ယောဟန် 10
10
သိုးဆိတ်ကျောင်းသားန သိုးဆိတ်အရွီ ပုံဥပမာ
1“ငါ ကိုယ်ဘင်ရို့ကို အမှန် ပြောရေ၊ အသူမဆို သိုးဆိတ်ခြံအထဲတို့ လမ်းခဝက မဝင်ဘိုင်းန အခြားတစ်နေရာက ဝင်ရေဆိုကေ သူစာ သူခိုးဒါးမြ ဖြစ်တေ။ 2ယေကေလည်း လမ်းခဝက ဝင်သူစာ သိုးဆိတ်ကျောင်းသား တစ်ယောက် ဖြစ်တေ။ 3သိုးဆိတ်ခြံလမ်းခဝမာ စောင့်နီသူစာ သိုးဆိတ်ကျောင်းသားကို လမ်းခဝ ဖွင့်ရို့ ပီးရေ။ အရာ သိုးဆိတ်တိလည်း အကျောင်းသား ခေါ်စာအသံကို နားထောင်ကတ်တေ။ သူစာ ကိုယ့်သိုးဆိတ်တိကို နာမည်ဖေါ်ရို့ ခေါ်ပြီးကေ ပြင်တို့ ထုတ်ယူလားရေ။ 4သူစာ သိုးဆိတ်တိကို ပြင်တို့ ထုတ်ရို့ သိုးဆိတ်တိ ရှိက ဦးဆောင်ရို့ လားရေ၊ အရာ သိုးဆိတ်တိလည်း သူ့စကားအသံကို သိရေအတွက်န သူ့နောက်က နောက်က လိုက်ကတ်တေ။ 5ယေကေလည်း သိုးဆိတ်တိစာ မသိသူတစ်ယောက် နောက်က လိုက်ကတ်လိမည် မဟုတ်။ သိုးဆိတ်တိစာ သူ့စကားအသံကို မသိရေအတွက်န ထွက်ဗြီးလားကတ်လိမည်။” 6ယေရှု ဒေ ပုံဥပမာကို တင်ပြရို့ ဖာရိရှဲအဖွဲ့သားရို့ကို သွန်သင်ပီးလီရေ၊ ယေကေလည်း သူရို့စာ ယေရှု ပြောစာစကား အဓိပ္ပါယ်ကို နားမလည်ကတ်လီ။
ကောင်းမြတ်စာ သိုးဆိတ်ကျောင်းသား
7ယင်းအတွက်န ယေရှုစာ သူရို့ကို အရာတစ်ပြန် ပြောလီရေ၊ “ငါ ကိုယ်ဘင်ရို့ကို အမှန် ပြောရေ၊ ငါ သိုးဆိတ်တိဝင်စာ လမ်းခဝ ဖြစ်တေ။ 8ငါ မလာခင်အယင်က ရောက်လီသူရို့စာ သူခိုးန ဒါးမြ ဖြစ်ကတ်တေ။ ယင်းအတွက်န သိုးဆိတ်တိစာ သူရို့ စကားအသံကို နားမထောင်လီကတ်။ 9ငါစာ လမ်းခဝ ဖြစ်တေ။ ငါ့ကနီရို့ ဝင်သူစာ ဖီးဒုက္ခက ရွတ်လိမည်။ သူစာ အထွက်အဝင် လုပ်ဖို့ ရလိမည် အရာ သူ့မာ လိုအပ်စာ အစားအစာ ရလိမည်။ 10သူခိုးစာ သက်သက် ခိုးဖို့၊ အသက်ကို သတ်ဖို့ အရာ ဖျက်စီးဖို့အတွက် လာရေ၊ ယေကေလည်း ငါ ကိုယ်ဘင်ရို့ကို ထာဝရဘုရား၏ ပဿိနပြည့်စုံစာ အသက်ကို ပီးဖို့အတွက် လာစာဖြစ်တေ။
11“ငါစာ ကောင်းမြတ်စာ သိုးဆိတ်ကျောင်းသား ဖြစ်တေ။ ကောင်းမြတ်စာ သိုးဆိတ်ကျောင်းသားစာ သိုးဆိတ်တိအတွက် ကိုယ့်အသက်ကို စွန့်ရေ။ 12အခစားရို့ သိုးဆိတ်ကို ကျောင်းသူစာ သိုးဆိတ်ကျောင်းသား အစစ် မဟုတ်။ အရာ သိုးဆိတ်တိကိုလည်း ယင်းသူ မပိုင်။ ယင်းအတွက်န တောခွီး လာစာကို မြင်ရေခါ သူစာ သိုးဆိတ်တိကို ထားရို့ ထွက်ဗြီးလားခရေ။ ယင်းခါ တောခွီးစာ သိုးဆိတ်တိကို ကိုက်ရို့ ယူလားခရေ အရာ သိုးဆိတ်တိလည်း ကြင်းရို့ ဖြစ်လားခရေ။ 13အခစားရို့ သိုးဆိတ်ကျောင်းသူစာ အခရဖို့အတွက် သိုးဆိတ်တိကို ကျောင်းစာ ဖြစ်တေ။ ယင်းအတွက်န သူစာ သိုးဆိတ်တိ ဇာဖြစ်ဖို့မဖြစ်ဆိုစာကို တစ်ခုလည်း မစဉ်းစားဘိုင်းန တောခွီး လာစာကို မြင်ရေခါ ထွက်ဗြီးလားခရေ။
14-15“ငါစာ ကောင်းမြတ်စာ သိုးဆိတ်ကျောင်းသား ဖြစ်တေ။ ငါ့အဖစာ ငါ့ကို သိရေ၊ ငါလည်း အဖကို သိရေ။ ယင်းပိုင်တထန် ငါစာ ကိုယ့် သိုးဆိတ်တိကို သိရေ အရာ ငါ့ သိုးဆိတ်တိလည်း ငါ့ကို သိကတ်တေ။ ငါစာ ကိုယ့် သိုးဆိတ်တိအတွက်မာ ကိုယ့်အသက်ကို စွန့်ရေ။ 16ဒေ ခြံမာဟိစာ သိုးဆိတ်တိကို ပယ်ရို့ ငါ့မာ အရာလည်း အခြားသိုးဆိတ်တိ ဟိသိရေ။ ငါ ယင်းသိုးဆိတ်တိကိုလည်း ဒေ ခြံတို့ ယူခရဖို့သိ။ ယင်းသိုးဆိတ်တိလည်း ငါ့စကားကို နားထောင်ကတ်ဖို့။ ယင်းပိုင် သိုးဆိတ်တိစာ တစ်ရွီတည်း ဖြစ်ဖို့ အရာ သိုးဆိတ်ကျောင်းသားလည်း တစ်ယောက်တည်း ဖြစ်ဖို့။ 17ငါ အသက်ကို ပြန်ယူဖို့နိုင်လတ်အောင် ကိုယ့်အသက်ကို ပီးဖို့။ ယင်းအတွက်န ငါ့အဖ ငါ့ကို ချစ်တေ။ 18ငါ့အသက်ကို တစ်ယောက်လည်း လုယူနိုင်မည် မဟုတ်။ ငါ ကိုယ့်စိတ်သဖေါန ငါ့အသက်ကို ပီးဖို့။ အသက်ကို ပီးဖို့အတွက်န ပြန်ရှင်ထမြောင့်ဖို့အတွက် ငါ့အဖ ငါ့ကို တန်ခိုးအာဏာ ပီးလီရေ။”
19အသျှင်ယေရှု ထိုစကားတိကို ပြောရေအတွက်န ယုဒလူရို့အထဲမာ အရာတစ်ပြန် တစ်ယောက်န တစ်ယောက် စိတ်သဖေါကွဲကတ်လီရေ။ 20ယင်းခါ ယုဒလူရို့အထဲက များကာလူရို့ ပြောကတ်လီရေ၊ “ဒေသူ နတ်ဆိုး ကိုင်ရို့ ရူးလားခဗျာ။ နင်ရို့ ဒေသူ စကားကို ဇာဖို့ နားထောင်ကတ်စာလည်း?”
21ယေကေလည်း အရာတစ်ချိုးလူရို့စာ ပြောကတ်လီရေ၊ “ဒေသူ ပြောစာစကားကား နတ်ဆိုး ကိုင်သူ ပြောစာစကားန မတူ။ နတ်ဆိုး ကိုင်သူတစ်ယောက် ဇာပိုင်ပျင်ရို့ မျက်စိကန်းသူကို အကောင်း လုပ်နိုင်ဖို့လည်း?”
အဖန ယေရှု တစ်ကိုယ်တည်း ဖြစ်ခြင်း
22နှစ်ပေါင်းများစွာ အယင်က ယေရုရှလင်မြို့မာ ဝိပဿနာကျောင်းကို အရာတစ်ပြန် ဆောက်လီရေ။ ယင်းခါကပင်စရို့ ထိုနိရက်ကို မှတ်ထားဖို့အတွက် ဝိပဿနာကျောင်း ဆောက်စာပွဲကို ကျင့်ပရို့ လာလီရေ။ ယင်းချိန်စာ ဆောင်းရာသီ ဟိလီရေ။ 23ယင်းခါ ယေရှုစာ ဝိပဿနာကျောင်းထဲမာ ရှောလမုန်နာမည်န ဒန်ခြံတစ်ခုမာ လည်ရို့ ဟိလီရေ။ 24ယင်းအချိန်မာ ယုဒဂေါင်းဆောင်ရို့စာ ယေရှုကို လေးဖက်လက်စိ ဝန်းရို့ ပြောကတ်လီရေ၊ “နင် ငါရို့ကို အရာ ဇာမျှရက် မယုံသင်္ခါ ဖြစ်အောင် လုပ်ဖို့သိလည်း? နင် အမှန် ခရစ်တော် ဖြစ်တေဆိုကေ ငါရို့ကို ပပွင့်လလင်း ပြော။”
25ယေရှုစာ ဂေါင်းဆောင်ရို့ကို အဖြေပီးလီရေ၊ “ငါ အယင်ကပင် ကိုယ်ဘင်ရို့ကို ပြောပြီးဗျာ၊ ယေကေလည်း ကိုယ်ဘင်ရို့ ငါ့ စကားကို မကျုံကတ်။ ငါ့အဖ အခွင့်အာဏာန ငါ လုပ်စာ အံ့ဩဖွယ်အလုပ်တိလည်း ငါ့အကြောင်းကို သက်သီပီးရေ။ 26ယေကေလည်း ကိုယ်ဘင်ရို့ ငါ့ သိုးဆိတ် မဟုတ်။ ယင်းအတွက်န ကိုယ်ဘင်ရို့ ငါ့ကို မကျုံကတ်။ 27ငါ့ သိုးဆိတ်တိစာ ငါ ခေါ်စာအသံကို နားထောင်ကတ်တေ။ ငါ ကိုယ့်သိုးဆိတ်တိကို သိရေအတွက်န သူရို့စာ ငါ့ နောက်က နောက်က လိုက်ကတ်တေ။ 28ငါ သူရို့ကို ထာဝရအသက် ပီးရေ။ ယင်းအတွက်န သူရို့ တစ်ခါလည်း ပျက်စီးခြင်းတို့ ရောက်ကတ်လိမည် မဟုတ်။ သူရို့ကို ငါ့အလက်က တစ်ယောက်လည်း လုယူနိုင်မည် မဟုတ်။ 29ထိုသိုးဆိတ်တိကို ငါ့အလက်မာ အပ်ပီးစာ အဖစာ အားကုံးသူထက် ကြီးမြတ်တေ။ ယင်းအတွက်န ထိုသိုးဆိတ်တိကို ငါ့အဖအလက်က တစ်ယောက်လည်း လုယူနိုင်မည် မဟုတ်။ 30ငါန ငါ့အဖ တစ်ကိုယ်တည်း#၁၀:၃၀ ငါန ငါ့အဖ တစ်ကိုယ်တည်း အသျှင်ယေရှု ထိုစကားကို ပြောရို့ ကိုယ့်ကို ထာဝရဘုရား ဟို့ ခံလီပါရေ။ ဖြစ်ကတ်တေ။”
31ယင်းခါ ယုဒဂေါင်းဆောင်ရို့စာ ယေရှုကို ဘိုက်ဖို့အတွက် အရာတစ်ပြန် ကျောက်ခဲ ကောက်ကတ်လီရေ။ 32ယေရှုစာ ဂေါင်းဆောင်ရို့ကို ပြောလီရေ၊ “ငါစာ အဖ အခွင့်အာဏာန အများကြီး ကောင်းမြတ်စာ အလုပ်တိကို လုပ်ရို့ ကိုယ်ဘင်ရို့ကို ပြဗျာ။ ထိုအလုပ်တိမာ ဇာ အလုပ်အကြောင်းန ကိုယ်ဘင်ရို့ ငါ့ကို ကျောက်ခဲ ဘိုက်ဖို့ ကြည့်ကတ်စာလည်း?”
33ယုဒဂေါင်းဆောင်ရို့စာ ယေရှုကို အဖြေပီးကတ်လီရေ၊ “နင် ကောင်းမြတ်စာ အလုပ်တိ လုပ်တေအတွက်န ငါရို့ နင့်ကို ကျောက်ခဲ ဘိုက်ရို့ အသီသတ်ဖို့ ကြည့်ကတ်စာ မဟုတ်။ နင် လူတစ်ယောက် ဖြစ်ရို့ပင်လည်း ကိုယ့်ကိုကိုယ် ထာဝရဘုရား ဖြစ်တေ ဟို့ ပြောပြီးကေ နင် ထာဝရဘုရားကို တရိုက်တေ။ ယင်းအတွက်န ငါရို့ နင့်ကို ကျောက်ခဲ ဘိုက်ရို့ အသီသတ်ဖို့ ကြည့်ကတ်စာ ဖြစ်တေ။”
34ယေရှုစာ သူရို့ကို ပြောလီရေ၊ “ကိုယ်ဘင်ရို့ ပညှတ်တရားမာ၊ ‘နင်ရို့ နတ်ဘုရား ဖြစ်ကတ်တေ’ ဟို့ ထာဝရဘုရား ပြောလီရေ မဟုတ်လော? 35ထာဝရဘုရား၏ စကားတော်ကို လိုက်နာသူရို့ကို ‘နတ်ဘုရား’ ဖြစ်တေ ဟို့ ပညှတ်တရားမာ ရွီးရို့ ဟိရေ။ ငါရို့မာ မှတ်ထားရဖို့စာကား၊ ကျမ်းစာမာ ရွီးရို့ဟိစာ စကားကို ပယ်ဘိုက်ဖို့ မရ။ 36အဖ ငါ့ကို ရွီးကောက်ရို့ ဒေ လောကတို့ ရွှတ်လိုက်လီရေ။ ယင်းပိုင်ဆိုကေ၊ ‘ငါ ထာဝရဘုရား၏ သားတော် ဖြစ်တေ’ ဟို့ ပြောရေခါ ကိုယ်ဘင်ရို့ ငါ့ကို ဇာဖို့၊ ‘ထာဝရဘုရားကို တရိုက်တေ’ ဟို့ ပြောလီကတ်စာလည်း? 37ငါ အဖ၏ အလုပ်ကို မလုပ်ဆိုကေ ကိုယ်ဘင်ရို့ ငါ့ကို မကျုံကတ်ကေ့။ 38ယေကေလည်း ငါ ထိုအလုပ်တိကို လုပ်တေဆိုကေ ကိုယ်ဘင်ရို့ ငါ့ကို မကျုံကတ်ကေလည်း ငါ လုပ်စာအလုပ်တိကို ကျုံကတ်။ ယင်းပိုင်ဆိုကေ ကိုယ်ဘင်ရို့ သိရဖို့စာကား၊ ငါ့အဖ ငါန တစ်ကိုယ်တည်း ဖြစ်ရို့ နီရေ အရာ ငါလည်း အဖန တစ်ကိုယ်တည်း ဖြစ်ရို့ နီရေ။” 39ယင်းခါ ထိုဂေါင်းဆောင်ရို့စာ အရာတစ်ပြန် ယေရှုကို ဖမ်းဖို့ ကြည့်ကတ်လီရေ။ ယေကေလည်း ယေရှုစာ သူရို့က ရှောင်ပြီးကေ ထွက်ရို့ ကြွလီရေ။
40ယင်းနောက် ယေရှုစာ ယော်ဒန်ချောင်း ကမ်းတစ်ဖက်က ယောဟန် ရီနှစ်မင်္ဂလာ ပီးလီစာ နေရာတို့ ကြွရို့ နီလီရေ။ 41ယင်းခါ လူအများကြီး ယေရှုတို့ လာကတ်လီရေ အရာ သူရို့စာ ပြောကတ်လီရေ၊ “ယောဟန် အံ့ဩဖွယ်အလုပ် တစ်ခုလည်း မလုပ်ခလီ။ ယေကေလည်း ဒေလူ အကြောင်းနပတ်သပ်ရို့ ယောဟန် ပြောလီစာစကား အားကုံး မှန်ရေ။” 42ယင်းနေရာမာ လူအများကြီး ယေရှုကို ကျုံကတ်လီရေ။
Voafantina amin'izao fotoana izao:
ယောဟန် 10: RMZ
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©2023 Wycliffe Bible Translators, Inc.
