Ubwandilo 19
19
Ubunịongafụ bwa bạndu ba mụ Sotomụ
1Po papo abāndumị babili bala balinkwakufịka nkāja ka Sotomụ namajolo; Lotị alị̄tūgēle pa kipata kya kāja ka Sotomụ. Lelo bo ababwene alinkusụmụka alinkwakubāmbilila, alinkwịnama nkyenị mmyabo. 2Alinkujoba nabo alinkuti: Mwe Batwa bāngu ngubasūma ukuti mụpāguke, mwịse kunyụ̄mba jāngu ne mụ̄ndu gwinụ ukuti ko mụgone, kangi mbapepo amīsi mụsụgụsụle mmalūndi; po mutemēlelege nulubūnju fị̄jo ukubūka injila jīnụ. Abēne balinkuti: Mma tukugona pānja pa mpūlo. 3Lolị Lotị alinkubapyelesya fị̄jo balinkwịngila nnyụ̄mba jāke. Umwene alinkubatendekekesya ifyakulya kangi nifịsyesye ifịsịta nkese balinkulya. 4Lelo bo bakāli nukulāmbalala, po papo abāndu ba kāja kala ka Sotomụ, abakeke na bakusị na bāndu bōsa ukufụma mụmbeto syosa balinkujisyungūtila innyumba. 5Balinkunkōlela Lotị, balinkuti: Bali kūgu abāndu aba bị̄ngilaga nnyụ̄mba jāko pakilo? Ubasōsye ukuti tubēgege baje bakasị bītu. 6Umwene Lotị alinkusōka ukwakwaganịla nabo, alinkwenda nu kwigalako kukifịgo kya nyuma nyuma alinkuti: 7Mwe bamyitu nikubasūma ukuti mụngabōmbaga īmbị̄bị bo sịsịsị. 8Kēta ndinabo abānāngu abalindwana babili aba bakammanyamo nu nnyāmbala; bo mbatwalilege umwe, ukuti mubōmbege nabo syosa isị mwịganịle loli abāndu aba bo mungababōmbelaga nasịmo. Namanga bị̄ngị̄le nkitēmbe kyangu. 9Abēne balinkuti: Twepukile tukīnde! Kangi balinkuti, umụ̄ndu uju alị̄sịle nkupona ịtolo mụno, jo kangi ipele gwa kutulōnga uswe. Lilino po tukuja pakukubōmbela ugwe īmbị̄bị fị̄jo ukukīndapo kuli isị tukusịlonda ukubōmba kuli aba. Balinkusegelela kumyake ukuti bankole nukuti bapāngule ulwịgị. 10Po papo abāndu bala balinkugolosya amaboko gābo nukunkwabila Lotị nnyụ̄mba mụmo bālịmo, balinkwịgalako kukifịgo. 11Balinkubapūpasya amāso abāndu bōsa bala bālị pakifịgo kya nyụmba abanāndi na bakulūmba, po papo abēne balinkusịta nukukyaga ikifịgo.
Lotị ịkusōkamo mụ Sotomụ
12Po papo abāndu bala balinkunndālūsya Lotị balinkuti: Bule uli nunkamụgo jumo ujūngi mụno? Abakōgo, abānāko abanyambala na bakị̄kulu, pamo bamo aba linga ulinabo ubasōsyemo mụno. 13Namanga tukuja pakukapyụta akāja aka papo īngụ̄to jāke jikindilile nkyenị mwa Kyala, po apa UNTWA atutumịle kukukapyụta. 14Po papo Lotị alinkusōka, alinkwakujoba na bāko aba bājaga pakubēga abānāke abalindwana, alinkuti: Sụmụka mụsōkemo mụno namanga UNTWA ịkuja pakukapyụta akāja aka. Lolị abēne balinkuti ịkusūnga sūnga ịtolo.
15Lelo bo kụkuja pa kukya popāpo abāndumị bala balinkunkūjisya Lotị balinkuti; sụmụ̄ka ummwegege unkasịgo na banāko abalindwana bo babīli aba bālịpo papapa, ukuti ungisakupyụtilịgwaga lumo nubutulanōngwa bwa kāja aka. 16Umwene bo ịkwịlabāsya, po papo abāndu bala, balinkunkola ikiboko jūjo na ju nkasị na banāke abalindwana bo babili bo mụmo UNTWA ālimpākị̄sye; balinkunsōsya balinkwakummbīka pabutalị na kāja kala. 17Lelo bo bansōsịsye balinkummbūla balinkuti, bopaga mụbuponesye ubūmị bwinụ, mungaketangako kūnyụma, kangi mụngīmaga napamo mụntebēla mụno, mụbopelege kufyamba ukuti mụpone ukupyụtịgwa. 18Umwene Lotị alinkubasūma alinkuti, mma, batwa bāngu. 19Kēta ne mmbōmbị gwinụ ndyagịle ilịpyana nkyenị mmyinụ, kangi mụnāngị̄sye ikisa ikikulūmba pakubupoka ubūmị bwangu; ngabagila ukubopa ukuti ngafịke kufyamba, mụmo ulupyụto lwịsakūnyāga mụ njila po nēnde nu kufwa. 20Amụkēte akāja kala kali pa bupị̄pị mo ndībopela ukuti mo ngaponele, kangi akēne kanāndi ịtolo; nātigi mo mbonele mụla mụla. 21Umwene alinkummwamụla alinkuti: Ngwịtikị̄sye syosa isị usūmịle, ndịkukapyụtaga akāja aka kukabala. 22Lelo ubopele kula kula nakalīnga, ngabagila ukubōmba isya kupyụta bo ukāli ukufịka. Buno buno akāja kala īngamụ jāke kalinkujobigwa ukuja jo Sohalị.
Ukupyụtịgwa Sotomụ na Gomola
23Lotị alinkwịngila mụ Sohalị bo ilịsuba lịkusōka. 24Po papo UNTWA alinkulagasya umōto ukufụma kumwanya, gulinkugwa nkāja ka mu Sotomụ na ka mụ Gomola. 25Alinkupyụta utwaja tula naguntebēla gōsa pamopēne na bābenekị̄su, na ifị fyalịmo fyosa. 26Lolị unkasị gwa Lotị alinkukētako kūnyụma, po papo alinkusanụka alinkwịpela kikōngotị kya mụ̄nyu. 27Umwene Abụlahamụ alinkutemēlela nulubūnju lwa kilābo kyake, alinkwakwima pa bujo bula ālyimịlepo bo ali nkyenị mụ NTWA. 28Alinkukēta ku kāja ka Sotomụ na kā Gomola kangi na nkị̄su kyosa ikya mụ ntebēla, alinkulibona ilyosị bo lịkufyuka ukufụma pakị̄su, lilinkufwana bo lisị lyosị lya nkigemo kya mōto. 29Bo silinkuja buno buno bo Kyala ịkutupyụta utwaja tula tula twa mụntebēla, Kyala ālinkumbwịke Abụlahamụ alinkunsōsyamo Lotị nndupyụto, bo ịkutupyụta utwaja tula mụno Lotị ājēngịle.
Ubufụmo bwa Bamwabu na bany'Amonị
30Umwene Lotị papo ātị̄laga ukujēnga nkāja kā Sohalị, alinkufyuka alinkwakujēnga mfyamba alinkwakwịtūgala mụ mbako pamopēne na banāke abalīndwana bo babīli bala. 31Po papo umwanāke unndindwana unkulūmba alinkujoba kunnāndi alinkuti: Tāta ikukāngala, kangi akajamo najumo unnyāmbala nkị̄su kyosa ugwa kutwega uswe ukuti tupāpege abāna bo mụmo ulwịho lwa pakị̄su lujīlị̄le. 32Oko, tunnwesye tāta ubwalwa bwa māfị̄lu ukuti tukagone nagwe ko kuti ulujụ̄ngụ lwitu mwa tāta lupone lūngāga. 33Po papo ikilo kīkyo balinkunnwesya ugwịsabo ubwalwa bwa māfị̄lu; unkulūmba alinkwịngila alinkwakwegana nu gwịse; umwene ugwịse jo alinkusị̄ta nukumanya akabalilo aka ị̄silaga nāka āsụmụkilaga.
34Ulwa kilābo kangi unkulūmba alinkujoba ku nnāndi alinkuti: Mmajolo une ngonịle nagwe tāta; oko tunnwesye kangi ubwalwa bwa māfị̄lu ikilo iki; nanụngwe ukagone nagwe. 35Kyope ni kilo kila kila balinkunnwesya ugwịsabo ubwalwa bwa māfị̄lu; po papo unnāndi alinkusụmụka alinkwakwegana nagwe; umwene ugwịse jo alinkusịta nukumanya isi syabonịke ikilo kila. 36Buno buno bo babīli abāna ba Lotị abalīndwana bo babīli balinkwịnoga ifịfụba ifị bāpēgị̄gwe nu gwịsabo. 37Unkulūmba alinkumpāpa umwana unndumyana, alinkumpa ingamụ ja Moabu; jujuju jo gwịse gwa banyaMwabu mpaka kulilino kuno. 38Jope unnāndi alinkumpāpa umwana unndumyana, alinkumpa ingamụ ja Benami; jo gwise gwa banya Amonị mpaka kulilino kuno.
Voafantina amin'izao fotoana izao:
Ubwandilo 19: NYB96
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
Nyakyusa Bible © Bible Society of Tanzania, 1996.