Màtéwò 7

Yèésù wà tsɛ̀kɔ́ ŋa fú ŋa ńǹrɔ́ǹrɔ́ ti nára-kíbí à kó gbé gbà fáà nóyè-Ɔ̀ɖáyé#ɛ́

(Lúkà 6:37-38,41-44,47-49; 11:9-13; 13:24-27)

1Máa kpɛdzɔ́ bá enìkéèdzì-ɛ̀ɛ, àtsùgbée Ɔ̀ɖáyé kó máa kpɛdzɔ́ bá ìwɔ gbo. 2Ó ɖi, ńǹrɔ́-kíbí ò kpɛdzɔ́ bá enìkéèdzì-ɛ̀ɛ gbà#á ní Ɔ̀ɖáyé nákó kpɛdzɔ́ bá ìwɔ gbo#ɛ́. Àwò-ìrɔ́ yèé nàa ń kpũ̀rã̀ã́ fúnɛ#ɛ́, nyɛ̀ŋɛ̀ ké ní nàa ń gbàá#á. 3Kí tse tsí ò wà rí kóko tsígíɖí-kã̀ yèé wà nódzú-enìkéèdzì-ɛ̀ɛ#ɛ́, tsí ò kò nyáa rí òkúùkù-egi lákṹ rìgìɖìì yèé wà nódzú-ɛ̀ɛ#ɛ́? 4Ɔ̀nà mɛ̀ɛ́ wà fɛ́ɛ, tsí ò wà fɔ̀ fú enìkéèdzì-ɛ̀ɛ ní: “Dzɔ̀ɔ́, tsí n nya kóko tsígíɖí-kã̀ nódzú fɛ́ɛ”, tsí òkúùkù lákṹ rìgìɖìì-kã̀ sì wà nódzú-ɛ̀ɛ#ɛ́ si ná? 5Rí ɔ̀nyà-atsendzɔdzú yèé gé! Nà tsɛ̃̀tsɛ̃̀ nya òkúùkù lákṹ rìgìɖìì yèé wà nódzú-ɛ̀ɛ#ɛ́ ǹɖe tã́ná, tsí o nyáa rírã, tsí nya kóko tsígíɖí yèé wà nódzú-enìkéèdzì-ɛ̀ɛ#ɛ́ gbo ńǹkɛ̀ɛ́.

6È máa wà kɛ́ iŋɛ́ yèé ŋa dzɛ́ ti Ɔ̀ɖáyé#ɛ́ fú adzá ŋa. Bí kò tsi bɛ́ɛ̀, à nákó nyí kã̀ ŋɛ́, tsí fà ŋɛ́ ya. Bɛ́ɛ̀ ké ní kò wà ní e kɛ́ iŋɛ́ yèé fɛ́ fú ŋɛ́ kíbí lɛ̀kɛ̀ bɛ́#ɛ́ fú ɔ̀hà ŋa#á. Bí kò tsi bɛ́ɛ̀, à nákó rɛ̃̀ ńǹtá‐ɛ̀ wáa lɔ gé ni.

7È bere Ɔ̀ɖáyé ńŋɛ́ yèé wà hã́ ŋɛ́#ɛ́, nákó fú ŋɛ́ ńnɛ̀. È wo iŋɛ́ yèé wà wù ŋɛ́#ɛ́ ńɖɔ̀‐ɛ̀, è nákó ríi. È kpɛ̀kũ̀ fúu, nákó tsíi fú ŋɛ́. 8Fee, ɛnɛ yèé wà bèrè#ɛ́ nákó gbà. Ɛnɛ yèé wà wò#ɛ́ nákó rí. Tsí Ɔ̀ɖáyé nákó tsí èkũ̀ fú ɛnɛ yèé wà kpɛ̀kũ̀#ɛ́. 9Nɛ̀ɛ́ wà náàŋírĩ-ŋɛ́, tsí bí ɔma‐ɛ̀ bèrèé ńkpɔ̃́nɔ́ ni nákó mú òkúta fúu? 10Nàmí bí ɔma‐ɛ̀ bèrèé nɛ́dzã ni nákó mú edzò† bɔwɔ́‐ɛ̀? 11Ɛ̀ŋɛ yèé dzɛ́ ɔ̀nyà-íbàɖí ŋa#á, è náa màá, tsí mú iŋɛ́-ire ŋa fú ɔma-ŋɛ́ ŋa. Máàbàtó Ɔ̀ɖáyé Boba-ŋɛ́ nɔ́ɔ̀rɔ̃! Bí ɔ̀nyà-kã̀ bèrèé ńŋɛ́-ire ŋa, nákó fúu ńnɛ̀.

12Báàyí#ɛ́, ńnɔ́-iŋɛ́ kpó yèé è wà tse#ɛ́, è náa wà tse fú enìkéèdzì-ŋɛ́ ŋa ńǹrɔ́-kíbí è wà wò ní enìkéèdzì-ŋɛ́ ŋa gbo ká tse fú ŋɛ́ gbà#á. Afɔ̀ kpó yèé wà nɛ́kpa-Mɔ̀ɔ́sè† òŋu nɛ́ɛ̀kɔ́-agbáfɔ̀-Ɔ̀ɖáyé fɔ̀† ŋa#á ńnɛ̀ɛ́.

13Èkũ̀-kã̀ wà, tsí arũ‐ɛ̀ kpamá. Bí è wà wo e gbà nɔ́ɔ̀nà yèé lɔ náàyɛ̀#ɛ́, è gbà bɛ̀. Ó ɖi, ɔ̀nà-kã̀ wà, tsí èkũ̀‐ɛ̀ tsédzú gbàgàlàà, tsí ɔ̀nà#á gbo kò le. Ó tsédzú rere, tsí ɔ̀nyà kpíkpɔ̀ ní wà gba nɔ́ɔ̀nà#á. Tsí ɔ̀nyà kpó yèé wà gbà bɛ̀#ɛ́, à làkóò nɛ́ɛ̀rá gé ni. 14Tsí ɔ̀nà òmírɛ̃̀-kã̀ gbo wà. Ɔ̀nà yèé bɛ́ òŋu#ɛ́, èkũ̀‐ɛ̀ kpamá, tsí ɔ̀nà#á gbo le tó bɛ́ɛ̀. Tsí ɔ̀nyà ìmarũ oɖé tsígíɖí-kã̀ gé ní wà gbà bɛ̀#ɛ́. Tsí ɛnɛ yèé ŋa wà gba nɔ́ɔ̀nà yèé#ɛ́, náàyɛ̀-òtítɔ́#ɛ́ ní à làkóò#ɛ́.

15È tsɔ́ éwo-ara-ŋɛ́ ŋa rere nára-atsìké-agbáfɔ̀-Ɔ̀ɖáyé fɔ̀ ŋa. À nákó wá náàŋírĩ-ŋɛ́ nɔ́ɔ̀nyà-olínɔ́ tútù ŋa kíbí àgùɖã̀ ŋa bɛ́. Ó ɖi nóòtítɔ́#ɛ́, òkóòkò ŋa ní à dzɛ́ si, tsí wà wo ká mú ŋɛ́ dzɛ#ɛ́. 16Bí è rí ìlò-ŋa òŋu afɔ̀-arũ-ŋa, è nákó ma ɔ̀nyà-ìrɔ́ yèé à dzɛ́#ɛ́. Ǹ ní fòò, à náa ká èso-egi-ekũkũ-aworo gbo ńǹtá-èkíkã́kòò? Nàmí à náa ká òrì gbo ńǹtá-sùyɛ̀? 17-18Ńbɛ̀ɛ́, bí egi-kã̀ dzɛ́ egi-ire si, náa so èso-ire gbo. Kà so èso yèé kò sã̀ ní ká dzɛ#ɛ́ láyé. Tsí bí egi-kã̀ gbo dzɛ́ egi-íbàɖí#ɛ́, èso yèé à kàkó nyáa dzɛ#ɛ́ gé ní náa wà so#ɛ́. Kàkó nyáa so èso-ire láyé. 19Egi kpó, bí kò wà so èso-ire#ɛ́, à náa rɛ́ɛ si ńná gé ni. 20Ńbɛ̀ɛ́, bí è rí ìlò-ŋa òŋu afɔ̀-arũ-ŋa, è nákó ma ɔ̀nyà-ìrɔ́ yèé à dzɛ́#ɛ́.

21Bí è wà wò ní Ɔ̀ɖáyé kó gbà ŋɛ́ si nóyè‐ɛ̀, tsí è wà kpè mí ní “Ɔlá-wa! Ɔlá-wa!” sɔ̃́ŋú gé#ɛ́, kò tó. Ó ɖi, ó wà ní e tse awù-Ɔ̀ɖáyé Boba-mi nɔ́ɔ̀rɔ̃ gbo. 22Nɔ́dzɔ́-ɛdzɔ́ kpíkpè#ɛ́, ɔ̀nyà kpíkpɔ̀ nákó wá ńɖɔ̀-mi, tsí wà fɔ̀ ní: Ɔlá-wa! Ɔlá-wa! Ɛ̀tsɛ-ɛ̀ɛ ní àa lò, tsí ń gba afɔ̀-Ɔ̀ɖáyé fɔ̀#ɛ́ nɔ̀! Ɛ̀tsɛ-ɛ̀ɛ ké ní àa lò, tsí ń lé edzò ŋa sɛ̃̀ náànyì-ɔ̀nyà ŋa#á nɔ̀! Tsí ɛ̀tsɛ-ɛ̀ɛ ké ní àa sì lò, tsí ń tse iŋɛ́-àwùsì kpíkpɔ̀ kpíkpɔ̀ ŋa gbo#ɛ́ nɔ̀! 23Tsí màa wí fú ŋa gãgã ní: Ǹ kò mà ŋɛ́ ti ńǹɖì-kã̀ wòrí! Kóyá! È sɔ́ ǹɖe ńɖɔ̀-mi bí! Ɛ̀ŋɛ òŋu, ɔ̀nyà-atseébàɖí ŋa ní è dzɛ́#ɛ́.

24Ńbɛ̀ɛ́, ɔ̀nyà ɔ̀kã̀lɔ́ɔ̀kã̀ kpó yèé wà gbɔ́ afɔ̀ yèé ŋa ǹ wà fɔ̀#ɛ́, tsí wà ń tsitsɛ́ tse#ɛ́, màa nyáa ń sàwé ɔ̀nyà-kã̀ fú ŋɛ́. Ó wà kíbí amùrã̀-kã̀ yèé bàkó malé, tsí ǹɖe lɔ káà maá si ńǹtá-òkúta, àtsùgbée ilé#ɛ́ kó lera gbógígbógí#ɛ́ ni. 25Tsí awu lákṹ-kã̀ tse gbà nɔ́ɔ̀gãgã-ilé#ɛ́, tsí òdzò rɔ̀, tsí ògbúŋ̀gbu tsã̀ gbùgbùgbù, tsí ilé#ɛ́ kò ɖíwó gìɖì, iŋɛ́ yèé tse#ɛ́, ó malé#ɛ́ si ńǹtá-òkúta ni. 26Tsí ɔ̀nyà ɔ̀kã̀lɔ́ɔ̀kã̀ kpó yèé wà gbɔ́ afɔ̀ yèé ŋa ǹ wà fɔ̀#ɛ́, tsí kò wà ń tsitsɛ́ tse#ɛ́, màa nyáa ń sàwé ɔ̀nyà-kã̀ fú ŋɛ́. Ó wà kíbí àɖàlɛ̀-kã̀ yèé bàkó malé, tsí ǹɖe lɔ káà maá si ńǹtá-ìnyarĩ̀#ɛ́ ni. 27Tsí awu lákṹ-kã̀ tse gbà nɔ́ɔ̀gãgã-ilé#ɛ́, tsí òdzò rɔ̀, tsí ògbúŋ̀gbu tsã̀ gbùgbùgbù, tsí ilé#ɛ́ ɖíwó ɖà ńlɛ̀ kpó. Iŋɛ́-kã̀ kpókpó kò bɔ̀ ńnɛ̀ ró.

28Ńbɛ̀ɛ́, oŋù-Yèésù dzilɛ̀ bɛ̀. Tsí kíbí ó wíìnyɛ̀ tã́#á, ɔ̀nyà kpó yèé wà bɛ̀#ɛ́, ɛ̀kɔ́‐ɛ̀ mù ŋá. 29Iŋɛ́ yèé tse#ɛ́, ɛ̀kɔ́‐ɛ̀ ŋa kò dzɔ ti akɔ́nɛ nɛ́kpa-Ɔ̀ɖáyé† ŋa. Ɛ̀kɔ́‐ɛ̀ nɛ́kpá.

Voafantina amin'izao fotoana izao:

Màtéwò 7: ngl

Asongadina

Hizara

Dika mitovy