MATEO 4
4
Jesuuquidiito wä’yunaacajo’jödö
1Yääje mma yaawä Jesuuquidiito cöntämä jata ’jemjönö aca, Epíiditu Santo nanontädö woije, töwä’yunaacajoodö wetä odo’sha wwä.
2Yäätä töwö cönä’jaacä aacä soto anooto, aacä soto coijaicho mmaja, ääwashinchä’da. Yää ’jeje ämiije cönä’jaacä. 3Yaawä chäwwadäädä cöneejä odo’sha, yuunaca; cönä’döaacä chäwwä:
—Wanaadi nnedö neeneje aweiya’jäcä, uuje amoode’näcä edä täju; que cönä’döaacä odo’sha.
4Jesuuquidiito cönä’döaacä:
—Yääje Wanaadi a’deddu imennaajä nä’döa: “Äwanshi che mma’da weiñä nai, Wanaadi a’deddu que mmajaane;” quee nä’döa imennaajä; que cönä’döaacä Jesuuquidiito.
5Yaawä odo’sha Jesuuquidiito cönaadäi Jeduusadén ña, yää aashichaato jata ña. Wanaadi weichojo judu de’wä cönnöi, cawä; 6cönä’döaacä chäwwä:
—Wanaadi nnedö neeneje aweiya’jäcä, adhaajanöncä eetonno, Wanaadi a’deddu imennaajä yääje yä’döaajä:
Töwö Wanaadi tamoodedö nanontaato adheedai’chännamooje.
Tönwanno adhaadäaato’de, täju de’cäi mma adheejucca’no; quee imennaajä wä’döaajä; quee cönä’döaacä odo’sha Jesuuquidiito wwä.
7Jesuuquidiito cönä’döaacä:
—Yääje mmaja Wanaadi a’deddu imennaajä nä’döa dea: “Adheedhajä Wanaadi mma monoonejai;” quee mmaja nä’döa dea Wanaadi a’deddu imennaajä; quee cönä’döaacä Jesuuquidiito.
8Yää ’jeje odo’sha cönaadäi chea jöö cawooto de’cäi. Chäwwä cöneenejoi tameedä edä nono de’wono jata, tameedä iiñataadö mmaja. 9Odo’sha cönä’döaacä Jesuuquidiito wwä:
—Tameedä mädä iiñataaje naadö äwwä u’jai wa wa’demeecödööje tä’mudhe äwä’döa’jäcä je’taca; quee.
10Yaawä Jesuuquidiito cönä’döaacä odo’sha wwä:
—Äjääne amäädä Caajuushawa. Yääje Wanaadi a’deddu imennaajä nä’döa: “Adheedhajä Wanaadi mmaane ya’deme’jai ma; chäwwä mmaane tödööjai ma;” quee nä’döa Wanaadi a’deddu imennaajä; quee cönä’döaacä Jesuuquidiito.
11Yääje mma yaawä odo’sha cöntämä Jesuuquidiito jonno. Wanaadi amoodedö cöneejoto yaawä Jesuuquidiito ’wa’tännamooje.
Jesuuquidiito waajäntä’jödö tötaadawaajui tödöödö
12Jesuuquidiito wwä eta’jäcä Juan jedeesoje yeichö, Caadideea ña cöntämä yaawä. 13Naasade ña ejaata’tä’da cöneiyacä, Cajeedamu ñaane. Yää jata cönä’jaacä chu’jä jawä, Saawudón nonoodö’jödö de’wä, Neutadí nonoodö’jödö jäcä amoinche’da. 14Yäätä Jesuuquidiito cöneejata’täi chaanönge Isaía nimennä’jödö wä’dödö wetä, ñäädä Wanaadi wa’deuwödö ecammanei. Edääje cömmennäi Isaía:
15Saawudón nonoodö’jödö de’woncomo, Neutadí nonoodö’jödö de’woncomo mmaja,
ñanno dama ’cwaca wötä tawoncomo, Joodadán mänsemjoncomo,
ñanno Caadideea ñancomo, judhíojöncomo jadoncomo,
16ñanno tööjano’taca cönä’ja’todö, tawaanato joojato neneeaato’de.
Ñanno töwä’ja’aamo jäcäiñe nawaana’de; quee Isaía cömmennäi.
17Yaawä Jesuuquidiito cönaajäntäi ecammajäätödö. Töwö töwä’döe cönä’jaacä:
—Ätö’tajäätödööcomo sha’duminchatääcä. Amoinche’da nä’döi eduuwa Wanaadi acaajichaanaichomooje yä’dötoojo; quee töwä’döe cönä’jaacä.
Na’cwacancomo i’yännamo a’dejja’jödö Jesuuquidiito wwä
18Caadideea cu’jäi jacääcä töötädaawä Jesuuquidiito cöneejodöicho aacä dhanwaacomo, ñanno dea. Simón täätö cönä’jaacä yui, ñäädä eetö dea Peedhodooje. Dhacoono cönä’jaacä Antedé. Jaji emaajätöödöje cönä’ja’to na’cwaca, na’cwacancomo i’yännamooje töweijäcäiñe. 19Yaawä Jesuuquidiito cönä’döaacä chäwwäiñe:
—Ma’chomo jaadä, soto owaanomannamooje männötäiye.
20Yaawä dea mma töjaajiyööcomo cöneetömaicho; Jesuuquidiito jadä cöntonto yaawä.
21Mänseedä’cä Jesuuquidiito wä’döa’jäcä, aacä dhanwaacomo mmaja cöneejodöicho dea, tacoono acä mmaja. Ñanno cönä’ja’to Jacoowo, Seewedheeo nnedö, Juan mmaja, Jacoowo acoono. Cudiiyada awä cönä’ja’to tumöötoncomo jadä, töjaajiyööcomo coneecadööje. Ñanno daja Jesuuquidiito cöna’dejjaicho dea. 22Yaawä dea mma tönwanno tucuudiyaadaichomo cöneetömaicho, tumöötoncomo mmaja, Jesuuquidiito jadä töötädööcomo wetä.
Jooja’como soto owaanoma’jocoomo
23Yaawä Jesuuquidiito cönäämannä’acä tameedä Caadideea chäcä, judhío we’jummato’como waadäi soto owaanomancädäiñe. Wanaadi töcaajichaanaije tödöödö jäcä töneecammajä’e cönä’jaacä. Töneejichö’tä cönä’ja’dea tameedä chäädäichöcoomo. 24Chääcadö cöneecatai yaawä tameedä Siidiya ña. Ñanno iiñancomo cädäija’como cönnejooto yöiña, chäwwä adoncajoodö wetä. Anejjejaiñene’jödöödä cönä’jaacä chäädäichöcoomo. Odo’sha ’jacomo cönnejooto dea, änönnä’ja’como mmaja, secumja’como mmaja. Jesuuquidiito cönaadoncaicho tameedäädä. 25Jooje soto Caadideea ñancomo cönäämannä’a’to chääjadä, Decaapodi ñancomo mmaja, Jeduusadén ñancomo mmaja, Judheea ñancomo mmaja, Joodadán mänsemjoncomo mmaja.
Voafantina amin'izao fotoana izao:
MATEO 4: MCH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2014 Reservados todos los derechos
