Luk 3
3
Jon Umi Kuháng Yámámá yá Jesu yan kálu sariuk
(Mat 3.1-12; Mak 1.1-8; Jon 1.19-28)
1Sisa Taiberius yá Rom bán king hálengga yara 15 átuk wahára wu Pontius Pailat tá provins Judia yan kawana árán, Herot tá distrik Galili pinná tán kulaná Filip pá distrik Ituria yot Trakonitis pin yándi tán du Lisanias yá distrik Abilene pinná táuk. 2Kulá Anas káling Kaiafas yá ku pris yáin yáni ya átumálák, wahára ku Sekaraia nanggená Jon wawu ále komkomá ámálum re káin wa árán Ánutu yá áwáng málámbán me wa wakáin Jon inuk. 3Inán hangga kuk watá kungga Jodan umi tangtang káin áturáng wa yánuk, “Sándá pahán hurik tángga áwáng umi kuhát tu Ánutu yá mukmuro sáni wa yawonek.” 4Kálu wa tunggafiuk wawu profet Aisaia yá Ánutu yan me ing uyiuk wa isutang:
“Man dá ále komkomá páliná muná káin ing mantáinek,
‘Táwi yan kálu tiyawineráng,
kálu kándáng hánám táng toling mineráng.
5Ále pahálá átaráng wa erek ingmen molát tuwarát,
ále yáilá me ále kangkandángngá átaráng wa erek ingmen ping yanyawon táineráng.
Kálu tulátulá árená wa tát kándáng re hálet,
kálu wáik wa táng toktolik tát kándáng re hálineráng.
6Wáina hálendu ámna náráwa kámuk hánám watá Ánutu yá son ihinek wa hiták káineráng,’”#3.6 Aisaia 40.3-5 ingga wáina uyiuk.
7Kulá Jon dá ámna náráwa káwan táwi umi kuháng námik ingga áwuráng wa yánuk, “Sán kunap wáik nángánangge, Ánutu yá pahán káráp táng sámángga sáháng lem táinek. Niyá sánán pitángga kungga rám wáik sándán káin tunggafein ingga táek wa táng háhátiya táeráng? 8Sándá pálipuk pahán hurik hánám táeráng hálendu tirik tárák sáni watá meinek. Hang sáni ya mengga, ‘Nándu Abraham e ilommá,’ ingga ma meindaráng. No ing sánin, Ánutu yá sup ná átaráng háranan men álo Abraham e ilommá háleineráng. 9Káráwasi wu káráp hulá káin há átak. Káráp retá páliná kándáng ma sáindák wawu marángga táng káráp lánggop kinan san kuinek.”
10Wáina yánán ámna náráwa watá inuráng, “Iná nándu rina táinemán?”
11Wáina inát tu Jon dá yánuk, “Ámna káman dá siot ná yará pálak árán du káman táng ni siot ná muná wa iminek, hang niyá sunginá pálak hálendu wáinanyon táinek,” ingga yánuk.
12Hang takis iháhá ámna kámá hányon umi kuháng námik ingga áwuráng watá inuráng, “Tiksa, nándu rina táinemán?”
13Ing inát Jon dá yánuk, “Takis sup ihinán du kapman dá rina iháháya mená wáina re ihineráng,” ingga yánuk.
14Kulá tewe ámna yá hányon inuráng, “Iná nándu rina táinemán?”
Wáina inát watá yánuk, “Ámna nukngá iháng piták tángga sup yáni manek ma iháng yámindaráng, me kámá ya me kusák hára ma meng yámindaráng. Sup rina sáháng yunggoeráng wawu sáni wu tárák hára álo ingga narineráng,” ingga yánuk.
15Ámna náráwa yá ále wa tán kangga pahán yáni tárurán nanará yáup táuráng, “Jon wawu ámna Ánutu yan ámna náráwa son iháhá wa hám,” ingga miuráng. 16Iná Jon dá ku yánuk, “No ku umi yá kuháng sámet, iná káman máriya áwinek wata hálángngá wu nák neháng hátek, hang ámna wáik nák ina tá watán sendol páupmá yayaliyan tárák muná. Watá wu Iruk Káungá yot káráp lánggop pot kuháng sáminek. 17Málám sarak tángga áwinek ngáyá áwáng wit horengga páliná álosim wa iháng itná kinan tingga kepmá wawu iháng káráp sásáliná muná hára wa sin rang hálineráng.” 18Jon málám wáina yánángga me kámá yot me pingnga álosim watyot yánángga pahán yáni táng tárut táuk.
19Rám káman Jon málám kapman dán ámna yáilá káman Herot wa me táng muk, náuta kulaná ya áwáná Herodias táuk, me kálu kandák nukngá kámá hányon átmeráng wata ingga. 20Wata me táng mán du Herot tá kandákngá nukngá waháranyon sengsáráp tiuk wawu Jon táng kalabus it kinan tingga kálu káto táng muk.
Jon dá Jesu umi kuháng muk
(Mat 1.1-17; 3.13-17; Mak 1.9-11)
21Kulá Jon dá ámna náráwa kámuk hánám umi kuháng yámuk waháranyon du Jesu ya umi hányon kuháng muk. Wáina kuháng mán du Jesu málám sáponga tángga átnárán waháranyon alek ká ang tán, 22Iruk Káungá watá hang málám hára ep tángga árán káuráng wawu iráp tánarám ina. Kulá waháranyon me káman alek kálu wáina háuk, “Kák ku nák Nanggena. No kák ka kikiná hánám naret. No kák ka pahánna álosim hánám naret.”
23Rám wahára wu Jesu málám bu yaraná 30 hám wáina hálengga árán miti yáup hulátiuk. Kulá ámna náráwa yá ku Josep nanggená ingga káuráng,
iná Josep wawu Heli nanggená, 24iná Heli wawu Matat nanggená,
iná Matat wawu Liwai nanggená, iná Liwai wawu Melki nanggená,
iná Melki wawu Janai nanggená, iná Janai wawu Josep nanggená,
25iná Josep wawu Matatias nanggená, iná Matatias wawu Amos nanggená,
iná Amos wawu Nahum nanggená, iná Nahum wawu Esli nanggená,
iná Esli wawu Nagai nanggená, 26iná Nagai wawu Mat nanggená,
iná Mat wawu Matatias nanggená, iná Matatias wawu Semen nanggená,
iná Semen wawu Josek nanggená, iná Josek wawu Joda nanggená,
27iná Joda wawu Joanan nanggená, iná Joanan wawu Resa nanggená,
iná Resa wawu Serubabel nanggená, iná Serubabel wawu Sealtiel nanggená,
iná Sealtiel wawu Neri nanggená, 28iná Neri wawu Melki nanggená,
iná Melki wawu Adi nanggená, iná Adi wawu Kosam nanggená,
iná Kosam wawu Elmadam nanggená, iná Elmadam wawu Er nanggená,
29iná Er wawu Josua nanggená, iná Josua wawu Eliesa nanggená,
iná Eliesa wawu Jorim nanggená, iná Jorim wawu Matat nanggená,
iná Matat wawu Liwai nanggená, 30iná Liwai wawu Simion nanggená,
iná Simion wawu Juda nanggená, iná Juda wawu Josep nanggená,
iná Josep wawu Jonam nanggená, iná Jonam wawu Eliakim nanggená,
31iná Eliakim wawu Melea nanggená, iná Melea wawu Mena nanggená,
iná Mena wawu Matata nanggená, iná Matata wawu Natan nanggená,
iná Natan wawu Dewit nanggená, 32iná Dewit wawu Jesi nanggená,
iná Jesi wawu Obed nanggená, iná Obed wawu Boas nanggená,
iná Boas wawu Salmon nanggená, iná Salmon wawu Nason nanggená,
33iná Nason wawu Aminadap nanggená, iná Aminadap wawu Atmin nanggená,
iná Atmin wawu Arni nanggená, iná Arni wawu Hesron nanggená,
iná Hesron wawu Peres nanggená, iná Peres wawu Juda nanggená,
34iná Juda wawu Jekop nanggená, iná Jekop wawu Aisak nanggená,
iná Aisak wawu Abraham nanggená, iná Abraham wawu Tera nanggená,
iná Tera wawu Nahor nanggená, 35iná Nahor wawu Seruk nanggená,
iná Seruk wawu Reu nanggená, iná Reu wawu Pelak nanggená,
iná Pelak wawu Eber nanggená, iná Eber wawu Sela nanggená,
36iná Sela wawu Kainan nanggená, iná Kainan wawu Arpaksat nanggená,
iná Arpaksat wawu Siem nanggená, iná Siem wawu Noa nanggená,
iná Noa wawu Lamek nanggená, 37iná Lamek wawu Metusela nanggená,
iná Metusela wawu Enok nanggená, iná Enok wawu Jaret nanggená,
iná Jaret wawu Mahalalel nanggená, iná Mahalalel wawu Kenan nanggená,
38iná Kenan wawu Enos nanggená, iná Enos wawu Set nanggená,
iná Set wawu Adam nanggená, iná Adam wawu Ánutu nanggená.
Pašlaik izvēlēts:
Luk 3: klt
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2013, Wycliffe Bible Translators, Inc. All rights reserved.