Genesis 6
6
Ja b'a jak ja cha'anil kristyano jumasa
1Jel juts'in pojxi ja kristyano jumasa b'a lu'umi, ajyi yuntikile ak'ix. 2Yajni yilawe ja yuntikil ja Dyos jastal jel tsamalik ja ak'ixuk b'a lu'um iti, ti stsa'awe b'a jel tsamali nupaniye sok. 3Jaxa Dyosi, ti yala'a: —Mi oj ki' lek ja oj ajyuk sak'anil spetsanil k'ak'u ja kristyano'i. —Mi oj ek' yujile ja jun syen sok jun tajb'e jab'ili—, (120).
4Ja yuntikil ja Dyosi, ajyi yuntikile sok ja ixuke jumasa b'a lu'um iti,#6:4 ja it wax alxi yuntikil Dyosi ja anjel jumasa it jekab'anume'i. ja' yuntikil ye'nle ja jel cha'anik k'i'ye ja najate'i, ja it jumasa jel tsatse b'a tiro'aneli, sok na'ub'al lek sb'aje.
Tajki ja Dyos yuj ja kristyano'i
5Ja smul wa'n sle'jel ja kristyano b'a lu'um iti, jelxita ele, kechani ja wajel sk'ujole oj sk'u'luke b'a mi lekuka. Yajni yila ja Dyos jelxita ja jas mi lek wa'ne sk'u'lajeli, 6Jel cham sk'ujol yuj ja sk'u'lanta, jelto tsa'an sna'a ja lom ti ya'a b'a lu'umi. 7Ja'yuj ti yala'a: —Oj ch'ay sna'jel b'a lu'um it ja kristyano jk'u'lani, oj ch'ay sna'jel spetsanil ja swinkili, sok spetsanil ja chante jumasa. Jel cham k'ujol ayon ja lom jk'u'lani—. 8Ja Dyosi, jel lek yila ja jas sk'u'lan ja Noeji.
Ja Noeji, stojb'es jun barco
9Ja Noeji, spetsanil k'ak'u sk'u'an ja yab'al Dyosi, b'a spetsanil ja smoj jumasa mi jun ma' lek sk'ujol yujile kechan ye'na. 10Ja Noeji, ajyi oxe yuntikil ja sb'i'ile'i, Sem, Cam sok Jafet.
11-12Ja Dyosi, sna'a k'inal ja jastal mi tsamaluk sok jel kalaxe ja swinkil ja lu'um iti. 13Ja'yuj ti yal yab' ja Noeji:
—Oj jch'ak sna'jel spetsanil ja jas ay sak'an b'a lu'um iti, mi ma' oj ka'kan yuj ja jelxa kistal ja jastal ayi. 14Ja'yuj, le'a ja te'i, k'u'lan jun barco b'a oj likjuk yuj ja ja'i. Ch'akan nok'o sok chab'ek' ja skol jumasa b'a yojoli, cho jach'ni b'a spatiki, tojb'es jitsan skwarto'il. 15-16Ja barco jawi, b'a ox kaje oj ja k'u'luk, oj ja b'is jun syen jun tajb'e sok jo' lajune metro ja snajtili, (135) jun tajb'e sok chab' metro ja sati (22) ox lajune metro ja scha'anili. A'kan smejch'il sok jun b'a oj ajyuk ochel b'a sts'e'eli, cho k'u'lan sbentana'il a yil sb'aj sok nalan metro b'a smejch'ili. 17Ke'n oj jek jun tsatsal ja' b'a lu'um b'a oj sch'ak spetsanil ja jas ay sak'anil b'a lu'um iti. —Mi jas oj kan sak'an—
18—Jayuj, oj jk'u'l jun trato amok ja we'n, wa wuntikil jumasa, wa che'umi, wa walib' jumasa, oj ochanik ja b'a yoj barco, 19-20Jach'ni, ja chante jumasa oj wa' och jun swaw sok jun snan, b'a spetsanil ti'k'e yal chan b'a wax jujpi, b'its'il chan, alak'il chante, chante b'a k'ul. A ochuk a mok lajan b'a jach' mi oj chamuke. 21A och spetsanil tik'e wa'el, ti'xa b'a snajtsil b'a jach' oj ch'ak a ta' jas oj ja wabyex—
22Jaxa Noeji, jach'ni sk'u'lan spetsanil ja jastal alji yab' yuj ja Dyosi.
Voafantina amin'izao fotoana izao:
Genesis 6: YABD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Sociedad Bíblica de México 2021