haaniaye ajeh. 6Hunen kosloh ru mujloh nu kote Damsyik. Ku pajeh doh bipasal nu hek ma de hod habeh.”
7Sengoi-sengoi de naijoi ha Saulus ajeh naisengoh lei pek dapat naibual ma-ma kerana pek naibakek bok-bok tapi had naicerngai suara taleh. 8Lalu Saulus kikos ru kibuka imat tapi pek kibakek ma-ma pen. Enai pen naicap iteg ru naipeg kek muj nu kote Damsyik. 9Nik arik kek pek dapat kinengneng, pek kicakcak, ru pek kingekngut.
10Ku kote Damsyik ajeh mong numom pengikot Yesus imuh Ananias. Ku kateh inengneng, Tuhan Kiurok nu kek, “Ananias!”
Ananias kiberlag, “Ma, Tuhan?” 11Tuhan Kiurok, “Etloh nu deg Yudas ku Nong Tegak. Ku pajeh, kek numom sengoi de imuh Saulus ju kote Tarsus. Kek tengah kibedoa. 12Ku kateh inengneng, kek kibakek numom keral imuh Ananias kihol ru kidek iteg nu kek supaye dapat kinengneng nij.”
13Ananias kiberlag, “Tuhan, jeoi mai naipasal nu eng tentang sengoi adeh. Kek kibeh hal-hal de jehat nu jemaah-jemaah Jen ku kote Yerusalem. 14Hunen kek kihol nu madeh ru surat kuasa ju raknak-raknak imam agame Yahudi kaha-cap dikdij sengoi de naipecaya nu Jen.”
15Tapi Tuhan Kiurok nu Ananias, “Etloh kerana Eng ya Ngpileh kek kijadi hambe Eng supaye kiperlei muh Eng nu mai pek Yahudi, raja-raja, ru mai Israel. 16Eng doh Ngperneng nu kek ijengoi seniksa de hod kitanggong kerana kiperlei gah tentang Eng.”
17Lalu Ananias kiet ru kimuj nu deg Yudas ru kidek iteg ku Saulus. Kiurok, “Sedara eng Saulus, Tuhan Yesus de haneng ku kateh ceknip hek nu madeh Kingeng eng supaye hek dapat hanengneng nij ru bikuasa ya Kelog Santen.” 18Ku sarik jijeh juga mong begei sisek kak jer ju mat Saulus ru kek dapat kinengneng nij. Lalu kek kikos ru bibaptis. 19Telas ya kicakcak, iberog kibetenage semula.
Saulus Kibeajar ku Kote Damsyik
Saulus kigei memerip arik ku kote Damsyik besama ru pengikot-pengikot Yesus. 20Kek teros kiet nu deg-deg sembahyang ru mula kiajar tentang hal adeh: Yesus ajeh Kenon Jenang.
21Dikdij mai de naicerngai ha bengwal Saulus ajeh naijadi hiran. Enai naibelwal ratak liknai, “Kek ajeh isengoi de kaha-perdat dikdij mai de naisembah ha Yesus ku kote Yerusalem. Kek kihol nu madeh kaha-cap ru kaha-en pengikot-pengikot Yesus nu raknak-raknak imam agame Yahudi.”
22Tapi pengaroh Saulus ya gukuat. Kek kiguna Alkitab kaha-pebukti hal adeh: Yesus ajeh Peselamat de bijanji ya Jenang. Hal ajeh kibeh mai Yahudi ku kote Damsyik pek dapat naibantah ibengwal ajeh.
23Telas merip iluniu ju kenjeh, mai Yahudi nairancang naiha-perdat Saulus. 24Tapi nerancang enai ajeh bipanei ya Saulus. Kelem yah naipoj ku pintu kote naiha-perdat kek. 25Tapi ku nanek kelem, pengikot Saulus naicerleh kek ku kateh raga ju lubang dinig kote nu matik.#2 Kor 11:32-33
Saulus ku Kote Yerusalem
26Saulus kiet nu kote Yerusalem ru kikerekwat kaha-besama ru pengikot-pengikot Yesus ku pajeh. Tapi naisengoh ha kek kerana pek naipecaya kek ya betol-betol kijadi pengikot Yesus. 27Tapi Barnabas kisamut kek ru kien kek nu rasul-rasul. Barnabas kipasal hal adeh nu enai: Saulus ya kineng Tuhan mase ku kateh iceknip nu kote Damsyik ru Tuhan ya Kibelwal nu kek. Barnabas juga kipasal begeiharok Saulus kiberani beajar kateh muh Yesus ku kote Damsyik. 28Kerana ajeh, Saulus kigei besama ru enai ru berani kibeajar ku kateh muh Tuhan ku dikdij kote Yerusalem. 29Kek juga kibelwal ru kibelawan bual ru mai Yahudi de naibelwal engrok Yunani tapi naikerekwat naiha-perdat kek. 30Bile sengoi-sengoi de pecaya nu Yesus naipanei tentang hal ajeh, enai naien Saulus nu kote Kaisarea lalu naingeng kek nu kote Tarsus.
31Kerana ajeh, jemaah-jemaah ku dikdij lengrik Yudea, Galilea, ru Samaria naisui kateh neaman. Jemaah-jemaah ku pajeh naisengoh ru naihormat ha Tuhan. Kerana bitulog ya Kelog Santen, enai juga ya gukuat ru ya gujengoi.
Petrus ku Pekan Lida ru Kote Yope
32Sementare Petrus kiet nu jap-jap tempat, ku nanek arik kek kisueg ha mai pecaya de mong ku pekan Lida. 33Ku pajeh kek kiburuk numom keral imuh Eneas de lumpoh ru pek dapat kikos ju itempat daknak iluniu lapan tahut. 34Petrus kiurok nu kek, “Eneas, Yesus Kristus Kiperbor hek. Kos ru siaploh tempat daknak hek.” Ku sarik jijeh juga Eneas kikos. 35Dikdij sengoi de naigei ku pekan Lida ru Dataran Saron naineng Eneas lalu naijadi pecaya nu Tuhan.
36Ku kote Yope, mong numom kerdor imuh Tabita. Kek pen pengikot Yesus. (Kateh engrok Yunani imuh Dorkas. Imaksod, rusa.) Kek selalo kibeh hal-hal de bor ru kitulog ha mai hajap. 37Mase Petrus mong ku pekan Lida, Dorkas de mong ku kote Yope kinyik lalu kidat. Telas bipermuh, imayat bidek ku bilek kemil. 38Kote Yope ajeh pek nyak ju pekan Lida. Jadi, bile pengikot Yesus ku Yope naicerngai gah tentang Petrus mong ku Lida, naingeng nar mom keral baiet nu Petrus ru naibesat baiurok begei adeh: “Hol deras nu madeh.”
39Petrus teros kikos ru kijoi ubai. Bile ya kilei nu majeh, kek bien nu bilek kemil. Dikdij balu de mong ku pajeh naiperek nu Petrus ru jengnam sambel naiperneng baju ru abat de bicig ya Dorkas ha enai mase kek lekat kisui. 40Petrus kior naihol nu luar lalu kibelutot ru kibedoa. Telas ajeh kingerngar nu mayat ajeh ru kiurok, “Tabita, kosloh!” Tabita pen kibuka imat ru bile kek kibakek Petrus, kek pen teros kigigei. 41Petrus kicap teg Tabita supaye buleh kijinjeg. Telas ajeh Petrus kicereg dikdij sengoi de pecaya nu Yesus teutame kekerdor balu ru kiperneng Tabita de ya sui ajeh nu enai.
42Gah ajeh biperlei nu dikdij tempat ku kote Yope lei jeoi mai naipecaya nu Tuhan. 43Petrus kigei memerip iluniu nij ku kote Yope ku deg Simon de kibeh getek binatag.
Voafantina amin'izao fotoana izao:
KISAH 9: AEH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.