Lir. 10
10
Lisaaye lie babaana ba Noa
(1 Ke Ch. 1.5-23)
1Lino lili lisaaye lie babaana ba Noa, Shemu, Hamu ne Chafwesa. Babaana bataru bano basaala babaana be sisoleeli enyuma we khukhwichula khwe kameechi khu sibala.
2Ba okhwa Chafwesa baba: Komeri ne Makoki ne Matai ne Yabani ne Tubali ne Mesheki ne Tirasi. 3Ba okhwa Komeri baaba: Ashikenasi, ne Rifati, ne Tokarima. 4Ba okhwa Yabani baba: Elisha, ne Tarishishi ne Kitimu ne Totanimu. 5Khukhwama khu bano chikholo che sia nyanja chamalatana. Bano bali be lisaaye lia Chafwesa mu bibala biabwe, buli sia mulala ne lulomo lwewe, khuloondekhana ne kimiliango kiabwe, mu kholo chabwe.
6Ba okhwa Hamu baba: Kushi, Misiri, Putu ne Kanaani. 7Ba okhwa Kushi baba: Seba, Habila, Sabata, Raama ne Sabuteka. Ba okhwa Raama baba: Sheba ne Dedani. 8Kushi asaala Nimuroti, niye owaba owe khunyoa khu liloba khuuba omundu owe kamaani. 9Aaba omuaayi owe kamaani ebweeni wa Wele Omunyali Owa Bioosi khulwe buyeeti bwa Wele, khwako kalomekha bali, “Nga Nimuroti omuaayi owe kamaani ebweeni wa Wele Omunyali Owa Bioosi.” 10Khurakikha khwe bubwami bwewe khwaba Babeli ne Ereki ne Akati, bioosi bie mu sibala sia Sinari. 11Aama mu sibala esio acha Ashuru mala ombakha lukoba lwa Ninefe, Rehoboti-iri, Kala, 12ne Reseni luli akari wa Ninefe ne Kala, olwo luli lukoba luboofu.
13Misiri aaba raraawe owa Lutimu, Anami, Lehabi, Nafutuhi, 14Paturusi, Kasiluhi. (Lisaaye lie Bafilisiti liama khu bano) ne Kafutorimu.
15Kanaani asaala Sidoni, omwana wewe omubele, ne Heti, 16lundi aaba kuuka owe Bayebusi, Baamori, Bakirikashi, 17Bahibi ne Baariki, Basini 18Baaribati, Basemari ne Bahamasi. Enyuma Bakanaani bakucha mala bamalatana. 19Lulwakha lwe Bakanaani lwarakikhila khukhwama Sidoni owa Kerari khukhwola Kasa lundi khukhwama ebweeni wa Sodomu, Komora, Atima ne Seboimu khukhwola Lasia. 20Bano boosi baba be lisaaye lia Hamu, khuloondekhana ne kimiliango kiabwe ne chinomo chabwe ne bibala biabwe, ne chikholo chabwe.
21Shemu yesi, wandaaye owa Chafwesa omukhulu, owaba kukaawe owe babaana Baeberi boosi, asaala babaana. 22Babaana ba Shemu baba Elamu, Ashuru, Arifakisati, Luti ne Aramu. 23Ba okhwa Aramu baba Usi, Huli, Keteri ne Masi. 24Arifakisati aaba raraawe owa Sela ne Sela aaba raraawe owa Eberi. 25Eberi aaba ne babaana babili, mulala bali Peleki, sikila mu ndaalo chewe babaandu be khu sibala baukhana, ne wandaaye aaba bali Yokitani. 26Yokitani aaba raraawe owa Alimotati, Shelefu, Hasari-mabeti, Yera, 27Hatoramu, Usali, Dikila, 28Obali, Abimaeli, Seba, 29Ofiri, Habila ne Yobabi. Bano boosi baba ba okhwa Yokitani. 30Sibala nisio bamenyangamo siama Mesha khukhwola Sefari, mu sibala sie sikulu sie bukwe. 31Lino lili lisaaye lia Shemu, khuloondekhana ne kimiliango kiabwe ne chinomo chabwe, ne bibala biabwe ne chikholo chabwe.
32Bano boosi bali be lisaaye lia Noa, khuloondekhana ne chikholo chabwe, mu bibala biabwe, ne khukhwama khu nibo, chikholo chasalanikha khu sibala enyuma we khukhwichula khwe kameechi.
Voafantina amin'izao fotoana izao:
Lir. 10: LUBUKUSU
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
©Bible Society of Kenya, 2019