San Mateo 8
8
Lëë Jesús chuuñ kyak tu meñ xsyaknë
(Mr. 1:40‑45; Lc. 5:12‑16)
1Tsiñee lëë Jesús bikche kiy, ndaly meñ kunal xaa. 2Kok xtsedyak byety Jesús kiy tsiñee lëë tu xaa xsyaknë nii xyodz lady biid ksoxib lo xaa chëb:
—Xey, pe nëëdyoo beeñ kyak naa.
3Tsigo lëë Jesús pxob ña kik xaa chëb:
—Chakladzyaa nii kyakoo. Byak.
Aan wor go kazh lëë xaa nii xyodz lady ko byak. 4Per lëë Jesús chëb lo xaa:
—Ni tu cho lo këëbtyoo xa byakoo, sink byey aan kwey lo pxosy. Kuksakon nii xñabey xley Moisés parñee kan kchë meñ nii lëël byak.
Lëë Jesús chuuñ kyak xmos tu xaa nii xñabey lo soldad Roma
(Lc. 7:1‑10)
5Lëë Jesús kwsëëb lik leñ kyedzy Capernaum tsiñee lëë tu xaa nii xñabey lo tubtsoon soldad Roma kunee lo xaa 6chëb:
—Xey, lëë xmosaa xsyaknë. Lëë xaa nix chu yu, kutoo xaa ni mban xkyë xaa yoob.
7Lëë Jesús kwëb chëb:
—Naa kuuñ kyakaa xmoosoo.
8Tsigo lëë xaa xñabey go chëb:
—Xey, cho nakaa nii tsil lidzyaa. Destye nu pxaal tiits nii kyak xmosaa aan lëë xaa kyak. 9Porque deel naa, no xaa nii mastre xñabey lon, lëë naa lo soldad xñabeyaa. Tsiñee xalaa tu xaa mandad, chi xaa. Tsiñee xkwetsy kaan tu xaa, chiid xaa. Singo gak xmosaa tsiñee xñabeyaa nii kuuñtsyey xaa tu cos, chuuñtsyey xaaw.
10Axte psee Jesús biñ xaa nii kwnee xaa xñabey go, aan lëë xaa chëb lo meñ nii sinal:
—Nli gaa na karty kanaa tu meñ Israel nii kniladzy Dios tyub styoo sinak xniladzy xaa xñabey re. 11Ni lëën kñeli gaa lo do nii ndaly meñ nii nche tyub lo kislyu kawni pxusykoltoo no Abraham, Isaac ni Jacob tse nii lëë Dios kñabey. 12Per ndaly meñ nii wi xyal sob siko kwe lo nguey ley koon ni kaw lay.
13Loxsye ngo lëë Jesús chëb lo xaa nii xñabey lo soldad:
—Byey liidzyoo. Lëë nii bniladzyoo tyub styool kak.
Aan wor go kazh lëë xmos xaa xñabey go byak.
Lëë Jesús chuuñ kyak xñaatsaap Pedre
(Mr. 1:29‑31; Lc. 4:38‑39)
14Tsiñee lëë Jesús ptsiñ lidzy Pedre lëë xñaatsaap Pedre nix xlyañ xlyëë. 15Lëë Jesús kwseñ ña me, aan lëë xlyëë pchoo. Tsigo lëë me kuxche beeñlo me nii taw xaa.
Lëë Jesús chuuñ kyak ndaly meñ xsyaknë
(Mr. 1:32‑34; Lc. 4:40‑41)
16Tsiñee lëë lyu pkyey, lëë meñ kuni ndaly xaa nii no kyalbini mal leñ styoo lo Jesús. Aan con tublanak tiits nii kwnee Jesús lëë kchë kyalbini mal go pchoo ni lëë kchë meñ xsyaknë byak. 17Lëë Jesús beeñtsyey ngo parñee kuñ xaa cumplir tiits nii kwnee profet Isaías tsiñee chëb xaa: “Lëë xaa biy kchë xkyalkits no.”
Meñ nii kokladzy nyinal Jesús
(Lc. 9:57‑62)
18Tsiñee kon Jesús nii singootyee ndaly meñ ptyop, lëë xaa chëb lo xpëëdscuel xaa:
—Kol tsoo stublad chu nistoo.
19Aan lëë tu maestre ley big chëb lo xaa:
—Maestre, chakladzyaa sënalaa lii laañee tsityoo.
20Tsigo lëë Jesús kwëb chëb:
—Chap mëz kyoplyoo ni chap mguiñ pchoos, per lëë naa nii nakaa mguiy nii pxaal Dios ni laañee kxiladzyaa xisy wiñ chaaptyaa.
21Loxsye ngo lëë tu xpëëdscuel xaa chëb:
—Xey, blaa kajkeetsy kaazhaa pxosyaa, tsigo kyely nalaa lii laañee tsityoo.
22Lëë Jesús chëb:
—Tënal naa. Lëë meñ nii nak sinak meñ kuty jkeetsy meñ kuty.
Lëë Jesús xkwëës me
(Mr. 4:35‑41; Lc. 8:22‑25)
23Lëë Jesús kwyo barkw ksa xpëëdscuel. 24Lëë xaa si lo nis ksa xaa, tsiñee lëë tu me dox bislo xchoo aan lëë barkw byaktsë nis. Per lëë Jesús nixyesy. 25Lëë xpëëdscuel xaa beeñ kna xaa chëb:
—¡Pteelaa lëë noo, por lëë barkw nonity leñ nis!
26Tsigo lëë Jesús kwëb chëb:
—¿Penak nii xtsyeb to? ¿Penak nii kopty to Dios confians?
Aan loxsye chëb xaa singo lëë xaa kwnabey nii kwës me ni kwe tse nistoo, aan nli gaa tsesy byak. 27Kchësy xpëëdscuel xaa psee xñee:
—¿Cho nak xaa re nii axte wi me ni nistoo xsoob xtiits xaa?
Lëë Jesús xkwii kyalbini mal
(Mr. 5:1‑20; Lc. 8:26‑39)
28Tsiñee lëë Jesús ptsiñ xtañ meñ Gadara nii nche stublad chu nistoo, lëë chop xaa nii no kyalbini mal leñ styoo pchoo leñ paa aan lëë xaa big lo Jesús. Ntseeb chak xaa. Por ngo ni tu cho xtyejty nëz ko. 29Aan lëë xaa kwchuptsyë chëb xaa lo Jesús:
—Jkaaldyoo lëë noo, Jesús. Ndon noo nii Xiñ Dios nakoo. ¿Penak sëëd ksaksil lëë noo? Karty ktsiñ xtsee noo.
30Aan kex siko ncheyaw tubtsoon ngutsy. 31Lëë kyalbini mal go chëb lo Jesús:
—Deelñee kwiil lëë noo, bneetsy tiitspey syëëb noo leñ ngutsy nii nche ske.
32Lëë Jesús chëb:
—Kol sëëb.
Tsigo lëë kyalbini mal go pchoo chop leñ styoo xaa go, aan lëëw kwsëëb leñ ngutsy. Aan kchë ngutsy ko kwloo corr kukyab lo nis aan lëë ma kuty.
33Lëë xaa nii nche nap ngutsy ko kuknitiits kyedzy, aan tsiñee ptsiñ xaa, lëë xaa bitiits lo meñ xa ptsyool xaa nii no kyalbini mal leñ styoo. 34Aan lëë meñ kyedzy kwey laañee so Jesús, chëb meñ lo xaa: “Beeñ favor, bi nu.”
Pašlaik izvēlēts:
San Mateo 8: ztq
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2009, Wycliffe Bible Translators, Inc. All rights reserved.