Mə́líʼkus 3

Yə́sus ayóómɛ mɔɔd a wɔɔ́s ó kisúgiʼ kɛ́ Yúdɛn

(Maʼt 12.9-14; Lóʼk 6.6-11)

1Yə́sus əyíʼkíni kosɔd a yoog ɛ pɛɔ́sɔ́gɔ́lɔ́n. Mɔɔd nyummú ayɛ́ɛ kɔ a yoog ɛ pɛɔ́sɔ́gɔ́lɔ́n yɛ́ɛy, na ombɔg úmmuʼ uʼkuə́n. 2Pafalɛsɛyɛ́ɛŋ páyɛ́modámɛn əngis agodála nga aagoómɛ mɔɔd nyóon naánɛ́ yɛ́ɛy, wɔɔ́s ó kisúgiʼ ná pɔ́ɔŋ ɛgom ɛ́gomosɔ́mɛn lɛ́ alɛ agɛɛlanɛ kɔbɛ́. 3Náa ɔnɔ́ na mɔɔd nyóon nyɔ́ ayɛ́ɛ abany ɛyɔgɛʼ: «Tɛ́ɛ́mɛn, wíim adɛ́lɛm áanɛ a udi ó mɔɔd ungim.» 4Mɔɔd aáság kiim adɛ́lɛm. Náa Yə́sus ɔnɔ́ na pɔɔd pá pə́yímubísin əngis: «Kɛ́lɛ a pɛcɛm piə́s lɛ́ nkə ə́? Kɛ́lɛ lɛ́ mɔɔd yɛ́ɛlɛ kɔŋɛʼ wɔɔ́s ó kisúgiʼ oóm, yɛ́ɛlɛ kɔbɛ́ ə́? Kɛ́lɛ lɛ́ yɔ́ɔyɛ mɔɔd wɔɔ́s wóow oóm, ámoyóon ə́?» Ɔmbɔ́ úmmuʼ ədiʼkə́əgúbin unuʼ əgumuyúlisini kɛbán. 5Na ilúún yɛ́ɛy, Yə́sus aáság kobodɛ́ʼtɛg log log log. Ɔʼtɛ́m wə́ə́ŋ óyɛ́ɛ ɔmbɛ́ na pɔ́lɛ́ lɛ́ yɛɛ́dála lɛ́ pálɛ na ntɛ́m yɛ́ nnasáŋ. Náa ɔnɔ́ na mɔɔd nyóon: «Tə́ə́míni ombɔg.» Əə́də́ə́míni, wándɛ kə́lə́ŋ. 6Pafalɛsɛyɛ́ɛŋ pá páyɛ́ɛ kɔ áay a yoog ɛ pɛɔ́sɔ́gɔ́lɔ́n pááság kolónan, pámɛ́ɛn aboan pɔɔd pá a ngim yɛ Ɛlóod ɔgɔɔ́dɔɔgɛ na pɔ́lɛ́. Pɛ́ɛ́gód unuʼ úmmuʼ a wɔnɔ́ ná páagɛɛlɛ ná póon Yə́sus.

Kiʼtúú kɛ́ pɔɔd kilúd kííyə́ən Yə́sus

(Maʼt 4.25; Maʼt 12.15-16; Lóʼk 6.17-19)

7Yə́sus ayɛ́ɛ́n na paaʼkan pə́ə́ŋ a ɛbá ɛ́ noom nó Kalilə́ə. Ɛ́fɔlɛ́ ɛ́ pɔɔd íyímuyə́ən kɔ. Pə́yíím pádɛ́ɛman lɛ́ póonɛ a Kalilə́ə, pə́mmú a Siudə́ə, 8pə́mmú a pálɛ́ɛg ɛ Yolósalɛm. Pɔsɔ́g pə́mmú pə́yíím pádɛ́ɛmɛn a kɛsaa kɛ́ nsí kɛ́ Idumə́ə, pə́mmú nsɛ́ɛ́ ɛ noom nó Siuludɛ́ɛŋ, na pɔsɔ́g tɛn pá pə́yíím pádɛ́ɛman a əʼkúu yɛ́ a kɛsaa kɛ́ nsí kɛ́ Tíil na a kɛ́ Sɛdɔ́ɔŋ. Páyɛ́ɛ kiʼtúú kilúd pá pə́yíímən kɔ áay lɛ́ páyóób nugəm nó nkə kiim kɛ́ Yə́sus ayɛ́ɛ agɛɛlɛ. 9Yə́sus yɛɛ́dɛánɛ na paaʼkan pə́ə́ŋ lɛ́ pámoóboŋɛnɛn kɛʼkɔ́m, nyɔ́lɛ́ ábág kɔ agɛɛlɛ lɛ́ kiʼtúú kɛ́ pɔɔd kɛ́ɛg kɛ́ kɛ́lɛɛ́ agaányɛŋ a nkó yəəŋ kɛ́dɛyɛ́modása. 10Kɛ́lɛ lɛ́, wɔnɔ́ ná ayɛ́ɛ agoómanɛ pabámbany piíŋ, ungim nyɔ́ ayɛ́ɛ abany, ayɛ́ɛ agaányɛŋ a nkó yəəŋ lɛ́ ná ámodɔ́bɛd əgín komodɔ́bɛ́dáán, yóom. 11Pɔsɔ́g pá məŋun má mabɛ́ máyɛ́ɛ na pɔ́lɛ́, páyɛ́ɛ pɛɛlanɛ lɛ́, ná páamoodála, pə́yiim əmudə́əŋənən a ambaan, páasása nɛŋo a mɔɛn pɔ́nɔ́: «Wɛ, olɛ Mɔɔ́n o Táán óo!» 12Náa, nyɔ́lɛ́ ayɛ́boyáágánan mbaŋ, ɔnɔ́: «Ná poándagɛɛnɛɛ́, podɛyɛ́ʼkwaaŋɛ.»

Yə́sus əyííyid a ondáŋ ó paaʼkan pə́ə́ŋ, nto yówád na ɛ́baan

(Maʼt 10.1-4; Lóʼk 6.12-16)

13Yə́sus yɛɛ́bág a oʼkon a mɔɛn, aáság kodɔ́ŋɔn ngab yɛ́ yɛɛ́nyɔ́ŋɛn. Pááság kiimən kɛnɔ kɛ́ ayɛ́ɛ. 14Páyɛ́ɛ nto yówád na ɛ́baan yɛ́ əyííyid. Ayɛ́boólóg ɔnɔ́ «pɔɔ́n pə́ə́ŋ pá maʼtom.»#3.14 A tufuuʼ túmmú tó píídílə na ɔmbɔg, tɔgɛ́ɛ́ tóonɛ lɛ́ «Ayɛ́boólóg póob ɔnɔ́ “pɔɔ́n pə́ə́ŋ maʼtom” » tódɛɔ́gɔ kɔ náan. Yiídə́nígi pɔsɔ́g póob lɛ́ pɛ́ɛn a ɛbá yə́ə́ŋ, áaboodom lɛ́ pɛ́ɛn alɔɛgɛ Tɔsɔm Tólaŋ. 15Ayɛ́boyɛ́ʼkɛn toɛn tó koŋɛŋ məŋun má mabɛ́. 16Táá əngiŋ á pɔɔ́n pá maʼtom págo pá pówád na pábaan aa yɛ́ɛnɛ lɛ́: Simɔ́ɔŋ nyɔ́ Yə́sus ayɛ́moólóg tɛn lɛ́ Píɛ, 17na pa Sɛ́ag pɔ́lɛ́ na móŋŋí Sɛ́aŋ, pɔɔ́n pá Səbədə́ə. (Yə́sus ayɛ́boólóg tɛn lɛ́: Poánɛ́ɛ́gɛs. Áay lɛ́, pɔɔd na toɛn tó mbambany), 18na Əndələ́ə, na Filíib, na Pəʼtələmíi, na Maʼtɛ́as, na Tómas, na Sɛ́ag tɛn nyummú, mɔɔ́n wo Əlifə́ə, na Tadə́ə, na Simɔ́ɔŋ tɛn nyummú, (ayɛ́ɛ ɔnnɔnaʼ pɛbán pɛ́ nigúu) 19na Siudáa Ɛsɛʼkalɛyóod, nyɔ́ yɛɛ́lɛ́g Yə́sus.

Yə́sus alɛ ondáŋ úmmuʼ na Pə́lə́səbul oóm

(Maʼt 12.24-32; Lóʼk 11.15-23; 12.10)

20A ngim yɛ́ɛy, Yə́sus aáság kɛɛn a noádɛʼ. Kɛnɔ kɛáság kiiʼkini kiim əyə́əg kɔ síɛ́ɛ́d. Kɛnɛŋ kɛ́ɛnɛ lɛ́ ánɛ́ɛnɛ na paaʼkan pə́ə́ŋ fiɛ́d. 21Ná yoog yəəŋ ɛ pɔɔd ɛyóób náan, pə́yíím pádɛ́ɛmɛn əgiim əmuúsiəd lɛ́ púúli na nyɔ́lɛ́. Páyɛ́ɛ agosɔyɔ pɔ́nɔ́: «Oʼto wə́ə́ŋ wáʼkolɛ́aŋ.»

22Palɛŋ pɛcɛm pá pə́yíím pádɛ́ɛmɛn a Yolósalɛm páyɛ́ɛ kɔ áay. Pɔ́lɛ́ páyɛ́ɛ agosɔyɔ pɔ́nɔ́: «Pə́lə́səbul, nkúm ɛ məŋun má mabɛ́ aa ɛlɛɛ́ na nyɔ́lɛ́.» Na lɛ́: «Nkúm ɛ məŋun má mabɛ́ aa ɛmoyɛ́ʼkɛ́nɛ́nɛ́ɛ́ toɛn tóod tó alɛɛ́ agoŋɛ́ŋŋaŋ məŋun má mabɛ́ na tólɛ́.» 23Ná Yə́sus ayóób náan, yiísə́ə́ lɛ́ píim. Əə́bə́ə́ kosɔyɔ na pɔ́lɛ́ a poʼkaʼtɛ́n a mɔɛn, ɔnɔ́: «Tuə́ aa Sáʼtan alɛɛ́ ugiiʼkini kaáŋɛŋ nyɔ́lɛ́nyɔ́amɔɛ́d ə́? 24Kɛnɛŋ kɛ́ pɔɔd pá nigúu nímuʼ páagaánɔɛyɛ pɛdá pɔ́lɛ́ na pɔ́lɛ́, nigúu nɛ́ɛn nɛ́dɛɔ́gɔ nɛ́gɛɛn yuudi? 25Yoom tɛn náan ímuʼ na yoog ɛ pɔɔd yɛ́ ɛlɛɛ́ na məʼtíiyiʼ na məʼtíiyiʼ. Yoog ɛ pɔɔd yɛ́ɛy tɛn ɛdɛɔ́gɔ ɛgɛɛn yuudi. 26Sáʼtan amaʼkɛɛn lɛ́ aagaánɔɛyɛ pɛdá nyɔ́lɛ́nyɔ́amɔɛ́d, oó lɛ́ ɔdɛɔ́gɔ unuʼ úmmuʼ na ngim yəəŋ, Nɛlaamɛʼ niə́ŋ nɛ́dɛɔ́gɔ nɛ́gɛɛn yuudi, níəwu. 27Mɔɔd na mɔɔd ɔdɛɔ́gɔ ogosɔd a yoog ɛ sɔ́g nyummú nyɔ́ alɛɛ́ na toɛn, áanyáŋɛna moom muə́ŋ agosan na mólɛ́ fiɛ́d koyaŋ amoósanya. Əgín aáʼkomoogóda, áay aa aányáŋɛna muim mó mólɛɛ́ a noádɛʼ nó mɔɔd o toɛn nyóon agosan na mólɛ́. 28A fɔ́lɔ́b ndabodɛ́anɛ lɛ́, Táán alɛ́ɛ́ kulisin pɔɔd mabɛ́ mɔ́ɔ́bɔn miim, na tofán tuim tó páamofánan. 29Náa, nyɔ́ alɛ́ɛ́ kosɔyɔɔ́ niiŋ nɛ́ Uŋun wó Ufúlúʼtú kɔbɛ́, nyóon, Táán adɛndɛ́ɛ́ kumuúlisin lɛ́ nsɔ́ɔ́ yɛ́ ɛlɛɛ́ a kɔbɛ́ kóog ɛlɛ́ɛ́ kɛɛn na nyɔ́lɛ́ a pɛnɛŋ piim.» 30Yə́sus ayɛ́ɛ əgusəə náan lɛ́ páyɛ́ɛ agosɔyɔ pɔ́nɔ́ nyóon alɛ na uŋun wó ɔmbɛ́.

Yə́sus yiílóódi pa ánɛ aa pálɛɛ́ fɔ́lɔ́b ŋŋí yəəŋ na pomóŋŋí pə́ə́ŋ

(Maʼt 12.46-50; Lóʼk 8.19-21)

31Na ŋŋí, na pomóŋŋí pá Yə́sus foáy kɛnɔ kɛ́ ayɛ́ɛ. Pádɛʼkɔ́ɔsɔd a yoog a kaadɛ. Pɛ́ɛ́lɔ́b a táán, páádóm mɔɔd lɛ́ ábodɔ́ŋɔnɔn Yə́sus. 32Pɔɔd páyɛ́ɛ kɔ a yoog piíŋ. Náa pɔ́nɔ́ na Yə́sus: «Táá ŋŋí yaaŋ na pomóŋŋí pááŋ áa póonɛ pálɛɛ́ a táán, pálɛ əguguyúunə.» 33Əyíbuyúlísíni ɔnɔ́ na pɔ́lɛ́: «Ánɛ aa alɛɛ́ ŋŋí waam əə́? Pa ánɛ aa pálɛɛ́ pomóŋŋí páam əə́?» 34Əə́bə́ə́ kodɛ́ʼtɛg ungim nyɔ́ ayɛ́moyágoʼkɛnɛn, náa ɔnɔ́ na pɔ́lɛ́: «Taa, ŋŋí waam aa nyóonɛ. Pomóŋŋí tɛn páam aa póonɛ.» 35Kɛ́lɛ lɛ́, nyɔ́ alɛɛ́ agɛɛlɛ nɛnyɔ́ŋɛn nɛ́ Táán, nyóon aa alɛɛ́ móŋŋí waam nyɔ́ ɔnɔ́mɛɛd, na móŋŋí waam nyɔ́ ɔʼkɛ́ɛd na ŋŋí waam.

Voafantina amin'izao fotoana izao:

Mə́líʼkus 3: yatDBL

Asongadina

Hizara

Dika mitovy