Kèʼlo 13
13
Abram wùn Lot jávsín
1Abram ku nèn lò fo Ejiv fèy wùn à wiíy, à vifá və́ ví vidzə̀m, e lì Lot, wùn áwune, à kfə́ə, e dù e mbìv Kanan yee Negev.
2Abram‑eè dzə̀ ŋgaà kav wo ghaʼán, kér nyám si wùn à visha ve mbàm ve fəvír ví, à ve baar ví. 3Wù ló fó Negev, a ghan, a beè e virə̌ʼ virə̀ʼ, e nèn wìy, e mèé e kirə̀ʼ ke kí dzəə̀n é kintìntìn ke Betel wùn Ay fo kibàn kfə́ kí‑iì siìn fó mbìy, 4a kfə̀n dzə̀ fo wù‑uù bomen kíy cù e ghan sé mbìy si. Wù nèn yòŋ yír Nyùy Tàr, a cù wun fo.
5Lot wo wù‑uù ghán wùn Abram‑eè kér sa nyám si wùn à bvə́y si, à kfə́ə rəə́, e bóo lì akwàn. 6Kí nèn ghàʼ fo áwune wáa dzə kirə́ʼ kimòʼón, a ker yí ye yí wáa dzə e gheénén é nsay foo fèy, bìʼ fo vé‑eè kér nyám sineénín, kfə̀n kér wíri, aá kúʼ sá e ŋàŋ. 7Anshìy nyàm Abram wùn à vé Loti lo, á nèn kù a taŋnín taŋnín. Yì‑iì dzə̀ é ghan fóo fèy, a wír veé Kanan wùn à veé Perisi‑iì dzə́ fo.
8Abram yiì lò, e sùúy e Lot jii, «Kí yoʼ bòŋ ji kitáŋnìn ki wáa dzə e wòsò nsàn, kìn áànshìy nyàm vesòó mvəm, bìʼ fo wòsò dzə̀ wír kfəə́ e mòʼón. 9Bó yòʼ néŋ woŋ ji moòr bèn e wò si à? Wòsò javsin. Aà koŋ mbìv yeé koy ŋkoòvì, bo m li ye yìy, à wáa kòŋ ye yìy, bo m du e koy ŋkoòvìi.»
10Lot nàn sí, e lèéy, e yèn a mboʼ ndzə̀v yee Jordan bór féyì virə́ʼ vidzə̀m, e dù duùn é mbìv yeé Tsoar, moo kiboó ké Nyùy Tàr, kìn moo nsay Ejiv bèy. Kin ki‑iì dzə̀, é bo Nyùy Tàr wìy laàr ŋkà se laʼ see Sodom wùn Gomorra. 11Lot nèn shòʼ kfə́ mboʼ ndzə̀v yee Jordan e dzə̀m, e ŋàʼáy, a dù fo, a yì dzə̀ é mbìv yee fo shùy yii tó. Áwune nèn jàvsìn. 12Abram ku nèn a dzə e wòŋ Kanan. Yii bèy, Lot wáa dzə e mbìv ŋkà se laʼ se sí‑iì dzəə̀n é mboʼ ndzə̀v yee Jordan, e lò, e tàm vibàn və́ é ghaa ŋkàlaʼ Sodom. 13A wír veé Sodome‑eè kér liì kisaŋ, yii vinyo ve ví wáa nyar Nyùy Tàr é ŋàŋ.
Abram ló, e dù e Hebron
14Abram wùn Lot jàvsìn bèy, Nyùy Tàr lò, e yòŋ e Abram jii, «Nàn sí yée fo à tíy fèy, e lèéy vitóŋtóŋ ví. 15Virə́ʼ ve à yén vìn vidzə̀m, m yíi fo e wò, é wáa ker vèn à rám yée, e wìy dù, e mày. 16M wíy yiì, é rám yée wáa dzə moo kibvər e kitu ke nsay. Wìr wáa dzə, a dzə̀ wù tàŋ kibvər, bo dzə̀ wù tàŋ rám yé. 17Lò ri, a ghan e wòŋ fèn. Ghán vitóŋtóŋ ví vidzə̀m, bìʼ fo m yíi fo woŋ və̀n e wò.»
18Abram nèn shòʼóy vibàn və́, e dù e ghaa vici vee *oak ve dzəə̀n vé Mamre, a ví‑iì dzə̀ é ghaa ntèʼ yee Hebron, e nèn a dzə fo, e lò, e bàʼrì kirə́ʼ ké cù ke Nyùy Tàr fó.
Voafantina amin'izao fotoana izao:
Kèʼlo 13: LNB
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2022 CABTAL