Genesis 4
4
Ja Cain sok ja Abeli
1Ja winiki sta'a sb'aj sok ja sche'um Eva, jaxa ye'n, tukb'i satk'inal, ajyi jun yalats. Ya sb'i'iluk Cain, ti yala'a: —Sts'akatal ja Dyosi, ajyi jun yal jkerem—. 2Tsa'an cho ajyi pilan yal ya sb'i'iluk Abel. Ja Caini, a'tijum b'a alaj, jaxa Abeli, talna chej.
3Ek' ja k'ak'u jumasa, jun k'ak'u ja Caini, ya' yi jun smajtan ja Dyosi, ja ya' yi ja jas wax ya' el b'a lu'umi. 4Jaxa Abeli, stsa'a jun chej b'a jel kojleli, ja ya' yi b'a smajtan ja Dyosi. Jaxa Dyosi jel lek yila ja majtanal ya'a ja Abeli, 5Mi jach' yila lek ja jas ya'a ja Caini. Yuj ja jastal iti, jel tajki ja Caini, ti' wax ilxi b'a sat ja jastal jel tajki.
6Ja'yuj ja Dyosi, ti sjob'oyi ja Caini:
—¿Jasyuj ja jel cham k'ujol aya, sok jel tajkela b'a? 7Ja' lek yuj tojuk ja jas waxa k'u'lani, ja ke'n ojni ki'awi leka, kechan ta yuj k'a mi lek ja jas wa'na sk'u'lajeli, ja mulali, chapanxta ay b'a oj syam'a jastal jun tan choj. —Mok a wa'a b'aj yi' b'a oj yil k'ujoluka.
8Jun k'ak'u ja Caini, sloko paxial ja yijts'in Abeli, yajni ti'xa aye b'a witsi, och smak' ja yijts'ini man smila.
9Tsa'an ja Dyosi, ti sjob'o yi ja Caini:
—¿B'ay wa wijts'in b'a? —x'utji.
Ti yala ja Caini:
—Mix na'a, —Mi ja'uk wanukon stalna jel, —xchi ja Caini.
10Ja'yuj, ti alji yab' yuj ja Dyosi:
—¿Jasyuj ja lom a mila wa wijts'in b'a? —Ja schik'el wa wijts'in it a pek'a yi b'a lu'umi, wa'n sk'anjel oj ja tup ja jas a k'u'lan yi'i. Ja iti, mi oj b'ob' kan jachuk, xchi ja Dyosi. 11-12Jel wokol oj ek' a wuj, ja lu'um oj ja wa'telta mi oj ajyuk a wuj sb'a'al yuj ja lom a mila wa wijts'ini, ja lu'um jaw ja' u'ji yuj ja schik'el ta. Ja'yuj ja we'n lomtik oj ajyan ek' ja b'a lu'um ja jastal ma' mi sta'a b'a oj ajyuka.
13Ja'yuj ja Caini, ti yal yab' ja Dyosi:
—Ja wokol jawi, jel tsats, mi oj kuch kujil. 14Ja ya'n waxa jekawon ele chikan b'a oj elkon k'ot jastal ja ma' lomtik ay ek'i. T'ilan oj nak' ek' b'aj b'a sti' wa sati, sok chikan ma oj sta'on ek'e ojni smil'ona, —xchi ja Caini.
15Ti alji yab' yuj ja Dyosi:
—Miyuk yuj k'a ay ma wa sk'ana oj smil'a, juk majke tsats lek oj yi' ja wokol ja ma oj sk'u'l jachuki.
Ja'yuj ja Dyosi, ya ochyi jun senya ja Cain b'a jach' mi ma' oj b'ob' miljuk yuj ja. 16Jach' waj jastal iti, ti'xa spila sb'aj ja Cain b'a sti' sat ja Dyosa, ti ajyi sok ja ma'tik lomtik ni aye ek' b'a stojol wax jak ja k'ak'u ja b'a yaljil tek'ul Edeni.
17Ja Caini, sta'a sb'aj sok ja sche'umi, jaxa ixuki tukb'i satk'inal smana jun yalats ya sb'i'iluk Enoc. Jaxa k'ak'u jaw ja Caini, wa'n stojb'esjel jun chonab' yuj ja jel tsamal ja yunin Enoki, ja'yuj Enoc ya' sb'i'iluk ja chonab' jawi.
18Ja b'i'ilal jumasa iti, ja yintil jumasa ja Caini:
Enoc,
Irad,
Mehujael,
Metusael,
Lamec.
19Ja Lameki, ajyi sok chab' sche'um. June ja ye'nle'i sb'i'il Ada, jaxa juni Sila. 20Ja Ada smana jun yalats sb'i'il Jabal, ye'n b'ajtan ti ajyi ek' b'a na'its k'u'lub'al sok k'u'utsi, sok ja ya'tel wax ya pojxuk ja wakaxi. 21Ja Jabali, ajyi jun smoj alijel sb'i'il Jubal, ye'n sts'ijb'a sk'ujol jastal oj stojb'es ja arpa sok ja ajmayi.
22Jach'ni ja Sila cho ajyi jun yal skerem sb'i'il Tubal-cain. Ja ye'n wa sk'u'lan spetsanil tik'e a'tel b'a tak'in jumasa, jastal bronce, sok hierro. Ja swatsi, sb'i'il Naama.
23Jun k'ak'u ja Lameki, yal yab' schab'il ja sche'um jumasa:
—Ada, Sila, cho jche'um jumasa:
—Maklayik lek ja jas oj kali—
Yuj k'a ay ma oj syajb'eson,
ma yuj mi lekuk ja jas oj sk'ulki'i,
yal untik ma niwan winik,
ojni jmila.
24Ja ma oj syajb'es ja Caini
Juk majke lek cha'an oj stupe,
jaxa ma oj syajb'eson ja ke'n
ox tajb'e lajune sok juk majke oj stupe—. (77).
25Ja Adani, cho sta'a sb'aj sok jun majke smoj ja sche'umi, jaxa yajni cho ajyi pilan yal skeremi, ya sb'i'iluk Set,#4:25 Set: Set ja b'a hebreo wa sk'ana oj yal, cho ya'ki jun majke smoj. ti yala'a: —Ja Dyosi, ya'ki pilan yal jkerem ja'ni slok'ol ja Abel it smila ja Caini—. 26Jach'ni ja Seti, ajyi jun yal skerem ya sb'i'iluk Enos. Man k'ak'u jawi, k'e stul'e stoyjel ja Dyosi, cho k'e yal'e ja sb'i'ili.
Voafantina amin'izao fotoana izao:
Genesis 4: YABD
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© Sociedad Bíblica de México 2021