Màtéwò 14

Bí Yòhánà Awɛ̀fúnɛ kú gbà fáà?

(Mákò 6:14-29; Lúkà 9:7-9)

1Ńǹwèrè nyɛ̀ŋɛ̀#ɛ́, Èróɖì† dzɛ́ ólú nérè-Gàlìlé si. Tsí ó gbɔ́ kíbí ɛ́kɔ-Yèésù wà fì tó gbà#á. 2Tsí ó wà wí fú àtsìtsɛ́‐ɛ̀ ŋa ní: Idza#á, Yòhánà† Awɛ̀fúnɛ ni. Ó sɛ̃̀ dzí ti náàŋírĩ-òkú ŋa wá náyé. Ńnɛ̀ ní ó nɛ́kpá, tsí wà tse iŋɛ́-àwùsì ŋa#á.

3Ìɖéǹɖè#ɛ́, Èróɖì ti fɔ̀, tsí à mú Yòhánà, tsí ɖèé, tsí kɛ́ɛ si nɛ́ɛ̀ŋà. Àtsùgbée kíbí Èróɖì gba aya-ìfó tòŋu ká‐ɛ̀ nɛ́#ɛ́ ni. Aya#á, aya-ìfó‐ɛ̀ ní ó dzɛ́ dzɔ̀ɔ́#ɛ́. Ìfó‐ɛ̀#ɛ́, à náa kpèé ní Fìlíkpò, tsí aya#á dzɛ́ Èròɖíyà. 4Ó mú Yòhánà si nɛ́ɛ̀ŋà#á, iŋɛ́ yèé tse#ɛ́, Yòhánà náa wà wí fúu ní: Ɔ̀nà kò wà fúu ní kó gba Èròɖíyà nɛ́.

5Ńbɛ̀ɛ́, Èróɖì wò ní òŋu má kpa Yòhánà nóòkú. Ó ɖi, ó wà rí ɔma-Ìyúɖà† ŋa sá, iŋɛ́ yèé tse#ɛ́, à kɛ́ si fú Yòhánà ní agbáfɔ̀-Ɔ̀ɖáyé fɔ̀† ní ó dzɛ́#ɛ́. 6Náànyì-bɛ́ɛ̀ ńǹkɛ̀ɛ́, ó wáa ɖi nɔ́dzɔ́-kã̀, tsí Èróɖì wà dzɛ ɔɖɔ̃́-ɔdzɔ́-bíbí‐ɛ̀, tsí ó kpe ɔ̀nyà ŋa ní ká wáa dzɛ ɔɖɔ̃́#ɛ́ bá òŋu. Tsí kíbí à wà nɔ́ɖɔ̃́#ɛ́ si#ɛ́, ɔma-Èròɖíyà ɔnɔbɛ̃̀ɛ̃ ǹɖe, tsí dzì nádzà, tsí dzó, tsí ó dzɔdzú-Èróɖì tó bɛ́ɛ̀ 7títí ó fɔ̀, tsí kpe iŋɛ́ si ńǹtá‐ɛ̀ ní iŋɛ́ ɔ̀kã̀lɔ́ɔ̀kã̀ kpó yèé ɔma#á nákó bèrè#ɛ́ òŋu nákó fúu ńnɛ̀. 8Ìnà-maɖé#ɛ́ kɔ́ɔ, tsí ó wà fɔ̀ fú ólú ní ká ɖéwo Yòhánà Awɛ̀fúnɛ si náàwò tɛ́rɛ́-kã̀ wá fú òŋu ńbíbɛ́. 9Kíbí ɔma èkíɖã#á fɔ̀ bɛ́ɛ̀#ɛ́, ó kpara fú ólú. Ó ɖi, ó tse àtsùgbée kíbí ó wíìnyɛ̀, tsí kpe iŋɛ́ si ńǹtá‐ɛ̀ nódzú-àledzò‐ɛ̀ ŋa#á, tsí ó fɔ̀ ní òŋu nákó fúu ńnɛ̀. 10Tsí ó bɛ̀ ɔ̀nyà, tsí à lɔ káà ɖéwo-Yòhánà nɛ́ɛ̀ŋà#á. 11Tsí à kɛ́ éwo#ɛ́ si náàwò tɛ́rɛ́-kã̀ wáa tó. Tsí à kɛ́ɛ, tsí ń fú ɔma èkíɖã#á, tsí òŋu gbo kɛ́ɛ lɔ fú ìná‐ɛ̀. 12Tsí ɔmatsɛ́-Yòhánà ŋa wáa lɔ káà kɛ́ àrágùɖé‐ɛ̀ lɔ káà rì, tsí à lɔ káà dzɛ́ fú Yèésù.

Yèésù sɛ̃ ɔ̀nyà ɛ̀gbɛ̀lɛ́ɛ̀gbɛ̀-kã̀ ńdzídzɛ

(Mákò 6:30-44; Lúkà 9:10-17; Yòhánà 6:1-14)

13Kíbí Yèésù gbɔ́ ikú-Yòhánà† Awɛ̀fúnɛ#ɛ́, ó yɔ́ hɔ́ɛ́ɛ́, tsí lɔ káà wɔ̀ nɔ́kɔ̃̀-odzómi-kã̀, tsí dzì nɔ́ɔ̀nà làkóò ńbí ɔ̀nyà-kã̀ kò wà#á. Ó ɖi, ɔ̀nyà ɛ̀gbɛ̀lɛ́ɛ̀gbɛ̀ yèé wà bɛ̀#ɛ́, à gbɔ́, tsí à tsɛ́ kì, tsí ti ńǹlú-ŋà ŋa, tsí ròó bá lɔ nɛ́sɛ̀. 14Kíbí Yèésù tì nɔ́kɔ̃̀-odzómi#ɛ́, ó rí ní ɔ̀nyà ŋa tsɛ́ kì, tsí wáa ɖà si, tsí inɔ́-ŋa nyɔ́ɔ kpíkpɔ̀, tsí ó bɔ àkɔ̃̀rɔ̃̀ ŋa náàŋírĩ-ŋa.

15Alɛ́lɛ́ lɛ́, tsí ɔmatsɛ́‐ɛ̀ ŋa sɔ́ tìmá‐ɛ̀, tsí wà fɔ̀ fúu ní: Ńbí àŋa wà si#ɛ́ kí taánù, tsí alɛ́lɛ́ gbo ti lɛ́ ná. Ó ɖi, kó fɔ̀ fú èrò#ɛ́, tsí ká lɔ ńǹtá-oko ŋa káà ra iŋɛ́-kã̀ dzɛ fú ara-ŋa.

16Tsí Yèésù fɔ̀ fú ŋa ní: Kò kpã́dzú ní ká lɔ. Ó ɖi, àŋa ká-ŋa ká fú ŋa ńdzídzɛ nɔ̀!

17Tsí à fɔ̀ fúu ní: Kpɔ̃́nɔ́ mɛ́ɛrú òŋu ɛdzã méèdzì gé ní wà fú àŋa bí#ɛ́.

18Tsí Yèésù ní: Ká kɛ́ ŋa fú òŋu. 19Tsí ó fɔ̀ fú ɔ̀nyà ŋa ní: Ká dzokó ńǹtá-kóko#ɛ́ lɔ.

Tsí ó kɛ́ kpɔ̃́nɔ́ mɛ́ɛrú#ɛ́ òŋu ɛdzã méèdzì#ɛ́, tsí kɛ́ odzú fú ìgbèrí, tsí wúùre fú Ɔ̀ɖáyé, tsí tsɛ́ kpɔ̃́nɔ́ ŋa#á, tsí ń bɔwɔ́-ɔmatsɛ́‐ɛ̀ ŋa. Tsí ɔmatsɛ́‐ɛ̀ ŋa ń kpɛ̃́ fú ɔ̀nyà ɛ̀gbɛ̀lɛ́ɛ̀gbɛ̀#ɛ́. 20Tsí àŋa kpó, à dzɛ, tsí yó títí ó bɔ̀. Tsí ɔmatsɛ́‐ɛ̀ ŋa se àbùbɔ̀ yèé bɔ̀ ŋa#á, tsí ń ɖà nágbã̀ máàméèdzì, tsí à kɔ̃́ kpó. 21Ɔnɔkɛ̃̀ɛ̃ yèé ŋa dzɛŋɛ́#ɛ́ lɔ kíbí ɔ̀nyà ɛgbɛ̀rú lé nɛ́gbàá ɛgbàá ɔ̀nà méèdzì (5.000) bɛ́ɛ̀. Ó ɖi, à kò kã ɔnɔbɛ̃̀ɛ̃ òŋu maɖé ŋa si ńnɛ̀.

Yèésù rɛ̃̀ ńǹtá-oɖò

(Mákò 6:45-52; Yòhánà 6:16-21)

22Ńbɛ̀ɛ́, Yèésù mú ɔmatsɛ́‐ɛ̀ ŋa ńkpá ní ká sɛ̃̀ dzì nɔ́kɔ̃̀-odzómi#ɛ́, tsí ká tsúwádzú-òŋu làkóò náàtàkè-ɔ̀nɔ̀ɔ́. Ńǹwèrè nyɛ̀ŋɛ̀#ɛ́, òŋu nákó fɔ̀, tsí ɔ̀nyà ɛ̀gbɛ̀lɛ́ɛ̀gbɛ̀#ɛ́ kó bɔ̀ lɔ. 23Tsí kíbí ó fɔ̀ fú ɔ̀nyà ŋa, tsí à lɔ tã́#á, òŋu níìkã̀ gu òkè-kã̀ lɔ, tsí káà wúùre. Ɔdzɔ́ kpa fúráfúrá, tsí ó wà bɛ̀ si òŋu níìkã̀. 24Náàsòkò nyɛ̀ŋɛ̀#ɛ́, ɔkɔ̃̀-odzómi#ɛ́ ti wà náàŋírĩ-oɖò#ɛ́ si làkóò, tsí awu wà tse kpàɖé‐ɛ̀, tsí omi gbo wà kpa ɖàbòó.

25Ó ɖi náàkìkɔ-àtsɛ̃̀tsɛ̃̀, tsí Yèésù rɛ̃̀ ńǹtá-oɖò#ɛ́ bàa ńɖi-ɔmatsɛ́‐ɛ̀ ŋa. 26Kíbí à ríi, tsí ó rɛ̃̀ ńǹtá-oɖò#ɛ́ bàa#á, ɛ̀ɖɔ̃̀ ɖá ŋa, tsí à ní odzú-àŋa rí ɔ̀rɔ̀, tsí dzidzi mú ŋa, tsí à wà ɖúgbe.

27Kò kpɛ̃́ gé#ɛ́, Yèésù tsí arũ, tsí wí fú ŋa ní: È gbódzú dzà ŋa! Èmi ni, ɛ̀ɖɔ̃̀ kó máa ɖá ŋɛ́!

28Tsí Òkúta gboŋù, tsí fɔ̀ fúu ní: Ɔ̀gá! Bí ó dzɛ́ ní ìwɔ ni bɛ́ɛ̀ ìɖéǹɖè ni fɔ̀, tsí n rɛ̃̀ ńǹtá-oɖò#ɛ́ wá ńɖɔ̀-ɛ̀ɛ.

29Tsí Yèésù fɔ̀ fúu ní: Kó wá. Tsí Òkúta tì nɔ́kɔ̃̀-odzómi#ɛ́, tsí rɛ̃̀ ńǹtá-oɖò#ɛ́, tsí làkóò ńɖi-Yèésù. 30Ó ɖi, kíbí ó rí awu#ɛ́ wà tse líle tó gbà#á, odzo tseé, tsí ó kpé múmù nómi, tsí igbe‐ɛ̀ gbà ní: Ɔ̀gá, gbà mí ɖé ooò!

31Gbòkã́ gé#ɛ́, Yèésù nawɔ́, tsí dzìí banɛ́, tsí wà fɔ̀ fúu ní: Àkaralé‐ɛ̀ kò wɔlɛ̀ nɛ́! Kí tse tsí ó dzèrèbe bɛ́ɛ̀ ná? 32Tsí kíbí à dzɔ́ wɔ̀ nɔ́kɔ̃̀-odzómi#ɛ́, awu#ɛ́ ɖóro. 33Tsí ɔmatsɛ́ yèé ŋa bɔ̀ nɔ́kɔ̃̀#ɛ́ kálɛ̀, tsí mú erí kãlɛ̀ fú Yèésù, tsí wà fɔ̀ fúu ní: Nóòtítɔ́#ɛ́, Ɔma bíbí-Ɔ̀ɖáyé ní ó dzɛ́#ɛ́.

Yèésù bɔ àkɔ̃̀rɔ̃̀ ŋa nérè-Gɛ̀nɛ̀sàrɛ́tì

(Mákò 6:53-56)

34Ńbɛ̀ɛ́, Yèésù òŋu ɔmatsɛ́‐ɛ̀ ŋa tu ɔkɔ̃̀#ɛ́ káà dzá náàtàkè-kã̀. À náa kpe ibɛ̀ ní Gɛ̀nɛ̀sàrɛ́tì. 35Tsí ɛnɛ-ìlú bɛ̀ ŋa rí Yèésù mà, tsí à fɔ̀ lɔ nérè-ibɛ̀ wérí kpó, tsí ɔ̀nyà ŋa gbɛ̃́ àkɔ̃̀rɔ̃̀ ŋa kpó wá fúu. 36Tsí à náa wà tsìkálɛ̀ fúu ní kó dzɛ́ gé, tsí àkɔ̃̀rɔ̃̀ ŋa#á kó mɔ́wɔ́ kã etí-ìwɔ̀ra‐ɛ̀. Tsí ɛnɛ yèé ŋa kpó mɔ́wɔ́ kã etí-ìwɔ̀ra‐ɛ̀#ɛ́ ɖi abarakpá.

Voafantina amin'izao fotoana izao:

Màtéwò 14: ngl

Asongadina

Hizara

Dika mitovy