MATIUS 1
1
Rekenang u iupung I Yesus Kristus
(Luk. 3:23-38)
1Ii e rekenang u iupungi Yesus Kristus, hintou ngi Daud, hintou ngi Abraham. Arengi iupung I Yesus nanita boi Abraham nutatuhu sarang nuratingi Daud musul᷊ungu kere i'i:
2-6aI Abraham
i Ishak,
i Yakub,
i Yehuda, dingang u manga ana u singkataunge,
i Peres dingang i Zerah (Mamangi sire rua arenge i Tamar),
i Hezron,
i Ram,
i Abinadab,
i Nahason,
i Salmon,
i Boas (Mamange i Rahab),
i Obed (Mamange I Rut),
i Isai,
dingang i Ratu Daud.
6b-11 #
2Raj. 24:14-15; 2Taw. 36:10; Yer. 27:20 Boi Daud sarang tempo ngu kawanua ngu Israel nirume sarang Babel, seng mawawohe apang areng mutatuhu musul᷊ungu kere i'i:
i Salomo (Mamange l᷊inau kawingi Uria),
i Rehabeam,
i Abia,
i Asa,
i Yosafat,
i Yoram,
i Uzia,
i Yotam,
i Ahas,
i Hizkia,
i Manasye,
i Amon,
i Yosia,
i Yekhonya dingang u manga ana u simbaue.
12-16Bou tempong Kawanua ngu Israel nirume sarang Babel, nurating u sasongong I Yesus, seng mawawohe apang areng mutatuhu musul᷊ungu kere i'i:
i Yekhonya,
i Sealtiel,
i Zerubabel,
i Abihud,
i Elyakim,
i Azur,
i Zadok,
i Akhim,
i Eliud,
i Eleazar,
i Matan,
i Yakub,
i Yusuf kawingi Maria.
I Maria e'e nahindingi Yesus ko nisigho si Kristus.
17Boko kere'e bo i Abraham sarang nuratingi Daud, kaul᷊ie pia mapul᷊opa su hawenge. Bo i Daud sarang nurating u tempong kawanua ngu Israel nirume sarang Babel pia mapul᷊opa suhawenge l᷊ai. Bou tempong kawanua ngu Israel nirume sarang Babel sarang nurating u sasongo ngi Kristus pia l᷊ai mapul᷊opa su hawenge.
Sasongo-Ngi Yesus Kristus
(Luk. 2:1-7)
18 #
Luk. 1:27
Kiri'i e wuke ngu sasongo ngi Yesus Kristus. I mamange i Maria, nutunangang dingang i Yusuf. Su tempo ngi sire rua mborong tangkeng nukawing, nikatitonang i Maria ko seng pia kal᷊uwaenge. (i Yusuf wugha ko kal᷊uwaengi Maria e'e ualingu kawasangu Rohku Mawu Ruata). 19I Yusuf tunangange e'e singkatau komatuhu su atorang u agama. Ual᷊ingu e'e i sie pia kaoe mu pakabusu u tunangange asal᷊e pakarumasi tadeau i Maria ta ipakamea su saruang u hape. 20Su tempo ngi Yusuf kaputimbangu hal᷊i e'e, i sie nipi. Su l᷊al᷊ung u ipinge e'e, i sie nakawua singkatau Malaekat u Mawu ko nudidato si sie, “Yusuf, hintou ngi Daud, kumbahang i kau mataku mukawing dingang i Maria, ual᷊ingu Ana su kal᷊uwaenge e'e, nariadi bou kawasa ngu Roh u Mawu Ruata. 21#Luk. 1:31I Maria sarung mahinding u singkatau ana koese. I kau mambeng pu sigho arengu ana e'e I Yesus. Ual᷊ingu i sie sarung mangambang umat-E bou dosa ngi sire.”
22Patiku e'e nariadi kere'e, tadeau apang ko niul᷊iu Mawu bou mohongu nabi-Nge makoa, e'e ko, 23#Yes. 7:14“Singkatau Mahua sarung pia kal᷊uwaenge dang sarung mahindingu singkatau Ana koese. Ana e'e sarung i sigho Imanuel.” (Imanuel bou didato ngu Ibrani mangalenge, “Mawu Ruata ene dingang i kite”.)
24Suapang i Yusuf nuwangung, i sie turusi nukoa apang ko niul᷊i u Malaekatu Mawu si sie. I sie nukawing dingang i Maria. 25#Luk. 2:21Su kal᷊iwuengi Maria mborong tangkeng nahindingu Ana e'e, i Yusuf mborong tangkeng nutatamba dingange. Suapang Ana e'e nipahinding, i Yusuf nusigho arenge I Yesus.
Voafantina amin'izao fotoana izao:
MATIUS 1: LAISXN
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
2014 Indonesian Bible Society (Lembaga Alkitab Indonesia)
