Jenesis 2
2
1Gia o Del getosarda o miloso ta e phuv ta sa so si ande lende. 2Ta o eftato llive o Del getosarda sa so cherda, ta gua llive ni radisarda ios pe so thodaiape te cherel.#Ebr 4.4,10. 3Ondaka o Del blagosisarda o eftato llive, ta phenda te avel santo,#Ek 20.11. soke ande gua llive achilo te radil katar sa pe so thodaiape te cherel.
O manus ando Eden
4Gia si sar cherdilo o miloso ta e phuv.
Ando llive kana o Del o Gazda cherda o miloso ta e phuv, 5ondaka ni sea e patra ta ni barilaia o zelenipe, soke o Del ni ios ni cherdaia te delpeke pe phuv ta ni saia niko te radil e phuv. 6A katar e phuv likela o pai sargo iek aburo kai chingarela sa e phuv. 7Ondaka o Del o Gazda cherda e muruse katar o prajo e phuviako, ta phurdia ande leko nak balav zivotoki. Gia o manus thoda te zivil.
8Mapalal o Del o Gazda cherda iek vostano karing likel o kham katar o Eden, ta thoda kote e muruse kai cherdaia. 9A o Del o Gazda cherda te bariol katar e phuv suako kasta sukar kai den septelie lache te janpe, a po maskaral katar o vostano thoda i o kas e zivotoko, ta o kas katar o llanglipe katar o lachipe ta o bilachipe. 10Ta likela katar o Eden iek len kai chingarela o vostano, ta kotar fuladola pe star riga. 11E purvo len ikhardola Pison, gaia si kai nakhel truial katar sa e phuv katar e Javila, kote kai si sunakai, 12ta o sunakai katar goia phuv si lacho, ta i si barra bedelio ta onise. 13E duito len ikhardol Gijon, gaia si kai llal truial katar sa e phuv katar o Kus. 14A e trito len ikhardol Jidekel, gaia si kai nakhel katar e rig katar perel o kham katar e Asiria. A e starto len si o Eufrates.
15Kana o Del o Gazda thoda e muruse ando vostano katar o Eden, te sai radil ande lete ta te sai arakhel le, 16mukla leke gala alava:
Sai ja katar suako septelia e kastengi kai si ando vostano, 17a katar o kas katar o llanglipe katar o lachipe ta o bilachipe, ni ka ja katar leke septelie. Soke o llive kai jaia letar, chachimaia ka mere.
18Mapalal o Del o Gazda phenda:
Inai sukar te avel korkorre o murus. Ka cherav leke, ko te pomozil le. 19Ondaka o Del o Gazda cherda katar e phuv suako zivirinia divi ta i golen kai inai dive, ta suako chirikli e milosoki, ta anda len kai o Adan te sai vou thovel lenge anava. Ta o Adan thoda anava sa e zivirinienge kai si len zivoto, ta gia achilo lengo anav. 20Ta thoda o Adan anav sa e zivirinienge kai inai dive, ta sa e chiriklienge, ta sa e zivirinienge kai si dive. A o Adan ni malada ko te pomozil le. 21Ondaka o Del o Gazda cherda te perel iek bari lindri po Adan, ta kana vou sovela, ikanda iek katar leke pasuare, ta phangla o mas pe po than. 22Ta katar o pasuaro kai ikanda letar, o Del o Gazda cherda iek diskinia ta andala kai o manus. 23Ondaka kana dikhla la phenda:
¡Gava si akana kokala katar me kokala, ta mas katar mo mas! Voi ka ikhardol diskinia, soke o Del ikandala katar o murus.
24Goleke o murus ka mukel pe dade ta pe da te avel pe diskiniaia, ta e dui ka aven sargo iek mas.
25Ta e dui sea nange, o manus ta leki diskinia ta ni lallana.
Voafantina amin'izao fotoana izao:
Jenesis 2: BACHRO
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Biblia ande chib Romani © Sociedad Bíblica Chilena, 2018.