Matiyò 9
9
Yerzù à mà wɔ̀wìrzɛ̀ è mòtò wà è nyàmbɛ yà njɛmbu
(Mak 2.1-12; Luk 5.17-26)
1O mburza eŋge hvònda Yerzù rzìi a kpèeyà ò tenì ya wɔ̀lɔ̀ hvɛ, rzìi a aka ò enɛyi èhvàrzù ya yulu lì ɛ̀ndɛ ò mbòwà ya eni ema à mà hwɛ lì lìya. 2Nà òmà à mà uke ò mbòwà ya eni, lòŋgò la hwatò hwa ma mò jàneyà mòtò mɔ̀kɔ ò lìkɔ̀kɔ̀ ema à mà ɔ̀kìrzɛ̀ e nyàmbɛ ya njɛmbu. Nà òma Yerzù à mà ɛnɛ lìlòkɛ̀ la awu, rzìi à òhweyà òŋgò mòòkèlì nanù ema, “È ŋmanà wa munyanà wa ami kòkò, ò rza òka wɔ̀ŋgɔ̀, na mà ò làkìrzɛ̀ wòhwe wò aŋgɔ̀.” 3Nà òma lòŋgò la Hwà-òkòlèlì hwa mbenda hwa ma hweye nanù, rzìi hwa arzàrzòwɛ wɔ̀ na wɔ̀ nanù ema, “Onò mòtò a hwɛnyɛ Lohwɛ̀!” 4Yerzù à mà hwiya mɔ̀ŋgɛ̀lɛ̀ ma awu rzìi à hwa òhweyà nanù ema, “Mamɛ ndeŋgatɛ è wòmba manù màlùtèyà ma wòhwe ò mèèmà me anyu e? 5Ì ma yɔ̀ e wɔ̀hwèlì, ò lì òhwà nanù ema, ‘Nà ma ò làkìrzɛ̀ wòhwe wò aŋgɔ̀,’ ŋgà ò lì òhwà nanù ema, ‘Tɛ̀mɛ̀nɛ̀ ò wòteyà lì ɛ̀ndɛ̀ e?’ 6Nà e uŋmɛ̀lɛ̀ nanù ema è Ŋmanà wà è Mòtò wà Hwènàmà a hweni wònjà ya lì làkìrzɛ̀ wòhwe ò rze.” Yerzù rzìi a òhweyà òŋgò mòtò hwa e nyàmbɛ yà njɛmbu nanù ema, “Nà ò òhwèlì nanù ema, tɛ̀mɛ̀ ò wòwè lìkɔ̀kɔ̀ lì àŋgɔ, ò ɛ̀ndɛ̀ ò mààndà ma aŋgɔ.” 7Ò wòtɛmɛ̀tɛmɛ̀ rzìi òŋgò mòtò à tɛ̀mɛ̀nɛ̀, à ɛ̀ndɛ ò mààndà mà eni. 8Nà òma è ŋgìndì è mà ɛnɛ nanù, hwa mà tùmeyà nà mòkambiya. Rzìi hwa wòteya lì eka Lohwɛ̀, èhwanja mɔ̀ à ŋgbelì hwatò ène tumba wònjà.
Yerzù à hwɛlɛ Màtiyò ò lì mò nɔ̀ŋgɔ
(Mak 2.13-17; Luk 5.27-32)
9Ò mburza hwene hweyà Yerzù à mà anjììyà ò eŋge èki, nà òma à mà hwɛ lì ɛndɛ, à mà ɛnɛ munyanà mɔ̀kɔ ema à mà hwɛ̀lɛ̀hwɛ̀ Matìyò. Matìyò à mà lìya ò lìyɛ̀hvɛ̀ là ama è mɔ̀kɔ̀tèlì wà è njàŋge yà lìkànèyà. Yerzù rzìi à mò òhweyà nanù ema, “Ò nò òŋgame” Matìyò rzìi à tɛ̀mɛ̀ ò ŋmanyu, à òŋgama Yerzù. 10Ò mburza hvònda, Yerzù à mà ɛndɛ ò ndawò yà àma Matìyò ò lì làa. Rzayì-rzayì ja hwàrzàŋgèlì hwa e njàŋge yà lìkànèyà, na hwatò hwa wòhwe wɔ̀ hvɛ hwa ma ùkeya aŋga rzìi hwa lìya na Yerzù na hwà-òkòwèlì hwa eni. 11Nà òma lòŋgò la Ìhvalìrzàyì i ma ɛnɛ na òma Yerzù à mà lìya na iŋgi nyayi ja hwatò, rzìi hwa ijòwa hwà-òkòwèlì hwa ama Yerzù nanù ema, “O mamɛ ndeŋgatɛ è Mòòkòlèlì wa anyu, a làlɛ̀nɛ̀ nà hwàrzàŋgèlì hwa e njàŋge yà lìkànèyà nà hwatò hwa wòhwe e?” 12Yerzù a mà hweye nanù, rzìi à hwa alàhwɛ̀ nanù ema, “Hwatò ema hwa lìyayi gbamù hwa rzà àrza è ŋgàŋgà. Hwatò ema hwa ɔ̀kìrzɛ̀, wɔ̀ ndi hwa ɛ̀ndeyà e ŋgàŋgà. 13Ndi e ɛ̀ndɛ e òkòwe mamɛ ene mbɔrzi e òhwa na òma e tìlahwì ò e kààtì ya Lohwà nanù ema, ‘Mamɛ ema na arzana hwatò e hwèlì ndi ììlì, ndi rzeketɛ màhwèyà.’ Imba na rza jèlì ndi ò ene rze ya mɔ̀nyɛ̀ ò lì hwɛlɛ hwatò ema hwa gbeyà hweyà ema Lohwɛ̀ arza, na jɛ̀lɛ̀lɛ̀yi ndi hwatò hwa wòhwe.”
Mììjòwelì lì hvòmɛ̀nɛ̀ è mòkìyà njàwò
(Mak 2.18-22; Luk 5.33-39)
14Hwà-òkòwèlì hwa ama Yòwanìrzɛ̀ e mòlùhwìrzèlì rzìi hwa jèeya Yerzù rzìi hwa mò ijòwa ema, “Mamɛ ndeŋgatɛ irzɔ na Ihvàlìrzàyì i lìya mòkìyà njàwò, ndi Hwà-òkòwèlì hwa aŋgɔ̀ wɔ̀ hwa rza lìya tɔ̀ mòkìyà njàwò e?” 15Yerzù rzìi a hwa alàhwɛ̀ nanù ema, “Nɛ hwatò ema hwa yòhwɛ̀hwɛ̀yi ò ndèma yà lìhwa hwà tànɛyi lì lìya rzɔ̀lùù wɔ̀ hwa hwèlì tɛ na e mòhwɛnɛ wa mɔ̀ɔ̀mbì e? Jàyɛ̀ hwa rzà tànɛ̀yi! Ndi o ò jà wùnyà ema wò ò hwa wòwàna è mòhwɛnɛ wa mɔ̀ɔ̀mbì. O wòŋgò wùnyà ndi hwa ò lìya e mòkìyà njàwò ò màkanɛ̀. 16È hwɛni lì hwiya nanù ema mòtò a rzɛ̀ŋgɛ̀nɛ̀ tɛ mbɔti, a rza wòwà ehvàhvè ya lìhwàtù lì hvènya ò lì rzɛ̀ŋgɛ̀nɛ̀ è mbòlòwa ya mbɔ̀ti. Èhwanja eŋge ehvàhvè ya lìhwàtù lì hvènya è wòtèlì tɛ lì nyùkeyà òma la akakòwɛ ò mbòlòwa lìhwàtù. Oma eŋge èhvɔ̀ndì ya eŋge mbòlòwa ya lìhwatu ema nyàla. 17Nanù mɛnɛ hvɛ ndi mòtò a rza tànɛ̀yi lì wòwà mòkàkò mò mimba rzìi à mà rzɔ̀lɛ̀ ò tenì yà èlùnì ja kòhwà. Ehwànja, òŋgò mòtò à gbèyi tɛ nanù, mòŋgò mòkàkò mò hvùhvà, natɛ̀ɛ è kòhwà e kandeyà, ò ma maŋga mimbà ma mà rzòweyà, ò ma è kòhwà yɔ hvɛ e ma hvaŋgeyà. È hwɛ ndi ema mòkàkò mò mimba mò rzɔ̀lɛ̀hwɛ̀ ndi ò tenì ya kòhwà hvènya, aŋga nanù e kòhwà na mììmbà ma utahwa.”
Yerzù à mà tɛ̀mirzɛ̀ ŋmanà ŋgɔ̀ndɔ̀ ò kpeli na lì wɔ̀wìrzɛ̀ hvɛ mòlanà mɔ̀kɔ
(Mak 5.21-43; Luk 8.40-56)
18Nà òma Yerzù à mà hwɛ lì òhwa hwenè hweyà nanù, mòkànèlì mɔ̀kɔ rzìi a jà a mò rzùmeya màwɔ̀ŋgɔ̀ŋgɔ̀ a mò òhweyà nanù ema, “È ŋmanà wa ami wa ŋgɔ̀ndɔ̀ a undɛ̀nɛ̀yi naŋgɛ-naŋgɛ. Ndi jà, ò mò hwàkɛ lìya la aŋgɔ̀ ò nyò ya eni, aŋga nanù a tìmba ò lòŋgɛ.” 19Yerzù à mà tɛ̀mɛ̀ ò ŋmanyu na hwà-òkòwèlì hwa eni rzìi hwa mò nɔ̀ŋgɔ. 20Nà òma hwa ma hwɛ lì ɛndɛ, ò ma hwɛ mòlanà mɔ̀kɔ aŋga ema màyija ma mà hwɛ lì wurza ò nyò ya eni ya mòlanà, lìyòmɛ̀ la meya na mehwakɛ à mà ja ò mburza ya ama Yerzù, rzìi a tɔ̀tɔ̀ lìrzukù la mòŋgòmbè mò eni na lìya la eni. 21Oŋgò mòlanà à mà gbeyà ndì nanù èhwanja, à mà lùteyà nà mɔ̀ ŋmìti nanù ema, “A tɔ̀tì tɛ mòŋgòmbè mò eni, a wɔ̀wɔ̀.” 22Yerzù rzìi a ayèŋgòwɛ̀ à mò ɛnɛ̀, rzìi à mò òhweyà nanù ema, “È ŋmanà wà amì wà mòlanà kòkò, lìlòkɛ̀ la aŋgɔ̀ ndi lì ò wɔ̀wìrzɛ̀yi.” Lìwòkìmɛ̀nɛ̀ òŋgò mòlanà à mà wɔ̀wɔ̀. 23Yerzù à mà uka ò e ndawò ya ama òŋgò mòkànèlì. Nà òma a kpèeyà ò tenì ya eŋge ndawò, à mà ɛnɛ hwatò hwa òka ihvòlè, hwa emba mɛ̀rzɔ̀kɔ̀ me kpelì ndèŋgànà rzayi-rzayi ja hwatò hwa ma hwɛ ò mɔ̀tɔ̀wù. 24Yerzù à mà òhwa nanù ema, “Inyɔ hwa arzɛ e anjiye anù, èhwanja ònò ŋmanà ŋgɔ̀ndɔ̀ a nàŋgayi ndi ijɔ, a rzi ŋwelì.” Ndi wɔ̀ hwa ma wòteyà ndi lì mò yɔ̀yeyà. 25O mburzà ya hvònda ema e ŋgìndì e ma hvàyàhwe ò èwòka, Yerzù à mà kpèeyà ò tenì ya e tu ema hwa ma nàŋgɛlɛ òŋgò ŋmanà. Nà òma a ma mò lɛ̀mbɛ lìya la eni, òŋgò ŋmanà ŋgɔ̀ndɔ̀ lìwòkìmɛnɛ rzìi a tɛ̀mɛ̀nɛ. 26Mene meyàŋgò me ma lìŋgòwa e njàmbɛ̀ ò eŋge èhvàrzù ya arzɛ ya eŋge èkòmè.
Yerzù à mà wɔ̀wìrzɛ̀ ndima ihwakɛ
27Nà òma Yerzù mɔ̀ à mà anjiye aŋga òma, ndima ihwàkɛ ja wunyanà hwa wòteyà lì mò nɔ̀ŋgɔ, rzìi hwa a tɛ lì òhwa nanù ema, “Ìi Ŋmanà wa e nyɔ̀ŋgɔ̀nì wà ama Dàhwitì ò jò òkeya ììlì!” 28Nà òma Yerzù à mà kpèeyà ò tenì ya ndawò iŋgi ndima ja hwatò ja ahwakɛ ima mò jèeyà. Yerzù rzìi a hwa ijòwa nanù ema, “È lòkɛ̀yi ema na tànɛyi lì e gbèeyà mamɛ e arza ema na gbeyà e?” Hwa ma mò alàhwɛ̀ nanù ema, “Ɛ̀ɛ, Rzàŋgò i lòkɛ̀yi.” 29Yerzù rzìi a hwàkɛ màà mà eni ò mìirzɔ̀ ma awu, a òhwa nanù ema, “È òhvi lì lòkɛ̀ nanù ema e ɛnɛ, ò èŋgànɛ̀lɛ̀ e gbèyɛ̀nɛ̀, na òma e lòkɛ̀yì.” 30Lìwòkìmɛ̀nɛ̀ rzìi hwa ma wòteyà lì ɛnɛ̀. Yerzù rzìi a hwa kòkòhwɛ̀lɛ̀ kɔ̀yi-kɔ̀yi nanù ema, “È rzìi òhweyà tɔ̀ mòtò ene eyà ema e gbèyɛ̀nɛ̀.” 31Ndi wɔ̀ hwa ma wurza rzìi hwa timba ndi lì nyàlirzɛ̀ mànyakà ma ama Yerzù ò eŋge èhvàrzù ya eŋge èkòmè ya arzɛ.
Yerzù à wɔ̀wìrzɛ̀yi mòtò wà mbuke
32Hwaŋga hwatò hwahwàkɛ ema Yerzù à mà wɔ̀wìrzɛ̀hwɛ̀ rzìi hwa anjiya aŋga òma. Nà òma hwa mà anjiye, hwatò hwa ma jàneyà Yerzù mòtò mɔ̀kɔ ema à mà hwɛ mbuke èhwanja èlìŋgɛ̀ ya wòhwe e ma mò hwɛ ò tenì. 33Nà òma Yerzù à mà wurzirzɛ eŋge èlìŋgɛ̀ ya wòhwe, ò ma òŋgò mòtò ema à mà hwɛ mbùke rzìi òŋgò mòtò a wòteya lì òhwa. È ŋgìndì ema e ma hwɛ aŋga e ma tàmà rzìi hwa wòteya lì òhwa nanù ema, “Ene nyayi ya eyà e rzìi gbèyɛ̀nɛ ò èkòmè ya arzɛ ya Irzàyɛ̀lì.” 34Ndi Ihvàlìrzàyì hwa ma òhwa nanù ema, “Yerzù mɔ̀ à gbeyànà ndi è wònjà yà ama è kiŋgɛ̀ yà hwèlìŋgɛ̀ hwe wòhwe, ò lì hvayànà hwèlìŋgɛ̀ hwe wòhwe.”
Yerzù à òkelì hwatò ììlì
35O èŋgànɛ̀lɛ̀ Yerzù à mà hwɛ lì ɛndɛ ò màmbowà màndɛnɛ nà màmbòwà màrzalì mà eŋge èhvàrzù ma eŋge èkòmè. À mà hwɛ lì òkòlɛ̀ ò ndawò ja awu ja màkanɛ̀ ja wònyà Yudà, na ò lì òhwa Ŋmɛ̀ndì mò Gbamù mò Likànèyà là ama Lohwɛ̀. À mà hwɛ lì wɔ̀wìrzɛ̀ hwà-òkèlì hwa arzɛ na i nyayi ja nyàmbɛ ja arzɛ ema me ma hwɛ ò tenì ja inyɔ ja awu. 36È hvònda Yerzù à mà ɛnɛ è ŋgìndì, à mà è òkeyà ììlì rzayi-rzayi. Èhwanja hwa mà tàkirzɛhwɛ, hwa rza òhve hvɛ tɔ̀ lì òŋgòwànà. Hwa mà hwɛ ndi nàa mɛ̀ɛ̀lɛ̀ŋgù ema me rza òhvɛɛ mɔ̀ɔ̀ŋgèlì. 37O èŋgànɛ̀lɛ̀ à mà òhweyà Hwà-òkòwèlì hwa eni nanù ema, “È hvaya è ŋyàayì jɔ̀ɔ̀-jɔ̀ɔ̀, ndi hwarzàŋgà mbòtà hwa rzà kòkì. 38È kanɛ̀ nanù ema è mòhwɛ̀nɛ wà hvaya, à òme hwàrzàŋgèlì hwa mbòtà ò hvaya.”
Voafantina amin'izao fotoana izao:
Matiyò 9: bri
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
