MATIYUW 20
20
Mayim yawiy kwurdiy duw maaj.
1Jisas dayak ata wadidiy, “Kitawa God duw takwak van tinaad. Ganbab duw rasikuw, yin adi mayim yawiy kwur duwak kwakibagwud. 2“Di dayawa maaj lakatiykuw saan tabatiy nyi nak yawiyik dayak kwiydikik, di ata wayakididiy dikidi mayir yawiy kwurdakik. 3-4“Ganib, nyi abaliy tilik, adi duw sibinin yikuw nyidi tipaar, di vididiy nuwukadiy duw day kip tidiy. Dayaam vikuw, di dayak wadidiy, ‘Gwurabab wunadi mayim yin yawiy kwurgwur, wun saan kwatiya-kituwadiygwurik.’ 5“Aw day diki maaj wukikuw, yidiy yawiyik. Ginyir nyidi nyi tilik, nyi viyatakadik, taay kwurdil pik atampik kwurid. 6“Nyi gilpik tidik, di nyidi tipaam vididiy nuwukadiy duw day kip tidaak, wadidiy, ‘Agwa javik gwur adi miyawa nyi kilim kip kwagwura?’ 7“Day dikik ata wadaad, ‘Nyanak yawiy kwiykwiy duw maa.’ Di dayak ata wadidiy, ‘Gwurabab maay. Yin wunadi mayim yawiy akwur.’
8“Giraab kwusilik, adi maay duw dikidi yawiy van tidi duwak wadid, ‘Min gaam simin adiy mayim yawiy kwurnadiy duwak. Yadaak, dayadiy saan dayak akwiy. Min kwukir yinadiy duw dayak taay dayadiy saan akwiy. Adiy taay yinadiy duwak kwukir saan akwiy.’ 9“Nyi gilpik tidik, yawiy kwurdiy duwak saan tabatiy tabatiy kwiydidiy. 10“Adiy tayib yadiy duw vikuw, wukidiy mawulaar, ‘Nyan saan yitaypik kwurkinadiyan.’ Aw dayabab saan tabatiy tabatiy kwurdadiy. 11-12“Day dayadiy saan kwurkuw, dayadiy mawul warkuw, adi maay asaay duwak wadaad, ‘Kidiy kwukir yanadiy duw nyi nak yawiy kwurkuw, min dayak saan tabatiy tabatiy kwiyminadiy. Aw nyan kidi nyi miyawa yawiy kwurbana. Nyidi nyi nimadi nyi nyanaam sikuw, aw min nyanak ab saan tabatiy tabatiy kwiy-minadiyan. A maa rav.’ 13-15“Adi maay asaay duw dayaam duw nikik wadid, ‘Wunadi kapa duw, min awuk. Wun gwurak kwasa saan maa kwataay. Gwur wunawa maaj lakatiybana saan tabatiyak ki nyi liki yawiyik kwurkwurik, ay maa? Gwur gwuradiy saan kwurkuw, gwuradiy wiyaar maay. Li wun kidiy kwukir yanadiy duwak gwurak kwiytuwadiy sana pik kwiykituwa, aal wuna yawiya. Kidiy saan wunadiy-adiy. Wuna mawul wala yawiy kwurkituwa adiy sanak, aal wuna yawiya, ay maa? Gwur maa wagwura wun nima saan nuwukadiy duwak kwiytuwadiy? Ay maa?’ 16“Atampik adiy duw taakw day taay God dikidi gwalugwur wuladiy day dayadiy saan kwukir kwurkidanadiy. Aw adiy kwukir God dikidi gwalugwur wulakinadiy duw taakw taay day dayadiy saan kwur-kidanadiy.”
Jisas dikidiy kalivadidiy duwak yarik yididiy maa diki kiyadil kiyak.
(Mak 10:32-34; Luk 18:31-34)
17Jisas Jiruwsalimaar warik tikuw, dikidiy kalivadidiy duw tabatiy maan vitiy nakamwiyib yitaay tikuw, nyidiy yabim tikuw, di dayak kap wadidiy, 18-19“Wukigwura nyan Jiruwsalimaar warkibana. Warkuw, adi duw nak duw taakw dayadi Mwaam sapakwa nyanugw pris awa God diki lo kalivanadiy duwak kwiy-kidadiwun. Day kiyadikik wakinadiy. Wakuw, day wun niki jaka tipa kidiy bapa duwak kwiykidadiwun. Kwiykuw, day wunak wajibay-kinadiy. Wunaam ramiy rinadi miyaar viyakidanadiwun. Viyaan napakuw, wunaam ata viyasipadaak, kiyakinadiwun. Ginyir nyi mugwul yidaak, God wunaam ata kirapitaka-kidadiwun.”
Jamisawa Jon biraki amaay Jisasak bas silil maaj.
(Mak 10:35-45)
20Sipatiy dikibir duwa nyidiy, Jamisawa Jon, biraki amaay li likibir duwa nyidiy kwurkuw, Jisasak yakuw, dikik ab gwalikakuw, dikik ata walid, “Wun minak bas sikir jaav nikik.” 21Jisas likik ata bas sidil, “Agwa javik nyina mawul wana?” Li dikik ata walid, “Ginyir min ababa duw takwak van tikimina, a nyi min wakuw, wunabir duwa nyidiy nak mina mava tabaam nak mina akiy tabaam atawa tikinabir. Bir minawa duw takwak van tikir daan rikibira.” 22Jisas dayak ata wadidiy, “Gwur maa laakw wunak bas sigwura javik. Wunak kupwaraap yakinadiy jaav atampika jaav birabab kwur-kinabirbir rikir?” Bir ata wabirid, “An bwunak kwurkita.” 23Jisas birakik ata wadibir, “Wunak yakinadiy jaav kitampik kwur-kinabirbir. Aw wunabir mava tabawa akiy tabaam rikinabir duw wun birakim tasakw maa. Aal wunadi Asaay diki yawiya. Ginyir di tasakwu-kidabir diki mawulaam rinabir duw.”
24Jisas dikidiy nuwukadiy tabatiy duw a jaav wukikuw, wariya kwudiy wadiy Jamisawa Jonak. 25Alik Jisas dayak gaam sididiy yaan vagaruwdakik dikik. Day yakuw, di ata wadidiy, “Gwur lakwu-gwura ababa nuwukadiy jaka tip dayadiy van tinadiy duw ap kwurnadiy dayadiy duw takwak van tikuw. Aw dayadiy mawulaam van tikwanadiy. 26“Gwur kitampik maa ti. Li duw nak gwuraam yitaypik tikir, God diki milaam di gwuradi yawiy duw tikwaad. 27“Li gwuraam duw nak yitaypika duw tikir God diki milaam, aw nuwukadiyik kipa yawiy duw tikwaad. 28“Atawa duw taakw dayadi Mwaam maa yi nuwukadiy duw taakw yawiy kwurdakik dikik. Di nuwukadiy duw takwak sugwiyaan kwurik yaad. Di yaad samasama duw taakw dayadiy vaal Godak kwiyik. Kiyakuw, di dayadiy vaal yapiy-kidadiy.”
Jisas mil kwakibir duw sipwutiy-dibir.
(Mak 10:46-52; Luk 18:35-43)
29Day Jarikaw tip wapakuw, yidaak, duw taakw samasam Jisas kwukib yidiy. 30Mil kwakibir duw vitiy mala yabim daan ribir. Bir ata maaj wukibir Jisas yataay tidik walibab. Wukikuw, nimadib ata gaam sikuw, ata wabir, “Yitaypika duw, Davit dikidi gwalugwa duw-adimin, anak min awuk!” 31Nuwukadiy duw taakw birakik wariya kwudiy wakuw, wadabir, “Bir kaygan ada!” Aw bir wadaal majik maa wak. Bir ata mwiya nimadib Jisasak maa gaam sibirid, “Yitaypika duw, nyanadiy warag dayadi yitaypika duw Davit dikidi gwalugwa duw-adimin, anak min awuk!” 32Jisas walibab tikuw, wadibir, “Birak agwa jaav kwurtuwkik birabir mawul wanabir?” 33Bir Jisasak ata wabirid, “Yitaypika duw, an sipwutiy-minkik anabir mil.” 34Jisas di birakik samasam wukikuw, diki taab birakibir milaam takadik, jayib nak vibirbir birakibir mil. Vikuw, bir ata diki kwukib yibir.
Voafantina amin'izao fotoana izao:
MATIYUW 20: MLE
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2001, Wycliffe Bible Translators, Inc. All rights reserved.
