Taruparea̧ Ma̧ȩ 12
12
Ütë tjamo̧ judi mitërëremȩdejȩ Abara̧ ju̧i̧
1Ado Jeova judi ma̧ȩ yürürëremȩdejȩ Abara̧ ju̧i̧. Ja̧di ta̧rëri̧ yo̧mȩrȩ ma̧ȩ yürürëremȩdejȩ:
—Danȩ, a̧dë baävä na̧ chiri oa —yo̧a̧dejȩ—. Ado mȩadi ja̧ji̧ri̧ pio ji̧ri̧bo a̧dë baäjȩrȩ. Ado na̧ ama̧i̧ ja̧ bë pio ju̧i̧bo a̧dë baävä. Jabechji̧ cüdë mȩa na̧rȩpea̧ chiriräpȩ baätä earequedemȩ. 2Ado danȩ, na̧ea̧ri ja̧ji̧ri̧ pio judiro̧ no̧i̧dë tjamo̧pe jäpadirȩ —yo̧a̧dejȩ—. Ado a̧dë chjäte ba chia tjamo̧ji̧ri̧rȩ cjo̧ro̧padirȩ. Ado danȩ, mȩnȩ chjadëri̧ cjo̧ro̧pea̧ ma̧ȩ oa yürüparequedemȩ mȩnȩ chjadëri̧ cjo̧ro̧rea̧mi̧ dari̧. Ado pio cüdë tänȩa̧ oa, oëra̧ti̧ oa cjo̧ro̧ji̧ri̧ pumȩ judiro̧ pio mȩa chjiari goë goë ta̧rëpadirȩ. Ado ba chia jo̧rȩtapadiro̧mȩ. Ado pio mȩnȩ o ji̧ri̧iäpȩmo̧ chjadëri̧ a̧doparenȩjȩrȩ, judiro̧ ji̧dë u̧i̧ chjadëri̧ cjo̧ro̧rea̧mi̧ dari̧ —yo̧a̧dejȩ—. 3Ado danȩ, pio mȩa chjadëri̧ japaji̧ri̧ pio ji̧ri̧ chjadëri̧ japaparequedejȩrȩ, judiro̧ chjadëri̧ cjo̧ro̧rea̧mi̧ dari̧. Jabo pio mȩa chjai̧dëri̧ japaji̧ri̧ pio ji̧ri̧, jabechji̧ bape chjaoparequedejȩrȩ —yo̧a̧dejȩ—. Ado danȩ, chiri nö̧ta oa cjo̧ro̧ji̧ri̧ pumȩ pio judiro̧ chjadëri̧ cjiadiärea̧ dapadirȩ na̧ea̧ri ja̧mȩ pio ju̧i̧iä —yo̧mȩrȩ ma̧ȩ yürürëremȩdejȩ Abara̧ ju̧i̧ Jeova judi.
Abara̧ judi go̧dürëremȩde jibëa̧ ama̧i̧rea̧rȩ cjo̧ro̧rërea̧ ja̧ bëri pio judiri
4Ja̧dëa ji̧ Abara̧ judi Ara̧ quȩmȩ bë ma̧ri̧ri judiri go̧dürëremȩde Ütë tjamo̧ ja̧ ma̧ȩrä. Aja̧, 75 ui goamȩrȩ go̧dürëremȩde Canaa̧ quȩmȩ chiriräpȩ baäpamȩrȩ. 5Baärëremȩde jibëa̧ iei̧ pio ji̧ nö̧ta, Charai quȩyi̧ pio ji̧ nö̧ta. Jibëa̧ uima̧i̧ oa peaja̧di ëba baäa̧dejȩ, Oto quȩmȩ oa. Ado jënȩ Ara̧räpȩ cjo̧ro̧a̧ nö̧ta mitërëremȩdejȩrȩ jibëa̧ mu̧i̧tjoi̧ ji̧ra̧ oa. Pio ji̧ri̧bo ëba baärëremȩdejȩrȩ jënȩ baäa̧ ji̧. Aja̧, jibëa̧ baca oa, jibëa̧ oveja oa, jibëa̧ chjibo oa, jibëa̧ cjo̧ro̧rea̧ chjö̧na̧i̧ oa goamȩrȩ baärëremȩde. Ado japamitë ana̧ chjätä ëte go̧düdärärëreji̧ri̧dirȩ Canaa̧ quȩmȩ chiriräpȩ. 6Ado Canaa̧ quȩmȩ chiri oa dae jäji̧ri̧rȩ go̧düdärärëreji̧ri̧dirȩ Chiquema quȩmȩ bë ma̧ri̧räpȩ. Ju̧ri̧pȩ to boi̧dërë cjiamȩräpȩ ju̧ri̧, More quȩmȩräpȩ ju̧ri̧ go̧düdärärëreji̧ri̧dirȩ. Ado pio jiro japamitërä Canaa̧räpȩ cjo̧ro̧ji̧ri̧ judiro̧ pio jiro chiri nö̧ta oa cjo̧ro̧ marëreji̧ri̧diro̧jo̧ȩ.
7Ado ja̧dëa ji̧ Jeova judi na̧rȩmȩrȩ ma̧ȩ yürürëremȩdejȩ Abara̧ ju̧i̧, ja̧di ta̧rëri̧ yo̧mȩrȩ:
—Danȩ, pio yoa chiri oa yürüparequedejȩrȩ na̧ea̧ri ja̧ji̧ri̧ pio ji̧ri̧ —yo̧mȩrȩ ma̧ȩ yürürëremȩdejȩ Abara̧ ju̧i̧.
Ja̧dëa̧ ji̧ pio ju̧i̧ ta̧rë ëte, Abara̧ judi japeno̧rëremȩdejȩ gu̧na̧rea̧ mechja oa goe gu̧rori̧ cäë yürüpea̧ oa. ‘Jabechji̧ pio coa na̧rȩa̧mȩ pio ju̧i̧ yürütäremȩcuni̧da’ quëna̧ jo̧rȩtamȩrȩ jëdano̧rëremȩdejȩ chjadëri̧ yürüpea̧ oa. 8Ja̧dëa ji̧ ji̧dë duri oa Abara̧ judi Chiquemȩ bë ma̧ri̧ri pio judiri go̧dürërea̧ ji̧, jabechji̧ ado cja̧rȩmo̧ chiriräpȩmo̧ baärëremȩde, ya̧mi̧rȩ cjiamȩräpȩmo̧. Aja̧, Bete quȩmȩ bë ma̧ri̧ pio judiri dorë biramȩräpȩmo̧ a̧rȩmȩ chiriräpȩ, Ai quȩmȩ bë ma̧ri̧ri pio judiri dorë cjitëmȩräpȩmo̧ a̧rȩmȩ chiriräpȩ baärëremȩde. Ado ju̧ri̧pȩ cjo̧ro̧rea̧ bë bori̧ maea oa japaji̧ri̧rȩ cjo̧ro̧ji̧ri̧pea̧dirȩ japamitë boi̧chji̧. Ado ju̧ri̧pȩ ado cja̧rȩmo̧ gu̧na̧rea̧ mechja oa cji̧deno̧rëremȩde Jeova ja̧ oa, Jeova pio ju̧i̧iäpȩmo̧ chjacjiamȩri̧ jo̧rȩtapea̧ oa. 9Ado ja̧dëa ji̧ Abara̧ judi ji̧dë u̧i̧ jachi oa baärëremȩde Negebo quȩmȩ chiriräpȩmo̧. Jaerira̧ jämȩrȩ baärëremȩde.
Abara̧ judi baärëremȩde Ejitoräpȩ
10Ado pio jiro japamitërä jurarea̧ decjiape bagarëremȩde pio jiro chirirä. Pumȩ judiro̧ jurarea̧ dadëa̧dirȩ. Ja̧di tara Abara̧ judi go̧dürëremȩde Ejitoräpȩ jäpea̧ oa, jurarea̧ dapea̧ oa. 11Ado Ejitoräpȩ jabë go̧düdärädëa̧rä, Abara̧ judi yo̧rëremȩdejȩ jibëa̧ iei̧ ji̧, Charai pio ji̧:
—Damȩ, ‘iei̧ chjacjiayi̧ tjamo̧ni̧da’ quëna̧ dabacama̧. 12Ado Ejitoräpȩ cjo̧ro̧ji̧ri̧ judiro̧ pio mȩa darä, 'Aja̧, pio oa ja̧ iei̧ni̧da, üi̧ pio ju̧i̧ gu̧na̧täreji̧ri̧a̧ro̧ju̧i̧da, jabechji̧ iei̧ chjacjiayi̧ pio ji̧ mitëpea̧ oa gu̧na̧täreji̧ri̧a̧ro̧ju̧i̧da' quëna̧ jo̧rȩtapai̧ dadiro̧. 13Ja̧di tara eami̧rȩ pio mȩaiä iëno̧ë ta̧rërä judi, "¿Chjia ja̧ iei̧mȩ?" iëno̧ë ta̧ra̧rä judi, jabechji̧ “Ju̧i̧ ja̧ iei̧dërequede, jabo pio ju̧i̧ ja̧ oyi̧requede” yo̧eyi̧mȩji̧ri̧. Aja̧, ja̧di ta̧rëri̧ yo̧eyi̧mȩji̧ri̧ coa ma̧i̧ dari̧ japachea oa —yo̧mȩrȩ yo̧rëremȩdejȩ Abara̧ judi jibëa̧ iei̧ pio ji̧.
14Ado Abara̧ judi jibëa̧ pumȩ pio ji̧ri̧ nö̧ta Ejitoräpȩ pea go̧düdärärërea̧ ji̧, dëdë, Ejitoräpȩ cjo̧ro̧ji̧ri̧ pio judiro̧ chjaodëri̧ darëreji̧ri̧diro̧jȩ Charai pio ji̧ jabëdë. 'Chjacjiayi̧ tjamo̧ni̧da' quëna̧ jo̧rȩtaji̧ri̧rȩ darëreji̧ri̧diro̧jȩ. 15Ado pjarao̧ ja̧ oa ja̧bepaji̧ri̧ pio judiro̧borë daea̧diro̧jȩ. Ado pio ji̧ chjiari ma̧ȩ yüreno̧a̧diro̧jo̧ȩ pjarao̧ pio ju̧i̧. "Chjacjiayi̧ tjamo̧nȩ" yo̧ji̧ri̧rȩ ma̧ȩ yürüa̧diro̧jo̧ȩ. Ado ja̧dëa ji̧ mitëa̧diro̧jȩ Charai pio ji̧. Ado ëba jäa̧diro̧jȩ pjarao̧ pio ju̧i̧iäpȩ. 16Ado Charai pio ji̧iä, jabechji̧ pjarao̧ judi cjäri̧ri̧ cjia darëremȩdejȩ Abara̧ ju̧i̧. 'Aja̧, Charai ja̧ omȩdida' quëna̧ jo̧rȩta̧ oaiä, jabechji̧ ji̧ra̧ri̧ yürürëremȩdejȩ. Baca oa, buro oa, cameyo oa, oveja oa yürüa̧dejȩ ji̧ra̧ tjamo̧ oa. Ado jibëa̧ pio ju̧i̧ ja̧bepe yürüpea̧ oa peaja̧di a̧de yürürëremȩdejȩ jibëa̧ mu̧i̧tjoi̧ ji̧ri̧. Oari mu̧i̧tjoi̧ ji̧ri̧, ivi mu̧i̧tjoi̧ pio ji̧ri̧bo yürürëremȩdejȩ. 17Jabo parao̧ judi Abara̧ ja̧ iei̧ pio ji̧ mitëa̧ tara, jabechji̧ Jeova judi a̧dë chjäte ma̧i̧ da gito oa chjadürëremȩdejȩ. Tjamo̧ davä. Judi Charai̧ pio ji̧ mitëa̧ tara, gito ana̧ tjamo̧ri̧ tara tänȩrëremȩdejȩ, jibëa̧ pumȩ pio ji̧ri̧bo. 18Ja̧dëa ji̧ pio jȩaiäpȩ jana̧tä yo̧ chjadüeno̧a̧dejȩ Abara̧ ju̧i̧. Ado ja̧dëa ji̧ to̧bari̧ iëno̧ë ta̧rëa̧dejȩ:
—Jabo cjäri̧ marenȩque, ¿tjana̧pea̧ ji̧ ma̧i̧ dari̧ japea̧renȩque? ¿Tjana̧pea̧ ji̧ chjadëri̧ yo̧dëa̧renȩque na̧ iei̧ pio ji̧ chjiari? 19"Ca̧ oyi̧nȩ" yo̧a̧renȩque. Ado pio mȩaiä ta̧rëa̧ oaiä, jabechji̧ ëbaparemȩrequedejȩ. Jabo cjäri̧ marequedejȩ, ëbarea̧mi̧dërequedejȩ na̧ iei̧ tara. Ja̧di tara jabechji̧ mitëvä. Ado pio yudiri baävä —yo̧mȩrȩ yo̧rëremȩdejȩ Abara̧ ju̧i̧ pjarao̧ judi.
20Ado pjarao̧ pio judi tänȩa̧ oa, jibëa̧ mu̧i̧tjoi̧ pio judiro̧ baä tänȩrëreji̧ri̧diro̧jo̧ȩ Abara̧ ju̧i̧ Ejito chiriri pio judiri. Aja̧, Abara̧ pio ju̧i̧, jibëa̧ pumȩ pio ji̧ri̧ baä tänȩrëreji̧ri̧diro̧jȩrȩ jibëa̧ cjo̧ro̧rea̧ bë oa chia baäji̧ri̧ oa. Aja̧, ja̧di dari̧ baärëremȩde Abara̧ judi Ejito quȩmȩ chiriri pio judiri.
Voafantina amin'izao fotoana izao:
Taruparea̧ Ma̧ȩ 12: Pume
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©2021 Global Partners, All Rights Reserved