Marko 4
4
ŠTAR
1Aver data, thodya‐pe te sityarel paša e marya tay tyidinsayle katyi žene ke lya‐pe tay bešlya and ekh ladžiya po pay. Tay sa o narodo bešelas tele paša e marya. 2But butya sityarelas len le paramičentsa. 3Tay kay sityarelas len, mothodya, “Ašunen. Gelo ekh pavuro tay šudelas le semintsi te seyin‐pe. 4Seyil tay seyil tay peren vuni semintsi pe vurma tay aven le čiriklya tay sa xan le. 5Peren aver semintsi pe bařuyi phuv tay, anda yekh, baryon ke nay adinko e phuv. 6Numa kana sikadya o kham peske dand, phabon tay šutyon ke skurtsi sas penge ředečini. 7Peren aver semintsi maškar le kanřale luludža tay kana baryon le luludža, tasaven le semintsi tay či patyon‐pe. 8Tay vi aver semintsi peren pe laši phuv adinko tay baryaren but dživ tay aven tryanda anda yekh semintsa, šovardeš anda kaver tay šel anda kaver. 9Kaste si kan, te thol kan.”
10May palal, kana mekline les le žene, feri leske deš‐u‐duy manuš tay aver vortača sas lesa. Tay von pušline les anda e paramiči. 11Phendya lenge vo, “So si tayna anda e Amperatsiya le Devleski sikadili tumenge. Numa ie avrenge sa si and el paramiča. 12Tay kadya šay dikhen tay dikhen numa či dikhen vorta tay šay ašunen tay ašunen numa či hačaren vorta te na ambolden ka o Del tay aven yertime.”
13Tay mothodya lenge, “Či hačaren kača paramiči? Apo, sar te hačarena sa le paramiča? 14Seyil o pavuro e Vorba le Devleski. 15Vunivar perel e Vorba pe vurma. Kana ašunen la kadala žene, anda yekh, avel o Beng tay lel lendar e Vorba seyisayli ande lende. 16Atunči, sa kadya, kodola kay seyisayle pe bařuyi phuv. Kodola, kana ašunen e Vorba, anda yekh, primin la, voyasa. 17Numa, sar kay le semintsi, nay len čače ředečini, tay ašen zurale feri pe'kh tsiŕa vryamya. May palal, kana perel lenge bayo tay kana vuřitsin‐pe pala e Vorba potegnin‐pe tay peren. 18Apo, kodola kay seyisayle maškar le kanřale luludža. Kodola ašunen e Vorba. 19Numa, atunči, avel lenge pharo anda le butya kadala lumyake tay avel drago lenge te aven barvale tay te aven poftarya. Anda kodya tasadyol e Vorba tay či pherdyol‐pe. 20Numa le semintsi kay seyisayle pe laši phuv si sar kodola kay ašunen e Vorba tay primin la tay kodola pherdyona‐pe, tryandavar, šovardešvar tay šelvar.”
21Tay mothodya lenge o Isus, “Khonik či anel ekh momeli tay thol la tela ekh kanta vay tela ekh pato. May vorta te thol la p'ekh fežniko. 22Ke sogodi garadilo si kadya te avel suvetno tay sogodi si ekh tayna, si kadya te avel prinžardo tay hačardo. 23Kaste si kan, te thol kan.”
24Tay mothodya lenge, “Arakhen‐tume so ašunen. Sogodi te den, sa kadya te len tay vi may but. 25Ke kodoleske kay si les aba voareso, o Del may dela leske vi may but, numa kodolestar kay nay les khanči, o Del te lel lestar vi kodya kay si les.
26Kadya si e Amperatsiya le Devleski — si sar ekh pavuro kay seyil le semintsi pe phuv. 27Tay, ryate, žal te sovel tay, dyese, pomenil‐pe. Tay ande kodya vryamya, baryon le semintsi, numa či žanel o pavuro sar te baryon. 28Korkoro e phuv kerel le luludža, pervo o desto, may palal e plyavya tay atunči o dživ. 29Numa kana patyilo o dživ, anda yekh, šinel les o pavuro ke avili e vryamya le šinimaski.
30Pe soste mezil e Amperatsiya le Devleski? Savyatar paramiči te mothav pa late? 31Si sar kay e semintsa le muštareska luludžaki. Kana seyil‐pe ande phuv, kodya semintsa si e may tsini semintsa pe lumya. 32Numa, kana seyisayli, may palal, baryol ay avel e tufa e may bari. Katyi bare aven peske krenži ke šay keren le čiriklya penge kuyburi ande vušalin.”
33Phendya o Isus but kasavendar paramiča le ženenge ži kay daštisardine. 34Numa pe paramiča delas lentsa duma, numa peske vortačenge sa delas duma vorta.
35Sa kodo dyes, kana pelya e ryat, mothodya lenge, “Žas intyal o pay.” 36Tay mekline le narodos tay leske vortača ankliste pe ladžiya le Isusesa tay telyarde ži ka o aver brego. Vi aver ladžiyi geline lentsa. 37Frenedeyit avili ekh bari balval tay kadityi marenas le talazuri pe ladžiya ke pherdyolas payestar. 38Tay sovelas o Isus palal, peske šeresa pe šerand. Tay uštyarde les tay mothodine, “Raya, nay bayo tuke ke meras?” 39Tay uštilo tay xalya‐pe la balvalyasa tay phendya la maryake, “Pača, aš miro.” Tay ašili e balval tay sa domolisayli. 40Tay mothodya lenge o Isus, “Anda soste daran? Manay tume patyayimos?” 41Tay sa čudisayle tay phende yekh avreske, “Savestar manuš si kado ke patyan lesko muy vi e balval tay vi e marya?”
Voafantina amin'izao fotoana izao:
Marko 4: Kald71
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
maintained by the British and Foreign Bible Society
