Mt 6

Ənû nɨ naʼ ɨghɨ əmbɨ ə bə̂d ŋgəʼ

1“Mbə̀ we əwən ni tɨ mbə̀ ghɨ ə ɨnû mbe nɨ kuʼnɨ ɨfě bə̂d, àmei ɨmbə̀ʼ mbɨ zə əwən. Mbə mɨ ghɨ əne, njɨ chəi ə Mbǎʼ we nɨ yeʼ ɨkaŋ bɨrɨ chɔʼ ə ə̀fàʼì.

2“Əne ənɨ àwɔ̀ ə nàʼ ɨghɨ əmbɨ wə̀d ŋgəʼ, tɨrə̀ fə e tàŋ ɨchî nɨ ɨbekɨ bə̂d ə ghɨ̀ ɨŋga nəb tɨ ə̀kàtɨ̀ bə̀ ghɨ̀ ɨtu ɨzib. Ɨ mbɨə ghɨ̀ əne ɨmbə̀ʼ bə̂d yiirɨ mɨ̀mə̌d. Mə ghà rəsìʼ ɨ nən ni mbɨ fə berɨ ə ɨchɔʼ ə̀fàʼì. 3Àyɨə ənɨ àwɔ̀ ə nàʼ ɨghɨ əmbɨ wə̀d ŋgəʼ, tɨrə̀ ben e ni əbɔ ə tweŋ ə kyerɨ əghɨ ze nɨ əbɔ ə jɨgɨ ə ghɨ̀ə̀, 4ɨmbə̀ʼ àmei àwɔ̀ bɨrɨ kyerɨ. À mɨ ghɨ̀ əne, e Mbǎʼ we nɨə zə ɨnû mbe nɨ àwɔ̀ ə ghɨ̀ ənə̀mə, bɨrɨ chɔʼ e ə̀fàʼì.

Ənû nɨ kɔŋgɨ ə Ŋwiə̀

(Lk 11.2-4)

5“Ənɨ mbə̀ə kɔ̀ŋgɨ̀ ə Ŋwiə̀, tɨ mbə̀ ghɨ ə ɨghabɨ ɨbekɨ bə̂d. Ɨ mbɨə ghaʼə nɨ təm ɨŋga nəb tɨ ə̀kàtɨ̀ bə̀ fɔrɨ ɨban ɨnə̂njɨ̀ bɔŋ kɔŋgɨ ə Ŋwiə̀. Ɨ mbɨə ghɨ̀ əne àmei ɨmbə̀ʼ bə̂d zə mɨ̀mə̌d. Mə ghà rəsìʼ ɨ nən ni mbɨ fə berɨ ə ɨchɔʼ ə̀fàʼì. 6Àyɨə ənɨ à kəb kɔŋgɨ ə Ŋwiə̀, nyɨ ɨŋga e ətu ə nəb, wùb ɨchû nəb, kɔ̀ŋgɨ̀ e Mbǎʼ we nɨ yeʼ ənə̀mə. Əne, e Mbǎʼ we nɨə zə ɨnû mbe nɨ àwɔ̀ ə ghɨ̀ ənə̀mə, bɨrɨ chɔʼ e ə̀fàʼì.

7“Ənɨ àwɔ̀ ə kɔ̀ŋgɨ̀ ə Ŋwiə̀, tɨrə̀ ghà əwe ɨnû nɔnɔʼ nɨ chəi ɨwe ɨŋga, ɨchî nɨ bə̂d mbe nɨ kaʼi mɨ̀Jû ə ghɨ̀ə̀. Ɨ mbɨə kɔndɨə ni mɨ̀ŋwìə̀ mɨ̀mə̌d bɨrɨ zu ə̀kɔ̀ŋgɨ̀ mɨ̀mə̌d ɨmbə̀ʼ ɨchî nɨ mbɨə ghà ɨnû nɔnɔʼ. 8Tɨ mbə̀ ghɨ̀ ə ɨghabɨ mɨ̀mə̌d, ɨmbə̀ʼ ɨghəm nɨ ə Mbǎʼ ə kyerɨ ɨghɨ mbe nɨ mbə̀ kwaŋɨ bɔŋ mbə̀ sɨə biirɨə. 9Mbə̀ kɔŋgɨ ə Ŋwiə̀ əni:

'A Mbǎʼ nɨ yeʼ ɨkaŋ,

ghɨ ni bə̂d wumnɨ e ɨkum.

10E ənû ɨfɔ̀n ə yeʼe,

bə̂d rɨ ɨgwɨ ə si ghɨ ɨnû mbe nɨ à kə̀bɨ

ɨchî nɨ mbe nɨ yeʼ ɨkaŋ ə ghɨ̀ə̀.

11Naʼ ɨghɨjɨg nɨ kuʼnɨ ɨ na rə̀chɔ̀ŋ.

12Waʼ mba ɨnû rɨbɔ̀ŋ,

ɨchî nɨ tɨ̀ fə waʼ ɨnû rɨbɔ̀ŋ bə̂d mbe nɨ gù ɨnû ɨ na.

13Tɨrə̀ ben e ni ənû ə mɔʼɔ numbɨ əwa,

àyɨə chɨ əwa rɨ ənɨ ɨnû rɨbɔ̀ŋ.' #6.13Ə zɨ ɨŋga ɨ̀ŋwàʼnɨ̀ mɔʼɔ ni, chɨ əwa rɨŋga rɨkyerɨ-ɨbɔ wə̀d rɨbɔ̀ŋ. #6.13Ə zɨ ɨŋga ɨ̀ŋwàʼnɨ̀ ənun mɔʼɔ ni, “Əne yɨ ɨmbə̀ʼ ɨghəm nɨ à yɨ àwɔ̀ berɨ ənû ɨfɔ̀n fɔrɨ ɨka bə̀ berɨ ɨwumnɨ koŋ. À yɨ əne.”

14“À mɨ waʼ ɨnû rɨbɔ̀ŋ bə̂d, e Mbǎʼ we nɨ yeʼ ɨkaŋ bɨrɨ bɨ waʼ mbe. 15À mɨ yeʼ nɨ chəi àwɔ̀ ə waʼ ɨnû rɨbɔ̀ŋ bə̂d, njɨ ka e Mbǎʼ bɨrɨ bɨ waʼ i mbe.

Ənû nɨ chub rɨ jɨg

16“Ənɨ mbə̀ chub rɨ jɨg, tɨ mbə̀ ghɨ ə ɨghabɨ ə bə̂d nɨə kə̀nə̀, ɨchî nɨ ɨbekɨ bə̂d ə ghɨ̀ə̀. Ɨ mbɨə ŋgɨ̀ndɨ̀ tə rɨfě ɨmbə̀ʼ bə̂d zə ni ɨ mbɨə chubə rɨ jɨg. Mə ghà rəsìʼ ɨ nən ni mbɨ fə berɨ ə ɨchɔʼ ə̀fàʼì. 17À yɨ ənɨ à chub rɨ jɨg, so e ɨfě bə̀ sɔ̀d e ətu, 18ɨmbə̀ʼ tɨ bə̂d zə ə ni à chub rɨ jɨg. Àmei e Mbǎʼ we nɨ chəi bə̂d ə zəə bɨrɨ zə. À mɨ ghɨ̀ əne, e Mbǎʼ we nɨə zə ɨnû mbe nɨ àwɔ̀ ə ghɨ̀ ənə̀mə bɨrɨ chɔʼ e ə̀fàʼì.

Mbə̀ nuŋ ə mbɔ̂n ɨkaŋ

(Lk 12.33-34)

19“Tɨ mbə̀ nuŋ əwən ə mbɔ̂n ɨgwɨ ə si, nɨ yeʼ əsɨ ze nɨ ɨsəʼɨ fɔrɨ chə̂b bɨrɨ chə̀kɨ̀ nɨ bə̀ yeʼ əsɨ nɨ mɨjɨ bɨrɨ tòʼ. 20Mbə̀ nuŋ ə mbɔ̂n yeʼ ɨkaŋ, nɨ yeʼ əsɨ nɨ ka ɨsəʼɨ kɨ̀ chə̂b bɨrɨ chəkɨ i, bə̀ yeʼ əsɨ nɨ ka mɨjɨ bɨrɨ toʼ ə. 21Əne yɨ ɨmbə̀ʼ ɨghəm nɨ əsɨ ze nɨ e mbɔ̂n yeʼ əŋgu, e fîŋ bɨrɨ bɨ yeʼ əŋgu.

Ɨghə yɨ ɨghabɨ ənam əmbɨ nyamnyod

(Lk 11.34-36)

22“Ɨghə yɨ ənam əmbɨ nyamnyod. Əne, e ɨghə mɨ yeʼ wɨ chɔ̀m, e nyamnyod jìm bɨrɨ zeŋ. 23Àyɨə e ɨghə mɨ yeʼ wɨ rɨ̀bɔ̀ŋ, e nyamnyod jìm bɨrɨ fin. Əne ɨzeŋɨ zeŋɨ we nɨ yeʼ ɨŋga ne mɨ bèŋ ənɨ ɨsɨ firɨ, njɨ ɨsɨ mbe bɨrɨ fin rɨ kììm!

Ənû ɨmbə̀ʼ ə Ŋwiə̀ fɔrɨ ɨnû ɨmbə̀ʼ mbɔ̂n

(Lk 16.13; 12.22-31)

24“Chəi wə̀d mɔʼɔ əŋgu nɨ tɨ̀ wɨ̀ fàʼ əmbɨ mɨ̀mbǎʼ ə̀fàʼì mɨbe, ɨmbə̀ʼ ɨghəm nɨ wɨ̀ bɨrɨ ban wɨ fìbɨ̀ ghaʼ wɨ fìbɨ̀, kɨ̀ wɨ̀ fàʼ əmbɨ wɨ fìbɨ̀ ənɨ i fîŋ jìm tə̀ə̀nɨ̀ wɨ fìbɨ̀. Chəi ənɨ tɨ̀ à fàʼ əmbɨ ə Ŋwiə̀ bə̀ faʼ nɨ berɨ mbɔ̂n əwu əwən.

Tɨ mbə̀ nwìʼ ə ɨnyod

25“Tɨ mbə̀ nwìʼ ə ɨnyod ɨmbə̀ʼ ə ɨ̀tènɨ̀, ni mbə̀ kɨə wo jɨg yè kɨ̀ ni mbə̀ kɨə wo nɔ yè. Tɨ mbə̀ bɨ nwiʼ ə ɨnyod ɨmbə̀ʼ ə nyamnyod, ni mbə̀ kɨə wo zɨ yè. Ɨ̀tènɨ̀ rɨ wa chè i ɨghɨjɨg ə? Nyamnyod rɨ wa chè i ngywɨ̌ ə? 26Mbə̀ neŋ rɨnən. Chəi tɨə kon ɨghɨ, chəi tɨə bə̀ kwə̀ŋ ɨghɨ chà ɨŋga ŋgə̌n. À yɨ ə Mbǎʼ we nɨ yeʼ ɨkaŋ ə jə mɨ̀mə̌d. Chəi mbə̀ wa che rɨnən ə? 27À kɨə we rəbɔʼ nən nɨə nwìʼ ɨnyod, nɨ tɨ̀ wɨ̀ yì ə awà fibɨ̀ ɨgun ɨni mbe nɨ wɨ̀ bɨrɨ chub ɨŋga ɨsɨg ə? 28Mbə̀ kɨə nwìʼ ə ɨnyod ɨmbə̀ʼ ngywɨ̌ ɨmbə̀ʼ ə yè ə? Mbə̀ neŋ ɨchî nɨ rɨ̀kwě ə kwiə. Chəi tɨə fàʼə̀, chəi tɨə bə̀ baʼə tə ngywɨ, 29àyɨə mə̀ ghà ɨ nən ni ka àbei ɨfɔ̂n Solomòn nɨ nyaʼə fɔ̀ɔ̀nɨ̀ ɨŋga mbɔ̂n, chəi wɨ̀ nyaʼa berɨ ngywɨ̌ nɨ bɔŋ ɨghabɨ ɨ̀kwě mɔʼ rəbɔʼ rɨ̀kwě tɔ̂. 30Ŋwìə̀ mɨ yeʼə zɨ̀ə̀ ngywɨ̌ ənɨ ɨfu nɨ yeʼ ɨkǎ rə̀chɔ̀ŋ, ɨsɔ mbɨ maʼ ɨŋga ɨwid, njɨ ka məd wa bɨrɨ zɨ i ngywɨ̌ ɨgwɨ nən chè ɨchî nɨ wɨ̀ zɨ ənɨ ɨfu ə? Ə ɨbenɨ ə kàŋ kə! 31Əne tɨ mbə̀ nwìʼ ə ɨnyod ghà ni, 'Tɨ̀ kɨə wo jɨg yè?' kɨ̀ ni, 'Tɨ̀ kɨə wo nɔ yè?' kɨ̀ ni, 'Tɨ̀ kɨə wo zɨ yè?' 32Bə̂d mbe nɨ kaʼi mɨ̀Jû mbɨə kə̀b ɨghɨ mbɔ̂ jìm. Ə Mbǎʼ rɨkaŋ ə bə̀ kyerɨ ni mbə kə̀b ɨghɨ mbɔ̂ jìm. 33Àyɨə mbə̀ be kə̀b yeʼ ənû ɨfɔ̀n əməd bə̀ ghɨ̀ ɨnû nɨ kuʼnɨ, əne wɨ̀ bɨrɨ bɨ naʼ ɨghɨ mbɔ̂ jìm ɨ nən.

34“Əne tɨ mbə̀ nwìʼ ə ɨnyod ɨmbə̀ʼ əni ɨsɔ, ɨmbə̀ʼ ɨghəm nɨ əni ɨsɔ ə berɨ mbi ɨnû. Ɨni jìm ə berɨ i ŋgəʼ.

Voafantina amin'izao fotoana izao:

Mt 6: mgo

Asongadina

Hizara

Dika mitovy