CAWA'TA TUNITA 12
12
Abram. Cota valamu hay nagat Kanaan
1Ma-Vatɗina di tam Abram: Wulin kayni hinaŋ nagata vi sumiyaŋ ta naŋ vuɗi haya'ta, hinaŋ ziyna vi buŋ kaw, tuɗaŋ hay nagata ta nan min ɗekaŋ ka'ta. 2Nan ma muɗaŋ jafaŋ ŋolo, nan ma gi bol kaŋu, nan ma muɗaŋ seŋ tiy ŋolo. Sum segen ma fi bolda ɗawn kuɗaŋ naŋu. 3Sum sa laŋ ŋaana, nan ma gisi bolo,
Sum sa laŋ joona, nan ma beɗsi goyo.
Jaf-sumun gaa hay nagat noŋ kaf fi ŋaat ɗawn kuɗaŋ naŋu.
4Abram kaliya ki Ma-Vatɗin di talam nala, Lot kalay hiɗi namu kaw. Hay li ma Abram kal goy hay Karan, busata valam coy dok-siɗiya yam vasl. 5Abram vi cata valam Saray kuɗumu, hiɗi Lot goora vi ɓasulumna kaw, nisi yaw farayna visi kuɗsi kaf, hiɗi gorvo sa nisi gussi hay Karan kaf kaw. Nisi kaliya kay co hay nagat Kanaan, nisi coya hay nagat na'ta. 6Abram ŋuy nagata ta-ta nam co hay liyn ma yum Sikem, nam co gaa kuɗ gu-sliganna ma hay More. Hay na'ta ay ziy hay nagat kayni si sum sa Kanaaniyana. 7Ma-Vatɗina vul tuwam kir Abram, nam dumu: Nagat waŋŋi nan min vula' mi jafna vaŋu. Goy hay liy namna Abram in giwin-ma-ɗifinna tam Ma-Vatɗina ma vul tuwam kiramu. 8Goy hay liy namna pa, nam kalay hay liyn ma hiɗiyna hay gal ma kuɗuwna vi Betel, ɗawni nam in guɗukŋa valamu, Betel hay galam ma vulatina, Ay hay galam ma kuɗuwna. Nam in giwin-ma-ɗifinna mara'a tam Ma-Vatɗin lo, nam yi sem Ma-Vatɗin hay vunamu. 9Abram tuɗi vokom lo lo, nam kalay hay gal ma kayamna.
Abram kal li ziy hay Egipte
10Hay na'ta mayta ni gaa kay nagata; nala Abram kalay li ziy ɗawni hay Egipte, kay mayta ka ŋolo hay nagata. 11Hay li ma nam goboy co kulo hay Egipte, nam di tam Saray cata valam ala: Humagu, nan wi ala nak ti cata ta jifiy ŋolo. 12Hay li ma sum sa Egipten irsi wagawa, nisi ma di ɗawn ala nak ti cata vanu, nisi ɗawn ma can goyo, hinag nak iriya may. 13Nan siɗawagu, nak ma di ala nak ti ɓasunta, kay a nisi ma lan ŋaa'a kuɗag naku, a nan ma hin iri ɗawn kuɗag naku. 14hay li ma Abram co hay Egipte, sum sa Egipten ɗuw kayni na' jifiy ŋol ku'u. 15Sum sa ŋulona vi Farawn kaw irsi wa'a, nisi tiya' se' vun Farawn, nisi mara' hay ziyna vi Farawn. 16Nam li Abram ŋaa ŋolo kuɗa'a; Abram nisi vulum fok-dimina, nisi vulum luwayna, vulum kuro ma jufayna hiɗi ma boyna, sa sunda sa jufayna hiɗi sa boyna, nisi vulum lamgan lay. 17May kuɗ Saray cata vi Abram, Ma-Vatɗina hin zumalda ŋolda nig gaa'a kay mulla Farawn hiɗi ziyna valamu.
18Farawn yi Abram, nam dumu: Lawta naŋ la' tan na kayn ti law mige? Naŋ may dan ala na' ti cata vaŋuɗi kay mige? 19Naŋ dan ala na' ti ɓasuŋga, kay na'ta nan sla' ca'a naɗi su? Wulin kayn cata vaŋ zawni, vaŋga, tuɗaŋ hiɗi na'a. 20Farawn vul hagat tam sumuna valamu kay nisi ma gi ir Abram, nam hiɗi cata valamu hiɗi sle ma ir visin kaf.
Pašlaik izvēlēts:
CAWA'TA TUNITA 12: Massana
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
BIBALDA TA PELDETTA © L'Alliance Biblique du Cameroun, 2001