Mateo 7
7
1Maxta quixoc ix caniꞌ kꞌetol tak tzij chiquij ja winak utzcꞌa chi ja Dios matukꞌet tzij chewij ixix chakajaꞌ. 2Queriꞌ nbij chewe como ja necoj chiquij ja winak chi nekꞌetbej tzij chiquij jariꞌ noc chewij ixix chakajaꞌ. Caniꞌ neban chique ja winak queriꞌ nuban ja Dios chewe ixix chakajaꞌ. 3¿Nak tre tok neyaꞌ cuenta tre jun ti ril nuban ja rewachꞌalal pro mateyaꞌ cuenta tre jun nimlaj ewil neban ixix? Ja tok neban queriꞌ jariꞌ caniꞌ neyaꞌ cuenta tre jun ti rcꞌutal cheꞌ ja cꞌo parwach ja rewachꞌalal pro mateyaꞌ cuenta tre jun nimlaj cheꞌ ja cꞌo panewach ixix. 4In chakajaꞌ nak moda nebij tre ja rewachꞌalal: —Wachꞌalal, tayaꞌaꞌ lugar chake chi nkayaꞌ jun consejo chawe tre ja il mac ja cꞌo pan acꞌaslemal, nixcheꞌ tre, pro más na nim ja il mac cꞌo pan ecꞌaslemal ixix. 5Ja queriꞌ xa cacaꞌ epalaj ja neban. Ja wi newajoꞌ neyaꞌ consejo tre ja rewachꞌalal rjawaxic nabey chi neyaꞌ can ja ritzelal ja cꞌo chipan ja recꞌaslemal ixix utzcꞌa chi nixcowini neyaꞌ utzlaj tak consejo tre ja rewachꞌalal.
6Ja xin Dios maxta teyaꞌ chiquewach winak ja xa e caniꞌ tzꞌiꞌ. Ja rtzobal Dios caniꞌ juleꞌ abaj ja congana nimak rjil maxta teyaꞌ chiquewach winak ja xa e caniꞌ ak, matzij xa tiqueban tre ni mta, ja queriꞌ caniꞌ nquepakꞌ chi cakan, matzij nebe chewij caniꞌ nqueban tzꞌiꞌ natquetiꞌ.
* * * * * * * * * *
7Tecꞌutuj tre ja Dios ja ncꞌatzin chewe in arjaꞌ nuyaꞌ chewe, tecanoj ja newajoꞌ in newil, tecꞌoncꞌoꞌoc ja chiꞌjay in nja̱k chewach. 8Queriꞌ nbij chewe como canojel ja necꞌutuni nyataj chique in ja necanoni nyataj chique chi nquewil in ja necꞌoncꞌonoc ja chiꞌjay nja̱k chiquewach. 9O ¿la cꞌol on jun tatixel chewe tok ncꞌutux jun caxlanway tre rmal jun ti rcꞌajol la nuyaꞌ jun abaj pa rukꞌaꞌ? 10Owi ncꞌutux jun chꞌuꞌ tre ¿la nuyaꞌ jun cumatz tre? 11Ixix masqui ix lawuloꞌ pro ewotak neyaꞌ utzlaj tak nakun chique ja rewalcꞌwal pro pior cꞌa ja Tatixel ewxin ja cꞌo chilaꞌ chicaj arjaꞌ nuyaꞌ utzlaj tak nakun chique ja necꞌutun tre.
12Queriꞌ cꞌa rbanic, xa nak ta neyarij chique winak chi nqueban chewe queriꞌ cꞌa tebanaꞌ ixix chique chakajaꞌ como queriꞌ nucꞌut chikawach ja rtzobal Dios ja tzꞌibtal can chipan ja ley in cumal ja profeta.
* * * * * * * * * *
13Cꞌo jun pa rchiꞌjay ja congana ti latzꞌ xarwariꞌ nixeryaꞌaꞌ chipan ja utzlaj cꞌaslemal ja mta qꞌuisic trij, jariꞌ pa rchiꞌjay chipan quixoc wiꞌ. Queriꞌ nbij chewe como cꞌo chi na jun ja pa rchiꞌjay congana nim in natruyaꞌ chipan jun bey congana nim rwach chakajaꞌ, ma cꞌayew ta natoc chipan xarwariꞌ nixeryaꞌaꞌ chijutij chipan ja nimlaj rpokonal, jariꞌ pa rchiꞌjay e qꞌuiy ja winak ja neꞌoc chipan. 14Queriꞌ nbij chewe como ja pa rchiꞌjay ja nixeryaꞌaꞌ chipan ja utzlaj cꞌaslemal jariꞌ congana ti latzꞌ in natruyaꞌ chipan jun bey congana cꞌayew in xa ma e qꞌuiy ta ja newilowi.
* * * * * * * * * *
15Tebanaꞌ cuenta ewiꞌ chiquewach ja winak ja profeta necheꞌxi, pro ma katzij ta chi e profeta. Ejeꞌeꞌ tok neꞌekaj ewqꞌuin nquikꞌalasaj quiꞌ chewach chi majun nak ta itzel nqueban chewe, e caniꞌ tak carnelo netzꞌati pro ja pa tak canma e caniꞌ utiwaꞌ ja maxcoꞌ chi camíc nqueban. 16Caniꞌ tre jun cheꞌ, rumac ja rwach nuyaꞌ triꞌ nawotakij wiꞌ nak chi cheꞌal in queriꞌ cꞌa chique winak chakajaꞌ, rumac ja natzꞌat pa tak quicꞌaslemal triꞌ nawotakij wiꞌ nak quibanic. Ta cꞌa ja qꞌuix mta moda xtiwachij ta uva nixtacꞌa rxulquiej xtiwachij ta higo. 17Queriꞌ cꞌa rbanic, nojel ja utzlaj tak cheꞌ utz rwach nuyaꞌ in nojel ja ritzel tak cheꞌ itzel rwach nuyaꞌ. 18Ja utzlaj cheꞌ mta moda xtuyaꞌ ta itzel rwach nixtacꞌa ja ritzel cheꞌ xtuyaꞌ ta rwach utz. 19Nojel ja cheꞌ ja ma utz ta rwach nuyaꞌ jariꞌ nchoyi in nporox pa kꞌakꞌ. 20Queriꞌ cꞌa quibanic ja winak, rumac ja natzꞌat pa tak quicꞌaslemal triꞌ nawotakij wiꞌ nak quibanic.
* * * * * * * * * *
21Ja winak ja nebin chwe: —Kajaw, Kajaw, necheꞌ chwe, ejeꞌeꞌ ma canojel ta nyataj chique chi neꞌoc chipan ja gobierno xin chilaꞌ chicaj pro ja nyataj chique chi neꞌoqui ejeꞌeꞌ riꞌ ja netajini nquinimaj ja Nataꞌ ja cꞌo chilaꞌ chicaj. 22Ja cꞌa tok xterilaꞌ ja nimlaj kꞌij xin juicio e qꞌuiy ja winak quewaꞌ xtiquibij chwe riꞌ: —Kajaw, Kajaw ¿la ma pan abiꞌ ta cꞌa kayaꞌ rbixic ja rtzobal Dios, la ma pan abiꞌ ta cꞌa xekawasajel demonio pa tak canma ja winak in la ma pan abiꞌ ta cꞌa chakajaꞌ kaban nimak tak milagro? xquecheꞌ na chwe. 23Ja cꞌa ranin quewaꞌ xtinbij chique riꞌ: —Anin ni ma xinwotakij ta wiꞌ ewach, quixel chinwach ix banol tak itzelal, nincheꞌ na chique.
* * * * * * * * * *
24Xa nak ta ja necꞌaxani ja nmajon rbixic in wi nquinimaj ja nbij chique chi nqueban, ejeꞌeꞌ quewaꞌ quibanic riꞌ, e junan ruqꞌuin jun achi congana rnaꞌoj, xuban jun rochoch in parwiꞌ abaj xtzꞌubaꞌ wiꞌ. 25Xumaj cꞌa jun nimlaj kꞌekaljab, qꞌuiyi ja rkan tak yaꞌ in jaktajto jun nimlaj ikꞌ. Ja jay lawuloꞌ ban tre rmal pro ma xbe ta pa tokꞌulew como parwiꞌ abaj tzꞌubul wiꞌ. 26In xa nak ta necꞌaxani ja nmajon rbixic in wi matiquinimaj ja nbij, ejeꞌeꞌ quewaꞌ quibanic riꞌ, e junan ruqꞌuin jun achi xa ma chꞌobolic achi ta, xuban jun rochoch in xa parwiꞌ snayiꞌ xtzꞌubaꞌ wiꞌ. 27Xumaj cꞌa jun nimlaj kꞌekaljab, qꞌuiyi ja rkan tak yaꞌ in jaktajto jun nimlaj ikꞌ. Ja jay lawuloꞌ ban tre rmal in be pa tokꞌulew, xajutij yojtaji ja jay. Queriꞌ xbij ja Jesús.
28Ja Jesús tok bitaj rmal nojelal ja tzij ja cꞌa winak kas cꞌascꞌoꞌi quicꞌaxaj ja tijonem nuyaꞌ. 29Queriꞌ queban ja winak como ja tijonem nuyaꞌ chique congana nerusil, bien kꞌalaj chi ruqꞌuin Dios penak wiꞌ ja nbij, ma junan ta ruqꞌuin ja tijonem ja nqueyaꞌ ja maestro ja netijon quixin ja winak tre ja ley xin Dios ja tzꞌibtal can rmal ja Moisés.
Pašlaik izvēlēts:
Mateo 7: tzjW
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2010, Wycliffe Bible Translators, Inc. All rights reserved.