Genesis 18
18
Nasleman ni Sara i nagnegan ya nga inaat it AMPUꞌANG DIYUS nga manganak naga kanya
1Saꞌup siꞌ nga pakikita it AMPUꞌANG DIYUS it ki Abraham, duꞌun it pagbabalayan ngayti na Abraham nga duꞌut kakakayuwan ni Mamre, kaꞌsang magꞌaꞌdung si Abraham duꞌun it salakwatan it balay ya ngayting magkapuru-purun. Magpaderes-deres kanya ka masgay aldaw. 2Sakaling may nalawag ya nga tulung kalalakiyan nga mamagtitindeg. Pagkalawag ya, timnindeg kanya baw magpapalagyuy minlep duꞌun. Pagꞌabut ya, nanluud kanya it magtetꞌem i rupa.
3Maat ni Abraham, “Agalen ku, in mapakay it imyu, patuluy kamu daꞌan situt amen. Ayaw kamut taꞌlib. 4Situ kamu na daꞌan it siꞌrung it kayu ngaytu, magpaꞌna. Mamisiꞌ aku daꞌan it danum nga iꞌugas it aꞌay mi. 5Pasimpan aku beken it maski unu mana nga makaꞌen. Magayen ku parabir kamu mapanaw makakaꞌen kamut ikseg it ginawa. Ega naga yan makasasaw it amen. Masagya aku nga makapagsirbi it imyu.”
“Eeꞌ,” maat i tubag it tulu ngayti, “unuka ega mapakay?”
6Dimnali-daliꞌ si Abraham it semled duꞌut balay nira ngayti ka nagpasimpan it ki Sara it pangaꞌen. Maat ya, “Dali-daliꞌen mu, misiꞌ kat balit sang puluꞌ baw limang kilu i pirmirang arina ka buwaten mung tinapay.”
7Nanliꞌwan siꞌ si Abraham ka namiliꞌ duꞌut mga bakaꞌ ya it matabaꞌ nga maꞌuybun-uybun paꞌ ka ipiyakarniꞌ yat mga uripen ya baw ipiyaꞌilutuꞌ it dumaliꞌ. 8Pagkalutuꞌ it muꞌsa ngayti, minsiꞌ kanyat gatas. Tiyaban yay muꞌsa duꞌut siꞌrung it kayu ngayti. Tiyarakanan ya nay tulung kataawan ngayting miyabut. Pagꞌaꞌarigraen it magayen ni Abraham i mamagkaꞌen ngayti.
9Iyan magkaꞌen na sira, iningkut nira si Abraham, nga maat nira, “Ari asawa mu nga si Sara?”
“Aaꞌ,” maat ni Abraham, “duꞌun nagat seled it balay.”
10Maat it sang kataawan ngayti, “Pagtaꞌlib it sang taꞌun, siguradung paꞌuliꞌ aku naga yan situt imyu. Pagpaꞌuliꞌ ku, manganak nat lalaki i asawa mu nga si Sara.”
Itu palan, magpapagneg naga si Sara duꞌut linge-lingeb it salakwatan it balay. 11Lamang atkayti i inampang it sang kataawan ngayti, talagang gurang na na Abraham duwa magꞌasawa. Kamatuudan, ega na pagꞌabutun it adat it mga babay si Sara. 12Nakaslem si Sara nga nakagneg kayti. Kat nake-nakem ya nga, “Unuka aget pay atkayan it ungaytu, ubꞌub kami nang duwa?”
13“Abraham, unuka nasleman ni Sara baw atkayti i kat nakem ya nga magpakiꞌambut it inaat ku ngaytu, nga manganak naga kanya it maski gurang na?” maat it magꞌampang ngayti nga kanya i AMPUꞌANG DIYUS. 14“Unu, may maski unung bagay nga ega magkakayaan it AMPUꞌANG DIYUS? Kamatuudan talagaytu, pagtaꞌlib it sang taꞌun nga miyabut nay ipiyagtirminu ku nga timpu, paꞌuliꞌ aku naga situt imyu, baw manganak naga kanyat lalaki.”
15Egay beken miniꞌlam na si Sara, pagkagneg yat iting ampang, aypaꞌ ka piyayluwan ya na. Maat ya, “Daꞌku naga siminlem.”
Temed maat i magꞌampang ngayti, “Ayaw ka nat paylu! Talagang siminlem ka.”
May piyaꞌineꞌteꞌan ni Abraham it mingkut duꞌun it AMPUꞌANG DIYUS
16Iyan napanaw siꞌ i tulu ngayti nga kalalakiyan, ipiyagꞌuruꞌ sira ni Abraham. Kupanawan nirang ayun, duꞌut Sodoma. 17Iyan magpanaw na sira, miyampang i AMPUꞌANG DIYUS, nga maat ya, “Magayen ega itaguꞌ kut ki Abraham i kubwaten ku ngaytu. 18Sabap piniliꞌ ku kanya nga garingan it esang dakulaꞌ nga bangsa. Baw muꞌsang bangsat taw kat sinirungat langit, talagang begayan kut dakulang ildaw nga subuk manggaring situt kanya. 19Piniliꞌ ku kanya nga bilang magayeng iba-iba ku isaꞌun tulduꞌan yay kaꞌanakan ya nga sunudun nira i kaꞌirgan ku ngaytu baw mangaꞌgenan sira it mataldeng kat panleteg ku. Ka basta sunudun ga nira, tumanen kuy muꞌsang isiyanggup ku it ki Abraham ngaytu.”
20Bawnga inaat it AMPUꞌANG DIYUS si Abraham. Maat ya, “Yay matuud, masaki-sakit na nga pangabang it rugar nga Sodoma baw Gomorra, sabap itsubrang-subraꞌ nay karaꞌe-raꞌetan nga pagbuwaten it mga taw duꞌun. 21Kayti paꞌaduꞌun aku ka letganan ku i muꞌsa ngaytu, in unuy kamatuudan it magꞌabut ngaytu duꞌut aken.”#18:21 Egaytu ireg sugiden nga ega naꞌrutan it Ampuꞌang Diyus in matuud u daꞌga i itiꞌen ngayti. Siguru atkayting ampang ya ka subuk ipagpatantu yat ki Abraham nga mataldeng kanya mangukuman, nga ega kaꞌman mukuman it ega naga pagꞌuꞌrutan i muꞌsa pasar it kasalaꞌan nga betanganan yat ukuman.
22Magkatupus i iti nga ampang it AMPUꞌANG DIYUS, timneꞌyad kanya. Duwa ngayting kaꞌibaan ya, nandiritsu na. Ki Abraham, timneꞌyad na gasiꞌ. 23Nagpaꞌadeꞌdeng si Abraham baw miningkut. Maat ya, “Ta it atkayan i kubwaten mu, unu yan, in beteꞌ may mataldeng nagang mga taw duꞌun, unu, puuꞌun mu na nga uyut it mga mamagbuwat it karaꞌe-raꞌetan? 24In beteꞌ may limang puluꞌ nga kataawan nga mataldeng naga kat panleteg mu duꞌut Sodoma ngayti, unu ranggaꞌen mu nagay siyudad ngayan? Unu, ega na iribri mu i rugar ngayti kat kadakulat sanguꞌ mu it limang puluꞌ ngayti nga mataldeng? 25Siguru ega nagaytu mapakay nga imatayen muy mga mataldeng ngaytu nga ipaꞌuyut mu na it mga mamagbuwat it karaꞌe-raꞌetan. Ta daꞌga, in buwaten mu nay atkayan, ega nagay piyagbelagan it mga mataldeng baw ega? Sana alaid naga kat pikir muytu! Daꞌga baꞌ kataldengan lamang i ipapanaw it Manigꞌukuman it sang kinleban?”
26Timnubag i AMPUꞌANG DIYUS ngayti, maat ya, “In may maparagan ku duꞌut Sodoma nga limang puluꞌ nga kataawan nga mataldeng kat panleteg ku, kat kadakulat sanguꞌ kut kanira, ega naga ranggaꞌen kuy rugar ngayan.”
27Takaꞌ ega baꞌ magkatupusan si Abraham it ingkut. Maat ya siꞌ, “Tabing galang it imu, wayni kat sagpaw it ampupuru ku, pangaasen aku na nga mingkut it Ampuꞌang Diyus nga magbebegbeg it muꞌsa. 28Ta in beteꞌ ega maꞌustung limang puluꞌ ka kurang it lima i mataldeng ngaytu, unu puuꞌun mu naga i sang kabanwaan sabap kurang ngaytit lima?”
“Ega,” maat it AMPUꞌANG DIYUS. “In may maparagan ku duꞌun nga epat nga puluꞌ may limang kataawan nga mataldeng kat panleteg ku, ega naga ranggaꞌen ku.”
29“Ta in beteꞌ,” maat ni Abraham, “epat nga puluꞌ lamang i mga mataldeng duꞌun, unu gasiꞌ?”
“Ega,” maat it AMPUꞌANG DIYUS. “Kat kadakulat sanguꞌ kut epat nga puluꞌ ngayti, ega naga ranggaꞌen ku.”
30Sigi baꞌ nga paꞌineꞌteꞌ ni Abraham ngaytit mingkut, maat ya, “Beteꞌ daꞌku naga isgan it Agalen ku it kaꞌiꞌingkut ku ngaytu! Ta, in tulung puluꞌ lamang i maparagan nga mga mataldeng duꞌun. Magꞌuꞌunu gasiꞌ?”
“Ega,” maat it AMPUꞌANG DIYUS. “In may maparagan ku duꞌun nga tulung puluꞌ, ega naga ranggaꞌen ku.”
31“Daꞌga baꞌ,” maat ni Abraham, “talagang pangaasen aku baꞌ, Agalen ku, ka kuꞌingkut aku ga lamang! Ta in beteꞌ dumwang puluꞌ na lamang i maparagan duꞌun nga mga mataldeng, unu ranggaꞌen mu naga?”
“Ega,” maat it AMPUꞌANG DIYUS, “ega ranggaꞌen ku, kat kadakulat sanguꞌ kut duwang puluꞌ ngayti.”
32Pangiyaꞌpusang ingkut ni Abraham, “Ega naga beteꞌ isgan aku it Agalen ku ka mingkut aku pat kaꞌsa. Itu manay ingkut ku. Ta in beteꞌ sang puluꞌ manang kataawan i maparagan duꞌun nga mataldeng kat panleteg mu, magꞌuꞌunu gasiꞌ yan?”
“Ega,” maat it AMPUꞌANG DIYUS. “Ega naga ranggaꞌen ku ka sanguꞌan ku nagay sang puluꞌ ngayti.”
33Pagkatupus kayti it iting mga sugi-sugid nira, gimnaring nay AMPUꞌANG DIYUS. Ki Abraham, nagpaꞌuliꞌ na.
Voafantina amin'izao fotoana izao:
Genesis 18: TBWONT
Asongadina
Hizara
Dika mitovy
Tianao hovoatahiry amin'ireo fitaovana ampiasainao rehetra ve ireo nasongadina? Hisoratra na Hiditra
© 1992, Wycliffe Bible Translators, Inc. All rights reserved.