Kèʼlo 18
18
Nyùy káʼ Abraham e wàn
1Wáa dzə e kishiíy kímóʼ kí, Nyùy Tàr wìy fo Abraham wùn, e ghaa vici vee *oak veé Mamre. Abraham‑eè dzə́ e wun shùu tàv, a sì e shùy, 2e lò, e nàn sí, e yèn wír ataár, aá tíy shintàm fo wun ghaŋ. Mo wù yenen, e nèn lèʼ fó shùu tàv, e dù fo, e tsə̀m ndzəə́, e làʼ kitú e nsay, 3e yòŋ wùmòʼ, e sùúy sho jii, «Tàr wor, aà fen yèn mo ben, a kòŋ, lá à yòʼ gwàm ŋgaà lìm wò gwámen. 4Mo‑óò taʼ mendzə́v, é vèn su wuú yén shó, e meèmè e sar kici, 5é m taʼ kimbéʼ ke kiban ke vèn meeme, e shàmrí, e bó a shaà. Vèn kú a dzə̀ʼtì shishàr, mo vèn wìyìn ne e ŋgaà lìm wón kirə̀ʼ.»
Á bìnèr jii, «Beerì, ku yiì mo à suuyin.»
6Abraham nèn tùmnín, e tò é kibàn, e yèn Sara, e sùúy sho jii, «Ku lèéy meŋkfəŋ me juŋ mè ŋkaà sitaár,#18.6 ŋkaà sitaár: Ŋkaà see sitaár sìn si dzə̀ moo tin e fur bèy. e tòv, e tòn ntuʼ se kiban#18.6: kiban: Leéy mbìv Ji se Naarìn sí. sho.» 7Abraham nèn dù fo nyám si‑iì dzəə̀n, e tày wan nyàm wo wù fàŋèn, e kfə̀n ghèén, e fò e wàn lìm ji wù du á sho cér, e seè, e nàá. 8Nyóo sí bíy, Abraham nèn lì nyèbàm wùn à vín nàʼ ye fíyi, e fò vifá ve yi vìy e kiŋgàn kfə́ kí. Á lòo yikír, Abraham kú a tiy fo ghaŋ e sar kici.
9Áwune dzə́r shó jii, «Sara woo wiiy wò bèé?»
Wù bìnèr jii, «Wù dzə̀ é kibàn.»
10Woo shooy wo dzəə̀n Nyùy Tàr nèn sùúy jii, «M wíy a kfən e bàm ji m yén wò e ghan sin, e kiya ke kí wiyì, a Sara woo wiiy wò sí kér wán lumèn.»
Wù wáa suúy bèy, a Sara tíy e shùu kibàn e Abraham bàm, yuúri. 11Yì‑iì dzə̀ é ghan fen, a Abraham wùn Sara dzə́nkír ne, a Sara dzə́n ne, e shaà viyá ve kidzəə́y. 12Sara yú bey, e shèʼ fo wun mvə̀m bvə̀m, e sùúy jii, «M dzə̀n ne, a keè keèn, taà lav wom dzə́n sá, a dzə̀ m kfə̀n yù vijuŋ vee ben à?»
13 Nyùy Tàr dzə́r e Abraham jii, «Sara kì shéʼ ka, bó a suúy jii, ‹A dzə̀ rú m kfə̀n a ker wán, a m dzə́n ne bèn à?› 14A dzə̀ kinyo ki ghàʼ Nyùy Tàr fo wù yii a? M wíy kfən, e yen wò e ghan sin, e kiya ke kí wiyì, a Sara sí kér wán lumèn.»
15Yii bèy, Sara sháʼnín, e sùúy jii, «M yoʼ lò shèʼ.» A wù yoŋ bèy, bìʼ fo wù‑uù fanè.
Nyùy Tàr bìnèr jii, «Àáy, à lo shèʼ.»
Abraham lón ji lá Nyùy yòʼ laàr a kitúm kee Sodom
16Wír vee shooyi nèn lò fo fo, e kìʼ mbìv Sodom, Abraham wáa tsəəné áwune. 17Nyùy Tàr wáa ghay wún jii, «A dzə̀ la m yòʼ lìtì kinyo ke m lo, e yiì fo Abraham. 18Rám rə́ə wíy kùʼ, a dzə kitúm ke ghaʼán kí, a vitúm veé kitu ke nsay vidzə̀m vi wíy a ker kisəəvì bìʼ wun woo Abraham. 19M shòʼ ne wun ji wù wáa dànèr a wón və́ wùn à rám rəə́ ji á wáa yunín mo, a yiì vinyo tìítiy là jay, é m fiʼ wìy yiì kinyo kidzə̀m ke mò‑oò kàʼàn wun sho.»
20 Nyùy Tàr nèn sùúy e Abraham jii, «M yù ne ji vinyo ve ghaʼán ví kooy e Sodom wùn Gomorra, a liì wov kisaŋ kùʼ ne e ŋàŋ. 21M kér fóo dù, e yen ji vinyo vee shooy ve m yú ji á yii vi sà dzə̀ rú mo bó yòʼ dzə̀ rú á, e bóo kiíy.»
22Wír vee abàá nèn lò fo fo, a dù e mbìv Sodom. Nyùy Tàr góʼ fó bàm wùn Abraham. 23Abraham nèn kòʼtí e Nyùy Tǎr ghaŋ, e dzə̀r jii, «À yíi tatí, e laàr wír ve juŋe wùn à ve bií a? 24A kí kòóy ji wír ve juŋe wáa dzə mtàn e ŋkàlaʼ, à kù laàr kirə́ʼ kee shooy, é la à yòʼ màʼtì bìʼ wír ve juŋe vee mtàn ve á dzəə̀n fó à? 25Rúrú, bó yòʼ dzə̀ wò wo dzə̀ à yùyrí wír vee là jay wùn à vé jayi. Yòʼ dzə̀ kí kòóy bey. Bó yòʼ dzə̀ wò wo a dzə̀ à yiì bey. Aà yiì bèy, bo à sí maʼ ŋgeʼ aàlàjayi wùn à vé jayí kitu réŋréŋ. Mo tínen wò nsaʼ seé kitu ke nsay sidzə̀m, bo bó yòʼ dzə̀ à kù yiì a dzə̀ kinyo kee réŋ kí a?»
26 Nyùy Tàr bìnèr jii, «A m yèn wír vee réŋ é ŋkàlaʼ Sodom, aá meé mtàn, bo m maʼtì fó e dzə̀m bìʼ áwune.»
27Abraham kfən sùúy jii, «M dzə̀ kém ka, e bó a suŋnín e Nyùy Tàr, mo, a m dzə̀ kibvər fo kibvə̀r, a dzə kibvə́ fo kibvə́ ki. 28A kí kòóy ji joʼsi á wír nshòv sitàn e mkweè, à kù yiì laàr ŋkàlaʼ yee shooy, bìʼ vee atàn ve á buŋen a?»
Nyùy Tàr bìnèr jii, «Bó yòʼ dzə̀ m laàr, a m fen yèn wír nshòv sitàn e mkweè fo.»
29Abraham ku kfə̀n ghày jii, «A kí kòóy ji á wáa dzə mkweè fo, á ka?»
Nyùy Tàr bìnèr jii, «Bìʼ vee mkweè, bo bó yòʼ dzə̀ m laàr.»
30Abraham ku nèn shaà fo mbìy, a lon jii, «Éè Nyùy Tàr, lá à yòʼ a shwiíy kilòŋ, m kù‑úù wáa lon jii, aá lò a dzə fo mtaár, á ka?»
Wù bìnèr jii, «Bó yòʼ dzə̀ m laàr, a m fen yèn wíri fó mtaár.»
31Abraham suúy jii, «Yén ri, m shòʼ ne rú kitú kém, a suŋnín e Tàr wor, a kí fə̀m dzə̀ é le. A kí kòóy ji á wáa dzə fo mbaà, kí a dzə e le?»
Nyùy Tàr bìnèr jii, «Bìʼ vee mbaà, bo bó yòʼ dzə̀ m laàr fó.»
32Abraham suúy jii, «Éè Tàr wor, lá à yòʼ shwìíy kilòŋ wòsò, m sí lón lèn fo kàŋ woo wo bàm. A kí kòóy ji á jòʼsì ne fo cáʼcáʼ e ghvə̀m, á ka?»
Nyùy Tàr bìnèr jii, «Bìʼ vee ghvə̀m, bo bó yòʼ dzə̀ m laàr fó.»
33 Nyùy Tàr màysì, e sùŋnín wùn Abraham, e nèn lò, a dù. Abraham nèn kfə̀n fo wù‑uù dzə́.
Voafantina amin'izao fotoana izao:
Kèʼlo 18: LNB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2022 CABTAL