Mi cilima 4
4
Kayini leni Abeli togida
1Adama den bandi o pua Awa, o den punbi ki mali Kayini. O den yedi: «O Diedo todi nni ke n mali o joa.» 2O go den mali Kayini waalo Abeli. Abeli den tua yankpaalo, Kayini mo kpakpaalo. 3Yogunuba n den pendi, Kayini den cuani bu paabu U Tienu po, yaabu n tie ki tinga bonluonkaala. 4Abeli moko den cuani o yaa paabu, yaabu n den tie o yankulu nni o pebikpiala leni bi kpama. O Diedo den nuali Abeli yaa paabu leni ki nunmanga.#Heb 11.4. 5Ama waa den nuali Kayini leni o paabu kuli leni nunmanga. Lani, Kayini pali den beni boncianla ke o nunga kuli biidi. 6O Diedo den yedi Kayini: «Be yaa po yo ke a bieni a pali, ke a nunga mo go biidi? 7I moamoani a yaa tieni yaala n ŋani, a nunga baa yaa ŋani. Ama a yaa tieni yaala n bia, ti tuonbiadi dua a buliñoabu kani, ki sugini ki diedi a. Ama fini, ŋan moandi ki paadi ti.» 8Die ba yeni, Kayini den yini o waalo Abeli ke bi gedi li fuali po. Ban den ye lipo, Kayini den bibi o waalo Abeli, ki kpa o.#Mat 23.35; Luk 11.51; 1Jan 3.12.
9O Diedo den yedi: «Kayini, a waalo Abeli ye le?» O den guani ki yedi o: «Mii bani. Naani n tie n waalo guudo yo?»
10Lanwani, U Tienu den guani ki yedi o: «A tieni be? A waalo soama bubula nialu ñani ki tinga nni ki pundi n kani.#Heb 12.24. 11Moala liiga, a baa yaa tie ti solindi yua ki tinga nni, yaaga n den yaadi ki ñoabu ki gaa a waalo soama a nuu nni yeni. 12A yaa koni ki tinga, ki kan guani a po ki baali. A baa yaa tie o lianliamo leni o puapuagido ki tinga nni.»
13Kayini den yedi: «O Diedo, n tagili panpaani kpiagi ki cie n gbanmanu. 14Diidi, dinla a deli ki ñani nni ki naa tinŋanga nni. N baa yaa wuo naani n foagi leni a. N baa yaa tie lianliamo leni o puapuagido ki tinga nni. Yua n laa nni kuli baa kpa nni.»
15O Diedo den yedi: «O nilo yaa kpa Kayini, o baa guani ki baa o biadima panpaani taalimilele, kelima Kayini po.»
O Diedo den tieni mi maalima Kayini po, ke yua n laa o kuli n da kpa o. 16Lanwani, Kayini den sani ki foagidi leni o Diedo. O deni den ye Nodi diema nni, yaama n ye Edeni puoli po.
Kayini puoliŋuani
17Kayini den bandi o pua ke o den punbi ki mali Enoki. Lan pendi, o den cili o dogu ki yini u o bijua Enoki yeli. 18Enoki den mali Iradi, Iradi den mali Mehujaeli, Mehujaeli den mali Metusaeli, Metusaeli mo den mali Lemeki. 19Lemeki den taa puobilie, puoyendo den yi Ada, o lielo mo Tisila. 20Ada den mali Yabali, yua n den tie yaa nibuolu n yen ye a gbandiena nni, ki kpaa bi yandi kuli yaaja. 21O waalo den yi Yubali. Yubali den tie yaa nibuolu n pua ti gogiditi, ki go tie yaaba n piebi mu yelimu kuli yaaja. 22Tisila moko den mali Tubali-Kayini, yua n den maa yaa tiadi n tie ti kumoandi leni ti kuboandi kuli. Tubali-Kayini waalo, yua n den tie pua, den yi Naama.
23Lemeki den yedi o puoba Ada leni Tisila:
«Cengi mani n maama bonŋanla.
Diadi mani yi tuba ki cengi n yedima.
N den kpa o nilo kelima o den faligi nni.
N den kpa o jawaalo kelima o den poagili nni.
24Bi yaa guani i biadipanpaani Kayini po taalimilele,
Bi baa guani Lemeki po piilele n taalimilele.»#Mat 18.22.
25Adama go den bandi o pua ke o go mali bonjaga. O den yini o yeli Seti, kelima o den yedi: «U Tienu den puni nni bonjatoaga, ke o gaa Abeli kaanu, Kayini n den kpa yua.» 26Seti moko den mali bonjaga ki yini o Enosi. Lanyogunu yo, ke bi niba den cili ki jaandi Li Miali Diedo yeli nni.
Voafantina amin'izao fotoana izao:
Mi cilima 4: BGP
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Gulmancema Protestant Bible © Bible Society of Burkina Faso, 2013.