MATEO 10
10
Amoojadooto de’wä aaco’como anonta’como
1Yääje mma yaawä Jesuuquidiito cöna’dejjaicho tönoowanoomadö, ñanno amoojadooto de’wä aaco’como. Chäwwäiñe cuntui ijääduduucomo, odo’shancomo ija’canö’joto’como, tameedä cädäi ejiichö’totoojo mmaja, tameedä se’nato ejiichö’totoojo mmaja.
2Edä yää ñanno amoojadooto de’wä aaco’como anonta’como eetöcoomo: Awa’de Simón, Peedhodooje mmaja töwö chäätö; yää ’jeje dhacoono Antedé; yää ’jeje Jacoowo, ñäädä Seewedheeo nnedö; dhacoono Juan mmaja; 3Jediipe mmaja; Waadotoodomé mmaja; Tomá mmaja, Mateo mmaja, ñäädä acu’shänä jödaatai i’jummanei’jödö; Jacoowo mmaja, Aadeujeeo nnedö; Deweo mmaja, ñäädä Tadheo täätö mmaja; 4Simón mmaja, ñäädä jäduujato wa’deuwödö; Juudha Icaadiyoote mmaja, ñäädä Jesuuquidiito u’nei’jödö.
Ecammajä’e tönoowanoomadö anonto’jocoomo Jesuuquidiito wwä
5Ñanno amoojadooto de’wä aaco’como Jesuuquidiito cönaanontoicho; edääje töwö cönwätuujaicho:
—Judhíojöncomo jataacäiñe mma mötäätäi’che. Samaadiya ña mma mötäätäi’chede. 6Iisadaaediitacoomo döiñaiñeene ojoncomo. Tönwanno naato oweeja yännanö’a’como nönge. 7Edääje ecammajä’täcä’de: “Amoinche’da nä’döi eduuwa Wanaadi acaajichaanaichomooje yä’dötoojo;” quee caichäcä’de. 8Cädäija’como adoncatääcä’de, woi ’ja’como mmaja, äqueejö mmaja. Odo’sha ija’canö’jotääcä’dede. Täje’da mädä tödöötojo äwwäiñe nä’tua; täje’da mmaja u’täcä’de änwanno.
9“Oodo, jödaata mmaja, anejja yää nöngato mmaja, manaadätäi’che. 10Acanwaichomo mmaja manaadätäi’chede. Tooni mma owoomöcoomo anaadätääcä’de, aacä’da. Tösaajatuiche’da mma ojoncomo’de, adhe’sejiichomo tadä’da mmaja. Tadaawaaju tödöönei ätääwashinchä’da’da töweiye nai.
11“Jataaca äwä’döa’comjäcä aneedantätääcä’de soto aashichaato. Ñäädä mmai chaca eichäcä’de aneiñaja äätädööcomo wa’cä. 12Chä’saca owoomonga’comjäcä chaawoncomo a’dejjatääcä’de; “Aashicha awei’sheiñe ñaa na;” quee caichäcä’de. 13Yäätä soto aashichaato töweiye yeiya’jäcä, yää aashicha yeicho’como mecammaato’dedö chäwwä nä’tua’de. Aashicha’da yeiya’comjäcä mmaane äwwäiñeene nä’tua’de. 14Aashicha ayöödötäiñe’da yeiya’comjäcä, aneecammajäätödööcomo eta’se’da yeiya’comjäcä mmaja, yää maa tacanno ojoncomo’de, yää jataawonno jeiñe mma; ä’juduucomo she’secaadöje mma ñäntäcä’de. 15Chäänönge yääje wä’döa äwwäiñe, tönwanno imaaminchadööcomo jooje’cä na’de yaawä wätämmencajootojo anooto awä, Sodhooma ñancomo maminchadööcomo e’jodhe’cä, Comooda ñancomo maminchadööcomo e’jodhe’cä mmaja.
Yeetunu eneetojo
16“Öwö manaanontaato eduuwa. Änwanno maato’de oweeja mado antawäiñe eijai ñaatoodöje. Yääje yeijäcä odhoowadäädäiñe eichäcä’de, äcääyu töweiye naichöje, tääde’cwade’daane, jaduuma weichö nöngeene. 17Äädai’chätääcä’de soto jäcäiñe. Tönwanno ayu’ato’de äcamma’jonnamo wwäiñe. Töwe’jummato’como taca adhaiju’jä’ato’de. 18Cajiichaanacoomo wwadäädä jadä’jödöödä adhaadäaato’de, acu’shänä wwadäädä mmaja, sootoije aweichöcoomo jo’tädööje. Mädääje ya’deddu ecammajä’jai maato chäwwäiñe, Wanaadi dhowaanojöncomo wwäiñe mmaja. 19Yaawä äcamma’jonnamo wwä ayuutudaawäiñe, mätäncano’tätäi’che awa’deuto’como jäcä, äwwäiñe ecammajo’tojo jäcä jeiñe mma. Äwwäiñe eccujo’tojo cu’nädö aca yä’döa’jäcä Wanaadi nu’a’de awa’deuto’como. 20Änwannojöönööne adha’deuwato’de, Epíiditu Santoone na’deuwa’de äntaiñe, ñäädä Oomotoncomo dö’sennoto.
21“Yaawä töjimmotoncomo jadä’jödöödä soto nu’aato’de emaadö wetä. Yuumötoncomo tönnacontoncomo nu’aato’dede; mudeeshi mmaja tumöötoncomo nu’aato’de, senöötoncomo mmaja, yäämadö wetä. 22Tameedä soto aquiiñeme’cato’de sootoije aweichöcoomo jo’tädööje. Ñäädä yaatameedö jonaane shinchänei nääwanaaca’de. 23Anejja jataawä amaamincha’comjäcä, äänejeetäcä’de aneetaja. Chäänönge yääje wä’döa, tameedä iisadaaediitacoomo jataadöcoomo mämja’dä’tä’dadä Soto nnedö ne’a’de.
24“Towaanomaamö towaanomaanei e’jodhe’da töweiye nai. Dhanoonö tädhaajä e’jodhe’da töweiye nai chea. 25Ñäädä towaanomaamö towaanomaanei weichö nönge töwä’dödö mma ijummajai ñai, cho’jodheene’daane. Chäänönge mmaja dhanoonö, tädhaajä weichö jäcä daja. Ñanno soto Caajuushawaaje chäädhajootoncomo cöne’toicho; töwaacö’je mma shootoi cone’da e’täjai ñaato.
Wanaadi mma ñontäjai cöweichöcoomo
26“Yääje yeijäcä soto mma monnontätäi’che. Tameedä tacaademjönö töweecataamöje na. Tameedä etoone’taajä töwääcatu’nacaamöje na dea. 27Yää tööjano’taca äwwäiñe töneecammajä’e wääneneedö, ecammajä’täcä’de tawaanato aca. Yää tacaade’da aneeta’jocoomo, tätaane ecammajä’täcä’de tameedä soto e’sadööcomo waadäi. 28Aji’jä emaanei monnontätäi’che; odo’tadö emaajai’cha na töwö. Ñäädääne ñontäjai maato, odo’tadö jadä’jödöödä wa’to nwaca adheemajaichoone.
29“ ¿Täje’da jönca tunu’e weneeneto aacä tadiiñaamo’cä? Tooni jödaata’cä mmädä chääje’jödööcomo. Yääje yeichaame Oomotoncomo wwä tacaade’da ääma’da töweiye naicho tönwanno. 30Wanaadi dhowaanäcä tameedä aweichöcoomo, äju’jädööcomo jadä’jödöödä töme’cu’tä na chäwwä. 31Yääje yeijäcä tosaade’da eichäcä Änwanno tujunne maato Wanaadi wwä, jooje tadiiñaamo e’jodhe’cä.
Soto netaadöcoomoje Jesuuquidiito ecammajä’nnamo
32“Ñäädä soto netaadöcoomoje töjöiye’da yeecammajä’nei, öwö mmaja Jaaja wwä töjöiye’da wecamma’dede jaadonooje yeichö. 33Ñäädä soto netaadöcoomoje joome’dänei mmaane, öwö mmaja wijoome’da’dede Jaaja caju ñano wwä.
Jesuuquidiito jo’tädööje wä’tu’de’täjoonä
34“Edä nono de’wä täncanoode’da weiñä ene’e we’aatäi mma maneecanö’täi’che. Täncanoode’da weiñä ene’e’daane we’ne, wänä ajäntojoone. 35Öwö jo’tädööje anejja dhanwa tumö nichu’de’ta’de, anejja wodi senö nichu’de’ta’dede. Ijaadaana mmaja töwo’jödö acä nä’tu’de’taato’de. 36Mädääje na; töwä’jimmä’tädö jadä dea mma nä’tu’de’taato’de.
37“Ñäädä öwö jummadö e’jodhe’cä tumö, senö ijummanei, sootoije eijai’cha na. Ñäädä öwö jummadö e’jodhe’cä tönnedö ijummanei, sootoije eijai’cha mmaja. 38Ñäädä jaadä töweichö wetä öwö jääcäinchädä äntunaanö’jaichojöönö, cuduusa jäcä äämajaichojööno mmaja, sootoije eijai’cha na. 39Ñäädä töweichö ewontänei, töweichö nennanö’ca’de. Ñäädä öwö jääcäinchädä töweichö u’nei mmaane, töweichö neneea’de.
Wääjemaajonä
40“Ñäädä aashicha ayöödöneichomo, aashicha yöödöa dea. Ñäädä aashicha yöödönei, aashicha yaanontänei’jödö tödöödö wa’cä mmaja na dea yää. 41Ñäädä Wanaadi wa’deuwödö ecammanei aashicha tödöönei, Wanaadi anoonöje yeichö jäcäinchädä, Wanaadi wa’deuwödö ecammanei ejeemadö nönge dea nääjemaaja’de. Ñäädä soto aashichaato aashicha tödöönei, aashichaatoje yeichö jäcäinchädä, soto aashichaato ejeemadö nönge dea nääjemaaja’de. 42Ñäädä tooni sunuuji’chä mmädä mäccö mmädä wocöödö u’nei’jödö töweiye na’de chääje’jödö, öwö sootoije yeichö jäcäinchädä u’a’jäcä; quee cönä’döaacä Jesuuquidiito tönoowanoomadö wwäiñe.
Voafantina amin'izao fotoana izao:
MATEO 10: MCH
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 2014 Reservados todos los derechos
