Genesis 3
3
Dune nintaꞌutꞌih whutsꞌu nintꞌi
1ꞋEt tlꞌughus ꞌi lhelhdoh didoh-i Moodihti Yakꞌusda (Yahweh Elohim) ꞌuyinla-i unli ꞌinkꞌez tsꞌeke ꞌulhni, “Duchun yun kꞌut whuduchun ꞌaw tsꞌiyawh lhuzoohꞌal, ni eh?”
2ꞋEt tsꞌeke nyoon tlꞌughus ꞌuyulhni, “Nyoo duchun maiꞌ ha nuyeh-i, ꞌi tsꞌooꞌalh hubaꞌ hoontꞌoh, 3ꞌet hoontsꞌi ha nuyeh kꞌet whuduchun whuniz nadanꞌa-i, ꞌi Yakꞌusda (Elohim) ꞌutni, ‘Nyoo duchun maiꞌ ꞌaw lhuzoohꞌal, kꞌus ootꞌa oohnalh junih, khun si daoohtsah,’” ni.
4ꞋEt ndi tlꞌughus, tsꞌeke ꞌen ꞌuyulhni, “ꞋAlhaꞌ ꞌaw daoontsah ꞌaitꞌoh. 5Yakꞌusda (Elohim) tꞌeooninzun ndet dzin uhꞌalh-un, hoohꞌen tihleh ꞌinkꞌez Yakꞌusda (Elohim) bundutilhꞌelh, hoonzoo-un ꞌinkꞌez hoontsiꞌ-un cha tꞌewhuntahzin.”
6ꞋEt tsꞌeke duchun tsꞌuꞌalh huba unzoo, nulꞌen huba cha unzoo, duchun tsꞌuwhunih netilhtselh huba ookaꞌ whuninzun, oomaiꞌ yilhchoot ꞌinkꞌez yanꞌal, duki cha yuloh yutlꞌa nanꞌai ꞌinkꞌez ꞌen cha yanꞌal. 7ꞋEt nahultꞌoh duna be huhonꞌen suliꞌ, ꞌinkꞌez nahultꞌoh ꞌustꞌet ꞌuhintꞌoh tꞌehonanzin, mai “fig” huyulhni ꞌi ootꞌan lhunaꞌ hidunilhkaꞌ ꞌi be be kꞌeꞌuzdla ꞌuhududulhtsi.
8ꞋEt nawhudunikꞌaz whe Moodihti Yakꞌusda (Yahweh Elohim) ha nuyeh kꞌet ꞌoh nuya whe hiditsꞌo ꞌinkꞌez Adam duꞌat bulh ha nuyeh kꞌet duchun toh Moodihti Yakꞌusda (Yahweh Elohim) hichꞌa untilhꞌi. 9ꞋEt Moodihti Yakꞌusda (Yahweh Elohim) Adam ha hizya ꞌinkꞌez ꞌuyulhni, “Ntsꞌe ꞌintꞌoh”.
10ꞋEt ꞌutni, “Ha nuyeh kꞌez nyudastsꞌo ꞌinkꞌez whenuzjut, ꞌustꞌet ꞌustꞌoh ꞌet huwa untizꞌi.”
11ꞋInkꞌez ꞌuyulhni, “Mbe ꞌunyulhni ꞌustꞌet ꞌintꞌoh, duchun oomaiꞌ uhꞌalh junih nohdusni-i eh uhꞌal?”
12ꞋEt dune ꞌutni, “Tsꞌeke sgha nilhtꞌi-un duchun oomaiꞌ sgha ininꞌai ꞌinkꞌez ꞌi usꞌal.”
13ꞋInkꞌez Moodihti Yakꞌusda (Yahweh Elohim) tsꞌeke ꞌulhni, “Dahoontꞌoh-un dainja?” ꞋInkꞌez tsꞌeke ꞌutni, “Tlꞌughus nasunanꞌa ꞌinkꞌez usꞌal.”
14ꞋEt Moodihti Yakꞌusda (Yahweh Elohim) tlꞌughus ꞌulhni,
“ꞋEt ndinja huwa ꞌuyoo khuna-i anus nkꞌehida whe ꞌintꞌoh,
ꞌinkꞌez ꞌuyoo khuna-i chuntoh nulhꞌas-i anus,
mbut tlꞌah whe nukedutanzut,
ꞌinkꞌez lhez za tanꞌulh, yun ka tandalh nduwhulyiz whe.
15ꞋInkꞌez nyun ꞌinkꞌez tsꞌeke bulh lhazdatni nohtiselh,
ꞌinkꞌez nyuzkeh ꞌinkꞌez buzkeh.
Ntsi yayinduntaꞌus ꞌinkꞌez ookentsul duntalhdah.”
16ꞋEt tsꞌeke ꞌulhni,
“Ndzi unduda-un ꞌinkꞌez datantꞌelh-un ꞌonus ꞌuwhulcho whutiselh,
nyulh ꞌultsꞌulh whe nyuzkeh whutaleh,
nki ookaꞌ untanzilh ꞌinkꞌez nyumoodih tileh.”
17ꞋEt Adam ꞌulhni,
“Nꞌat oozalhtsꞌaiꞌ ꞌet huwa ꞌinkꞌez ndi duchun oomaiꞌ,
‘Onꞌalh junih,’ nyudusni,
inꞌal ꞌet huwa, nyun mba ndi yun ꞌi ookehida,
ꞌutꞌen be ootsꞌu huyukat-i tanꞌulh yun ka tandalh ndwhulyiz whe.
18Whus cho ꞌinkꞌez whusyaz bulh nankiltꞌoh ookꞌut mba ha ntiyeh,
ꞌinkꞌez yun ha nuyeh-i tanꞌulh.
19Nyunin tsꞌu halhdzilh whe ꞌutꞌalh-i onꞌalh,
yun natandleh whutsꞌun.
ꞋI ootsꞌu hainzut.
Lhez ꞌintꞌoh ꞌinkꞌez lhez ꞌi tsꞌun natandleh.”
20ꞋInkꞌez Adam duꞌat Eve be yoozi, khunane tsꞌiyawh buloo ꞌet huwa.
21ꞋInkꞌez Adam ooꞌat bulh Moodihti Yakꞌusda (Yahweh Elohim) ꞌen ndi zuz ꞌi buba ꞌuyinla hiye óokeꞌ ha. 22ꞋEt Moodihti Yakꞌusda (Yahweh Elohim) ꞌutni, “Nulhꞌen, dune Neundultꞌoh suliꞌ, hoonzoo-un ꞌinkꞌez hoontsiꞌ-un tꞌewhunozin ha. ꞋInkꞌez ꞌandit doo ka si dula be ndi duchun oomaiꞌ yolhchoot ꞌinkꞌez yooꞌalh ꞌinkꞌez ꞌilhiz whutinalh.” 23ꞋEt huwa Moodihti Yakꞌusda (Yahweh Elohim) njan ha nuyeh kꞌet, Eden, ꞌet tenabunilhꞌaꞌ, ꞌinkꞌez njan yun whutꞌas tileh ꞌi ootsꞌu ha itsꞌalhti ꞌet, ootꞌeꞌ ha. 24ꞋEt dune teininyoot ꞌinkꞌez Eden ndaz tsꞌe ꞌet lizasne, Cherubne hubulhni, ꞌet nebunilhti, ꞌinkꞌez saluzti kwun dunukw dotꞌen lhelhtsꞌun nadighus-i duchun oogha tsꞌukhuna-i yugholeꞌ ha.
Pašlaik izvēlēts:
Genesis 3: crx
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2019, Wycliffe Bible Translators, Inc. All rights reserved.