Matias 1

Yesus 'ai ete re dotumu manga loma-lomanga

(Luk. 3:23-38)

1Toma boku nena-ne, Yesus Kristus ga'a 'Olana Daud 'ai ju'uda re Abraham 'ai ju'uda ḏi'i, Unanga gena-ge 'Ai ete re dotumu manga loma-lomanga 'i silefo so'o ne:

2-6aAbraham: Isak 'ai ḇaḇa

Isak: Yakub 'ai ḇaḇa

Yakub: Yehuda re 'ai ioro re nongoḏu manga ḇaḇa,

Yehuda: Peres re 'a Zerah manga ḇaḇa re manga ngina ngo Tamar,

Peres: Hezron 'ai ḇaḇa,

Hezron: Ram 'ai ḇaḇa,

Ram: Aminadab 'ai ḇaḇa,

Aminadab: Nahason 'ai ḇaḇa,

Nahason: Salmon 'ai ḇaḇa,

Salmon: Boas 'ai ḇaḇa,

Boas: Obed 'ai ḇaḇa, Boas 'ai ngina ngo Rahab,

Obed: Isai 'ai ḇaḇa, Obed 'ai ngina ngo Rut,

re Isai: 'Olana Daud 'ai ḇaḇa.

6b-11Ra 'Olana Daud singadolo ngowa'a Israel sanga upa'a toma Babel, Yesus 'ai ete re dotumu manga loma-lomanga 'i silefo so'o ne:

'Olana Daud: Salomo 'ai ḇaḇa re Salomo 'ai ngina 'a Uria 'ai balo,

Salomo: Rehabeam 'ai ḇaḇa,

Rehabeam: Abia 'ai ḇaḇa,

Abia: Asa 'ai ḇaḇa,

Asa: Yosafat 'ai ḇaḇa,

Yosafat: Yoram 'ai ḇaḇa,

Yoram: Uzia 'ai ḇaḇa,

Uzia: Yotam 'ai ḇaḇa,

Yotam: Ahas 'ai ḇaḇa,

Ahas: Hizkia 'ai ḇaḇa,

Hizkia: Manasye 'ai ḇaḇa,

Manasye: Amon 'ai ḇaḇa,

Amon: Yosia 'ai ḇaḇa,

re Yosia: Yekhonya re 'ai ioro re nongoḏu manga ḇaḇa.#2'Oln. 24:14-15; 2Taw. 36:10; Yer. 27:20

12-16Wakutu ngowa'a Israel sanga upa'a toma Babel, singadolo ma 'orasa sibuoro Yesus Kristus, Unanga gena-ge 'Ai ete re dotumu manga loma-lomanga:

Yekhonya: Sealtiel 'ai ḇaḇa,

Sealtiel: Zerubabel 'ai ḇaḇa,

Zerubabel: Abihud 'ai ḇaḇa,

Abihud: Elyakin 'ai ḇaḇa,

Elyakin: Azor 'ai ḇaḇa

Azur: Zadok 'ai ḇaḇa

Zadok: Akhim 'ai ḇaḇa,

Akhim: Eliud 'ai ḇaḇa

Eliud: Eleazar 'ai ḇaḇa,

Eleazar: Matan 'ai ḇaḇa,

Matan: Yakub 'ai ḇaḇa,

re Yakub: Yusuf 'ai ḇaḇa, re unanga ngo Maria 'ami nau'u. Re ngo Maria gena-ge ga'a sibuoro 'a Yesus, ga'a si'aro'o 'O Kristus.

17Dadi ra Abraham singadolo ra 'Olana Daud, mo-moini nani nyagi moi re rata. Ra 'Olana Daud singadolo ngowa'a Israel sanga upa'a toma Babel, nani nyagi moi re rata ḏi'i. Toma wakutu ngowa'a Israel sanga upa'a toma Babel, singadolo sibuoro 'O Kristus, nani nyagi moi re rata.

Sibuoro 'a Yesus

(Luk. 2:1-7)

18Sibuoro 'a Yesus Kristus ma jarita so'o ne: Yesus 'ai ngina ga'a 'ami lomanga ngo Maria, munanga Yusuf 'ai ga-ganau. Mada'a wakutu ananga 'aḏi ma'u molo'ara nyangu, ngo Maria 'ami po'olo ri tegoro sababu Ma Ngagara 'Ofi-'Ofi ma kuasa.#Luk. 1:27 19Yusuf, ngo Maria 'ami ga-ganu, sababu unanga ngowa'a loasa re banari 'o mau 'a sito-tola'a ananga nga muḏiḏi, mada'a unanga mi simara'a Maria ua toma mandan. Dadi unanga 'o sitantukanga 'a'a so'o gena-ge 'a siogo-ogoro. 20Wakutu 'a Yusuf 'o matakasiri hali gena-ge, unanga 'o nanele. Tai nanele ma dara, unanga 'o oḏi'i Ma Jou'ongu Madutu 'ai mala'ekata matengo ga'a 'o kanau ra unanga ma betongo so'o ne: “Yusuf, 'Olana Daud 'ai ju'uda,#1:20 'Olana Daud 'ai ju'uda ma tero sa'olo: Daud 'ai Ngowa'a Nau'u. mojongo awa molo'ara ngo Maria, sababu 'ami la'ekata tami po'olo gena-ge ma dara 'i dadi mete'e Ma Ngagara 'Ofi-'Ofi ma kuasa. 21Maria ḏuanga i'a mo sibuoro ngowa nau'u matengo. Ngowa kiau gena-ge ngana balasu no silomanga 'a Yesus, sababu Unanga nena-ne ḏuanga i'a 'O sisalamata 'Ai ngowa-ngowa'a tamanga ḏosa.” #1:21 Yesus ma ngale: Ma Jou 'o sisalamata ngowa'a. #Luk. 1:31

22Mo-moini gena-ge 'i dadi so'o gena di'a sitotomo 'oru ga'a Ma Jou'ongu Madutu 'ai nabi-nabi raḏi kanau pasala ḏua so'o ne: 23“We-were'a matengo mo waro nau'u nyangu, ḏuanga i'a 'ami po'olo tegoro, re mo sibuoro ngowa nau'u matengo. Ngowa kiau gena-ge ḏuanga i'a silomanga Imanuel” — ga'a ma ngale: Ma Jou'ongu Madutu mamete'e ra ngene.#Yes. 7:14

24Wakutu 'a Yusuf 'o momi'i, unanga 'a si'a'a mete'e sa'olo mala'ekata 'o kanau ra unanga. Dadi unanga 'o molo'ara ngo Maria. 25Mada'a ngo Maria mo sibuoro 'ami ngowa nau'u gena-ge nyangu, 'a Yusuf so'o mi dongotu i'a ua.#1:25 toma demo Sahu ma siḏa so'o ne: “so'o mi lofo i'a ua.” Re wakutu munanga mo sibuoro ngowa nau'u gena-ge, Yusuf 'o silomanga Unanga Yesus.#Luk. 2:21

Voafantina amin'izao fotoana izao:

Matias 1: SNT

Asongadina

Hizara

Dika mitovy