Taruparea̧ Ma̧ȩ 9
9
Ütë tjamo̧ judi ma̧ȩ yürürëremȩdejȩ Noe ju̧i̧
1Ja̧dëa ji̧ Ütë tjamo̧ judi ma̧ȩ yürürëremȩdejȩ Noe pio ju̧i̧, jibëa̧ u̧ri̧ pio ji̧ri̧bo. Judiro̧ chjadëri̧ cjo̧ro̧pea̧ ma̧ȩ oa ma̧ȩ yürürëremȩdejȩrȩ, ja̧di ta̧rëri̧ yo̧mȩrȩ:
—Danȩrȩ, no̧i̧dëchji̧vä. Goë jeji̧ra̧pe bagachji̧vä chiri nö̧ta oa, chjuchjupechä cjo̧ro̧rea̧mi̧ dari̧. 2Ado danȩrȩ, yaba̧, chirirä cjo̧ro̧ji̧ri̧ judiro̧ chjö̧na̧i̧däräti̧rȩ uape uape da mapadiro̧dibe, coë jäji̧ri̧borë. Ado pua chjö̧na̧i̧ti̧rȩ peaja̧di uape uape da mapadiro̧dibe, uiräji̧ri̧borë. Pio cüdë tänȩa̧ oa dibëa̧ chja̧oerä cjo̧ro̧ mapadirȩ uapaji̧ri̧rȩ. 3Ado mȩnȩro̧ ja̧di dari̧ juradërërea̧ ji̧, jabechji̧ mȩnȩro̧ jurapea̧ oa yürürequededibe yaba̧. Jabechji̧ böa oa, ipurimȩchja oa, toyae oa, igärä oa, ariguri oa, chjido oa, puri oa, datutumi̧ oa, chiruri oa, pua oa, cho̧ oa, chirirä cjo̧ro̧ji̧ri̧ chjö̧na̧i̧däräti̧ oa yürürequededibe mȩnȩro̧ chjadëri̧ jurapea̧ oa. Danȩrȩ, jurarea̧ chiamȩ to ji̧ra̧ oa yürürëremȩrequededibe pearä judi. Ado yaba̧, mȩnȩro̧ go̧a̧ pio ju̧i̧bo chjadëri̧ jurapea̧ oa yürürequededibe. Jabechji̧ chirirä cjo̧ro̧ji̧ri̧ chjö̧na̧i̧ti̧ oa yürürequededibe yaba̧ jurapea̧ oa. 4Jabo danȩrȩ, pio ju̧i̧mo̧i̧ juradëpea̧de jabo. Goe chiamȩ go̧a̧ pio ju̧i̧mo̧i̧ juradëpea̧de. Aja̧, goe oa gu̧ro tänȩa̧rämo̧ jurapea̧de go̧a̧ üdë. Goe üdë china̧chjade. Goe pio oaiä cjo̧ro̧mȩde chirirä cjo̧ro̧mȩ judi. Goe pio oaiä pumȩmȩde. Ja̧di tara juradëpea̧de goe üdë. Goe chiamȩ go̧a̧ üdë juradëpea̧de —yo̧mȩrȩ ni̧bä chjaorëremȩdejȩrȩ pumȩ ji̧ri̧. 5Ado ji̧dë u̧i̧ yo̧mȩrȩ, ja̧di ta̧rëri̧ a̧de ni̧bä chjaorëremȩdejȩrȩ:
—Ado eami̧ pumȩrȩ ado cja̧rȩmo̧ pumȩ oa ja̧bo tänȩrä judi, jabechji̧ bape chjaopea̧de, bapë ja̧bo tänȩpea̧de. Ado eami̧rȩ chirirä cjo̧ro̧mȩ judi pumȩ oa ja̧bo tänȩrä judi, ja̧bopea̧ chiade peaja̧di. Bacarë pumȩ ju̧i̧ ja̧bo tänȩrä judi ja̧bo tänȩpea̧de. Tororë, yaerë, burorë pumȩ pio ju̧i̧ ja̧bo tänȩrä judi, jabechji̧ bapë ja̧bo tänȩpea̧de. Ja̧di dari̧ japapea̧ maeade. 6Ütë tjamo̧ pio judimi̧ darë pareapea̧ oa cjiarëremȩde pumȩ judi. Ja̧di tara yo̧requededibe: Eami̧ pumȩrȩ ado cja̧rȩmo̧ pumȩ oa ja̧bo tänȩmȩ pio judi, jabechji̧ bapë ja̧bo tänȩpea̧ maeade. Jabechji̧ pumȩ pio judiro̧ ja̧bo tänȩa̧ oa ja̧bopade jibëa̧ pumȩ pio ju̧i̧ ja̧bo tänȩa̧ ba oa. 7Ado yaba̧ ado chjereno̧ yo̧requededibe. Jabechji̧ no̧i̧dë tjamo̧chji̧vä goë jeji̧ra̧pe järea̧mi̧ dari̧. Pumȩ buba tjamo̧pe järea̧mi̧ dari̧ nö̧richji̧jȩrȩ dibëa̧ bori̧ ji̧ri̧ mȩnȩro̧ chiriräpȩti̧ oa chjuchjupechä cjo̧ro̧rea̧mi̧ dari̧ —yo̧mȩrȩ ma̧ȩ yürürëremȩdejȩrȩ chara ana̧ri pio judiri go̧dürëreji̧ri̧ pio ji̧ri̧ Ütë tjamo̧ judi.
Ütë tjamo̧ judi ma̧ȩ yürë cji̧därëremȩdejȩ Noe ju̧i̧.
8Ja̧dëa ji̧ Ütë tjamo̧ judi ma̧ȩ yürürëremȩdejȩ Noe ju̧i̧, Noe ja̧ u̧ri̧ pio ji̧ri̧. Ja̧di ta̧rëri̧ yo̧mȩrȩ ma̧ȩ yürürëremȩdejȩrȩ:
9—Danȩrȩ, pio cüdërequede ca̧ ma̧ȩra̧ pio ju̧ri̧ra̧ ni̧bämȩ judi. Ado pio dibë, dibëa̧ri ja̧ji̧ri̧ pio ji̧ri̧bo ma̧ȩ yürürequededibe yo̧ë cji̧därea̧ ma̧ȩ pio ju̧i̧. Jabechji̧ cüdë yo̧a̧mi̧ japaparequededibe ano̧ mire jo̧rȩtarea̧ decjiari̧. 10Ado dibë nö̧ta charari pio judiri go̧düa̧ji̧ri̧ pio ji̧ri̧bo ma̧ȩ yürürequedejȩrȩ. Chirirä cjo̧ro̧ji̧ri̧ pio ji̧ri̧, pumȩrȩ goa̧ pio ji̧ri̧, pua pio ji̧ri̧, ma̧ȩ yürürequedejȩrȩ chjö̧na̧i̧ oa. 11Aja̧, ca̧ ma̧ȩra̧ pio ju̧ri̧ra̧ yürürequededibe. Jaboti̧ri̧ ui ana̧ oa chjadüdëparequede. Cjo̧ro̧ji̧ri̧ ütëbodärä oa jemu̧i̧ ja̧bo tänȩpea̧ oa, jabechji̧ ado chjereno̧ chjadüdëparequede ui ana̧ oa —yo̧mȩrȩ ma̧ȩ yürë cji̧därëremȩdejȩrȩ Ütë tjamo̧ judi, ano̧ mire jo̧rȩtarea̧ decjiari̧.
12Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:
—Ado danȩrȩ, cüdë dibë ma̧ȩ yürë cji̧däa̧ ma̧ȩ üdë bucho ana̧mȩ ma̧ȩde. Tjamo̧ davä. Cüdë cjo̧ro̧ji̧ri̧ chjö̧na̧i̧ oa ma̧ȩ yürë cji̧däa̧ ma̧ȩ üdë badëpe jädëmȩ ma̧ȩde. Ado pio ju̧i̧ chjiari chjadëri̧ na̧rȩpea̧ oa, jabechji̧ na̧rȩrea̧ yürüparequededibe. 13Jabechji̧ jochebürüri pio ju̧i̧ cji̧däparequede a̧dëräpȩ. Cüdë dibë ma̧ȩ yürüa̧ ma̧ȩ pio ju̧i̧ chjiari chjadëri̧ na̧rȩpea̧ oa cji̧däpareconȩ. 14Ado cüdë go̧a̧ra̧diä go̧a̧ra̧diä cjia tänȩrä, ado jochebürüri üdë cjitërä, jabechji̧ jo̧rȩtamȩrȩ dapareconȩ. 15Aja̧, cüdë dibë ma̧ȩ yürë cji̧däa̧ ma̧ȩ pio ju̧i̧ jo̧rȩtamȩrȩ dapareconȩ. Tjamo̧ davä. Cüdë chirirä cjo̧ro̧ji̧ri̧ chjö̧na̧i̧ oa ma̧ȩ yürë cji̧dä ma̧ȩ pio ju̧i̧ jo̧rȩtaparequede davä. 'Aja̧, ado ui ana̧ oa chjadüdëpaquëda, cjo̧ro̧ji̧ri̧ ütëbodärä oa jemu̧i̧ ja̧bo tänȩpea̧ oa ado chjadüdëpaquëda, jabechji̧ cüdë ma̧ȩ yürë cji̧däa̧ ma̧ȩ pio ju̧i̧ jo̧rȩtaquëda' quëna̧ jo̧rȩtamȩrȩ daparequede jochebürüri pio ju̧i̧. 16Aja̧, cüdë jochebürürirë cjitëmȩ oa darä, jabechji̧ chjadëri̧ jo̧rȩtaparequede davä cüdë ma̧ȩ yürë cji̧däa̧ ma̧ȩ pio ju̧i̧, bucho ana̧ cjiamȩ ma̧ȩ pio ju̧i̧. Aja̧, chirirä cjo̧ro̧ji̧ri̧ chjö̧na̧i̧däräti̧ oa ma̧ȩ yürüa̧ ma̧ȩ pio ju̧i̧ jo̧rȩtaparequede. 17Aja̧, cüdë pio ji̧ri̧iäpȩmo̧ yürë cji̧däa̧ ma̧ȩ pio ju̧i̧ chjiari na̧rȩrea̧ üdë, jabechji̧ jochebürüri pio judide —yo̧mȩrȩ ni̧bä chjaorëremȩdejȩ Ütë tjamo̧ judi No̧ȩ pio ju̧i̧iäpȩmo̧.
Noe ja̧ u̧ri̧ judiro̧, jabechji̧ pumȩ ütëbodärä ja̧ ütëti̧dirȩ
18Noe ja̧ u̧ri̧ judiro̧, charari go̧dürëreji̧ri̧ pio judiro̧ ja̧di quȩji̧ri̧dirȩ. Chȩ, Ca̧, ado Japje. Aja̧, ja̧di quȩji̧ri̧dirȩ. Ado Ca̧ pio judi nö̧rirëremȩdejȩ jibëa̧ ja oa, Canaa̧ quȩmȩ oa. 19Aja̧, pio judiro̧dirȩ Noe ja̧ u̧ri̧ judiro̧. Ado pio ji̧ri̧iä no̧i̧dë tjamo̧pe bagarëreji̧ri̧dirȩ pumȩ judiro̧, chiriräpȩti̧ oa chjuchjupechä cjo̧ro̧rea̧mi̧ dari̧. Aja̧, pumȩ ütëbodärä ja̧ ütëti̧ pio judiro̧dirȩ. Pumȩ ütëbodärä ja̧ tarudirȩ. Pio judiri ja̧ maeadirȩ pumȩ ütëbodärärë.
Ca̧ quȩmȩ pio judi chjai̧dëri̧ japarëremȩdejȩ jibëa̧ ama̧i̧ ju̧i̧
20Ado Noe judi charari pio judiri go̧düa̧ duri oa, tjado oa ja̧bepamȩpea̧de. Ado uva to oa goamȩpea̧de. 21Ado japamitë chjätä ëte, uva üdë chiamȩpea̧rä, ërü oa japarëremȩde. Uvara̧ pio ju̧ri̧ra̧ ërü oa japarëremȩde. Ado ërü oa a̧dë chjäte jara̧ oaiä, cjäri̧ made, yu̧i̧mȩrȩ cjiadiärëremȩde. Ado yu̧i̧ tjamo̧mȩrȩ coëno̧a̧dejȩ jibëa̧ tjibo oa. Ado chjätemȩrȩ cjiadiärëremȩde jibëa̧ bërä. Ira̧ japea̧ bërä chjätemȩrȩ a̧rȩrëremȩde. 22Ado Ca̧ judi, Canaa̧ pio ju̧i̧ ja̧ jäja pio judi jo̧räpȩ yu̧a̧mȩrȩ darëremȩdejȩ jibëa̧ ama̧i̧ ju̧i̧ chjäte a̧rȩmȩ oa. Ado jäjäa pio ju̧i̧ da ëte, go̧dürëremȩde jibëa̧ oti̧ pio ji̧ri̧ yo̧pea̧ oa. Chjai̧dëri̧ jo̧rȩtamȩrȩ yo̧rëremȩdejȩrȩ pio jibë nö̧rimȩ pio ju̧i̧ chjiari. 23Jabo Chȩ judi, Japje judi pio ju̧i̧ ta̧rëa̧ oaiä, jibëa̧ ama̧i̧ ja̧ joë purirea̧ chjibo oa mitë ëte, jibëa̧ ca̧toro ara järëreji̧ri̧diro̧jo̧ȩ jäja ju̧i̧iäpȩ chjadëri̧ ina̧pea̧ oa. Ado ja̧dëa ji̧ durira̧ a̧de jäa̧dirȩ jibëa̧ ama̧i̧ ju̧i̧ chjadëri̧ ina̧pea̧ oa, chjätemȩ oa dachea oa.
Noe judi ma̧ȩ yürürëremȩdejȩrȩ jibëa̧ u̧ri̧ ji̧ri̧
24Ado Noe judi bëdüa̧rä, judi chjapea̧rä, jabechji̧ ta̧rërëremȩde jojarë japea̧ pio ju̧i̧ chjiari. Ado pio ju̧i̧ ta̧rëa̧rä, ‘Chia chia, ca̧ ja judi daea̧dicoada, chjätemȩa oa daea̧dicoada, chjai̧dëri̧ jo̧rȩtamȩrȩ daea̧dicoada’ quëna̧ jo̧rȩtamȩpea̧de. Ado pio ju̧i̧iä chjaodëri̧ ërecjiamȩpea̧de. 25Ado ërecjiapea̧mȩrȩ chjai̧dëri̧ cjo̧ro̧pea̧ ma̧ȩ oa yo̧rëremȩde Canaa̧ pio ju̧i̧ chjiari, Ca̧ pio ju̧i̧ ja̧ joja pio ju̧i̧ chjiari. Ja̧di ta̧rëri̧ yo̧rëremȩde:
—Aja̧, Ca̧ pio ju̧i̧ ja̧ joja pio ju̧i̧ chjiari ma̧ȩ yürürequede, pio judiri ja̧ji̧ri̧ pio ji̧ri̧ chjiaribo. Jabechji̧ chjai̧dëri̧ cjo̧ro̧rea̧mi̧ dari̧ cjiadiätäde Canaa̧ judi. Mu̧i̧tjoi̧ maearë cjiadiätäde. Jibëa̧ oti̧ ja̧ mu̧i̧tjoi̧ pio ji̧ri̧ ja̧ mu̧i̧tjoi̧ maearë cjiatäde —yo̧mȩrȩ yo̧rëremȩde Noe judi Ca̧ pio ju̧i̧ ja̧ joja pio ju̧i̧ chjiari.
26Ado Noe judi jojada pio ju̧i̧ chjiari ma̧ȩ yürü ëte, jabechji̧ ma̧ȩ yürürëremȩde peaja̧di Chȩ pio ju̧i̧ chjiari. Chjadëri̧ cjo̧ro̧pea̧ ma̧ȩ oa yürürëremȩde:
—Aja̧, Jeova judi, ca̧ Ütë pio judi chjadëri̧ cjo̧ro̧rea̧mi̧ dari̧ japatädejȩ Chȩ pio ju̧i̧. Ado Canaa̧ judi Chȩ pio ju̧i̧ ja̧ mu̧i̧tjoi̧mȩrȩ cjo̧ro̧täde —yo̧mȩrȩ ma̧ȩ yürürëremȩde Chȩ pio ju̧i̧ chjiari, judi chjadëri̧ cjo̧ro̧pea̧ ma̧ȩ oa yürürërea̧ ji̧. 27Ado ja̧dëa ji̧ peaja̧di ma̧ȩ yürürëremȩde Japje pio ju̧i̧ chjiari. Chjadëri̧ cjo̧ro̧pea̧ ma̧ȩ oa yürürëremȩde.
—Aja̧, Japje ja̧ chiri üdë boi̧dë tjamo̧rȩ a̧rȩtäde. Chȩ pio ju̧i̧ nö̧ta goae tarari̧ ëba cjo̧ro̧rea̧ datäde. Ado Canaa̧ judi, Japje pio ju̧i̧ ja̧ mu̧i̧tjoi̧mȩrȩ cjo̧ro̧täde peaja̧di —yo̧mȩrȩ ma̧ȩ yürürëremȩde Noe judi Japje pio ju̧i̧ chjiari.
Noe judi ja̧borëremȩde
28Ütë tjamo̧ judi ui ana̧ oa chjadüa̧ duri oa, jabechji̧ ui ji̧ra̧ri̧ cjo̧ro̧rëremȩde Noe judi. Tjamo̧ davä. Ütë tjamo̧ judi ui ana̧ oa chjadüa̧ duri oa, 350 ui cjo̧ro̧rëremȩde. 29Ado ja̧dëa ji̧ jënȩ 950 ui goamȩpea̧rä, jabechji̧ ja̧borëremȩde ui ji̧ra̧ tjamo̧ oa go̧amȩrȩ.
Voafantina amin'izao fotoana izao:
Taruparea̧ Ma̧ȩ 9: Pume
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©2021 Global Partners, All Rights Reserved